لحقوني ياشباب

[القماري]

مطلوب مساعدتكم وخبرتك يالنشامى وإن شاء الله مثل ماتعودنا نشوف ردودكم إلي تشرح القلب.
ياشباب ياطيبين تراني متوهق بين جهازين من جارمن ، الأول GPS ثري بلس وبين الجهاز الثاني إلي هوه GPS ستريت بايلوت شاشة بدون الوان . ويش الفرق بينهم ويش هوه الأفضل بينهم مع العلم الأول سعره حاليا عند دار موجه 1250 وبدون شاحن السيارة والثاني سعره 1200 مع الشاحن.
أرجوا سرعة الرد من الجميع أحسن أني بعدين أتوهق . المشورة ياشباب ولكم جزيل الشكر

[راعي عنيزة]

اخوي تفضل :
plus 111:
http://www.darmoja.com/gar3plusbook.jpg

يخزن 500 موقع
ذاكره داخليه 1.44 ميجا
البطاريه تعمل 36 ساعه
حجم الشاشه 2.2 في 1.5

StreetPilot:
http://www.darmoja.com/garspbook.jpg

يخزن 100 موقع
لا توجد له ذاكره ولتخزين مزيد من الخرائط تشتري كروت اظنها ب 500 ريال
البطاريه تعمل 16 ساعه
حجم الشاشه 2.4 في 3.5

صحيح يوجد فرق كبير في الشاشه لكن باقي المواصفات كلها لصالح ال plus 111

وان كنت تبي شوري فبدلا من هذا وذاك خذ

GPSMAP 162
http://www.garmin.com/graphics/gpsmap162lfbig.jpg

يخزن 500 موقع
ذاكره داخليه 2.5 ميجا
حجم الشاشه 3.3 في 3.3
الشاشه زينون (مثل شاشة جوال المسكت:D) وشكله في الليل اللهم يا كافي شببببببببح ;)
يعمل على الشاحن فقط

وسعره مع الشاحن 1700 ريال


وانا سمعت ان فيه عرض على GPSMAP 176 الي يخزن 3000 موقع بس ما اعرف كم سعره
http://www.garmin.com/graphics/gpsmap176176CBig.jpg

[القماري]

سلمك ربي . أخوي راعي عنيزة ومشكور من القلب على التفصيل والمعلومات والصور إلي تهبل ،
أنا بصراحة أبحث عن الجهاز المتكامل والصغير الحجم وأعتقد مثل ماتفضلت أن الثري بلس يناسب وممتاز لأني راح أستخدمه في أكثر من سيارة . ومشكور مرة ثانية

[الشقردي]

توي قلت هذا الرجال نبي نفزع له لكن ما دريت الا واحد حبه شقردي سبقني عليك
عموما ما قصرت يا راعي عنيزة شقردي والله

لكن توي شاري واحد قبل قترة بسيطة
GPS3+

بـ 1380
ومعه
شاحن سيارة
قاعدة سيارة
سلك كمبيوتر

هالكلام على ما أذكر في رمضان
ما أدري اذا السعر تغير و لا لا

لكني ماخذة من العامة اللي في المرسلات بالرياض

[عبدالعزيز الدباسي]

عزيزي القماري

وكلام الغالي راعي عنيزة بـــ متمه لا تتعدى ثري بلس اذا كنت تحب تنقل الجهاز معك لاكثر من مكان لانه خفيف وصغير ومواصفاته ممتازه ، صار لي فتره وانا استخدمه ، لقيت انه من اسهل القارمنات استخداماً ، وبعدين لاتنس ان اخونا السمح له موضوع جداً رائع في شرح استخدام الجهاز وكل تفصيلاته ، وحاول تشتريه كامل مع جميع وصلاته ، الا اذا كنت ودك (توفر) شوي في قيمة الوصلات ترى فيه طريقة مجربة لعمل وصلة الكيبل من جهاز الكمبيوتر الى جهاز القارمن ولا تكلف شى .

[راعي عنيزة]

الشقرديان مشكوران على هذه المشاعر النبيله وانا مؤيد لكلامكم بخصوص الجارمن بلس ثري

واخوي القماري حياك يا غالي ومدام انك ما تبغاه يثبت ف البلس ثري هو خيارك الافضل ويخدمك في كل مكان وممتاز اذا سافرت لاي مكان وصرت مثلي تضيع الفندق :) فالجهاز يخدمك تمام

لكن احرص اخوي انك تطلب القاعده الي تثبت في قزاز السياره لانها عمليه وتفكها وتركبها في كل موتر مب مثل القاعده العاديه تركبها في موتر واحد وخلاص

[القماري]

مشكورين أخواني الشقردي وشقردي العزيز ومانستغني عن أفكاركم وكلامكم الطيب بس عندي سؤال للجميع و يخص ال GPS وهوه الله يصلحكم ( لماذا التركيز على أجهزة جارمن مع العلم بأن سعرها أرفع من سعر ألماجلان ؟ ومع علمي بأن أجهزة ماجلان مطابقة تقريباً لمواصفات الجارمن وسريعة في تحديد الأقمار وسهلة الإستخدام أيضاً وسعرها أنزل من الجارمن ! فما هو العيب في أجهزة ماجلان بالتحديد ؟) ودمتم سالمين

http://www.magellangps.com/images/gps315_320/gps320.jpg

[عبدالعزيز الدباسي]

اخوي القماري

خلك حليل ،،، وانظبط ،،، وفتح مخك معاي

الحين تسألنا عن نوعين من انواع القارمن وشو الزين منهن ، وبعدين تقول وراكم على ماجلان
مايصر هييك .

وبعدين خذ عندك مواصفات الماجلان اللي انت حاط صورته

يستقبل 12 ستلايت
سعة تخزين الى 500 موقع
7 ميجابايت للذاكرة
جم الشاشة 2.0 في 1.3
اما من ناحية البطارية فهي فقط 15 ساعة .

[القماري]

ماهقيت هيك ردك شقردي (لكن معليش عزيز وغالي) وطبعا خدماتكم العظيمة مو بالساهل تنسى وما ننسى الزعيم (راعي عنيزة) وكلكم راعيها ، بس بصراحة سؤالي عن السبب للتوجه للجارمن فقط (إحتكار سلعة يعني في السوق) وبغيت وأمنيتي أعرف ماهي عيوب الماجلان ليس لأني راغب في شراء الماجلان ،أنما لزيادة المعلومات حول أجهزة ال GPS عامة . (يعني ماودنا نصير تقليد وبس مثل مو حاصل مع الكابرس في البلد :D ) عموما مشكورين وخصوصا على المعلومات وبشركم شريت اليوم الجارمن 3 بلس وكلفني بدون القاعدة 1350 ريال

[عبدالعزيز الدباسي]

عزيزي القماري

تراي ما كنت اقصد شى بكلام طال عمرك ،،، لكن الحقيقة انت سألت عن نوعين من القارمن يعني ما فيه خيار ثالث وحنا عطيناك راينا بين الاثنين فقط (( عدل والا مو عدل)) بعدين رحت تسأل عن ماجلان ،،،، هنا صار مفرق طريق ...

لكن اقولك الف مبروك على القارمن الجديد والله يعطيك خيره وكيفك شره ، وتكسره بالعافية انشاء الله . ومثل ماقلتلك لا تنس شرح اخونا السمح ، تراه كافي ووافي .

وبعدين ،،، تعال هينا ،،،،

-
-
-
وينك عن برنامج ماب سورس ، اشوفك ما كملت معانا عسى المانع خير ،،،


وترى ما عندي مانع ابداً بأن تسأل و تستفسر ،، ولاتحسبني اتضايق عند كثرة الأسئلة ،،،،

بالعكس وانا اخوك كلنا في خدمة اهالي واصحاب المنتدى ،،، ولا يردك الا الكي بورد

[القماري]

الحقيقة مو غلطان من سماك شقردي ( أصل الشقردية مأخوذة منك :D ) وابشرك الماب سورس زبط وصار منيح بعد وماقصرت.
وبالنسبة للجيبي أس ، مثل ماذكرت طال عمرك بغينا زيادة معلومات عن جميع الأنواع من شان لا يصير إحتكار في السوق لنوع معين ويرفع سعرها بدل ما ينزل
حبيب وكل كلامك عسل ياشقردي :D

[راعي عنيزة]

منيح !! من شان !!
قماري يا بعدي ممكن سؤال بجيح شوي :D
وشي جنسيتك ;)
زاد انا من يوم الباترول الي يغرز بالصبخه وانا شاك في الموضوع :D

[القماري]

أفا يراعي عنيزة ، مبغيت الأ الجنسية شدعوة مولود في سويسرا يعني - وإلا شرايك أحط رقم بطاقة الأحوال من شان تتأكد يابعد حيي .
خل عنك الهرج وعطنا معلومات كان عندك عن الجيبي أس كان عندك
وتفضل هالكلمات السنعة :D

الرياض : قم في ذا ( يعني تعال هنا ) و برتقان بدل من برتقال .. و روح مع الملف الأيمن ( يعني لف يمين ) و وثمن بدل من ثم أو بالعامية وبعدين كذا أو كذا.. و زقاقة وهذي اللي بقوة مالها داعي بالمرة ..وهي اللي حازت على الترشيح الأعلى درجة في دول الخليج العربي



القصيم : عطن .. عطه أو باللغة الفصحى أعطه .. والإس اللي تجي بعد نص كلماتهم مثل .. أحبش تصير أحبتس ..ووينش عندهم .. وينتس .. وش لون أبوتس وأخوتس وعيالتس .. وهكذا وما تترقع



جده والغربية : خذ اشوي من الكلمات السودانية و اشوي من المصرية واخلطهم بخلاطة يمنية أصلية من نوع

ac delco

وضيف عليهم كلمات سعودية .. وتحصل على لهجة جداوية أو غربية .. بس تراها زينة و لذيذة .. وحصلت على 4 من 5 عند الخليجيين



الجنوب : نفس الخلاطة اليمنية ممكن تستخدمها ولكن الكلمات من عند المصنع اليمني نفسه .. وكالة وعليك الباقي



القطيف وما حولها : اشوي = تشونه .. وفشغدة يعني ضفدع .. و فلاف حبات فوم وفلافين حبة فلافل ..3 حبات ثوم و30 فلافل ... و داويش ده يعني وش ذا



الدمام و الخبر والجبيل : أخذت الحقيقة المركز الأعلى من حيث قرب لهجتها من دول الخليج حيث أنهم مفهومين أكثر من غيرهم .. ولو فيهم بعض البلاوي مثل الدماميين:) الأصليين :: المررسة بدل مدرسة ..و هاللون بدل زي كذا أو مثل كذا ويا ريال بدل يا رجال و يا معود مثل الكويتيين



الأحساء : قريبة لما قبلها ولكن درجة ميلان الشفايف أكثر و وامتداد الحروف يصل بضع سنتيمترات .. من ذا قايلك ..يعني منهو اللي قالك .. وأها عاد ..يعني يالله عاد .. واشذا ذا ..وش هو ذا ..ولكنها أخذت درجة جيدة عند الخليجيين



وهناك لهجات الحقيقة اطردوها من قاعة الإمتحانات .. مثل الخرخيريين واللي ماقدرو يلاقون مترجمين لها و لهجة المناطق الواقعة بمحاذات اليمن



الشمال .. مشكلتهم مشكلة ..لهجة شبه مفهومة ولكن الحروف ..مرة تنقال بشكل صحيح ومرة تنعدم مرة . بعض الكلمات ياكلونها أكل الرمان .. وسرعة اللسان تصل أحيانا إلى 300 ميجاهيرتز في الدقيقة ..وثبت اللي يقولونه عاد

[راعي عنيزة]

اهااااا لدام العلم كذا فثبت شرعا انك سعودي وعلى ذلك اقر واعترف :D

[عبدالعزيز الدباسي]

وانا ابصم على ذلك

والله على ما نقول شهيد

[القماري]

لكان هيك منيح :D
بس للحين ماعرفنا وش قصتكم مع الماجلان ، وش بلاه وليش الناس ماتشريه ( يعني ماهي مساوىء الماجلان ) فقط لزيادة المعلومات. ومشكورين ياسعوديين، ولاحد يزعل بعد ياعرب كلكم مشكورين