لاندكروز 2008 ولا تاهو 2008 وشرايكم

[شحبار]

ابي رايكم ونصيحتكم بشتري ان شاء الله اول السنه موتر ومحتار بين
لاندكروز 2008 جير عادي ولا تاهو 2008 وانا راعي بر وسفر الراي شنو يا الربع

[Black VTC]

اخوي شحبار اذا تبي موتر مريح بالممشى وبالخطوط وسعة في المقصورة الداخلية و تحميل عدد اكبر من الركاب و رحابة في السيارة عليك بالتاهو !!..

اما اذا بغيت (شيك) عند البيع و مركب جميل و موتر جديد (الشكل) يعني كل ٍ يطالعك عند الاشارات عليك بالكروزر الجديد ... طبعاً حسب الشكل القديم هو رائع في الحزوم جيد في النفود افضل من الامريكي بمراحل ..

[./عنيزاوي./]

اخوي اذ تبي موتر مريح بالممشى وبالخطوط وسعة في المقصورة الداخلية و تحميل عدد اكبر من الركاب و رحابة في السيارة عليك بالتاهو !!..

اما اذا بغيت (شيك) عند البيع و مركب جميل و موتر جديد (الشكل) يعني كل ٍ يطالعك عند الاشارات عليك بالكروزر الجديد ... طبعاً حسب الشكل القديم هو رائع في الحزوم جيد في النفود افضل من الامريكي بمراحل ..

[mhs]

اخوي انا مجرب الباترول تماتيك وعادي لا يرخص عيك وعز الله بترتاح من الصيانه

[عاشق السيل]

إذا كنت محتار بين السيارتين أنصحك تاخذ لاند للأسباب اللي قالها أخونا بلاك فتك الله يعافيه ،،

أما إذا كنت ممكن تغير عنها فأنصحك تشتري سوبر سفاري لأنه أرخص وأريح وأنشط وأكثر مواصفات من الاثنين والاختيار لك يالغالي وتقبل مروري ....



.

[.أبوعبدالرحمن]

وانا اخوك لا تاخذ هذا ولا هذا


استخر ربك هو اللي بيختار لك اللي فيه خير لك

[شحبار]

جزاكم الله خير على نصايحكم بارك الله فيكم لزوم الواحد يستشير اخوانه مثلكم

[غالي]

والله ياخوي جرب الاندكروزر 2008
هل انت تعلم انه مريح او لا؟

انا من جهة نظري مايتقارن الاند بالتاهو اذا كنت راعي مكده وبران
الاندكروزر وبس وسعره فيه ولو ما كان مرغوب عند الناس اول مايطلع
مردهم يدورونه دواره ذيك الساعه بتكده سنتين وبيجيب لك السعر الزين
اما اليوكون ناظره هالحين (اليوكون _ التاهو ) كلهم سوا ترا
لاقي بالمعرض واحد ماشيء 1400 حاده ب175 وسعره جديد ب186 الف
واخونا من الاعضاء كان عارض واحد فل كامل بالمنتدى ماشي 15000
مسيوم منه ب145 الف ولاهو بعيد
وهو مطلعه ب186 وكاله اكيد
شف كم طاح :( الله يخلف عليه ويخلف على الي شرا امريكي فوق 120 الف
والواضح لي من السوق الامريكي يمسك سعره ان دخل التسعينات
جموس يوكونات وغيرها

[SilverSniper]

اذا تبي موتر تدفع فيه فوق مية ألف وإذا ركبته وشفت ديكورات وممشى ومطب ومكينة ددتسن ووزن ثور.. بس يمسك قيمته.. خذ جيب..
وان كنت تبي تاخذ موتر مريح.. وقوي.. ويطربك في بر والا في سفر.. خذ تاهو.. واسأل مجرب ولا تسأل طبيب.. وأنا كان معي زفت كروزر بهذلني وبعته بكلب سرق أهله.. وشريت تاهو 2007 ركبته ولعنت الياباني واللي صنعه..

[سعد777]

كل حسب هواه يعطيك
بس انت شف هوى نفسك واستخر قبل كل هاذا
انا وغيري والله لآ حنا دافعين من جيوبنا لك ولا مزاجنا مثل مزاجك

شف مزاجي فورد وغيري يحسفني اني شريته وانا مبسوط اني شريته لأسباب مقتنع فيها ولا يعرفها غيري