شركة جنرال موتر

[Waleed1]

السلام عليكم ورحمة

كل عام وأنتم بخير وعساكم من عوادة والله يديم علينا نعمة الاسلام.

أخوانى من واقع خبرة طويلة مع شركة جنرال موتر اللى منها الجموس والشفرات، حقيقة ياأخوان هذة الشركة أبدعت فى صناعتها بشكل عجيب وكان يشوبها التقلبات بين جيد وغير جيد من ناحية الموديلات.

ومع بداية الالفية يعنى من موديل الفين وأنا متجة لخط الهاف مون عندنا فى المنطقة الشرقية لمحت سيارة من بعيد شكلها غريب كان وقت عصر وماأن أقتربنا من تلك السيارة سوبر ألا وقلت ماشاء الله تصميم وتناسق أكثر من رائع، حتى أنى مالمحت نوعيتها وعرفت بعد ثوانى أنها سوبر جمس موديل 2000 قلت فى نفسى هذى بداية مجد شركة جينرال موتر. فياأخوان الشركة طورت سيارتها بشكل عجيب ومكائنها تغير الصانع صارت من الالمونيوم Verticومن واقع تجربة السيارة اصبحت قليلة الاعطال ماكينة حجم 305 أى 5.3 لتر صارت قوية جداُ كفائة عالية وعزم ممتازة. وأنا معجب بالوانيت قطع 10 الدفرنشين قوى وجبار، والسوبر قطع 15 قمة فى الروعة والراحة والابداع.

الوانيت قطع 25 مكينة 6 لتر اللغوا 350 اللى هو 5.7 لتر حقيقة سيارة قوية حمل وبس. ومايعادلة سوبر قطع 25 6 لتر و 8.1 لتر ممتازة وقوية لاكن لان فية سستة فى الخلف يكون مرتفع وغير مريح شوى فى الجلد والا فى الخط جداُ روعة.

يالربع لاعاد أحد يتكلم عن السيارات اللى قبل موديل 2000 ،، بالنسبة للجموس والسوابر والله أنها كانت قطع خردة والدى شرى سوابر على كل الانواع بعد سنتين ثلاث خذ انواع الاعطال والخرابات. شارى سوبر 2000 وأحنا فى 2007 الحمد لله لاقد وقف أو خرب. فية موتر واحد أشهد لة اللى هو موديل 79 الجمس فقط والباقى تحصيل حاصل. هذى نصيحتى لكم بالنسبة للجنرال. وشكراً

[تلسكوب 1]

شكرا لك اخي على هذه التوضيحات

[عقرب رمل]

شكرا على الموضوع
ولكن انا مستغرب من كلامك بأن الجموس القديمه قطع خرده وكلها خرابات
صحيح ان الجديد طوروه وقلت الصرفيه بس حتى القديم الكل يشهدله وشوف عندنا
سوبربان 92 وصراحه سياره ولا أحلى صدقني ان الخرابات توها تطلع الحين بحكم عمر السياره
واستهلاك قطعها العيب الوحيد اللي كان فيها الabs حق البريك وحليناها بفصله لنه كان فاشل ولولا
ستر الله كان تسببنا في الناس بعكس موديل 2000وأنت طالع فيه مشكلتين يشكون فيها الناس في المنتديات
وهي طرمبة البنزين والعدادحق السرعه يخبط ولا يتحرك وجنرال موتورزمن زمان سياراتها طيبه وطوروها
الحين مع انهم سووشي في الجموس السوبرواليوكن والتاهوصراحه ماعجبتني وهي ان الصدام صار بلاستك
أمس صارلي موقف واحد عند جمس قديم طفت السياره عليه في تقاطع لأن البنزين خلص المهم اني لحمت صدام
سيارتي في سيارته ودفيته وبعدته عن الطريق جلست أقكر بعدين لو الجمس 2007 صدامه بلاستك والله ماكنت بقدر اسوي له شي

وبالنسبه لمكينه الجمس 5.3 رمزها 325 لأن 305 سعتها 5لتر

[Waleed1]

السلام عليكم

تلسكوب جزاك اللة خير، أنا معلم بقر لا بالله مانى معلم وجزاك الله خير. شكراً على الموقع الممتاز..

أخى عقرب الرمل من ذكاء وغباء شركة جنرل موتور أنه لاتبقى الصناعة كما هى وتعدل الاخطاء فى الموديلات الجديدة فمثلاًسوبر 2000 ماأحد أشتكى لامن عداد ولا طرمبة بنزين ولاكن بسبب التطوير ناس فعلاً تشتكى من هل المشكلتين وأنا أبشرك عندى سوبر 2004 عدادة مكيم. لاكن والحقيقة أن موديلاته الجديدة أكثر من رائعة. وعلى سبيل المثال فى شركة ارامكوا كانت السيارة ما تتقاعد بعد خدمة 3 الى 4 سنوات ألا وهى قد تعطلت وخربت الف مرة موديلات بعد 2000 ولاأذكر أحد من الشباب وقفت فية السيارة أو تعطل ألا بس عدادتها تخرب فى بعضها فقط السيارات ياجماعة قمة فى المتانة والابداع مع أعلى مواصفات السلامة.


عموماً الكامل الله والسيارة وسيلة ولايمكن تجد كل المواصغات تجتمع فى سيارة وحدة

شكراً للجميع

[عقرب رمل]

أنا ماأقول ان الموديلات الجديده فيها شي بس حبيت أوضح
أن جنرال موتورز من زمان سياراتها ممتازه والى الآن وهي تتطور
أكثرواللي خلاني أكتب الرد كلامك في اخر ثلاث سطور من موضوعك
بالنسبه للخرابات


أخى عقرب الرمل من ذكاء وغباء شركة جنرل موتور أنه لاتبقى الصناعة كما هى وتعدل الاخطاء فى الموديلات الجديدة فمثلاًسوبر 2000 ماأحد أشتكى لامن عداد ولا طرمبة بنزين ولاكن بسبب التطوير ناس فعلاً تشتكى من هل المشكلتين وأنا أبشرك عندى سوبر 2004 عدادة مكيم

ياليت توضح هالنقطه لأنها متناقضه أو أنك ماعرفت توصل المعلومه صح

ومثل ماقلت الكامل وجه الله ولاراح نختلف علشان حديد
:)

[Waleed1]

السلام عليكم

شكراً أخى عقرب الرمل على الاهتمام وجميع الاخوان، طبعاً مافية سيارة تخلى من العيوب واللى حطم الامريكى مقابل اليابانى هو قيام الشركات الامريكية بالعبث فى صناعاتها لانها كانت تصنع سيارات جبارة لاتبلى وأقصد الصناعات فى أواخر الاربعينات والخمسينات والستينات كانت تصنع سيارات الى اليوم تعمل . ومع بداية السبعينات، بدى يدب العبث لان الشركات خسرانة وبلاخص فورد والدوج ومحاكيك ماعمرة شرى سيارة يابانى. جربنا سبعينات وثمنينات وتسعينات أنا أتكلم فقط عن السوابر والونيتات وحقيقة مرة مشاكلها تعور الراس. عموماً سبب العبث يركبون بعض القطع التى لاتدوم كثيراً وبعدين تقوم تطلب علشان الشركات تستفيد من شراء القطع ومثال على ذلك الفورد مديل 66 الى اليوم شغال والدوج أبو شنب برويغن الى اليوم شغال وكانت جنرال موتر ليست منافس قوى مقابل الشركتين. ومع بداية 2000 حقيقة أحدثت شركة جنرال موتر نقلة ممتازة فى تحسين صناعتها وحقيقة وأنا وراء المقود أشعر بذلك.

ياجماعة ليش الشاص مشهور وبقوة لان عشرين موديل والتغيرات بسيطة وليست جوهرية مما مكنها من الشهرة وفى النهاية تبى سيارة ماتعطلك فى البر أو على الطريق الا ماندر وهذى تتوفر فى السيارات التى تحافظ شركاتها فى أبقاء السيارة بنفس المتانة وأدخال التحسينات على العيوب للموديل اللى قبل، مش كل يوم تغير فى القيور أو طبلوناتها أو مكاينه وهذا تغير كبير مما يؤدى الى تكرار العيوب بشكل كبير...هذا مالزم شرحة وشكراً

[عقرب رمل]

جربنا سبعينات وثمنينات وتسعينات أنا أتكلم فقط عن السوابر والونيتات وحقيقة مرة مشاكلها تعور الراس
للأسف ماعندي معلومات كافيه عن خسائروأرباح جنرال موتورزعلشان كذا مابقدر أعلق على هالنقطه.صراحه أنت أول واحد اشوفه يذم في موديلات السبعينيات والثمانينيات والتسعينيات لأن في ناس يعشقون هاذي السيارات للحين
خصوصا ابورفارف من 76الى79 والمكينه الجباره اللي نزلت على هالموديلات فما فوق 454 وأنا ماأكذبك بس اللي أشوفه خاصة عندنا أهل الأحساء الشعب عندنا أغلبه كوابرس وجموس وفي ناس عندنا وأيضا من اللي في المنتديات اللي من خارج ديرتنا أشوفهم يفضلون هالموديلات حتى على الجديد وأعتقد في كم عضو معانا يفضلون القديم وياليت لو يشاركون في الموضوع ويعطونا لأرائهم بحكم امتلاكهم من هالموديلات.

عموماً سبب العبث يركبون بعض القطع التى لاتدوم كثيراً وبعدين تقوم تطلب علشان الشركات تستفيد من شراء القطع
هل تقصد بأن مشكله القطع التي لاتدوم طويلا ماعادو يسوونها في الموديلات من 2000وفوق

ياجماعة ليش الشاص مشهور وبقوة لان عشرين موديل والتغيرات بسيطة وليست جوهرية
هالسياره أصلا عباره عن قطعة حديد وعليها مكينه وجير ودفرنش تفتقر لمقومات السلامه (ماأدري كنهم حطو فيه ايرباق الحين)وكل شي فيها بسيط من كهربا ال مكانيكا وللمعلوميه ترى الشاص فيه مشكله قطعه كل تخترب بس والله ناسي أسمها بس ماأعتقد انها معقده كثير و البساطه هاذي هي اللي يبونها الناس لأنها حتى لو تعطلت السياره يقدر يصلحها.بس هل معناته أن الشركات توقف عن تطوير سياراتها مع أن المفروض أن التطور في السيارات يقلل من الخرابات.

أبقاء السيارة بنفس المتانة وأدخال التحسينات على العيوب للموديل اللى قبل، مش كل يوم تغير فى القيور أو طبلوناتها أو مكاينه وهذا تغير كبير مما يؤدى الى تكرار العيوب بشكل كبير
كلامك صحيح المفروض انها تحافظ على المتانه بس اذا كانت
القطع مثل الطبلون والمكينه والجير في حاجه الى التحسين فالمفروض يحسنونها ولا تنسى ان الشركا ت تتنافس مع بعض وهذا سبب ثاني لاجراء التغييرات والتحسينات ومب شرط انها تكرر العيوب مع التحسين أكبردليل كلامك عن موديل الستينيات وال2000 فما فوق اليس موديل 2000 يختلف كليا عن الستينيات وهذا أنت تمدح فيه مع أنه مطور.
:)

[SilverSniper]

الجي ام سياراتها ممتازة ولا يعلى عليها.. أفضل بكثير من التايوتا وباقي خمام الياباني وما ودي أقارن الثرى بالثريا..
لكن أختلف معك أخي الكريم في قديم الشفر والجمس..
أنا عندي شفر ونيت 454 موديل 1977.. كل قطعة شد بلد.. ماغير قطع استهلاكية مثل سيور وفلاتر بس.. متين.. قوي.. ولا يوقف ولا يغرز وهو دفرنس واحد بدون دبل.. ومافيه تقنية وتعقيد..
وموتري الثاني بليزر 1990 ماشي معي زي الساعة ومعدل مكينته 383 وكل ما حطيت فيه شي قال عادي.. وقيره قير جمس موديل 76.. ميزة السيارات القديمة من الجمس والشفر مرونتها في تقبل التعديلات وقلة أو انعدام التقنية وهذا اللي يخليها قوية وصبورة ويعتمد عليها.. وأهل التهريب قديما ما يستخدمون الا السيارات هذي..
بالنسبة للحديد وقوته.. أنا عندي في الورشة مكان للسمكرة وفرن بويه.. جا نسيبي معه جمس ونيت موديل 1970.. مصدوم مع الرفرف الأمامي طعجة .. وفيه عندي جمس صالون موديل 2003 مصدوم مع الرفرف الأمامي طعجة أيضاً.. رفرف الجمس 2003 عدلناه بدون فك الرفرف بشوي شفط وضغط من الخلف.. رفرف الجمس السبعين فكيناه ويالله عدلناه بالأكسجين والمرزبة ( المرزبة مطرقة فولاذ ضخمة )..
فالجموس القديمة لها قوتها ولها صبرها.. أنا لا أبخس الجديد حقة والجديد ممتاز وفخم وقوي ويستاهل كل ريال تحطه في قيمته وعندي تاهو 2007 ركبته ولعنت الزفت كروزر واللي صنعه..
تقبل تحياتي.. :)

[Waleed1]

أخوانى الاعزاء أشكركم على التفاعل الطيب، وعموماً نعم ذكرت أن الونيت 79 كان ممتاز نعم الكوابرس ممتازة الموديلات و الجديدة صارة سيئة، وأنا ياأخوان موضوعى من البداية عن الونيتات والسوابر من الالفية وماتغير فيها من تحسينات رائعة ولايمكن بأى حال من الاحوال ونيت قبل الالفين ينافس الموديلات الجديدة وترى مجرب قطع 10 فى الرمل اللى تغطس رجلك فيه لا كروزر ولاغيرة حيث العزم القوى والكفائة العالية طالع على 120 كم عداد الدورات اقل من 2400 دورة فى الدقيقة شئ خيالى. وبعدين القديم مايسوى والجديد مستعمل أطيب وأقوى وممتاز وشكراً