ذبحني الباجيرو بصرفه للبنازين

[ملك البلوت]

السلام عليكم ورحمة الله وبركاته

كيف حالكم اخواني عساكم بخير

انا عندي باجيرو 2002شاريه قبل شهر والصراحه ماكنت متوقع انه يصرف بانزين بالشكل ذا يعني ذبحني هلكني بالبنزين ولا ادري وش سالفته مع العلم اني اعبيه بانزين اخضر ولا ادري وش علته اذا اي واحد عنده خلفيه عن الصرفيه فلا يبخل علي باي معلومه ولو وجهة نظرر

ولكم مني ارق واعذب تحيه
والسلام عليكم ورحمة الله وبركاته

[الرسن]

نصيحتي لك انك تسوي للمكينة تصفية وراح تنتهي المشكلة وذا الكلام عن تجربة بس مش في الباجيرو ومعالسلامة

[المميـز]

وشلون لاحظت الصرفيه ؟؟

مع خط والا ديره ؟؟

وكم يمشيك خط وكم يمشيك ديره ؟؟

[رقبة حاشي]

اتوقع كلام غير دقيق
كم يمشيك خط ؟؟؟ وكم يمشيك بالديره ؟

[ملك البلوت]

مشكورين على ردودكم اما من ناحيت الصرفيه يعني لو اجيب لي خباز لاحظ الصرفيه يعني شي مو معقول اما الخط اذا كان ممشاي ثابت على 120 يعني 300 كيلو الى 350 كيلو يعني انا من الرس اطلع لبريده باكثر من ربع التانكي اوصل بريده مولعه لمبة البنزين يعني اكيد فيه عله او مشكله قلت يمكن من البواجي قالوا لي البواجي زينه قلت فلتر الهواء شريت له واحد جديد الحين قالوا لي تنظيف بخاخات وانا والله محتار
ولكم مني جزيل الشكر

[azd]

السلام عليكم
انا مجرب الباجيرومن زمان كان عندى موديل 1998ثم شريت موديل 2001ثم 2004مكينه 3500الباجيرو اوفر سياره جيب يابانى من تجربه قديمه بلسفر مع جيبات نيسان وتويوتا لكن الجيب فيه عله والله يعينك



مشكورين على ردودكم اما من ناحيت الصرفيه يعني لو اجيب لي خباز لاحظ الصرفيه يعني شي مو معقول اما الخط اذا كان ممشاي ثابت على 120 يعني 300 كيلو الى 350 كيلو يعني انا من الرس اطلع لبريده باكثر من ربع التانكي اوصل بريده مولعه لمبة البنزين يعني اكيد فيه عله او مشكله قلت يمكن من البواجي قالوا لي البواجي زينه قلت فلتر الهواء شريت له واحد جديد الحين قالوا لي تنظيف بخاخات وانا والله محتار
ولكم مني جزيل الشكر

[.أبوعبدالرحمن]

شيك وانا اخوك على البواجي واسلاكها والصفاية


ايضا ارجع الى استخدام البنزين 95 لانه قد يكون 91 غير مناسب لسيارتك


فلذلك يكون يشرب بنزين

والله يعينك

[شمســـان]

عندك مشكلة يالغالي
الباجيرو اقل صرف من التويوتا والنيسان وعموما راجع وكالته

[ذئب اليل]

أخوي هذي المشكلة ممكن تكون من البخاخات أو وزنيت الديلكو والله اعلم على كل حال إنشالله تكون المشكلة بصيطة

[ابو فهد 2007]

السلام عليكم ورحمة الله وبركاته


والله غريبة ياخوي

أتوقع أن موترك به مشكلة

أن عندي باجيرو موديل 99 مكينته 3000 بخاخ
وصرفيته للبنزين ممتازة و لله الحمد تقول أربعة سلندر .

اكشف على موترك عند أكثر من مهندس والله يعينك .

[رقبة حاشي]

يااخوي انا امشي فيه من الرياض واعبيه فل الى الرس وباقي في التانكي تحت النص بقليل يعني يبقى فيه اكثر من الثلث وقريب من النص\... علما اني امشي 130 الى 140 والمكيف شغال !!!!!!!!!!
الخلاصه موترك فيه عله...
للمعلوميه سيارتي 2003

[ابوالوليد2003]

عندي باجيرو 99بابين يشرب بنزين شرب استعملته سنة ثم بعته ................

[أبو قسورة]

اخي الغالي (( ملك البلوت ))
وعليكم السلام عليكم ورحمة الله وبركاته .. وحياك الله :
فهمت من كلامك انك تعبي بنزين (91) أخضر ..
أنا عندي جيب باجيرو مكتوب في كتلوج الشركة نوع البنزين (95) أحمر لجميع أنوع جيوب الباجيرو وعلى باب التانكي من الداخل فيه استكر أحمر مكتوب عليه (95) ..
وقد وجدت مرة عند صديق ورقة موجود بها جميع أنواع السيارات اللي بالمملكة ونوع البنزين فوجدت كذلك أن الباجيرو بجميع أنواعه وموديلاته نوع البنزين (95) يعني أحمر .. أعتقد أن هذا له دخل في صرفية البنزين ..
مع العلم إني أعبي لسيارتي بنزين أحمر والحمد لله رب العالمين الصرفية زينه في السفر وداخل المدينة وهو أفضل بكثير من الجيوب الأخرى لأنه كان عندي جيب ربع ومن ثم في أكس آر والصرفية بصراحة كانت مسببه لي مشكلة .
اسأل الله عز وجل إن يعينك على حل المشلكة ولا يحوجك إلا لوجهه الكريم .
ولك مني فائق التحية والتقدير ،، وكل عام وجميع المسلمين بخير .

[رجل كريم]

وعليكم السلام ورحمة الله وبركاته:


طبعا الصرفية اللي تقول عليها غير طبيعية بالمرة .. وخاصة في جيب عرف عنه بأنه اقل الجيوب استهلاكا للوقود ..

هناك خلل ما .. وقبل كل شيء تأكد من عوامة البنزين لانها قد لاتعطي القراءة الصحيحة .. وياليت تعطينا حجم المحرك وكما كيلو قطع ؟ وهل سويت اي صيانة له ام لا .. وايش اللي غيرته بالضبط في السيارة ..
ولكل حادث حديث ..

تحياتي ..

[رقبة حاشي]

وهذه هديه موقع رابطة عشاق الميتشوبيشي ..





URL:
http://www.assayyarat.com/forums/showthread.php?t=109490&page=19&highlight=PAJER O

[رجل كريم]

مشكله قلت يمكن من البواجي قالوا لي البواجي زينه قلت فلتر الهواء شريت له واحد جديد الحين قالوا لي تنظيف بخاخات وانا والله محتار




اشتر البواجي الاصلية وتجي ثلاث رؤوس لكل بوجي بـ 150 ريال تقريبا لست حبات من الوكالة .. واشتر من الوكالة منظف بخاخ عدد 3 علب صناعة ميتسوبيشي تعبي التانكي وتصبها معاه .. ولا تحاول ابد انك تقرب انفك من العلبة وهي مفتوحة وحتى وهي فاضية لانها ممكن تسبب لك اغماءة سريعة والم شديد في الرأس يدخل المستشفى لا قدر الله .. المادة هذي قوية جدا بحيث انك تعتقد انها غاز كيماوي .. العلبة الواحدة بـ 22 ريال تقريبا .. واذا كان فعلا من البخاخ راح ينظف ولا تخلي احد يتعبث لك فيه ابد ..

تحياتي ..

قد يتأخر ردي لدواعي السفر .. في أمان الله

[ملك البلوت]

الله يجزاكم خير على تفاعلكم معي والصراحه مدري وش اسوي بدونكم

اخوي داكار انا شاري البواجي من الوكاله ب70 ريال والمنظف ان شاء الله بشتريه وابغير البنزين وان شاء الله اشوف هل الصرفيه تتغير والى لا

ولكم مني جزيل الشكر والتقدير
والسلام عليكم ورحمة الله وبركاته

[جيب متشوبيشي]

سلام عليكم اخوي مللك البلوت اعندي باجيرو 2005 ماكينه 3800 صاره له معي سنتين ماشاءالله اعبيه بنزين اخضر من يوم نزل الأخضر ب35 ريال يمشيني 510 كيلو ولافيه مشاكل مع الأخضر ابد ماشاء الله زي الحصان معا العلم اني اكبر مكينه منك واقوى المشكله عندك انت مو في الجيب المتشوبيشي اقل جيب صرفيه من غيره دور على اكثر من فرع لين تلقى الحل انشاءالله والله يوفقك وانا خوك .

[رجل كريم]

اخوي داكار انا شاري البواجي من الوكاله ب70 ريال والمنظف ان شاء الله بشتريه وابغير البنزين وان شاء الله اشوف هل الصرفيه تتغير والى لا





البواجي اللي شريتها العادية .. سبق وانهم اعطونياها ورجعتها لهم واخذت ابو ثلاث رؤوس ..وياريت ترجع للوكالة وتطلبها ..

تحياتي ..

[جبلاوي]

اخي الغالي (( ملك البلوت ))
وعليكم السلام عليكم ورحمة الله وبركاته .. وحياك الله :
فهمت من كلامك انك تعبي بنزين (91) أخضر ..
أنا عندي جيب باجيرو مكتوب في كتلوج الشركة نوع البنزين (95) أحمر لجميع أنوع جيوب الباجيرو وعلى باب التانكي من الداخل فيه استكر أحمر مكتوب عليه (95) ..
وقد وجدت مرة عند صديق ورقة موجود بها جميع أنواع السيارات اللي بالمملكة ونوع البنزين فوجدت كذلك أن الباجيرو بجميع أنواعه وموديلاته نوع البنزين (95) يعني أحمر .. أعتقد أن هذا له دخل في صرفية البنزين ..
مع العلم إني أعبي لسيارتي بنزين أحمر والحمد لله رب العالمين الصرفية زينه في السفر وداخل المدينة وهو أفضل بكثير من الجيوب الأخرى لأنه كان عندي جيب ربع ومن ثم في أكس آر والصرفية بصراحة كانت مسببه لي مشكلة .
اسأل الله عز وجل إن يعينك على حل المشلكة ولا يحوجك إلا لوجهه الكريم .
ولك مني فائق التحية والتقدير ،، وكل عام وجميع المسلمين بخير .

الرجاء التأكد من معلومات نوع البنزين لأن موقع ارامكو يقول غير كذا
ولك هذا الرابط

http://www.9195.info/9195/9195/contentArabicAction.do?name=MITSUBISHI_ARABIC

[جبلاوي]

لا تضيع اي ريال في تصليح السيارة وشراء القطع الا لشخص لديه كمبيوتر خاص بالمتسوبيشي فقط ويكون له دراية كاملة بالسيارة كأن يكون اشتغل فترة طويلة في شركة ميتسوبيشي وفهمه انك ما تبغى تشتري اي قطعة للسيارة ابدا وانه اذا ما صلحت السيارة ما ياخذ ولا ريال.
بعد هذه الشروط راح يغلي عليك السعر لكن مو مشكلة اذا كان بيصلحها او ما ياخذ اي ريال.

او وديها الشركة وفهمهم المشكلة وقوللهم انهم ما يغيروا اي شي فقط يصلحوا الخراب.

لان لي تجربة سابقة مع جيب باترول كان عزمه ضعيف جدا وكل مره اغير قطعة مره بواجي ومره اسلاك ومره غطاء ديلكو ومرة شاكوش ومره صفاية وخذ من هذا الكلام. الى ان نصحني صاحب ورشة اني اروح لمركز في جده لديهم كمبيوتر نيسان والحمد لله حط يده على المشكلة بدون خسارة اي قطعة.

[ملك البلوت]

مشكورين على تفاعلكم معي والصراحه رحت للوكاله ونزلت الموتر عندهم وغيرة بواجي ثلاث روس مثل ماقال اخوي دكار وحطيت منظف بخاخات وغيرت اسلاك البواجي وحجات ثانيه مدري وش اسمها بس الصراحه ارتاح جيب الثوب من الجيب والله كنت قبل يدي بس بالبوك والحين الحمد لله بعد مشوار اخذته من الرس لحائل رايح جاي والمكيف شغال ولا وقفت ولا محل وممشاي 140 -160 الحمد لله رحت واول ماوقفت عند اول اشاره تو لمبة البانزين ولعت يعني الصراحه ماقصر والله يجزاكم خير وكثر الله من امثالكم ولكم مني ارق واعذب تحيه
اخوكم
ملك البلوت