$$ ممنوع تطلع من دون وضع رأي أو مشورة $$

[wads]

إلى جميع الأخوه الأفاضل حفظكم الله تعالى : السلام عليكم ورحمة الله . وبعد :-
أرجو المساعدة منكم بالرأي والمشورة الله يعطيكم العافية ويجزاكم خير ، أريد شراء سيارة غمارة
وما أدري الحقيقة وش السيارة اللي تكون مريحة وعزمها قوي من الأنواع الآتية :

1- تويوتا .
2- نيسان .
3- مازدا .
4- ميتسوبيشي .
5- ايسوزو .
واللي عنده غير الأنواع المذكورة يذكرها ، وألف شكر وتقدير للجميع .

[راعي الطويلة]

ما لك الا احد الثنتين ...
أما تويوتا (هايلكس)
أو نيسان (دتسن)

وأن شاء الله ما تندم


أخوك

راعي الطويلة

[al-nashmi]

حياك الله يا wads :

انا ارشح لك 1_ النيسان 160 حصان بخاخات
2_ تويوتا هايلكس glx
امل ان اكون افدتك

وتقبل تحباتي/ النشمي

[المسفهل]

أنا أرشحلك تويوتا هايلكس GLX

[أبو دلة]

مالك غيرالتايوتا
1- قطع الغيار متوفرة
2- أسعار معقولة
3- خذ خطوط
4- خذ تحمل وكرف
5- صرفيتها حليله
6- تمسك السعرإذا بغيت تبيع
.7-...................................:

[laith]

الاخ الكريم " wads " احرجتنا بابداء الراي والمشوره بعد دخول موضوعك....:D ..:D

عموما شوف بارك الله فيك..

ان كان الهدف من الموتر مقناص ومكشات ولانت حاسب للخط حساب ..بمعنى انك راعي خطوط .. تفطر في الدمام وتتغدى في شقراء وتتعشى بطريف فخذ الموترين ادناه ..

1- تويوتا شاص بخاخ من الموديلات الجدد..

وان ماحصل..

2- ونيت جمس قطع 35 من موديل 91 الى 99 مع اضافة هيدرات ودف لوك..

هذا شوري طال عمرك وحسن عملك...:D ;) :good:

[wads]

أخي الكريم { راعي الطويلة } مشكور على هذا الرأي والمشورة الطيبة ، ويعطيك الله ألف عافية

الأخ الكريم { al-nashmi } شكرا جزيلا على هذا الشور ، والحقيقة إنك أفدتني يالغالي . لكن أبغى أسألك عن النيسان اللي تقول 160 حصان بخاخات : يجي منها غمارة وحدة لأني سألت راعي معرض سيارات وقال لي ما يجي بخاخات إلا غمارتين . أنتظر الرد !!! والله يعطيك العافية ،،،

الأخ الكريم { المسفهل } تسلم والله على هالترشيح بس يقولون إنها ما غير مناقز وتسرف بنزين وش رايك ؟

[wads]

الأخ الكريم { أبو دلة } الله يعطيك العافية على هذا الرأي والحقيقة إن كل اللي قلت في التويوتا صحيح بس لو تصير مريحة شوي وتريحك من هالمناقز . عموما تسلم يالغالي ، وما قصرت .

الأخ العزيز والغالي { laith } تسلم يا عزيزي والمعذرة على الاحراج ، يعني لو ما أحرجناك ما وصلنا منك هذه المشاركة التي توزن بالذهب . ما قصرت يالغالي وألف شكر لك .

[ابوياسر 11]

أخوي الغالي(wads)..

مالك غير الهاااايلكس ، والاخوان ماقصروا بذكرالمواصفات..

لكن أبغى أقول لك حاجة- - الديزل، الديزل، الديزل - - !!
تذكر كلامي عام2006 بيرفعون البنزين أرفع من الآن . بالعربي
كان معك فلوس عطناهن. بطريق غيرمباشر!
ولا تنسى الخلييييييجي،
ولا تنسى بإهداء تحية خاصة- لعبد اللطيف جميل-؟؟!!
------------------------------------
إذا قلت لأبوهنود-عب فل -؛؛ ثمن قالك عشرين ريال00تذكر كلامي!!
------------------------------------
تقبل تحيااتي؛؛؛
محبكم : المجرووح0

[أبوسليمان]

أخوي

أنا أنصحك بالهلوكس لعدت أسباب

1:توفر قطع الغيار في كل مكان.
2:تكاليف معقوله عند حدوث أي عطل لا قدر الله.
3:أكثر سياره من بين منافسيها محافظه على سعرها عند البيع.
4:قدره فائقه على التحميل والتحمل.
5:مناسبه لجميع الأحوال (رمال,جادات,مزفلت,ألخ).
6:أقوى عزم وأكبر سعة محرك من بين منافسيها.
7:صرف البنزين مناسب (10 ريال تمشيك 100 كم)

أما بالنسبه للراحه
فأنا أقولك كثير من الي أعرفهم وأنا منهم
معنى هلوكس ويركبون معنى الأهل ولم نشتكي منها
صحيح أن السياره فيها مناقز لكن مهب لدرجت أنه الواحد مايشتري السياره.

أخوي aboklood
البنزين يبي يصير ب82 هلله يعني أرخص
من الأن لأنه الأن ب90 هلله
والي يبي يغلى عليهم البنزين هم أصحاب المرسيدس
واللكزس 430 فقط أما البقيه راح يستفيدون من التسعيره
الجديده الي راح تطبق ببداية عام 1427هـ .


تحياتي
أبوسليمان

[العليمي]

نصيحه اذا انت راعي بر فما لك الا الهايلكس عز الله انه عزم و قوي..
بس ركب له كفرات عريضه و شف المشي الي على كيف كيفك ...

[جميل جمال]

الهيولكس وخل عنك غيرها بس ..

وعلى قولة ابو سليمان تنفع لجميع الظروف .. ( رمل , جادات , حصيان )

توكل على الله واشتر وانا اخوك

[العنكبوت]

يقولون الددسن اريح بالمركب وممشاه بالنفود احسن
ويقولون مكيفه ثلاجه وكفانا الله شر مايقولون

والهيلوكس عزم وكرففففف((مجربه)) وقطع غيار
واشخص بس يقولون عيبه انقيره مااش وخصوصا
ان الاول قوييي والثاني مااش يتعبك بالنفود عكس
عكس الددسن الثاني حقه حلو بالنفود يعني كنه واحد
ونص بالهايلكس

والشاص مووووت بس يبي يدج بك بنزيم وكفرات

اتمنى اكون افدتك
العنكبوت

[طيـــ بر ـــر]

بشّر أخوي wads شريت .. ولا توّك ... إن كان شريت بشرّنا .... وإن كان ماشريت أبنصحك بموتر (( ماذكروه الشباب في ردودهم )) وبيعجبك .. وبتدعي لي ..


انتظرك ..

طيـــ بر ـــر