تواير المقناص بالوعر (الحجره)........

[أبو جواهر]

السلام عليكم ،،،،،،،،،،،،،،

كيف حالكم يا صقاره يعلكم طيبين انشاء الله وابشركم بالموسم وصل ومابقا شي وانشاءالله اللي ناطر الصقر يصيد الصقر واللي ناطر ابرق الريش يهد وهو مستانس مع النشاما.

يا جماعه بخصوص المقناص انا اقنص بالاماكن الوعره (الحجره)وتصادفني دائما مشاكل وخاصة البنشر
ما ادري هو من التاير او من الرنق لا زم يكون ضعيف،وهالسنه ناوي اقنص الحجره بإذن الله.

تكفون يالنشاما علموني عن التاير اللي يصلح( بالحجره) وشنو نوعه وليه (شنو الميزه فيه).
اذا كان الرنق له سبب علموني شنو الرنق الزين للسياره مع العلم ان سيارتي جيب سفاري.

بعض الناس يمدحون تواير البالون بالحجره ياليت تعلموني السبب اللي يعرف السبب....؟


لكم مني كل التقدير والاحترام...........وجزاكم الله خير

[السنافــــــي]

اخذ العلم مني وان اخوك.......ولا يهينون الربع الباقين
وعلى ما قال اسال مجرب.
واحد من الربع قانص السودان وارضها كلهاحصى
وتوايره بالون وتشققت التواير.
ولاكن ركب له تواير حجري وضبط موتره
هذا اذا كانت الارض حصى......
هذا الى اعرفه...وشكرا لك
*******************
اخوك: السنافـــــي

[بن نشار]

مساك الله بالخير
ممكن توضح الحجره هل تقصد الاماكن ذات الحجر الصغير ام لا
اما بالنسبة للكفرات الجيده فهي الدنلوب

[أبو جواهر]

مرحبا يالنشاما .........

الله يعطيكم العافيه وماقصرتوا اخوي السنافي وبن نشار واقول لخوي المقصود

بالمقناص بالحجره الارض الوعره والحجريه اللي صخرها كأنه سكاكين ورضم كبار

كأنها هوادي وفيه منها صغير لاكن ممكن يبنشر بالسياره يعني وعر ورضم حاد واجسام غريبه.

اتمنى ان المعلومه وصلت واستوعبتها ......واتمنى من القراء ان لا يقصروا بالمعلومات

اللي يعرفونها.

تقبلوا احترامي وتقديري

[عزالخوي]

الاخ العزيز/ابوجواهر
بالنسبه للاطارات فهي تعتمد على توفيق الله ثم اهتمامك بالضغط الصحيح في الاطارات وكذلك على الحظ وحسن قيادتك .عندما تتكلم عن المناطق الوعرة فان اكثر البناشر تأتي من ضعف الجدارالجانبي الخارجي للاطار ولذلك فيجب ان تبحث عن اطار يكون قويا في هذة النقطه.
من تجربتي الشخصيه وجدت ان افضل الاطارات على الاطلاق هي اطارات ميكي طومبسون(Mickey Thompson) وهي الاطارات التي يستخدمها هواة تسلق المنحدرات الصخريه في العالم وهذة الهوايه لها مجلات متخصصه.هذة الاطارات لم اشاهد وكيلا لها عندنا بالسعوديه ولكنها حسب ماعرفت موجودة بالامارات ويصل سعر بعض انواعها(هي 7 انواع) الى 1200 درهم.
بالنسبه للاطارات الموجودة لدينا بالسعوديه فستختلف الاراء كل حسب تجربته وكما قلت التوفيق من الله بمنع البناشر ولكن الثابت ان اقوى الاطارات من ناحيه الجدار الجانبي الخارجي(علميا) فهو اطار يوكوهاما جيولاندر وقد جربت هذا الاطار وهو اطار ممتاز في البر عموما ولكن يعيبه انه يكون به رجه الى حوالي 1500 كم بعد تركيبه جديدا ثم مثل مانقول يسلك وكذلك صوته على الطرق الاسفلتيه مزعج بعض الشىء.تحياتي للجميع

[ابونـاصر]

الاخ ابو جواهر تبي شوري وانا اخوك عليك بالبالون يريحك ويريح سيارتك والميزه اللي فيه انه انسيابي وهذا يعطيه مرونه لتلافي صدمة الرضم .وطبعاً اي تاير مهما كانت جودته اذا تلف وانت تطرد بالحجره رايح يبنشر


وافضل تاير للحجره اللي هومضلع ودقيق اللي يطلقون عليه (الحجري) بس انه مطبه قوي على السياره

هذا حسب تجربتي

وتقبل تحياتي

[najeme]

اولا السلام عليكم ورحمه الله وبركاته وبعد:
الكفرات اللي تصلح للحجر اكيد فيه نوعين : وكلهن مجربات علي مسوؤليتي
النوع الاول : الكفر الحجري الياباني الاصلي الصب موجود عند شركه برجستون وهذا النوع للوعر الشديد الوعوره لانه سماكه اكثر
النوع الثاني كفر شبه عريض كمان عند برجستون بس انه غالي اشوي حوالي 450 ريال او ماشابه وهذا النوع صالح للوعر والرمل مجرب وفعال مركبه علي سيارتي وسلامتك : :good:

[4*4]

السلام عليكم
الاخوان ما قصرو لكن عندي لك نصيحه


انا من ضمن الناس الي يقنصون منطقه عندنا في نجد اسمها (ظهرة عليا) واهل الحوطه والحريق يعرفونها

وهي وعره لدرجة انها تدمر عليك الدفرنسات والعكوس
ومستحيل يدخلها احد ما يبنشر عليه كفر او اثنين فبعد ان انكوينا منها كم مره اكتشف واحد من الربع كفرات ممتااااااااااااااااااااااازه واحسن ما فيها رخصها
انا ما اعرف لها اسم ولكنها متوفر عند البناشر وهي الي تركب على ونيتات التحميل (دينا) وغيرها اسعارها ما بين مية ريال الى ميه وخمسين ويجي منها
1-ثمانيه غاط وانصحك بها
2-عشره غاط قويه مره لدرجة انك لو تحط فيها الهوا ظغط عشره ما اثر فيها شي
3 -ثنعشر غاط :eek: مايركبها الا واحد يبي يقنصفي المريخ لو تدوس لك لغم ما جاها شي
بعض الناس يسمونها المضلعه وبعضهم يسميها سلق :D وتصنعها كذا شركه الياباني غالي والصيني والاندنوسي هوا لرخيص

[عناز]

أبو جواهر ولا يهون الباقين ... عليك بكفرات البالون التايلنديه الصنع(سيام تاير) تصلح للطعوس والوعر وبعدين انت وحظك بعظها يسوي رجه للموتر لكن تروح بعد مده واول ماتمشي الصبح خاصه بالشتاء ياخذ له حواي 2كلم يضلع لكنه يسلك بعد ذلك...لكن ما لقيت احسن منه ... على فكره مركبه الصفري العام والى الآن ما بنشر -ماشاء الله-....جرب ترى سعره رخيّص ...........عنـــــــــــــــــاز

[أبو جواهر]

مرحبا،،،،،،

جزاك الله خير ياعناز وراح اسال عن البالون عندنا بالكويت واخذ علومه.


تقبل تحيات اخوك ابو جواهر