ساعدوني في الاختيار يا اخوان ...... من جد محتار ..

[ابو مرضي]

السلام عليكم ورحمة الله وبركاته

بعد تاجيل وتريث تمت ولله الحمد العزم على شراء سياره ولاكن الحيره جعلت
من الاختيار شي صعب با النسبه لي ارجو منكم مساعدتي بين سيارتين هما كا التالي
1 - تريل بليزر 4x4
2-هايلوكس دفرنسين
ارجو افادتي من جانبين
1-البر على الرمل في وجه العدو و الحزوم
2- الخطوط العاديه المطبات والتطمير ........
لاهنتو ا اخوكم
ابو مرضي

[راعي الهـــدد]

الأخ الغالي ابو مرضي ...

قبل مانحكم .... لي ثلاث اسئلة ....

انت بتشري جديد او مستخدم .... ؟؟؟

كم فلوسك .... ؟؟؟

وهل عندك عائلة كبيرة ... أو بدري ام مرضي الله يحفظها مابعد جت ... ؟؟؟ هههه

اتمنى تجاوب وابشر بالراي ....

محبك ابو حمد ....

[عاشق السيل]

وعليكم السلام ورحمة الله وبركاته ،،

إذا كنت تبي سيارة مريحة وفيها بعض الدلع وطلعاتك للبر قليلة جدا وهادية جدا خذ بليزر لأنه طامن جدا بس لاتنس ترى يبيله محافظة بزيادة ،،

أما إذا كنت ناوي تزره بالبر وتدخل شعبان وترقى حزوم وتقطع نفود فالهايلكس أفضل بكثييييير من البليزر وخاصة إنه رفيع ومن مميزاته إنه مايبي حرص واجد ( كد ومد ) ،،

وبالنسبة للخطوط كلها زينة بس البليزر أخف وأريح وأرسى لكن الخوف من النكبات المفاجئة ،،

والاختيار لك يالغالي وتقبل مروري وألف مبروك مقدما ...




.

[أبوهندي]

هلا اخوي انكانك تبي البر وتبي تستعمل الدبل (هايلكس)

لان دبل البليزر ماينفع ولا بريال وانا مجربة بالنفود غرزنا وعلقنا

بس فوقهن كلهن الــــبـــــــاتـــــــــرول ولا ياابوحمد امزح

[ابو مرضي]

اهلين اخوي ابو حمد وشاكر لك مرورك الطيب اما ب النسبه ل الاجوبه
راح اخذ جديد .... نظام تاجير.... مامعي غير راس اختك ام مرضي
هذي هي العائله ودعيلي ان شاء لله يرزقني الذريه الصالحه انا وخواني المسلمين
ولاهنت اخو ي مره ثانيه ......


لاهنت اخوي عاشق السيل على المرور العطر الجميل لاكن من كلامك خوفتني من البليزر....

اهلين اخوي ابو هندي على مرورك اللطيف وعلى رائيك بس لاتلخبطنا خلنا على موترين هههههه

[((( الحر)))]

مرحبا وهلا اخوي ابو مرضي

من كلامك انك بتشتري جديد 2007

الياباني وخاصة التايوتا .... لا يقارن بالامريكي وخاصة البليزر


البليزر .... جديد غالي وشلون اذا تاجير يكون اغلى .. وتطيح قيمته بالسوق الى النص بسرعه يعني بعد ماينتهي تاجيرك يصير قيمته ربع مشتراك او اقل يعني استثمار فاشل خاصة في نظام التاجير.

الهايلكس ... جديد يستاهل قيمته ويريحك سنين طويله ماتعرف دروب الورش واهلها .. وبعد ماينتهي تاجيرك وجيت تبيعها تحصل فيها خير ويمكن اكثر من الي بخاطرك. بالاضافة الى ماذكره الاخوان ...كد ومد وبتاخذك انت وعيالك ان شاء الله لو ياصلون خمسه.... وهذا من واقع تجربه.

فصل للهايلكس طربال على الحوض وتصير اوسع من اللاندكورزر........

ختاما...... ومن واقع تجربه انصحك بالهايلكس 2007 دفرنسين بنزين ...

مبروك مقدما ... والله يدلك على مافيه الخير

حفظك الله

[أ.الخزاعي]

بصراحة ماأدري ليه الناس يمدحون البليزر ياناس مايجيب قيمة ولاينفع بالبر وراخي كثير موب عالي يعني الله يعين الكارتير من الحجار والدوقي وييقولون إن زجاجه الخلفي بقيمة خيالية واستحي أقولها لأنها فوق الخيال

[رجل كريم]

اخي الكريم نظام التأجير بالنسبة للبليزر راح يطلع عليك غالي حيل ..ومع ذلك جاري عنده وحدة يمدح فيها كثير بالخطوط ولاهو راعي تطعيس بس تحتاج صيانة باستمرار وقطعها على حد علمي اغلى من الهوندا ..والسيارة عزمها قوي ومريحة .. واذا بتاخذها للبر يبغالك تغير اليايات الى مونرو وتركب كعكات عشان ترفع السيارة وغير كذا بيضعف التحكم في السيارة وبالذات في المنعطفات بسبب الارتفاع ... وذكر لي ان السيارة تستهلك بنزين بشكل كبير ..


اما الهايلكس فهي خفيفة الوزن اصلا واذا كانت دبل فانسىتغرز في البر حتى لوكنت غشيم بالطعوس, باذن الله راح تعيش معك سنين وصيانتها سهلة وتمسك سعرها عند البيع ..وقوية جدا في البر .. ومتوسطة الراحة على الاسفلت وقاسية حبتين في المطبات واستهلاكها للبنزين معقول جدا وتكفي لأربع اوخمس اشخاص .. وبالنسبة للمراتب فهي غير مريحة في السفر الطويل ..لكونها مصممة كسيارة نقل اولا ودفع رباعي ثانيا ..


لو شاورت ام العيال اكيد راح تاخذ البليزر ..


ولو شاورتني اكيد راح تاخذ الهلي ..


ولو شاورت رب العباد بصلاة الاستخارة .. راح يرزقك الافضل فهو ارحم الراحمين وادرى بمصلحة عباده ..


تقبل تحياتي ..

[باترول98]

بصراحه اخوي ابو مرضي الهايلكس الايقارن بالبليزر من ناحية الخرابات
اما من ناحية الراحة فالبليزار افضل من الهايلكس بكثير
وانا انصحك بالهايلكس

والله يطعمك من خيره ويكفيك شره مقدماً

[مرعش هدب]

مافيه مقارنة بين الهايلكس:mad: و البليزر:o
والاختيار راجع لك ...
ــــــــــــ ــــــــــــــــ ـــــــــــــــ ـــــــــــــ ــــــــــــ

((تحياتي لك))