اخوي البتار وشقران وجميع الاخوان

[راعي عنيزة]

السلام عليكم

ما تلاحظون اني اشغلتكم معي ما غير اشاروكم لكن ابشرو بسعدكم ان حطون وزير اعين كل واحد منكم على وظيفة مستشار بالمرتبه التاسعه طعش :)

ابشركم افتكيت من كسرة ايكوم 2100 قديم والحين ودي بجهاز صح من ناحية الارسال والتحمل

فهل تشورون على اخذ ايكوم 2100 جديد ولا ياسو ولا دبرونا تراي محتاس :confused:

[البتار]

الصراحة بعض الناس ما ينعطا وجه :o

المفروض يعطا العمر كله

أولا عساك ما خسرت فيه واجد

ثانياً شوري لك لا تقرب الياسو ..... صح إن الياسو قوي وشكله حليل ولكن ما راح تحصل قطع غيار له إذا خرب

أنصحك تأخذ 2100 عطي الله ولا تدور غيره ..

وبعدين ورى ما تجي للمحل علشان أحوسك زود:D

[شقران]

مساك الله بالخير ياالبتار انشاء الله انك بخير،
ياراعي عنيزة هلابك ومبروك انشا الله مقدما ، شف ياخوي ولايهون اخوي البتار ان كان مقصدك للبيت فانا افضل الياسو 2600 لمزاياه اللي ذكرتهن لك وان كان للسيارة فايكوم الفين وميه جيد لكن كلام اخوي البتار من ناحية القطع صحيح وعداه العيب بس الظاهر انك تقدر تطلب القطع اللي انت تبي عن طريق النت لاقدر الله حصل له شي .
وان كنت تقول ابي شي موجتين فماعنك وعن الفي سفن كنوود أو الثمانيه الاف وميه ياسو هذولا افضلهن في اجهزة الترددين
تحياتي/شقران

[راعي عنيزة]

البتار وشقران كفو والله بالرجال عزالله انكم ما قصرتو وكفيتو ووفيتو

وابشركم طقيت لي ايكوم 2100 جديد من محل بسعر رخيص جدا جدا جدا جدا وما اتوقع فيه محل ثاني يبيع بنفس اسعاره

هاه تبون اعلمكم باسم المحل ولا اخليه سر ;)

خلاص لا تصيحون خوذو
http://user.netomia.com/btar111/battar-2.gif

[شقران]

مبروك والله ياخلفهم ولا تقعد تنخبق فيه وتحبرش به تبي تقويه طق له امبي تحياتي واتمنى لك التوفيق;)
حلوه الواسطه تجيب بعض الزين:D موب كله والا الجهاز الثاني بيمحطك
:rolleyes:

[راعي عنيزة]

ربنا يبارك فيك ويخليك يا خلفهم ولو اني احتريتك ولا جيت او انك جيت وصار ارسالك ملحط وما يوصل ;)

وبالنسبه للجهاز شكل الي باعه علي قروشه حلال ويزكى :)
لاني اليوم ولله الحمد اراسل فيه 140 كيلو اوفرررر

على فكره سمعت ان فيه طريقه تزود قوته الى 90 واط ما ودك تعلمني شلون يا خال ;)

[شقران]

ماشاء الله عليك تمام وصلت المسافة ذي ومبروك على العموم اعتذر انشغلت بالبيت وسامحني ياخلفهم اعوضك بيوم اخر بمشيئة الرحمن :D
على قولك زينة بركم 10 دقايق ماشاالله يعني انشاء الله بيحصل لنا اي يوم ثاني ;)

ياخوي انت بادي تبي تخربه من الحين اي تعديل في مواصافات الجهاز بدون حساب قيمة الدوائر الإلكترونية ومكوناتها وانتقاء القطعه المناسبة رح يعمل وحدة من ثنتين اما أوفرلود أو شورتج ، بناء عليه رح يتأثر الجهاز ياعاجلاً ياأجلاً نصيحتي تبي تقويه توبتك الفضي او شي اصغر منه وتركبه على بطارية السياره وتسلك له زين زي الجهاز بشرط البطارية تكون 90 امبير فما فوق وبكذا انشاء الله بيغني في السيارة:D :confused:

[الصقار10]

السلام عليكم ورحمة الله وبركاته ،،،


هاه يا راعي عنيزه صادوك الرجاجيل .. و الله ان البتار ولد صادك بشوي
والله لو كل زبايني مثل كذا كان مابعت المحل .. بس ما دريت ان فيه مثلك وشرواك .. كل اللي يجوني في المحل علل .. عشان كذا قفلت المحل ...

تراي امزح ......
بس تراهم شارو عليك شورن زين .. والا الياسو 3000 ممتاز بس المشكله بقطع الغيار .


:p :D :p

[راعي عنيزة]

حبيب قلبي شقران
90 امبير :rolleyes:
بطارية الموتر اظنها 60 واخاف التسعين تصير كبيره وما تركب على سيره
وزعبلة امبي وتشبيكه في البر سالفه وانتلي ما يتحمل الا 100 واط
ما مثل تقوية الجهاز بالترهيم علمني شلون ولا كزني لمحل يحوفها ;)

بعدي الصقار
تقولي وين محلك اجي اشتري منك دين واسدد لك اقساط اول قسط حاضر والباقي يخلف الله عليك ;)
والياسو على ما افادني حبيب البي البتار انه مافيه فرق كبير بالارسال بينه وبين الايكوم بينما بسعر الياسو تشتري 3 ايكومات :eek:

[العمدة]

تراي ابجيك من الرياض وابركبه عندكم


ابتخاوى انا واياك للمحل

اجي

[شقران]

مساك الله بالخير قبل كل شي ياحلو لواني ماشفتك!:D
الحلول كثيره ياخلفهم وخل الكي اخر الأدوية امبليفاير 100 واط موجود في السوق واسأل البتار.
و البطارية بتتحمله بإذن الله اذا كانت 60 وحاول يكون تشغيله اثناء تشغيل السياره يعني في الشديد الأوي.
وبعدين الدينمو عندك يتحمل ياخي سيارتي طفسه ومركب بطاريتين على الدينمو كل وحده اربعين وبدون كتاوت ولها سنه ونص ولاقالت شي ومركب مهوب ميه واط 250 واط بالسياره ياخلفهم وزي الحلاوه وتذكر وش قلت عن مسافته بعد التعديل لان التسعين ماتفرق واجد عن الخمسين او الستين لكن 200 او 250 هنا الكلام يفرق.
وبعدين ياخلفهم لو عدلت بقوة الأوتبوت حقة الجهاز عشان يطلع تسعين اوحتى 80(مهيب مضمونه!) معناته انت حددت ان الجهاز ما تستخدم عليه امبي يعني الأمبيات ماتقبل اكثر من 50 الا الأمريكية الهوامير الهنري والتي اي سيستم تقبل 75 فقط وغير كذا يحرقها .

على العموم مصمل!!!!!!!!!!!!!!!

خذ عندك انت وغيرك لكني منيب مسؤوووووووووول!
لو احترق جهاز اي واحد يطبق هالطريقة لاتقولون ماقال!!!

1- افتح الغطا السفلي للجهاز عندك اربع مسامير
2 احضر مفك موازنه طرفه بلاستيك والطرف الثاني حديد مثل المفات الصغير للنظارات يمشي الحال.
3-احضر جهاز قياس SWER and power meter يعني جهاز قياس الواطات.
4- اشبك جهازك بالطريقة الصحيحة يعني الأريل في مدخل جهاز قياس الواط ومن جهاز القياس توصيله رايحة لجهاز الآيكوم.
شغل الأيكوم ورص الريشة وقس نسبة الأوتبوت على اللو والميد والهاي وتاكد انها 5-10-55واط
اللي فات عملية الإعداد
الآن عملية الجراحة
1- طالع الموديول اللي تسمونه أي سي الأسود المستطيل المكتوب عليه ايكوم بالانقريزي ابو اربع رجول.
2- عند اول رجل من جهة اليمين لها الآيسي على قولكم بتشوف مسمار صغير هالمسمار مكتوب عنده كتبه صغيره POWER (على فكره اسمه العلمي فاريبل للمعلومه فقط)
وهو اللي يتم فيه التحكم بطاقة الجهاز الخارجة
ارسل على اللو وبشويش حرك هالمسمار لجهة اليمين لين يعطيك قراءه على جهاز القياس 10 واط فقط لاغير لاتتعداها نصيحتي.

هالحين ارسل على الميد وشف القراء تجاوزت عشرة واط والا لا ثم جرب ارسل على الهاي رح تجد انه يصل الى 80 واط او 90 حسب اماكانيات جهازك .

طبق الغطا وراسل ياخلفهم والله يستر عليك.
على فكره فيه اربع قطع مربعة الشكل فيها فرارت اياني واياك تلمسهن ترا بتعدم الجهاز

ياشباب تقولون العمليه فيها خطورة ليش تكتب فيها اقول ان هالرجال يعز علي ولاابي ارفض له طلب لاهو ولاانتم وتامرون/شقران

[ابوخالد]

مبروك يارعي عنيزه عسى معينن على الطاعه

بستفسر عن اال نبي وشي اسعاره وانواعه وكيف تركيبه في السيارة وش يلزم غيره

[راعي عنيزة]

الله يبارك فيك :)
ولا يفتى وشقران والبتار في مكشات ;)
هم اهل الخبره ويجاوبونك :)

[شقران]

مساك الله بالخير انت والأخوان الحمد لله انك افتكيت من هالفكره وانشاء الله بالطريقه الطبيعية بيتحسن الإرسال وياخوي وش دعوه قايلينن لي انك اطخم والا تحب تغبي:p :D :p

وبعدين الا شفت الواحد يحش في نفسه فمعناه انه قطعه ياخوي بنزوجك الرابعه هاه نشوفلك من تكرنب المقاصيص:D :D :D ./ههههههههه شقران

ابوخالد مسيت بالخير الله لايهينك ارعص!
http://www.mekshat.com/vb/showthread.php?s=&threadid=1029

[الصقار10]

السلام عليكم ورحمة الله وبركاته ،،،


الاخوان شقران والبتار ولا يهونون الباقين
انا ادور على قطعة غيار مالقيتها دورتها في كل مكان و طالبين الفزعه منكم هي لجهاز :
Kenwood TM-241
رقم القطعه : MA141A
نوعها : Chip Diode
تستخدم لتوسيع التردد في بعض انواع الكنوود عشان يصير التردد :
من 136000 الى 171000 ميغاهرتز
بأنتظار ردكم بأسرع وقت :confused: :confused: :D

[شقران]

حياك الله ياخوي وانشاء الله الحلول موجوده
تقدر تركب قطعه بديله اذا ماحصلت الديود تشيب اللي ذكرت رقمها وتفي بالغرض انشاء الله وللبحث عنها في الرياض دور في سوق قطع غيارالإلكترونيات بجوار حراج الزل اللي عند الأماره/او حاول في المهندسون العرب اللي في السليمانيه عند المطعم الهندي/او عند مجداف

معليش بتتعب شوي لكن سجل عندك رقم القطعه: 1n914 ركبها في D209 أو القطعه:1n4148 او القطعه اللي ذكرتها أو اي ديود سطحي مشابه لها سيعمل بشكل جيد انشاء الله كما هو موضح لك في الصوره وارجو انك تطبع الصوره وتاخذها معك للمحلات الله يعينك على رحلة البحث هنا في الرياض عاد اذا ماحصلتها في الرياض تقدر توصي عليها من الإمارات عند القطان للإلكترونيات يبيع قطع غيار او محلات الفا في قطر او الله يعينك ادخل هالموقع واستفسر منهم www.rfparts.com

والحل الأخير انك تدور في في جهاز شبيه معطوب او في 261 بشرط تكون القطعه فيه تحياتي لك مع حزني ان القطعه ماتكون عندي والا والله ماتغلى عليك.

http://user.netomia.com/shagran/tm241a_control2.jpg

[البتار]

والله شبح يا شقران الله يكثر من أمثالك ... يا استاذنا الغالي

[الصقار10]

السلام عليكم ورحمة الله وبركاته ،،،،



اشكرا جدا على الفزعه وتزويدي بأرقام القطع المقابله للقطعه المطلوبه ، وحتى لو ماهي عندك كنك معطينيها . :D :D :D

بس انا دورت في المحلات اللي تقول ولا هي موجوده عندهم على الرقم الاساسي لاكن ما دورت بالمقابلات حقات القطعه ، بس ابدور و مشكور على الفزعه . وعزله ما خاب ظني في اعضاء هالمنتدى و الشاعر يقول :

جال(ن) إلى عنزت عليه يعزك ***** جال(ن) إلى عنزت عليه هيام

وانا اشهد ان اعضاء هالمنتدى انهم يعزونك انشاء الله ولا يخذلون ربعهم . :D :D :D

[شقران]

السلام عليكم ورحمة الله

اخوي الصقار تمنياتي لك بالتوفيق.....:)

اخوي البتار....العين ماتعلى على الحاجب.;)

[hamd.shakr]

السلام عليكم ورحمة الله وبركاته: ما شاء الله شقران والبتار جمييع وش هالصدفه الزينه. على كل حال حياكم الله وبياكم , كيف حالك اخي شقران والله اني مشتاق لشوفتك , وكيف حالك يالبتار ابو عبدالله , منورين.وحيا الله الموجودين الان. تحياتي لكم جميعا.

[hamd.shakr]

اخى الكريم شقران انا شفت باحد الردود مكتوب ابو سليمان وانا خبري ان اسم الولد سلطان .يمكن اني غلطان.

[المنطلدز]

اخوي حمد الموضوع من عام 2002 هههههههههههههههههههه

[ليث السراحين]

ههههههههههههههه

[hamd.shakr]

عفوا ا يها الاخوه المنطلدز وليث السراحين من احترامي للاخوين شقران والبتار ما رفعت راسي والتفت يمين حتى اتاكد من الناريخ اعتدر مرة اخرى . دمتم بخير.

[ليث السراحين]

لا تعتذر وانا اخوك وسعت صدورنا الله يوسع صدك ..وما نقدنا عليك

[hamd.shakr]

مشكور يا ليث السراحين على ها الاريحيه . شكرا لك,