ما هو برنامجك اليومي في البر؟؟؟؟؟؟

[ابو عمر اللاحم]

اخي عضو مكشات الكريم ماهو برنامجك اليومي من صلاة الفجر حتى تضع راسك على الوسادة للنوم ليلاً.

لاتقولون ملقوف ترى يمكن نطلع بفائدة من هذا الموضوع .

مع جزيل الشكر سلفاً.

[ابو المعالي]

موضوع حلو وجميل وشيق واكيد فيه فوائد

لكن للأسف ماني راعي طلعات

ان طلعت بالسنه يوم او يومين

اقضيها بين الأكل والطبخ والضحك والسوالف مع اصدقاء الرحله

بالعربي ضحك وفرفشه وفشة خلق على ما يقولون

[أيمن]

وأنا أشهد موضوع جميل ..
وأتوقع أن لكل رحلة لها ما يناسبها من البرنامج اليومي تبعا لظروف الرحلة، فظروف رحلة الصيد بخلاف رحلة الكشتة والاستمتاع بالمناظر الطبيعية أيام الشتاء أو الربيع وهلم جرا ..
لكن لنفرض جدلا أن الرحلة هي رحلة برية فقط للتنزه والاستمتاع بالأجواء البرية، يعني ما هنالك طرق برية أو قار سيأخذ من وقتك، وليس هنالك ما يشغلك من صيد وخلافه ..
هذا مافهمته من الموضوع .. ولي رجعة..
هل توجيهي صحيح أخوي أبو عمر ..

تحيتي

[ابو عمر اللاحم]

حيا الله ابو المعالي راعي افريقيا .

احتصرت البرنامج بالحيل ومشكور على مرورك على هذه المشاركه .

تحياتي،،،

[ابو عمر اللاحم]

مشرفنا القدير والغالي ايمن :

الله يعطيك العافيه على مرورك على هذه المشاركة .. كل شئ بوقته حلو ياليت يكون التحدث عن البرنامج اليومي في الصيد .

وانا بنتظار عودتك فلا تطول .


تقبل تحياتي ،،،،:good:

[laith]

اخي العزيز " نهار ".....:heart:

كما تفضل مشرفنا "ايمن " بارك الله فيه .. كل رحله لها برنامج معين .. وان لم يكن برنامج بمعنى الكلمه نظرا لخلو هذه الطلعات من الرتابه والروتين .. ولكن النمطيه تغلب في بعض الاحيان بناءا على المكان والزمان والمده .........

بالنسبه للطلعات الشبابيه او الكشتات القصيره المحدده .. يكون الطبخ والسوالف لها حصة الاسد من الاهتمام والتفنن ..ويتخلل ذلك بعض الاستكشافات للمنطقه وغيره..

هذا مالدي باختصار والسموحه...........

[عاشق الكشتات]

السلام عليكم ورحمة الله وبركاته.

أخي نهار مشكور ++ موضوع في وقته ++

أما أنا برنامجي عادي نسبياً ومثل أي شخص ذاهب للصيد !

المهم< خذ البرنامج > <==== مهب هاجد:D

بعد صلاة الفجر :نكون تونا مصحصحين من النوم والواحد يالله يشيل عمره:o :p بعديل كل واحد يظف عفشه واذا ضفينا كل شيء ولا القهوه والقدوع جاهز واذا تقهوينا مشينا الى المحطه لشراء بعض الاغراض الناقصه (نواشف_ مويه_بارد)بيعدين نتوجه الى الشعييييب (شعيب ألحثاقي) وبعد مانوصل تكون الساعه تقريبا ً7,5 ننزل الاغراض (القز_ أم صتمه_ الفرشه_العزبه) بعدين يكون فيه ثنين يضبطون الفطور (شكشوكه_شاهي_ فول سوداني_جبن+عسل+طحينيه+قشطه) والباقي يروحون يدورون دخل في هالطلح اللي وش كبره ماشاءالله وبعد ساعه تقريباً نكون رجعنا وأفطرنا وبعد الفطور نجلس نسولف ربع الى نص ساعه بعدين نتفرق للصيد اللي ياخذ الشوزن ويروح يصيد صفاري للغداء واللي يدور دخل للغداء واذا جت الساعه واحده الظهر ولا ماشاء الله الكيسه مليانه دخل وصفاري وبعدين يجي وقت التنتييييييف(الله يعين) من واحده الى ثنتين ساعة كامله للتنتيف وبعد التنتيف وتنظيف الدخل والصفاري نبدأ بالغدا ساعة الا ربع ولا الكبسه جاهزه(ياااااااااااسلااام ماودك الى بتصوير وكل ماجعت تناظر الصوره تشبع على طول) :D وبعد الغداء وقت الشاهي والراحه الى وقت صلاة العصر وبعد الصلاه نكمل الصيد (للعشاء) الى المغرب وبعد المغرب نرجع للمكان الى نمنا فيه البارحه أذا وصلنا يجي واحد من النشاما (ويحبك لنا القهوه) وبعدين سواليف الين صلاة العشاء وبعد الصلاة نصلح العشاء وبعد العشا النوووووووووووووم. وسلامتكم

الله بس يعيد لنا ولكم أيام الصيد الحلوه:)


<===== ومعليش على الاطاله



تحيـ عاشق الكشتات ـاتي



:good:

[قناص رماح]

انا اشوف ان كل كشته له برنامج فلو كان في بداية الموسم يعني القميري توه مابعد جأ وتونا مصلين الفجر

نبي نضف فرشنا ونفطر ونتقهوى وبعد كذا على الشعيب لايفوتك ولا شجره الا ونظفته من الدخل اما اذا كان

في وقت القميري فبالنسبه لي انسى شي اسمه فطور لاني اصلي الفجر وعلى الشعيب على طول قبل لاتطلع

الشمس وانا استقبل القميري في الشعيب بكل حفاوه وترحيب بالاحظان من الفجر الى الظهر اما اذا كان هذاك ا

ليوم فيه نزل كثيرفانا استمر الى مابعد صلاة العصر وبعده اروح اتغدى مع الشباب واتقهوى ونجلس الى حزة

الغروب سوالف وسعت صدر واذا قرب وقت غروب الشمس قمنا الى اطراف الشعيب نستقبل الفروق وهي تبي

تهاجر وبعد كذا نروح للمحطه نغسل العزبه وناخذ اللي نحتاجه للعشا وبعده نروح ناخذ لنا مكان ننام فيه وبعد

صلاة العشاء نتعشى ونتقهوى وننام وسلامتكم ،،،،،،،،،،،،،،،،،،،،،:good:

[ابو عمر اللاحم]

الاخ الغالي ليث

مشكور على مرورك ، مثل ما قلت كل رحله ولها برنامج .. لاكن ما شفنا ولا واحد من هالبرامج :D

لاكن لعل لك رجعه مثل ما قال اخونا الغالي ايمن .

تقبل تحياتي وحترامي،،،

[ابو عمر اللاحم]

الاخ الغالي عاشق الكشتات

اشكرك على مرورك اخوي بس عاد ساعتين تنتيف شكلكم ماشاء الله تضفون اللي بالشعيب من الدخل

:good:

مشكور وعساكم دائما على القوه ان شاء الله

[ابو عمر اللاحم]

هلا وغلاء بقناص رماح

اجل تقول:وانا استقبل القميري في الشعيب بكل حفاوه وترحيب بالاحظان من الفجر الى الظهر:D

ما اقول: الا مشاء الله عليك وعساكم دائما على القوه .

تقبل تحياتي وتقديري،،،

[قناص رماح]

هلا اخوي نهار الله يحييك ويبقيك ويرفع من مقدارك ياخوي ، ايه استقبله من الفجر الى الظهر طير عزيز

ويستاهل ولازم نوفيه حقه من الحفاوه والترحيب وسلامتك اخوي ،،،،،،،،،،،،،،،:good:

[ابووعل]

اخوي نهار :)

موضوعك شيق جداااااااااااااااااااااااا

منيب زايد على اخواني غير حاجه بسيطه :)

طبعا الرحله لها امير صحيح والا لا<<<<<<<<<<<<<<<<<<<<< ثقيل دم اخلص بسس

يقوم الامير بتوزيع المهام على اخوياه كل يوم وهو معهم يعمل , واللي ما ينفذ واجبه باكمل وجه يعاقب بعمل

آ خر. واحد يسوي القهوه والثاني يطبخ والثالث يغسل .
8
8
8
عسكريه صارت............. المهم و بيني وبينك الرحله تزين بألأخويا الطيبين مثلك وشرواك واخواني

المتواجدين معنا في هذا الموضوع, والذربين النشامى اللي يشتغلون والرحله حلاتها بالشغل والتعب .

تحياتي لك وللاخوان

[قناص رماح]

اما انا معدين امير الكشته عن الشغل اهم شي اني املا لهم الثلاجه طيور ، غير كذا مافيه ههههههههههه:D

[عاشق الكشتات]

أخوي لا تفهم غلط !!

انا يوم قلت (من واحده الى ثنتين ساعه كامله للتنتيف):row: أقصد من واحده الظهر الى ثنتين الظهر هذا وقت التنتيف يعني ساعه.

أرجو أنك فهمت قصدي :)


وأرجو أنك ماتزعل تراك غالي ;) ;)

[ابو عمر اللاحم]

اخوي قناص رماح :

كفوا والله ويا هلا فيك . واذا كان هذا شغلك المفروض الامير يعين لك واحد يصبلك القوة موب بس يعفيك من الشغل .:good:

تقبل تحياتي ،،


اخوي ابو وعل:


حياك الله ومشكور على مرورك ومشاركتك وترا الكشته ما تحلى الا بوجود امير .

تقبل تحياتي ،،


اخوي عاشق الكشتات :

الله يزيد غلاك عند مولاك ... وفعلاً انا فهمت غلط والعتب على النظر والله يحييك مره ثانية .

تقبل تحياتي ،،

[الساطي]

حسب المزاج فانا في نزهة ولست في:o عمل

[ابوفهيدان]

الصراحة مانقوم الا متأخرين ومانرقد الا اخر الليل ذبحنا البلوت