يامن يبحثون عن كهربائي لمثبت السرعة:جئتكم من فيليب بخبر يقين. أبو الحارث

[أبو الحارث 4]

الإخوة الإعزاء في هذا المنتدى المبارك
إليكم هذه التجربة:
ذهبت صباح الخميس 10/8/1428هـ إلى مدينة الخبراء بالقصيم للكهربائي فيليب وأخيه التوأم لأنهما يجيدان تركيب مثبت السرعة على أي سيارة فذهبت بسيارتي لا ند كروزر واتفقنا على 1500ريال
والضمان ستة أشهر.
العصا عصا فيكس آر كما في الصورة الأولى وكأنه من الوكالة والحمدلله
والمكيتة للمثبت أمريكي م 96 كما في الصورة الثانية
والصورة الثالثة للواير من المثبت للبخاخات.
فبدأ العمل الساعة9.30 وانتهى 10.30 . فذهبت لبلدي أكثر من 400كيلو وعمله ممتاز. وعسى الله يتمم بخير
يسعدني مروركم والرد على استفساراتكم.
ملحوظة: آمل من أخي حين الذهاب إليهما دعوتهما للإسلام وذلك بأخذ كتيبات وأشرطة لأنهما يتقبلان
وعسى الله أن يهديهما على يديك.
وهما نصرانيان أرثوكسيان.
http://www.mekshat.com/pix/upload/images45/mk48353_img_4011.jpg


http://www.mekshat.com/pix/upload/images45/mk48353_img_4014.jpg



http://www.mekshat.com/pix/upload/images45/mk48353_img_4017.jpg

[لا تشيل هم]

ما شاء الله على المثبت الله يبارك لك فيه


لكن عندي سؤال هل المثبت يفصل مع الدعس على الفرامل .

ايضا هل ترجع السرعة الى وضعها المثبت عليه بعد زيادة السرعة من الابنص .

[القائد ثابت]

يعني المثبت مثل السيارات الفل أمه وأبوه

هل يصلح للقير العادي والتماتيك؟

تكفى رد علي بسرعة

[الاستاد]

تحية طيبة
نعم يفصل مع الفرامل انا ركبته بجيبي مع العلم انه قير عادي يثبت من سرعة اربعين وفوق لكن ما يرجعك للسرعة الاولى يمكن لان القير عادي

[ثعل البرد]

ما عليه غبار أبداً

أنا عندي موتر كراون فيكثوريا تعطل المثبت وذهبت لهذا الكهربائي (فيليب) وقام بإصلاحه وهو الآن تمام 100% وأخذ علي 200 ريال وضمان شهر والآن لي شهرين ممتاز

مع العلم أني سبق أني صلحت المثبت بورشة تليد بالرياض وأخذوا 250 وضمان شهر وتعطل بعد أسبوعين ولكن ما أستطعت أني أرجع للرياض لأني من الرس بالقصيم والظروف ما سمحت

[فزاع الصمان]

هل يصلح للجيب موديل 99gxrعادي
امل الاجابه

[مافيا الصحاري]

سلمت الأنامل
الوصف إذا حصل ورقم الورشة
لا هنت

[مافيا الصحاري]

بانتظار الرد

[الرمح الازرق]

رائع يابوالحارث ... بس ياليت أعرف هل يركب على الباثفندر والا لا ..؟؟

[ابوعزيزm]

مبروك عليك . .

الله يطعمك من خيرة ويكفيك شرة

صراحة ناوي أركب عندة لكن الله يعين . .

[ثعل البرد]

بعد إذن صاحب الموضوع أبو الحارث ...



وصف الورشة التي يعمل بها فيليب كالتالي :


تقع بين رياض الخبراء والخبراء بالقرب من السحابين ... ورشة الفايز



وهو يركب مثبتات لجميع أنواع السيارات تقريباً

وأحاول أدبر رقم جوال فيليب لأعرضه هنا في هذا الموضوع

[هاوي البر]

ملحوظة: آمل من أخي حين الذهاب إليهما دعوتهما للإسلام وذلك بأخذ كتيبات وأشرطة لأنهما يتقبلان
وعسى الله أن يهديهما على يديك.
وهما نصرانيان أرثوكسيان
نعم هذا الكلام الطيب

لي سؤال العصى حقة المثبت الي في الدركسون هل هو الي يركبها او انت الي تشتريها من الوكالة

[ثعل البرد]

يعمل فيليب في هذا المجال منذ  سنة ومعه أخوه اسمه (مون) وهذا جواله
0502134209

[rescuer]

سمعت انه يركب مكيف خلفي للجيبوب اللي تجي بدون مكيف خلفي هل هذا صحيح؟؟؟
وشكرا على المضوع الجميل

[عندك يابعدي]

ابوالحارث:شكلك اخذت بريدة مطب ما كأن فيها الغلا كله (عندك يابعدي)ابواسامة لكن شكلي ابجي للرياض ان شاء الله وانط الشفاء مطب

[مداوي]

اخوي ابو الحارث مشكور ماقصرت
لكن عندي نفس سؤال اخوي هاوي البر ، العصى حقة المثبت اللي في الدركسون هل هو الي يركبها او انت الي تشتريها من الوكالة ، وهل جميع القطع من عنده والتكلفه كلها 1500 ريال

[ثعل البرد]

يعمل فيليب في هذا المجال منذ  سنة ومعه أخوه اسمه (مون) وهذا جواله
0502134209





منذ 15 سنة

[محمد الحريقي]

هذا رقم فليب للي يبيه/ :good:0501907090:good:

[NAWAF90]

والله أنا سمعت عنه وهو فعلا ماهر بمثبت السرعة

[أبو الحارث 4]

الإخوة الكرام أسعدني مروركم، كما يسعدني الرد على استفساراتكم، وسأجعل الرد تحت النقاط الآتية:
1- وصف الورشة انقله من رد الأخ ثعل البرد في الرد 11 وصف الورشة التي يعمل بها فيليب كالتالي :
تقع بين رياض الخبراء والخبراء بالقرب من السحابين ... ورشة الفايز
وهو يركب مثبتات لجميع أنواع السيارات تقريباً.
2- رقم جواله 0501907090
3- جميع القطع من عنده والعصا ياباني أصلي إضافة لعمل يده ( يعني ادفع 1500 وما لك إلا ولد يقرأ )
4- أما عمل مكيف خلفي للجيوب فلم أسأله ولا علم لي لكن دونك رقمه فاتصل به وهو يحاول أن يتكلم اللهجة النجدية القصيمية فلن تجد عناء من مفاهمته. أخبرني أنه سيسافر بعد ستة أشهر
5- طريقة عمل المثبت كا لآتي:
* يبدأ التثبيت بعد سرعة 50
* بلمسة حانية للأسفل مع التسمية علية يبدأ عمل المثبت
* يفصل المثبت بالضغط على الفرامل ، وبضغطة حانية إليك.
* إذا أردت زيادة السرعة فاضغط إلى الأعلى مواصلاً حتى السرعة التي تريد
* وإن أردت تخفيف السرعة= = الأسفل = = = = =.
* إذا أردت الرجوع لآخر سرعة فاضغط ضغطة حانية إلى الأعلى يوصلك إليها ثم يثبت.
أرجو أن أكون قد أفدتكم
كما أذكر الإخوة أني كنت مترددا في تركيب هذا المثبت لسيارتي 2007 لا ندكروزر
لكن لما عزمت وتكلت على الله ويسرالله تركيبه تمنيت أني ركبته من أول يوم استلمت السيارة وستذكرون ما أقول لكم.
أما أنت عندك يابعدي فلم أنساك ولن أنساك ولم أجعلك مطبا تكرم ياملح القصيم وسكرهم الله لا يخلينا من ذيك البسمة أبا أسامة وأنا في انتظارك هذا الأسبوع. أبو الحارث.

[اااالرااااكد]

يركب مثبت علي الهايلوكس 2005

[ثعل البرد]

يركب مثبت علي الهايلوكس 2005



أحسن شي أنك تدق على جواله وتتفاهم معه

[مهب الريح]

جعلك تسلم على هذا الموضوع المتكامل ..
من زمان وحنا نحتري واحد يعطي معلومات
كافيه عن مثبت الفلبيني ...
..
..
لا ينسى الأخوان الذين سيذهبون إليه أن يحرصوا
على دعوة للإسلام .. والدعاء له كذلك .. وحسن التعامل معه له تأثير بالغ ..
..
..
محبكم .. مهب الريح

[مـدحـدر]

يا ملا السيل يالخبراء


ومشكور اخي الكريم

[R7AL]

مشكور.................

[أبو الحارث 4]

أشكر للجميع مرورهم كل باسمه وأنا مستعد للرد على أي استفسار:
كما أشكر تعليق الأخ مهب الريح كثر الله أمثاله لتركيزه على الدعوة والتي بها ننال الأجر من الله ويبارك الله في أعمالنا وأعمارنا وأولادنا ومالنا وأن نخرج من العهدة التي قال سبحانه:( وإذ قالت أمة منهم لم تعظون قوماً الله مهلكهم أو معذبهم عذابا شديداً قالوا معذرة إلى ربكم ولعلهم يتقون. فلما نسوا ماذكروا به أنجينا الذين ينهون عن السوء وأخنا الذين ظلموا بعذاب بئيس بما كانوا يفسقون)
ولقوله صلى الله عليه وسلم لعلي:(لأن يهدي بك الله رجلاً واحداً خير لك من حمر النعم)
فالله الله بالدعوة لا تشغلنا الدنيا والمكاشيت والسيارات عنها جعلنا الله وإياكم من الدعاة الصادقين المسددين والسلام عليكم ورحمة الله وبركاته. محبكم أبو الحارث.

[راااعي بررر]

السلام عليكم ورحمة الله
بارك الله فيك يا أبو الحارث وبارك لك في موترك
تم إرسال رقم جوال فليب وأخوه مون إلى الجوال الدعوي
حيث أن هناك إخوة قائمين على دعوة غير المسلمين إلى الإسلام
وبوجود دعاة يجيدون جميع اللغات.
أسأل الله أن يهديهما إلى الحق وجزاك الله خيراً


ملاحظة / الجوال الدعوي 0555988899
كل ما عليك كتابة إسم وجنسية وديانة ورقم جوال من تريد دعوته إلى الإسلام وإرسالة إلى الجوال الدعوي أعلاه وهم يتولون المهمة جزاهم الله خيراً.

[أبو الحارث 4]

الله يجزاك خير ويجل ذلك في ميزان حسناتك وآمل من الإخوة حفظ رقم الجوال الدعوي في جوالاتهم وإرسال أرقام هؤلاء الكفاروأسمائهم وجنسياتهم ولغاتهم وبلدانهم والدال على الخير كفاعله.

[خالد940]

الله لا يهينك العصاء الي على الدركسون من عند الفلبيني والا انت جايبها من الوكالة والله يعطيك العافية 0

[أبو الحارث 4]

الأخ خالد أشكرك على المرور والجواب قد سبق لكن ما ودي أردك فأقول كل شيء من عنده. موفق إشاءالله.

[راعي المواجيب]

ماشاء الله .. تبارك الله

مجهود أكثر من رائع

تسلم والله يعطيك العافيه

[فارس طي]

مشكور يالغالي على الشرح وماقصرت0

لاكن عندي سؤال يالغالي عندالطلعات المرتفعه مثل طلعة الغاط هل تكون السرعه على ماهي عليه

بالطلوع تزيد السرعة والعكس بالنزول تنزل 0 مثل مثبتات السرعة شدبلد السيارات 0 أم لازم

إنت تتحكم يدوي بالمثبت أوبالدعسات سواء دعس على البنزين بالطلوع أو الدعس على الفرامل

بالنزول 0أكون شاكر ومقدر إيضاحك يالحبيب0

لك تحياتي؟؟؟؟؟

[أبو الحارث 4]

أخ فارس طي حياك ربي وأسعدني مرورك واستفسارك، أما من ناحية الطلعات اليسيرة مثل الجسور وما شاكلها فإنه لا حاجة لي بدعس البنزين بل هو يثبت على سرعته وذلك من خلال سحبه هو للأبنص أما الطلعات الكبيرة كالتي ذكرت وغيرها فلم أجربه بعد.ولك مني الود

[فارس طي]

مشكور على الرد يالغالي تكفى إذا جربته لاتبخل علينا بالمعلومه 0 لك فائق إحترامي وتقديري

دمت بكل ود وعافية 0

[aljde40]

بعد اذن أخوي ( أبو الحارث 4 ) نعم يصلح لجميع السيارات , وأنا ركبته على gxr قبل أربع سنوات ولله الحمد حتى الآن ممتاز ولافيه أي مشكلة ومواصفاته زي الوكالة , فأنا أنصح الكل بتركيبه ومارايح يندمون ا ن شاء الله .

[woqaili]

جزاك الله خير

[ابومحمدالراحل]

جزاك الله خير يا ابا الحارث

[سليمان VIP]

الله يعافيك يا ابو الحارث

والي يسألون عن الطلعات الكبيرهـ او النزلات انصحهم انهم ما يستخدمون المثبت لأنه مع الوقت اتوقع يضر الموتر
اذا قربت على طلعه او نزله فك التثبيت واذا تعديتها رجع التثبيت مره اخرى

[االديحاني]

مبروك الله يعطيك خيره ويكفيك شره

[أبونورة777]

السلام عليكم ورحمة الله .. حياكم الله شباب
وبعد اذن صاحب الموضوع .. وبما اني من القصيم وأعرف فيليب وتعاملت معه وأرسلت له ناس كثير

فيسعدني أرد على كل الاستفسارات لأنه يمكن ما يرد على الاتصالات ..

بالنسبة للي يسأل انه يركب على الباثفندر .. نعم يركب وكأنه شد بلد وأرسلت له أكثر من واحد وركب لهم وشغالين زي الفل .. وما شاء الله أحسن من شغل الوكالة ..

واللي يسأل عن الهايلوكس .. طبعاً يركب .. أعرف واحد مركب لددسن حتى !!!!!

يعني : يركب لجميع السيارات العادي منها والتماتيك ..

- واللي يسألون عن القطع .. اللي يبي شغل وكالة يجيب له القطع وهو عليه الشغل ..
واللي يبي يركب له مثبت من عنده .. ولا يهم يكون زي الوكالة برضو هو يسويه لك ..

على فكرة ( وكالة الجميح طالبته بعرض مغري جداً .. ورفض ) ..

وأي استفسار حاضرين ..

[أبونورة777]

لا إله إلا أنت سبحانك اني كنت من الظالمين

[راعي المستوي]

الف الف شكر لك اخوي وللجميع
وياليت اذا احد يعرف احداثية موقع الورشة يكون افضل
و ان شاء الله عزمت اركب مثبت على باترول 2005 اتوماتيك vtc

[أبونورة777]

الموقع اخوي كالتالي :

اذا وصلت الخبراء قادم من البكيرية لا تلف لا يمين ولا يسار حتى تطلع من الخبراء باتجاه رياض الخبراء تجيك الورشة بعد الخبراء بكيلو تقريبا على اليسار وهي ترا ما هي واضحة يعني يزمك تدقق بالنظر لأن ما فيها لوحة ولا شي .. بس المارية سيارات حواليها ..

اتمنا اني افدتك .. وبالتوفيق ..

اي خدمة حاضرين

[ماطر]

اشكركم اولا

طيب والشفاء بالرياض هل يوجد كهربائي ممتاز ؟؟؟

[راعي المستوي]

السلام عليكم و رحمة الله و بركته
انا كلمت الفلبيني بخصوص الباترول 2005 اوتوماتيكي وقال انه يركب له ازرار وليس عصا مثل الوكالة والسبب انه غير متوفر وان وكيل نيسان غير متعاون ويماطل بالطلبيات...!!!
السؤال : اين اجد عصا مثبت السرعة للباترول؟...؟ الرجاء الافادة للي عنده علم
وشكرا للجميع

[الملهماوي]

السلام عليكم ورحمة الله .. حياكم الله شباب
وبعد اذن صاحب الموضوع .. وبما اني من القصيم وأعرف فيليب وتعاملت معه وأرسلت له ناس كثير

فيسعدني أرد على كل الاستفسارات لأنه يمكن ما يرد على الاتصالات ..

بالنسبة للي يسأل انه يركب على الباثفندر .. نعم يركب وكأنه شد بلد وأرسلت له أكثر من واحد وركب لهم وشغالين زي الفل .. وما شاء الله أحسن من شغل الوكالة ..

..





حبيبي ابو نوره ممكن صور للمثبت حق الباث فايندر لاخوياك

[المساهر]

الله يطعمك خيره ويكفيك شره ..

[علي الجوال]

الله يجزاك الف خير اخوي ابو الحارث

[أبونورة777]

حبيبي ابو نوره ممكن صور للمثبت حق الباث فايندر لاخوياك



هلا اخوي .. ما عليش كاني تأخرت في الرد ما شفت الرد إلا اليوم

عموماً هو نفس مثبت الوكالة بالضبط

واذا ما زلت تبي صورة أرسلها لك .. بس زي ما قلت لك اذا اختلف أي شي عن الوكالة تعال أنا أعطيك كامل فلوسك .. وفوقها بوسة على الراس ..

تحياتي ..

[alkongrs]

جزاك الله خير بس عندي سؤال
المثبت من عندوه ولا ان اجيبوه ؟؟؟؟؟؟؟؟؟

[الملهماوي]

مشكور يابونورة يالغالي جعلك تسلم والله بس ودي بحاجتين :
1/ الصورة . لأن كل المواضيع حسب بحثي اللي تتكلم عن المثبت في الباث مافيها ولا صورة
2/ كم كلفهم والقطع علي والا عليه وكم اخلي السيارة عنده لاني من اهل الرياض ومشاغلي واجد الله يكفيك مشاغل اهل الرياض المشوار
القصير ياخذ ساعة ونص بس

وتسلم انت واخوياك

[أبونورة777]

جزاك الله خير بس عندي سؤال
المثبت من عندوه ولا ان اجيبوه ؟؟؟؟؟؟؟؟؟

على كيفك اخوي .. هو يركب من عنده بس مو زي الوكالة لكن يثبت بشكل طبيعي ..

بس اذا تبي زي الوكالة .. انت جب المثبت من الوكالة وهو يركبه لك زي الوكالة بالضبط

موفق

[أبونورة777]

مشكور يابونورة يالغالي جعلك تسلم والله بس ودي بحاجتين :
1/ الصورة . لأن كل المواضيع حسب بحثي اللي تتكلم عن المثبت في الباث مافيها ولا صورة
2/ كم كلفهم والقطع علي والا عليه وكم اخلي السيارة عنده لاني من اهل الرياض ومشاغلي واجد الله يكفيك مشاغل اهل الرياض المشوار
القصير ياخذ ساعة ونص بس

وتسلم انت واخوياك


أبشر اخوي .. اجيب لك صورة ان شاء الله

والتكلفة كاملة شغل وكالة مع القطع بـ 1500 ريال ( قطعة المثبت وكالة سعرها بالوكالة ب200 ريال ) والكلام هذا قبل 6 شهور تقريباً .. لكن شغل مستحيل أحد يقول هذا مركب .. يعني بأمانة شغل كأنه شد بلد ..

اتمنى افدتكم ..

[قوقل ارث]

مبروك المثبت والله يكفيك شره

[ياسر2006]

الله يبارك فيك اخوي ودي تعطيني العنوان كامل
القصيم فيها عدة مدن اي المدن اذهب اليها
بريدي tigr-2006hotmail.com وللك جزيل الشكر

[أبونورة777]

اخوي ارجع ورا شوي تحصل الوصف .. تم اعادته هنا كم مرة ..

موفق اخوي ..

[الملهماوي]

مشكور يابو نورة على هالمعلومات

عقبال ماتعزم اخوياك شكل هذا شرطهم عشان تصور

[أبونورة777]

مشكور يابو نورة على هالمعلومات

عقبال ماتعزم اخوياك شكل هذا شرطهم عشان تصور


الله يحييك انت وياهم يالغالي .. تشرطون على كيفكم عين فراش وعين غطا ..

[أبو الحارث 4]

شكرا أخي أبا نورة، وإذنك معك ومنكم نستفيد جزاك الله خيرا.

[فارس العمور]

اخواني هل يقدر يركب مثبت للنافارا مثل الوكاله كما بالصورة طبعا هو الازرار الي بالدركسون الثلاثة

http://www.cars-club.com/up/10-1/carsclub_76126414.jpg

[أبونورة777]

اي نعم اخوي .. يركب لك أي شي زي الوكالة ..

بس عليك تجيب له القطع اذا تبي نفس اللي في الصورة ..

موفق ..

[ابو ليان 1]

مرحبا يا اخوان

انا عندي المثبت عطلان وسيارتي فورد ، من اللي يخبر لي كهربائي متخصص بالرياض .

وتحياتي للجميع

[الخادم]

جزاك الله خير يا ابا الحارث

[أبو الحارث 4]

حياك الله أخي الخادم.

[mhn-]

الكهربائي الجابري بالصناعية القديمة

[marhoon]

بالدمام أعرف محل يركب مثبت سرعه ب 990 بس العصا تركب من جهة الاشاره.

[رياض الصمان]

أخوي ابو الحارث الله يعطيك العافية على الموضوع الرائع والمفيد لجميع الأخوان



سؤال اذا تكرمت ابو الحارث هل اذا جيته يشتغل في السيارة على طول أو يبغى نسوي معه موعد سابق


أخوك / رياض الصمان

[abu_fisal55]

السلام عليكم
أنا ركبت المثبت عند فيليب من ست شهور ، لكن جلس يركب في سيارتي بدون مبالغة
من الساعة 8 الصباح الى 5 العصر :)
يعني على حسب نوع السيارة ، انا سيارتي مستوبيشي ناتيفا ، والا الأن يعمل بشكل ممتاز
ومع ذلك ما أخذ الا 1500 وكل شي عليه
حتى اني استأجرت غرفة في رياض الخبراء ذلك اليوم

انا انصح الي يروح يحجز قبل

بس تراه كهربائي من جد ، حتى اللبة الي في الطبلون حقت المثبت شغلها

انتبهو يا اخواني تشغيل المثبت في الطلعات :no2:

لأنه راح يجر على المكينة ويخربها

فيه عيب بسيط في التركيب ، وهو انك تسمع صوت تكه في الكمبيوتر اسفل قدم الراكب على اليمين
عند كل دعسة فرامل ، وسئلته قال لي لازم تسمع هالصوت لأنا حملنا كمبيوتر السيارة حمل زائد
لكنه ما يضر بالسيارة ، طبعا الصوت خفيف جدا لكن تسمعه بوضوح
لأن المثبت لازم يربط بكميوتر السيارة
واحتمال هذا العيب ما يكون في السيارات كلها والله أعلم لكن عندي موجود


ابو فيصل

[رياض الصمان]

السلام عليكم
أنا ركبت المثبت عند فيليب من ست شهور ، لكن جلس يركب في سيارتي بدون مبالغة
من الساعة 8 الصباح الى 5 العصر :)
يعني على حسب نوع السيارة ، انا سيارتي مستوبيشي ناتيفا ، والا الأن يعمل بشكل ممتاز
ومع ذلك ما أخذ الا 1500 وكل شي عليه
حتى اني استأجرت غرفة في رياض الخبراء ذلك اليوم

انا انصح الي يروح يحجز قبل

بس تراه كهربائي من جد ، حتى اللبة الي في الطبلون حقت المثبت شغلها

انتبهو يا اخواني تشغيل المثبت في الطلعات :no2:

لأنه راح يجر على المكينة ويخربها

فيه عيب بسيط في التركيب ، وهو انك تسمع صوت تكه في الكمبيوتر اسفل قدم الراكب على اليمين
عند كل دعسة فرامل ، وسئلته قال لي لازم تسمع هالصوت لأنا حملنا كمبيوتر السيارة حمل زائد
لكنه ما يضر بالسيارة ، طبعا الصوت خفيف جدا لكن تسمعه بوضوح
لأن المثبت لازم يربط بكميوتر السيارة
واحتمال هذا العيب ما يكون في السيارات كلها والله أعلم لكن عندي موجود


ابو فيصل



ابوفيصل الله يعطيك العافية ما قصرت واما بخصوص المثبت تقول لا تشغلونه بالطلعات انا معك


مره كنت جاي من القصيم للرياض وكان معي سيارة فرد وفيه مثبت سرعه شد بلد وانا مثبته على طول الخط


ويوم وصلت لطلعت الغاط تركته ما فصلته واخذا الموتر صوته يرتفع مره يبغى يعادل سرعته 140


ايش اللي حصل ياجماعة بعد ما رقيت الطلعة طقت الحرارة عندي اتش يعني بغت تنفقع المكينة


على طول وقفت على جمب وانتظرت نص ساعة وبعدها شغلت ورجع الموتر كما كان


لكن شوري للجميع بعدم تثبيت السرعة في الطلعات وخاصة القوية


لكم تحياتي أخوكم / رياض الصمان

[compaq]

ممكن احد الاخوان يعرف واحد يركب بالرياض

ومضمون

ياليت اسم الورشه والموقع

[aamd2007]

بالنسبة للي يسأل عن ورشة تركب في الرياض
المهندس فيليب اللي في القصيم لو تنسق معه يجي يركب المثبت عندك في الرياض وهذا رقم جواله 0501907090:good:

[السفير2006]

هل يصلح للجيب موديل 99gxrعادي
امل الاجابه
نعم يركب على العادي والتماتيك
إذاكان في الدرقسون إرباك السعريكون1500
واذاكان عادي يكون 1700

[compaq]

فيه احد ركبه على جيب جي اكس

[سوبر VTC]

السلام عليكم و رحمة الله و بركاته احيي اعضاء مكشات و صاحب الموضوع يعتمد تركيب المثبت على الشريط الاصفر الذي خلف الدركسون ويتكون من 6 خطوط خطين للبوري و الارباق و 4 خطوط للمثبت لزيادة و تقليل السرعه و التشغيل و الاطفاء و المميوري او الذاكره و بعض السيارات يكون
هناك خطين فهنا يجب البحث في التشليح او الوكاله عن 6 خطوط او الاستغناء عنه اذا لم يتوفر فيكون عصا المثبت خارجي عند الجلنط مثلا يثبت او يرهم او الاستغناء عن الشريط و عصا المثبت معا و يكون البديل عنهما ازرار توضع تحت الطبلون يسار الدركسون او يمينه زر لزيادة السرعة و زر
لتقليل السرعة و فاصل لتشغيل او اطفاء المثبت هذه الحلول المتوافره اذا لم يتوفر ما اسلفت سابقا كما يعتمد تركيب المثبت على امكانية تركيب و اير المثبت عند البنص او اللهاة لانه احيانا يحتاج الى ترهيم مثل الكورولا 2001 و الفرامل يؤخذ سلك من دعسة الفرامل و توصل بالمثبت بحيث اذا مسكت
فرامل يفصل المثبت و هكذا كما يؤخذ سلك من سلك القير الذي هو سلك الكيلو او الحساس و يوصل بالمثبت بحيث اذا وصل سرعه معينه اشتغل المثبت فبعض المثبتات تشتغل عتد سرعة 40 و بعضها عند سرعة 80 و لو افترضتا انك مسكت فرامل و لم يفصل المثبت فيجب عليك اطفاء المثبت عن
طريق الفاصل او العصا او اطفاء السيارة تفاديا للاخطار او الحوادث لا قدر الله اما انا فقد ركبت مثبت عند فيلب لكورولا2002 تماتيك طبعا علي الاغراض و كلهن من التشليح فاشتريت مثبت كابرس م92 او 93 او 94 ب200ريال و اشتريت الشريط الاصفر ب50ريال و اشتريت عصا المثبت ب50ريال حق فكسار او لكزس
او كامري كلهن نفس بعض و اشتغل فيلب من الساعه 10 الى الساعه 4 عصرا و اشتغل المثبت زي الفل و اخذ علي 400 ريال فقط طبعا بعد فتره جبت كامري 2001 تماتيك الاغراض علي و اخذ علي 700 ريال للاسف و بعد فتره جبت كامري 2006 و اخذ علي 750 ريال ياخوان
شغله زين بس ما عنده قناعه يعني طماع شوي عسى الله يشرح صدره هو واخوه للاسلام اللهم امين و قد انا قمت بتركيب مثبت كابرس لشيروكي 2001 بمساعدة احد زملائي في البيت و ركبت عصا المثبت فوق الجلنط يعني و انت مرتكي تثبت يعني كاشخ بي ام دبليو و ركبت لمبة مثبت 12فولت داخل
الطبلون بمكان لمبة المثبت حق الشيروكي شد البلد طبعا سلك الكيلو او الحساس اللي يروح للطبلون وصلت سلك منه الى المثبت فاشتغل المثبت تمام لكن اذا وصل سرعة 100 فاكثر يفصل المثبت لان كمبيوتر الكابرس يلخبط مع كمبيوتر الشيروكي فيفصل فالغيت السلك اللي يجي من الكيلو و حطيت
حساس اي بي اس مانع الانزلاق حق الفرامل حق جمس طبعا من التشليح و ركبته على بكرة طرمبة الماء بحيث الحساس يقرى او يستشعر الذبذبه فيرسل اشارات الى المثبت فيشتغل نفس نظام مانع الانزلاق حق الفرامل و اشتغل المثبت زي الفل يبدا من سرعة 80 الى مالا نهاية
طبعا ياخوان في الطلعات المرتفعه يجب فصل المثبت عشان ما تحتمي المكينه لانه اذا ضعف عزم المكينه و انت طالع طلوع دايس او ما مفصلت المثبت تحتمي و تنضر المكينه و ايضا القير نفس الحال
خصوصا اذا كان تماتيك فانه في الطلوع تحتمي كلتشات القير و اذا احتمت يفوت القير و اذا فوت ينعدم القير و يحتاج توضيب كامل لذا ينصح اذا كنت في رمل شديد او هيار باستخدام الدبل الثقيل تلافيا لاحتماء الكلتشات لان الدبل الخفيف في الرمل الشديد يعدم الكلتشات و بكذا يفوت و يتضرر القير و اذا كنت في طلوع فانه كلما ضعف عزم المكينه فانك ترفع رجلك عن الدعسه تدريجيا او البنص تلافيا لاحتماء المكينه و اسف على الاطاله ودمتم بخييييييير

[compaq]

مشكور اخوي على المعلومات

وماشاء الله عليك لكن هل اجد احد يركبه لي بالرياض

بدل المشوار

[بدرالبيان]

السلام عليكم
انا ركبته للجي اكس ار 2007 خليجي عند فليب من 10 شهور بصراحة روعة ممتاز بسعر 1500 والشغل 4 ساعات

واي سؤال نحن في الخدمة

[أبو الحارث 4]

السلام عليكم
انا ركبته للجي اكس ار 2007 خليجي عند فليب من 10 شهور بصراحة روعة ممتاز بسعر 1500 والشغل 4 ساعات

واي سؤال نحن في الخدمة

صدقت أخي راني وأنا كذلك له أكثر من سنة والحمدلله تمام التمام.

[مكشات وبس]

مشكور والله يعطيك خيره ويكفيك شره

[SRAAB NAJD]

مشكور يا اخوي وفيه واحد من العيال يدور على كهربائي يركب مثبت لسياراته .

[صقرالفيافي]

اسمحلي اخوي هذا الكهربائي فاشل جدا لاهو ولا اخوه الامانه امانه ممكن ناجح في بعض الاشياء البسيطه ولكن الاشياء الصعبه بدري عليه وعلى فكره ترى هو وخوه يتشابهون عشان يلخمون الناس مرررررررره يتشابهون الفرق بينهم حبة خال بأخوه بجانب العين اليمنى الاصلي مابه حبة خال انا صاري موقف معاه لن انساه ما حييت الله لا يحلله ولا يبيحه صدقوني طغى واستكبر تعامله سييئ جدا انا وديت سياره لاندكروزر 2010 عشان يركب سنتر لك بالباب اللي بجنب السواق قسم بالله انه جلس 3 ايام (تخيل اني جاي وعاني من بلد بعيد ولطعني هالمده؟؟؟؟؟ ايجار سكن وغيره وغيره) اليوم الاول يقول نسيت ان السياره عندي (يعقل هالكلام؟) اليوم الثاني يقول خلص رحت اشوف يوم جربت واكتشف اذا السياره مطفئه فهي تمام التمام واذا شغلت وسكرت الابواب مايشتغل خير شر ،،،قال اووووه نسيت اجرب !!!!! قال تعال بالليل يوم رجعت له بالليل قال انا عجزت اشوف زين تعال بكرى عشان بالنهار اشوف الاسلاك ياللعجب المشكله انه مسوي عبقري قلت تدري ماااااااااااايخالف نصبر يوم صار بكرى واروح قال خلاص بس ترى ماينفتح الا باب السواق بس قلت له يافلب ابكلم واحد بالرياض مهندس ممتاز سعودي الله يجزاه خير يبي يشرحلك الطريقه عشان يسهل عليك الشغل قال طويل العمر انا ما اكلم احد (الضاهر اني جرحته وانا ما ادري ...مثل قولة انت ماتفهم ) ياناس ابسألكم سؤال هذا كهربائي ؟ ولله لاشغل زي ...الناس ولا مواعيد زي الناس... ولا اسلوب زي الناس... وللأسف تدخل عنده سياره بالمبلغ الفلاني ولا ورقه ولا شئ يثبت انك عطيته سياره حذاري حذاري حذاري من النصاب الحرامي لاتخلونه يلعب بسياراتكم تأكدو من ناس قبلكم انه مسويلهم نفس الشغله هذا اللي يحتد عليه والله لايحيجكم على هاؤلاء الاشكال




ازيدكم من الشعر بيت يقول ترى حسابك 250 ريال بعد المرمطه وتراني معطيك نص السعر لاني ما سويت اللي تبيه (الاخ مراعيني بالسعر كسرت خاطره طال عمره)



الله يستر علينا وعليكم جرى التنويه للفائده للجميع

[هوايتي مكشات]

بارك الله فيكم ياغاااالي

[عاشق يوكن]

طيب يا اخوان وين الوصف

[alkamali]

تركيب مثبت سرعة في الكويت و تحكم دركسون لعموم سيارات تويوتا وكيا وهايونداي بقطع اصلية بدون ترهيم وبدون اي مخاطر للتواصل واتس او اتصال
0096555512123
هايلوكس 2016 فما فوق عادي واوتوماتيك
fj 2008 وفوق
كامري 2007 وفوق
كرولا 2008 وفوق
لاندكروزر 2008 وفوق عادي واوتوماتيك
برادو 2010 وفوق 4 سلندر و 6 سلندر جير عادي واوتوماتيك
رافور 2008 وفوق عادي واوتوماتيك
فورشنر 2016 وفوق عادي واوتوماتيك
اينوفا 2016 وفوق
يارس بعض الموديلات عادي واوتوماتيك
وعموم سيارات الكيا و الهايونداي