أبشررررركم مخي صار واحد ميغا ؟؟؟!!!!

[هاوووووي صيد]

بعد توقف لمدة خمسه وثلاثين سنه قعدت أقلب مخي ولقيت طريقه يمكن يضحك علي البعض وهي بإحساسي إنها جدآ بسيطه وأستغرب أن البعض لم يفكر فيها وهذه الفكره تساوي الآلآف(وتبونه ببلاش:d :d :d :d ؟!!!) المهم نرجد بالسالفه000بصراحه أنا راعي تغريز وموتري فيه ونش أربعه طن ونص ولا ملى عيني فقلبت المخيخ ووجدت طريقه أقوى من الونش بمئات المرات وهي كما قلت سهله جدآ وجربتها عدد من المرات وسوف أشرحها لكم بالملي بس وسعوا صدوركم شوي ترا 35سنه مو سهله 00 وهي : إن السياره تطلع نفسه بنفسه من الغراز بحيث إنك تجيب معك سبته أو واير وتربط أحد أطراف السبته في شجره أوغيرها والطرف الثاني يربط بكفر السياره وله طريقتين وهما إما عبر فتحات الجنط يعني كأنك تغول الكفروالجنط مع بعض بشرط أن يكون مجمع الربط في المنتصف وأن يكون الربط بالكفر ألي يدور وإن كان الجنط بدون فتحات تجيب السبته وتأخذ بها لفه حول الكفر وهذه الطريقه تصلح لدفرنس الأمامي والخلفي وهي خاصه إلى دار كفر وكفر ثابت يعني بإختصار عندما يدور الكفر والسبته فيه يتحرك فيسحب نفسه بنفسه هذا بالرمل أما بالطين تربطه بشيء ثابت أمامك وتجيب السبته تقريبا بالمنتصف وتفرقه جهيتين جهه تخنق الكفر اليمين والثاني اليسار مثل حرف واي ومثل (محجان النباطه:d :d )علشان لودار أحد الكفرين ثم وقف ودار الثاني طلع الموتر00 بتقولون ما نقدر نربط السبته حول الكفر والموتر غايص طبعآ والكفر يدور تدخل السبته تحت الكفر على طول وأفيدكم إن هالطريقه ماتضر الموتر بشيء إلا مع كثرة استخدام هالطريقه لعدة مرات قويه إحتمال يأثر بشكل بسيط جدآ على رمان العكس وترا هذا الكلام ماجاء ألا بعد كمحة تجارب والتجربه خير برررررررررهان وأي واحد يقرأ موضوعي الله لايهينه ينقد ررريال بالربعه وسلامتكم000

[هولوكس2005]

اخوي مافهمت ؟ مخي كيلو بايت

[خلفهم]

مخي 64 .. ما فهمت أخوي ..

[(سكود)]

ولافلم كرتون

[almobd3]

مافهمت....
.......

[SilverSniper]

هذي الطريقة تدمر العكس ماهو الرمان بس.. وتكسر تروس الفرقعة إذا كان في الموتر دفلوك.. ويزداد خطر هذي الطريقة لو كنت مغرز في طين وما تدري يمكن يكون فيه حصى يدقر للموتر ثم يدمر عليك الدنيا.. إضافة إلى انك بتقعد ضعف مدة التغريز في فك السبته... عفواً.. ما أؤيدك في هالفكرة أبد...
حصل خطأ في النظام وسيتم إيقاف التشغيل... جرب نورتون انتي فايرس يمكن يصلح معك.. :)

[عضـو قديم]

اخوي مافهمت ؟ مخي كيلو بايت



اوضح اجز انا مخي بايت

[رجل كريم]

مشكور اخوي هاوي صيد ..

الطريقة اللي ذكرتها جربتها لما سيارتي تعلقت من النص على قص .. وحقيقة جيدة بس لا جا يحرك الموتر يكون بشويش عشان مايتضرر ..

شاكر لك وتقبل تحياتي ..

[خبوبي]

مشكووووووووووووووووور

هاوووووووي صيد

وهذا ريال يالله من قدك

[عاشق سدير]

هههههههههههههههههههه
حلوه صار واحد ميقا .... بعض الشباب 164 كيلوبايت يعني؟؟؟؟؟

والطريقة ممتازة وقت الزنقه لانك بعض الاحيان تقول ما يهمني لو خرب شي لكن اطلع من التغريزه او المشكله,,,,,

الله يعطيك العافية

[بواسامه]

الحقيقه فكرة روعه
ولكن لازم معك خوي
واحد يضبط السبته على الكفر وانت تسوق
عموما شف الريال بالقرنه

[غيث الحيا]

يا أخ هاوي ليه تقلل من إمكانات مخك يا أخي مخك مهي بالميقا ولا بالقيقا ولاشك إن مثل هالإبداعات دليل على قدرات ذهنية عالية لا تقدر بقدر ولله الحمد والمنة.
ولكن هالطريقة بحاجة لتأصيل فني ميكانيكي حتى تثبت نجاحها وعدم إضرارها بالسيارة لأني أخاف مع السحب ينشب الدفرنس والعكس بالشجرة وتقعد السيارة بمكانه :)
مع الشكر لك .

[هاوووووي صيد]

مشكوووووووورين جميعآ على المرور


وياجماعه أنا أتكلم من واقع تجربه حيث أن بعضكم قال أنها تؤثر على رمان العكس وأنا أقول عكس ذلك لأنه

وقت مايدور الكفر يكون الحمل كله على تروس الدفرنس وقليل جدآ منه على رمان العكس وعلشان أوضح لكم

الصوره أكثر دائما بأي مكره الحمل يكون على ألي حامل المكره وليس على المكره نفسها00

وردآ على ألي يقول إن هالطريقه تعدم الدفرنس رح شف تروس القير مقارنه بترس البنيون وغيره00

وأنا غرزت بموترين وربطت الموتر ألي ورا بلي قدامي وكان ألي ورا طافي وربطت كل الاثنين بشجره

والموتر ألي قدام سحب ألي ورا وهذا خير برهان 00ودمتم سالــــــــــــمين00