أهل الربع النيسان 2007

[hhhh2]

السلام عليكم .....
يا الربع استفسار لمن لديه خلفيه يفيدني معي ربع نيسان 2007 سلق لكن فيه مشكله وهي المراتب الخلفيه بطول عكس الموديلات السابقه (بالعرض) لكن هل فيه حل أو فيه احد حول يرهم او يركب مراتب بالعرض أو ورشه يدلني عليها الله لايهينه لانه ذبحني إذا ركب معي احد .
وشكراٌ اخوكم ابو محمد.

[ق ب م 632]

وعليكم السلام


عسى الشباب يفيدونك ياابو محمد

[المميـز]

والله واحد من الشباب اشترى نفس موترك

وراح للغرابي يدور وتعب مالقى

فلذلك انا اريحك من الغرابي اللي في الرياض لا تروح له

حاول تمر على التشاليح لعل الله يرزقك باللي تبي

[hhhh2]

وش دعوه مافيه ردود
ياناس لومجامله

[.أبوعبدالرحمن]

السلام عليكم ورحمة الله وبركاته

اخوي مالك الا التشاليح


والتركيب عند المنجدين

والله يعينك

[hhhh2]

طيب هل تركب على طول اوتحتاج الى ترهيم وتلفيق وصناعيه ولحم وفك ويبيلك قواعد ومن هل الكلام الموتر توه جديد مريت الوكله وسعرة قيمة المراتب قالو 6000ريال حسبي الله عليهم .

[ذئب اليل]

اخوي رح لتشليح وشتر مرتبة مع قواعدة وركبة عند المنجدارخصلك

[غضنفر]

برضوه
فيه موضوع سابق هنا في المنتدى يطلب نفس طلبك
ابحث عنه
ستجد فيه مرادك

[ابو؟؟؟]

التشلح احسن حل

[ابوعبدالله 22]

السلام عليكم
اول شي على البركه الله يطعمك من خيره ويكفيك شره
انا معي مثل موترك بس موديل 2006 ونفس المراتب الي عندك لاني مالقيت مرتبة عرض قالولي خلص مافيه الى مراتب طول توكلت على الله وشريت ابو مراتب طول اول ماطلعت السياره من المعرض رحت لم الوكاله سألت عن المرتبه العرض قالولي 7000 ريال طبعا بدون تركيب ولهيب موجوده بعد تعطينا قيمتها ونجيبها طلبيه من اليابان توصلك بعد شهر طبعا شهر عند الحمراني يعني سنه المهم توجهت لم التشليح حق الحاير وخذت لفه على التشاليح لقيت كم جيب بس بعضها قديم تجي مرتبته مشبوكه وبعد الحوسه في التشليح لقيت جيب ربع الضاهر انه موديل 98 مرتبته الي ورا مفصوله يعني تنصفط كل وحده بالحال شريتها منهم ب1000 ريال بعد المكاسر والطقاق مع ابو يمن
بعدها رحت لم كم ورشه في الصناعيه القديمه بعضهم قالو مانركب وبعضهم قالو نركبها بس ماتصير تنصفط المهم حست الصناعيه لين لقيت ورشة ترهيم محترمه بس شغلهم غالي قالولي بنركبها ب1500 ريال حاولت فيهم يخصمون المبلغ بس الزيدي عنيد ماطاع ينقص ولا قرش بعد ماشافو مقاساتها وتأكدو من انها تركب صح المهم قلت ماعندكم مشكله ركبوها قال مرني بكره تلقاها جاهزه مريت لقيت المرتبه مركبه بعدها رحت للغرابي ولبست المراتب عشان الي ورا لونها يختلف عن الي قدام صار مافيه فرق بينه وبين الي يجي شد بلد مرتبة عرض ولين الحين ماشي معي زي الوز لاقرقعه في المرتبه ولا شي بس قبل لاتشتري المرتبه افحصها زين وتأكد انها ماترقل ولا تقرقع بعدين لاتصير الصدمه مع جهتها حاول تسحب المرتبه على ورا قبل مايفكونها لك وفكها مره وحده اذا كانت تقرقع او ترقل لاتاخذها وفحص التكايات الي على اليمين واليسار لاتصير مكسره ولاتنسا تاخذ القواعد حقتها اهم شي قلهم يفكونها معها ولو تروح لتشاليح القصيم اتوقع تلقاها ارخص من تشليح الحاير لان الجيوب عندهم كثيره
اما بالنسبه للورشه الي اقولك اسمها مركز السفريات للصيانة العامه الصناعيه القديمه شارع الجمعيه وهذا تلفون الورشه 4486993 مع تمنياتي لك بالتوفيق

[ناوي نيه]

بس مراتب 98 مافيها حقت راااس ولا انا غلطان
بس يمكن يرهمون لك حقت راااس المنجدين

[ابوعبدالله 22]

بس مراتب 98 مافيها حقت راااس ولا انا غلطان
بس يمكن يرهمون لك حقت راااس المنجدين

الي انا اخذتها فيها حقت راس وفيها تكايات على اليمين واليسار تنزلهن وترفعهن بس مني متأكد من موديله الضاهر 98 فل كامل ربع

[hhhh2]

الله يعطيك العافيه ماقصرة كفيت ووفيت بنسه لتشليح مارحت لمه بس ورشة السفريات مريتهم قالي نفس الكلام تجيب المرتبه وتركيب 1500 او هم يجيب ويركب المرتبه 4000 ومايركب الا حق باترول او جس اكس ار فقط طبعاً ان تكون تنصفط يعني شغلهم نظيف بس غالي وما يعطيك مجال ابو يمن للمكاسر مشغول.
لكن فيه فكره خطرت على بالي وهي تانكي ماء على شكل مرتبه وتقوموتحط سفنج وتنجد التانكي ويصير على شكل مرتبه يعني اثنين في واحد طبعاً يكون بالعرض ولقيت ورشه بيفص التانكي 1300ريال ويسع 120 لتر ويقول راعي الورشه انه مريح ويتحمل طبعن التانكي الامنيوم بس انا متردد طبعاً الفكره فيها توفير من ناحية الاقتصاديه ومن الناحيه انك طحت بهم المويه ومكانها وجركل وفصل تانكي والعزبه وغيره خبرك عارف شنطة الربع مامن مكان يسوا