هذا اللى حصل لي مع الشمع اللى حطيته بموتري أنصحكم نصيحه من واقع تجربه

[M o b d a]

بسم الله الرحمن الرحيم
السلام عليكم ورحمة الله وبركاته

أخواني من واقع تجربه أتحدث إليكم ..

حدث لي أن أشتريت ملمع كفررات يشتغل فيه واحد .. وهو عضو معنا بالمنتدى ..

لاكن لا أحط اللوم عليه لأني قبلت بهذه الهديه

قدر الله علي وشريت الملمع قال إسمع بعطيك شمع جربه إن أعجبك جبت لك وإن ما أعجبك الشكوى لله

قلت زين هاته ..
عطاني الشمع
جلس فتره قرابه الـشهرين عندي ..
خذيت الشمع ذاك اليوم ورحت لمحل يحطه لي على الموتر لاندكروزر 2006
المهم قالي إنت متأكد إنه يروح قلت متأكد قال أوكيه ..
خذ الشمع وبدأ يشتغل على الموتر ..
الوكاد ضبطه لي وطلع ما عندك أزين منه ..

يوم جيت أحاسب قلت كم قالي بـ 20 أو 25 ماني متأكد ..

المهم

شغلت ومشيت ..

الشمع لو تلمسه بيدك وهي معرقه راح معك هذا الكلام أول ثلاث أيام ..
جت الإجازه ..
رحت فيه حايل ..
ماشي للحين ماسك ما كان عندي نيه أشيله معطي الموتر نظره ..

وهمن رجعت الرياض ..
وطلعت للأمارات ..
ورجعت ..

الوكاد الشمع خرب يعني ما هو مثل أول ..

قلت بغسله
رحت للمغسله وغسلته بستم ..

أنا اشووف خلفية الموتر مظبوطه ..
قلت تمام طلع
قالي الهندي طلع الموتر الوكاد يوم جيت أطلعه ..
إنهبلت ..
قلت وشو هذا قال ما يطلع هذا
قلت أفا

قعدت به ..
طلع الموتر كأنك ملصق عليه ..ستكر وفكيته وبقا لزقات فيه

قلت ما هي هي ..
وأطلع الموتر وأنقز للتلميع ..

هاه يمين يسار قالي .. شف بجرب إن طلع ولا الشكوى لله ..

طيب سوا لي عينه طلع لاكنه لازم يعيد عليه كم مره قلت كم يكلفك قال 200 ريال هذا الكلام العصر يمكن 4.30
طيب متىى يخلص قال خلك موجود هنا ساعه بالكثير أوكيه

جاني قال الإخبار ما تسر يبي لي أعيد عليه أكثر من مرتين قلت لا لا لا تكفى
قال بيكلفنا واجد لو أحد غيري ما إشتغل لانه عندهم الجالون المعجون الزهري بـ 170 ريال

المهم راح عليهم جالونين
طلع حسابي أخر شيء 400 ريال ..
قلت الشكوى لله .. هذي بليه ولا مصيبه نزلت بالدنيا ..
هونتها وهانت ..

لاكن لو إني شايف هالرجال اللى معطي هالشمع وقتها يمكن يعتبر أخر يوم بحياته ..

وأجيك وأدق عليه ..
يا ولد السالفه كذا وكذا ..

قالي شكلك ملمع قطار بـ 400

قلت قابلني أوريك الفاتوره ولا تعال عند محل التلميع ..
قال طيب إسمع بعلمك طريقه قلت وشيء قالي أنا مشغول أدق عليك بعد 5 دقايق قلت حياك الله

أنتظر هالكلام على صلاة العشاء جلست لين 10 ما أحد دق
الوكاد شغلي ما خلص إلا 10

وزبدة الموضوع إن التنده للحين فيها هالشمع أبي أطلع بطريقه علموني الله لا يهينكم
جبت ماء حار صبيته ما نفع

دلوني ولقيت علبه بمحلات الزينه لونها أسود رشاش مكتوب عليه ملمع لاكنه بـ 50 ريال بس أخاف أخذه وأجدعه ما ينفع معي ..

تكفوني دلوني يا أهل الخير ..

[كاشخ 24 ساعه]

تصدق انى ما فهمت شي

اسأل سوال محدد عشان افهم

كيف اشتريته وهو هديه ؟

بعدين وشو هذا الشمع اصلا

[M o b d a]

الشمع هذا


طال عمرك مثل التغبيره

أنا شريت ملمع والشمع هديه فهمت

[M o b d a]

أبد مثل الجيب اللى بتوقيعي

يشهب لون البويه

[الدحبول]

وش هو الشمع ؟؟؟
ممكن صورة لسيارة ؟؟
هل هو التغبير ؟؟؟

[خلفهم]

ياوه

الله يكون بعونك ..

لكن يوم عاد عليه راعي التلميع راح ..

إذا كان راح ما لك إلا تلمع التنده ..

[خلفهم]

إلي ما يعرف الشمع
تجيك بعض سيارات الشباب فيها القزاز زي الثلج هو ذا لكن على البدي وإلا أنا غلطان .. ؟

[كاشخ 24 ساعه]

والله يالربع التعبث واجد في الساره ما يصلح وهذا رأيي

[خلفهم]

أخوي كاشخ 24 ساعه

الرجال يطرح المشكله يبي حل وأنت تهاوش الله يهديك

[ابوفهوود]

غسله بالديزل وانشاء الله يروح

[كاشخ 24 ساعه]

أخوي كاشخ 24 ساعه

الرجال يطرح المشكله يبي حل وأنت تهاوش الله يهديك




انا ما أهاوش............ انا اخانق بس.هههههههههههههههههههههههه


بالعكس

اللي فهمته انه توهق بهذا الشمع وما رضى يطلع وقلت رأيي للبقيه عشان ما يطيحون بنفس المشكله

[M o b d a]

إلي ما يعرف الشمع
تجيك بعض سيارات الشباب فيها القزاز زي الثلج هو ذا لكن على البدي وإلا أنا غلطان .. ؟


صحيح كلام أخوي


لاكن يا أخوان أنا خايف إني أتوهق مع الديزل ..

[مفتاح الفرج]

:( :( :(
والله ما عندي شي ..... بس والله شلت همك و حسيت بحيرتك وانا اخوك

مالك - باذن الله - الا من يسأل لك ويسعى لعونك ....

اسأل الله ان يجعل لك من همك فرج ومن ضيقك مخرج

بجرب اسأل محلات السمكرة والبوية ...يمكن !!:confused:

[VXR.2007]

ليه ماتروح ملمع الساطع للسيارت في الرياض بس الوصفه ماعارف بس معروف في الرياض ويليت يعلمونك الاعضاء
ترا عادي الديزل بس لايجي لربل القزاز وبعدها تغسله بلوكس على القلل مرتين... والله اعلم

[وسيـع البـنايد]

أخوي m o b d a ..
جـرب عليه عـطر ماتبيه أو كالونيا أصلية .. وشف وش النتيجة
سو على منطقة صغيرة كبر أصـبع .. لا تـكبرها وتكبر عليك أنصحك

[M o b d a]

والله إني أحترت يا زكرت

[سهيل 2002]

يا خوي سهلة جب قطن وحط شويت بنزين ومسحه و بإذن الله يروح :)

[بدوي جنوبي]

يا ناس مو معقول واحد يقول بنزين وواحد يقول ديزل

ترا السوق مليان ملمعات خاصه بالبوية ،،، رح ورشه تلميع والله يعينك علي 200 ريال تزيد او تنقص

المهم يضبط الجيب

بالتوفيق

[ناوي نيه]

ياخوي لاتحوس نفسك وتتعب رويحاتك ودها المحل الي لمعه لك
والتنده طبعن مب مثل سعر السياره كامله طيب انا مستغرب وشو
ذا المحل الي لمع الموتر كلها وخلى التنده وأبعد عن الملمعات الي في المحلات مثل البلش وطختها
او اشرط على البايع قله جربه لي اذا نفع شريته منك

[ابوسعد]

يا خوي سهلة جب قطن وحط شويت بنزين ومسحه و بإذن الله يروح :)



كلام سليم ... لاكن خلك سريع يعني المنطقه الي تمسحها بالبنزين اغسلها بالصابون ,,

مره لقية على سيارتي بويه بخاخ , مريت محطه وخذت بنزين بقاروره صغيره ومسحت الصبغ وغسلت المكان ,

رجع المكان مثل اول ,,

[shaheenshah]

اذا كانت التغبيره رح بالسيارة وغسلها بستم وخله يغسلها بالديزل ويبي يروح ان شاء الله

[مدور ربيع]

جرب زيت الزيتون ;)

امسح الاماكن المصابة بالشمع :D واتركه ربع ساعة

وشف لك هندي نشيط خله يفرك فيه :D

وانشألله يروح بسهولة , هالحكي عن واقع تجربة

:cool: وموفق

[محسن اليامي]

والله ماقول إلا(( أسأل الله عز وجل إنه يسهلها عليك )) والله إني حاس فيك ياخوك ولاني خبير في هالسوالف

[أعالي المزن]

يا جماعة الخير يقول المثل عندنا " عط الخباز خبزه ولو كليت نصفه "
مع احترامي لردود إخوتي في الله .
الأفضل أن يتم سؤال محلات السمكرة ، لأن أشوف الردود كثرت واحد يقول بنزين وواحد يقول ديزل وواحد يقول زيت الزيتون ، إش صاير ليكون السيارة فيها حساسية وحب شباب ، ههههه ، عاد لا حد يزعل نبقي نفرفش معاكم ، على العموم أفضل شيء تسأل محلات السمكرة يعطونك مادة تزيل هذا الشمع وإذا كان أجرة الشغل مرتفعة إشتر فقط المادة من عندهم وجمع من يعز عندك حول 10 أشخاص وخلهم يساعدونك .

[صقر الفهدة]

اللي شال لك الشمع يشيل الباقي من التندة. والله يعينك على الحساب.

[المشراق]

أخي العزيز كانت لي مشكلة تشابهها إشتريت سيارة كابرس من العيسى جديدة وبعد عدة سنوات أسودة مقدمة الكبوت والرفارف الأمامية ( يعني السيارة مرشوشة عندهم ) المهم رشيت الكبوت ب 700 ريال , ولما زاد سواد الرفارف إتفقت مع الورشة على رش الباقي ب 700 ريال ولكني ما استعجلت وكنت في الغرابي اظلل السيارة وجاني سوداني من نفس المحل وقال اصلح لك الرفارف قلت وشلون قال المعها المهم طلب 40 ريال وقلت غالى وأنا واياه 20 ريال , وجاب لماع في علبة وقطن وصاروخ فية فرشة صوف وماخلص التظليل إلا هو خالص وله سنة ماتغير يمكن تنجح معك الله يوفقك لحل يرضيك وينفعك 0

[دليل البر]

اترك جميع الكلام الذي ذكر سابقا لانة غير علمي فية شركة امريكية عريقة متخصصة بمواد التلميع اسم الشركة Meguiars يوجد عندها مذيبات الشمع وله فرع في الرياض طريق خريص بعد وكالة بيجو على اليمين

[M o b d a]

الله يكتب اللى فيه خير

وشكلي أبدخل السياره التلميع من جديد

لآني خايف من هالبنزين والديزل

[.أبوعبدالرحمن]

راجع الخاص

وانا اخوك

[z a n h o r]

يالغالي حلي ما يكلف واجد

لكن باذن الله يبي يفيدك

قد صار لي اني رشيت على موتري شمع علشان السفر

سافرت ورجعت رحت غسلت الموتر بالمغسله

وانصدمت بالشمع عيا يروح

سحبت عليه فتره وصار شكل السياره مقرف

ذاك اليوم صار لي ضرف يلزمني اسافر المهم جهزت الموتر

بنزين وزيت ومؤنة المهم حطيت عليه فيري وكثرت مع فرك

المهم بقى امسك الخط بس و تكنسلت السفره

المهم رحت المغسله علشان اغسل الموتر من الفيري

يوم غسلوا الموتر وقضوا اطلع الموتر صار يلمع يعني الشمع راح

انت سو تجربه ما تكلفك

حط فيري على التنده وهي حاره يعني ضاربتها الشمس وكثر فير وافرك

انا اتوقع هذا انسب حل وصاير معي وما يكلف كلها 10 ريال علبتين فيري اصلي

واذا جربت قلنا وش صار الله لا يهينك

[M o b d a]

بروح أجرب الفيري هالحين ..

[M o b d a]

حطيت فيري والعصر
أبغسله

واشوف وش يصير

لاكن الموتر ما هو بالشمس ما يطاوعن قلبي يوقف بالشمس حاطه بالبايكه ..

[خلفهم]

بإنتظاركـ أخوي ..

[مهب الريح]

يمكن تحط صورة لعلبة الشنع يمكن نفيدك أكثر ..
..
وبشرنا أنضبط الموتر ..

[M o b d a]

يمكن تحط صورة لعلبة الشنع يمكن نفيدك أكثر ..

..

وبشرنا أنضبط الموتر ..



هلا بك أخوي

مهب الريح ..


بالنسبه للمشمع هذا واحد يشتغل فيه يعني ما هو بالسوق يباع

هو بنفسه يضبطه له طريقه خاصه وحاطه لي بعلبه مويه إم 3 ريال

[خلفهم]

ها أخوي بشرنا وش صار على الموتر

[M o b d a]

ما غسلته للحين

لاكني زودت الفيري

وبآتسر ربك يكتب اللى فيه الخير

[خلفهم]

الله يكون بعونك

[M o b d a]

وياك يا رب ..

[z a n h o r]

عسى يارب يروح الشمع

الصدز انه قلق

واحس بشعورك لاني مريت بنفس وضعك لاني كنت توي راش وجه الموتر بويه

[طارق الحربي]

الله يعينك ويوفقك ويروح الشمع ان شاء الله ويرجع موترك جديد

ولكن قد يكون زيت الفرامل مفيدا ولكن بشرطه استخدامه بشكل سريع ووبكمية خفيفه لاني اعرف انه يفيد اذا جاء السيارة بوية من حادث او غيره


وقد يكون هذا درس لنا جميعا بعدم استخدام انواع الشمع على السيارة

[dr.mekshat]

جرب ادهنه بزيت ثم عليك بالاستشوار حق الشعر
جربه عليه حراره الاستشوار راح تفيدك
ما اضن انه اصعب من ازياق السياره
ازياق السياره يشيلونها بحراره الاستشوار
وعسى الله يوفقك ياخوي

[مستقنص]

السلام عليكم ورحمة الله وبركاته
صبحك الله بالخير

عسى الله يعينك اخوي

لو ماحصلت حل من حلول الربع الله لا يهينهم
شل التنده وخله كشف وركب شراع اذا كان لك شف بالموتر

وخله موتر بر وتطعيس واشتر لك موتر صغير للديره
ولكن اتمنى ان شااءلله انك تحصل حل
ولا تتعدى محلات السمكره بالصناعيه اكيد بيفيدونك واذا حصلت احد متزهل وبيسنع لك الموتر توكل على الله حتى ولو سعره غالي بس تشرط عليه يظبط موترك ولا تسترجع فلوسك

هذا ماحبيت افيدك يالغالي
والله يكتب لك اللي فيه الخير وعلمنا وش سويت ترا الربع ينتظرون
وعلشان تعم الفائده

اخوك
ذرى

[shaheenshah]

الله يعينك ويوفقك ويروح الشمع ان شاء الله ويرجع موترك جديد

ولكن قد يكون زيت الفرامل مفيدا ولكن بشرطه استخدامه بشكل سريع ووبكمية خفيفه لاني اعرف انه يفيد اذا جاء السيارة بوية من حادث او غيره


وقد يكون هذا درس لنا جميعا بعدم استخدام انواع الشمع على السيارة


زيت الفرامل على طول يشيل البوية ويخربها وحتى التحذير مكتوب على علبة الزيت

[.أبوعبدالرحمن]

بشر راح ولا لا

[M o b d a]

جرب ادهنه بزيت ثم عليك بالاستشوار حق الشعر
جربه عليه حراره الاستشوار راح تفيدك
ما اضن انه اصعب من ازياق السياره
ازياق السياره يشيلونها بحراره الاستشوار
وعسى الله يوفقك ياخوي


أخوي

ليت إنه مثل اللصق

حله سهل

لاكن إنه مخشن البويه ما تدري وشلون يطلع يبيله يمكن تلميع ..

[M o b d a]

السلام عليكم ورحمة الله وبركاته

صبحك الله بالخير


عسى الله يعينك اخوي


لو ماحصلت حل من حلول الربع الله لا يهينهم
شل التنده وخله كشف وركب شراع اذا كان لك شف بالموتر


وخله موتر بر وتطعيس واشتر لك موتر صغير للديره
ولكن اتمنى ان شااءلله انك تحصل حل
ولا تتعدى محلات السمكره بالصناعيه اكيد بيفيدونك واذا حصلت احد متزهل وبيسنع لك الموتر توكل على الله حتى ولو سعره غالي بس تشرط عليه يظبط موترك ولا تسترجع فلوسك


هذا ماحبيت افيدك يالغالي
والله يكتب لك اللي فيه الخير وعلمنا وش سويت ترا الربع ينتظرون
وعلشان تعم الفائده


اخوك
ذرى





الله يجعلنا وياك وأعضاء هالمنتدى من جنات النعيم ..


الله يوفقك إنت قريت وشو

الموتر جي إكس أر 2006


http://www.m5zn.com/uploads/73f1c7f14d.jpg


وش أشيل ووش أخلي ..



---------------


وبالنسبه لفكرت أخونا ..


z a n h o r


والله سويت اللى قلت لي لاكن ما فيه فايده ..


الشكوى لله ..


يعني أجرب بوليش .. ؟

[سهيل 2002]

إني لك لمن الناصحين جرب شويت بنزين وقطن ومع البنزين مفش مستحيييييييييل :d

[خلفهم]

ها بشرنا .. أخوي ..!!

[النحلة]

السلام عليكم
الله يفرج لك يالغالي
وانتبهوا يالربع من الفيري تراه خطير واقشر
شوفوا كفرات سيارات اللي يلمعون بالفيري تلقاه ممشقة ومتجرحه
واحذر اللي يتركون الفيري على الموتر مدة طويلة وتصقعه الشمس
انصحكم اذا وصلتم من السفر اغسلوا سيارتكم بسرعة لان الفيري يحرق الطبقة اللي تحمي البوية ويشيل اللمعة


والشباب الله يهديهم ويحفظهم يروحوون للبناشر يحطون تغبيره جديده توه طالعة
وعلشان تبقى التغبيرة وتلصق بالسيارة يخلطون معه فيري


ورايي يالغالي داوها بالتي كانت هي الداء
رببص سيارتك بالفيري وانتبه عن الشمس
وبشرنا بالنتيجة
والله يعطيك انشاء الله ما تمنى

[محمد البازعي]

فعلاً الشمع مايصلح يطول على الموتر


ولا اضن يحط على البدي يحط على القزاز


ودمت بود

[أبو فروة]

الله يعينك
احذرك واخوني الاعضاء من زيت الفرامل والكلونيا على البدي لانه يشيل البويه ويكسر القزاز
اقترح تجرب البنزين في منطقة صغيرة وترا ما منه خطر على البوية وقد استعملته مرات كثير لغسل القار من البدي
الله يعينك ويوفقك للحل

[الساهر2003]

السلام عليكم
صحيح وجود الفيري فتره طويله على مقدمة السيارة يضرها واي مادة تكون على مقدمة السياره تضرها والسبب ان مقدمة السيارة البدي يكون حار جدا ف اي ماده تكون على مقدمة السيارة فستتخلل بوية البدي وتبقى الى الابد لكن نصيحة لا تستخدم اي مادة طيارة مثل البنزين الديزل والكالونيا وزيت الفرامل والفكس والعطور لما تسببه بازالة اللمعه الخاصه ببوية السيارة ولا تلاحضها الا بعد فتره طويلة اذا بهتت البوية بسبب زوال اللمعة
عليك بماء وصابون حار وممكن تضع ماء حار في النافخ مبيد وتغسل السيارة وشخص اخر يفرك البدي وتضيف فيري عليه حتى يزيله بشكل جيد وكرر
والسلام

[ع.ف.الدرويش]

حياك الله اخوي.. قبل كل شيء ما أقول إلا الله يعينك لكن وأنا أخوك بصراحة أنصحك بالديزل.. أذكر أول ما إشتريت الباترول اللي معي كانت عليه رشة الوكالة وعليه غباره المهم السواق الملقوف غسل السيارة غسيل عادي وفعلاً بقت التشميعه الخفيفة فلما رحت لمغسلة فقال العامل اذا اول مرة تغسل الموتر فلازم غسيل ديزل وبعد كذا الغسيل العادي من هنا أقترح عليك تجرب الديزل لكن الله الله بالمغسلة الزينة وان كنت تبغى مغسلة شغلها نظيف عندك مغسلة المنصور بالسلي والا مغسلة الدرع بالمنار اعتقد وهي قبل مستشفى اليمامة والله يهونها..أخوك.. أبو فهد..

[ALBDRANE]

انكان عشان الغبار حط فيري وانكان عشان المنظر ما شوفه منظر
السيارة تبي من يحافظ عليها مهوب يلطخها بها الخرابيط ( شايب زعلان على ولده )
تحياتي

[aaa3]

ياشباب طيب اللصق الأبيض وضعته على كبوت السيارة فترة طويله ولما جيت أشيله يتمزق إلى قطع صغيرة وباقي على الكبوت وش أسوي عشان ينشال

[خبوبي]

رأيي يامبدع انك تبلل منشفه بالبيبسي

وتحطها على الشمع

ونشاء الله انها تزووووووووووووول

[aaa3]

ياشباب طيب اللصق الأبيض وضعته على كبوت السيارة فترة طويله ولما جيت أشيله يتمزق إلى قطع صغيرة وباقي على الكبوت وش أسوي عشان ينشال
مع العلم أني إستخدمت الديزل والمويه الحارة وما في فايده وش الدبره :confused: :confused: :confused: :confused: :confused:

[بحبكم]

جرب بخاخ عند العليان جداا ممتاز

[مُباشر]

aaa3

جرب رح لتلميع السيارات

[فهووودي 7991]

اخوي m o b d a

والله ضاق صدري على كلامك الي قلته

اول شي انحش من الغرابي من السودانية واليمنية لايلمسون البوية الى اذا كان حاجات بصيطه يعني رفرف كبوت مايضر

لاكن عندك مشكله في البدي كامل وهاذي صراحه مخاطره فيها

نصيحتي لك ودها للتلميع هم اختصاصهم في هاذي الأمور هو افضل حل

في اثنين في الرياض معروفين

زيبارت هاذا افضل تلميع بس تراه غالي بس تبي الصراحه يستاهل

والثاني الساطع في واحد في شارع الملك عبدالله في حي الملك فهد محطة احد جمب مطعم كنتاكي اكثر زباينه شريطية سيارات المصدومه والثاني في حي السليمانية في شارع العروبة

وتركك من حقين التلميع ابو 200 وغيره تراهم ماعندهم سالفه مع صطعة الشمس تشوف لمعت الملمع الصاروخ مسويلك زي شخابيط يمين يسار فوق تحت

تراني ناصحك خلك من 10 و20 زيت ديزل بنزين تراها مضره للبوية هاذي تنفع للزفلت علك حاجات لازقه في البوية من الكفر لأنك تشتغل عليها من تحت الرفرف والباب مايضر مو كل السياره

ادفع من 500 الى 1500 حقين تلميع المعروفين ابركلك من المخاطر قبل لا توصل الى رش بويه للسياره كامل

وهاذا شي راجعلك