طريقة لتبريد السيارة أثناء التطعيس

[أبو ناصر]

السلام عليكم ورحمة الله وبركاته
عندي موضوع ولا أدري هل يعجبكم ولا لا
اسمع معانات كثير من الناس إذا جاء يطاعس وطول وهو يطاعس ترتفع الحرارة عليه ولقيت حل وهو :
المرواح اللي قدام الرديتر اللي هي حقت المكيف بعض السيارات تجي مروحتين مثل الجيوب وهذي المروحتين ما تشتغل إلا إذا شغلت المكيف عشان تبرد على السيارة أنا أقول ليش ما نستغلها ونستخدمها للتبريد عند التطعيس وعند الزحمة وإليكم الطريقة :
تشبك المراوح الأمامية بسلك أخر مثلا مقاس 6 ملي وما فوق عشان وما يحتمي السلك وتصير بلاوي وتمد السلك وتضعه مثلا عند الدركسون أو أي مكان قريب للسائق وتضع له مفتاح خاص إذا ارتفعت الحرارة وأنت ما شغلت المكيف في الطعوس أو وأنت واقف تشغله على طول وتبرد بإذن الله .
ملاحظة :
تأكد إنك إذا طفيت المراوح من عندك وأنت مشغل المكيف إنها ماتطفى عشان ما ترتفع عليك الحرارة يعنى رح لكهربائي فنان .
أتمنى أن يكون الموضوع مفيد وواضح للجميع وإذا كان هناك اقتراح أفضل من إقتراحي أتمنى إنكم ما تبخلون علينا فيه .

مع تحيات أخوكم أبو ناصر
سبحان الله وبحمده سبحان الله العظيم

:light: :light: :light:

[الباهي]

هلا بابو ناصر

بالعكس فكرتك طيبه ومايقولها الا صاحب خبره بالبر والتطعيس


بالنسبه لي عندي لاند كروزر وهو مروحه واحده للمكيف ولا كني
ركبت جنبها مروحه ثانيه ولها زرار عند الدركسون

لانه اذا كان الجو حار بعض الشي او انك دابر الهوا ترتفع الحراره
حتى لو اني ماشغلت المكيف وكلها كبسه زر وتشتغل المروحه
وتشوف وشلون تنزل الحراره وهذي الطريقه زينه للمكينه
لان الحراره الدائمه تؤثر على المكينه

[Bader-M]

اذكر
يوم معي الكورولا
وكنت اطاعس فيها
المهم
اني لوجيت اطاعس فيها
افصل سلك الحساس المجود عند الكوع البلف
فاتبدء تشتغل المراوح :light:
........
ولكن عندي اضافه بسيطه اذا تسمح لي
وهي
الفيوز
لازم تحط فيوز عشان تكون امن اكثر
تقبل تحياتي
........

[Y&Y_4X4]

مركب مروحة ثانية ومن ابدع ما يكون اثناء التطعيس او بزحمة البطحاء هالأيام مع المكيف الحرارة جدا طبيعية .

وانصح الجميع يركبون مروحة كهربائية اضافية والمفتاح عند السواق وشف الفرق, وانصح بعد يكون لها لمبة في الطبلون علشان ماتنساها وتروح عليك البطارية.

[ابو الريم]

اللي اعرفه ان هذه المراوح الاضافية ليست للمكيف فقط ............ يعني اذا ارتقعت درجة الحرارة عن ما هو مطلب تشتغل لتنزل الحرارة مرة اخرى ....... واذا كانت لا فانصحك انك ما تحط اي اسلاك على مروحة المكيف لان الدائرة الكهربائية راجعه للمكيف ....... يعني اذا حطيت لها كهرباء السلك اللي رايح للمكيف ينقل الكهرباء واحتمال يصير فيه خلل الكتروني ........ والله انا ماادري بس يا خوفي ...... واسلم طريقة مروحه اضافيه حط له زر جنب الدركسون وتشتغل مع تشغيل السيارة وارتاح .........


تحياتي ابو الريم ,,,,

[أبو ناصر]

السلام عليكم
تحياتي لكل الأعضاء
بالنسبة يقول أبو الريم عشان ماتصير مشاكل إنك تضع مراوح إضافية غير مشبوكة على المكيف وأنا أتفق معه ورأيه طيب .

الله يعطيكم العافية

أخوكم أبو ناصر
سبحان الله وبحمده سبحان العظيم

:good: :good: :good: :good:

[Y&Y_4X4]

الى صرت ماسك خط ماتنفعك المروحة الإضافية لأن الموتر مسرع والهواء يصدم, وفي المقابل استهلكت عمر المروحة الافتراضي, وازعاج مستمر الى صار الموتر واقف وبعدين لا تنسى فصل الشتاء ما تحتاج للمروحة الإضافية الا ما ندر.

لا بد من مفتاح يتحكم به السواق .

طبعا انا اتفق معك على انه يجب عدم التعرض لأسلاك السيارة شد بلد مهما كانت الأسباب !!!!!!!!

والسلام عليكم ,,,,,,,,,,,

[mohamad1121]

الاخ ابوناصر
مع التحيه

ذكرتم ان هناك سيارات ( جيوب يتوفر لها مروحتين ) هل هي شد بلد ام لا افدنا فانا ركبت مروحة تبريد لسياره vxr والمروحه الجديده لسيارة كرسيدا (تسمع الصوت ) وتقول ما غيرها صناعه ففي المدينه وبسرعة 40 الى 50 الله من طيبها اقول ماشاء الله واذا نزلت من السياره عند احد المحلات وانا على عجله سمعتت تغريد مرسيدس لكن مع زيادة السرعه الى 120 او 130 حرارة السياره ترتفع ،، اعرف اني طولت الموضوع.

المهم ولا عليك امر ، ماهي السيارات التي تتوفر بها مروحتين من انواع الجيوب وهل هي يابانيه ام غير ذلك وهل هي عمليه لكي الغي القديمه الاساس والترهيم واشتريها جديده ـــ اخوك محتاس ـــ والشكر لمن قام بالمساعده في موضوعي السابق وارتفاع حرارة اللاندكروزر ولكم وللاخوه ممن ساهم معي وشارك الشكر والتقدير .

ابوكاسر

[أبو ناصر]

أخوي أبو كاسر
السلام عليكم

بالنسبة للمراوح الجيب هو باترول من موديل 99 إلى أخر موديل تقريبا كلها تجي فيها مروحتين شد بلد .

نصيحة :
إذا أردت تركيب مراوح فركب مراوح يابانية أصلية عشان ماتحوسك وركب ثنين وضع لها فاصل كل مروحه لها زر عشان إذا زادت الحرارة تشغلها كلها .

أتنمى أن أكون قد أفدتك

أخوك أبو ناصر
سبحان الله وبحمده سبحان الله العظيم
:good: :good: :good:

[mohamad1121]

مشكور ابوناصر

وجزاك الله خير



ابوكاسر