العبدلي : يسأل عن الفتك يااهل الفتك

[ق ب م 632]

السلام عليكم ورحمه الله وبركاته


يااخوان انا من فتره وانا افكر بموتر وخايف ابيع الباث واتوهق ومثلكم خابرين ان الغش زاد والشريطيه كثروا والذمه قلة وهالكلام مايختلف عليه اثنين


مالكم بالطويله ,, لي مده وانا افكر بموتر واسع شوي ويشيل الاهل كلهم من دون اي ضيق فأشاروا علي الاخوان ان اشتري لادكروزر وانتم مثل ماتعرفون التويوتا غالي واللي يزيد الطين بله اني اشتري لي واحد بـ70 او اكثر وتلقاه ينقص او فيه تهرب او مسمكر او فيه عله والسبب موديله قديم شوي من 98 والا 99 وحولها ,, والصراحه حرام اشتري بالهقيمه موتر موديله قديم وفيه علل ومشاكل مالها اول من تالي ,,,وحاليا صملت على الفتك 2005 فل كامل ((ابو اسطب طويل)) مثل اللي مع العضو القدير ((خيال نجد سابقا)) المهم حبيت اسأل عن كل شى عنه من الصدام للصدام



مثل صرفيته للبنزين هل هي معقوله نوعا ما والا لا خصوصا وان مكينته الجديده 4800 vtc ؟؟


قوه عزمه هو قوي ويفز والا ثقيل مثل الباترول القديم



مشاكله وخراباته كثيره واذا كان له عيوب اذكروها لنا؟؟


واللي عنده كلمه او اضافه او معلومه عنه او اي شى وده يقوله الرجاء انه مايبخل علينا ويعلمنا عنه ولكم مني الدعاء الصالح عن ظهر غيب والله يجزاكم عنا كل خير,,,,

[hamo0o0ody]

السلام عليكم
اول شي صرفيته للبنزين يصرف
وبالنسبه لعزمه مافيه مثله مشاء الله قوي قوي وما شفت مثله في قوته
وما اتوقع فيه عيوب الا انه يبيله متابعه في الصيانه ومع الزمن يتفكك بسرعه ويلزمك تربيط كل ما حسيت بقرقعه كثيره

[ق ب م 632]

السلام عليكم
اول شي صرفيته للبنزين يصرف
وبالنسبه لعزمه مافيه مثله مشاء الله قوي قوي وما شفت مثله في قوته
وما اتوقع فيه عيوب الا انه يبيله متابعه في الصيانه ومع الزمن يتفكك بسرعه ويلزمك تربيط كل ما حسيت بقرقعه كثيره


مشكوووووور على الرد الصاروخي :D


الصيانه اتوقع اي سياره تبي صيانه كل فتره خصوصا واني راعي خطوط ومشاوير ماتخلص ,,


والفتكك مااعتبرها تعوق النيسان لان عندي حاليا باث وله سنيتن معي ماشاء الله مايبي تربيط او شى واحس ان الموتر متماسك معي بالحيل ماشاء الله تبارك الله,,,


وبعدين يالغالي انت ذكرت لنا انه يصرف ماادرى هو يجي تانكين او تانكي واحد وكم يمشيك بتانكي




ولاهنت

[طلآل]

السلام عليكم ,,

ياهلا اخوي العبدلي اولا الله يوفقك بالموتر الطيب والنظيف ,, ثانيا انا استخدم فتك 2005 ,, من ناحيه الصرف على حسب ممشاك لو ممشاك من 120 الى 130 خذ ولد مايصرف لكن لاتعديت 140 تزيد الصرفيه والفتك التماتيك صرفه اقل من العادي لان القير العادي ضغطه مرتفع والتماتيك عكسه والفتك خذ ولد ان الله حماه من العين ابشر بموتر لك وللزمن طبعا مع حسن الاستخدام يعني كل موتر يبيله اهتمام وهو تانكيين وعسى الله يوفقك بالموتر الطيب ,,

[hamo0o0ody]

صحيح كلامك كل موتر يبيله صيانه بس مهوب مثل الباترول
انا كان عندي باترول وصراحه تعبت من صيانته ومليت منه وترى هذا شي معروف في الباترول
بس الموتر ما شاء الله قوي قوي قوي
والموتر مثل ما قال اخوي طلال صرفيته على حسب استعمالك وهو تانكيين.
وتماسك الموتر على حسب استعمالك
والله يوفقك في هالموتر ويعطيك خيره ويكفيك شره

[باترول للأبد]

وعليكم السلام ورحمة الله وبركاتة

من ناحية الصرفية الفتك صرفيتة حلوة

ومن ناحية العزم كلمة قوي اشوي علية

وخذ مني العلم أذا خذت لك فتك بتنسى الورش وبترتاح

وبالتوفيق ان شاء الله

[طحنون]

معاي فتك موديل 2005
ومعي اول مانزل للوكاله والى الان لم اشتكي منه ومن ناحيه الصرف يعتبربالنسبه لي مناسب جدا
من ناحيه قوه المحرك لان المحرك يعطيك اللي تبي
اول ماشريته رحت عليه مكه اخذت عمره وعبيته فل التانكيين ووصلني الى الطائف يعني تخيل من الدمام الى الطائف
ورحت عليه مره ثانيه ولاكن لم يوصلني الى الطائف وصلني الى الحويه والسبب
ان البساتم توسعت من الخطوط والمشاوير
وبالنسبه للتفكك على حسب استخدامك

[قناص الوعول]

تبي نصيحتي قبل ما تطب وتتوهق ووتحسف على بيعت موترك رح لمحلات تاجير السيارات واستاجر لك فتك لمده يومين وتبين لك ميزاته وسلبياته . ومعروف ان الباترول صرفيته قويه مرررررره بلمقارنه بسيارات الثانيه وهاذا ما لدي ولا تنسى الاستخاره قبل كل حاجه .

[Black VTC]

ماشاء الله الاخوان ما قصرو وما بقي عليك الا الاستخارة اما الاستشارة فقد الممت خيراً منهم ..

[ق ب م 632]

الله يجزاكم خير يااخوان وانتم ماقصرتوا لكن باقي عندي كم اسعار الـ2005 الفل كامل؟؟

والمرغوب بالسوق ((الاوتو او العادي او التيبيوتنك))


وسلامتكم يالغالين

[محسن اليامي]

توكل على الله واخذه
والمرغوب في السوق طبعا في الكويت التماتيك (التيبيوتنك)

[ابوجعفر]

الفتك صرفيه اقل ومن ناحية العزم هو قوي جداْ
ومن ناحية السعر اتوقع ياصل 66او69
و الصيانه هو على حسب الستعمال






وشكراْ

[أبو مها]

الفتك صرفيه اقل ومن ناحية العزم هو قوي جداْ

ومن ناحية السعر اتوقع ياصل 66او69
و الصيانه هو على حسب الستعمال





وشكراْ


اخوي جلسله اسبوع بمعارض النسيم يدور فتك ماهو السوبر الفل الي اقل منه مباشرة يقولي مالقيت اقل من 75000ريال مو نظيف هذا في رمضان الي لقاها موديل 2003
الله المستعان

[مـدحـدر]

الله يجزاكم خير يااخوان وانتم ماقصرتوا لكن باقي عندي كم اسعار الـ2005 الفل كامل؟؟

والمرغوب بالسوق ((الاوتو او العادي او التيبيوتنك))


وسلامتكم يالغالين

التماتيك والعادي كلهم مرغوبات

بس من 2002م وفوق اكثر رغبه لتماتيك


وانت شف راحتك وين

مع ان الراحه دايم بالتماتيك

لا تنسى الاستخاره

والله يوفقك

[الدحبول]

الاسف ماقد طب يدي مفتاح باترول الاقديم والا جديد
إنشاء الله الشباب يفيدونك
وبنتظار عاشق السيل يملك باترول سوبر سفاري 1998 له معه حول الخمس سنوات
أكيد رح يفيدك

[الباترولي]

[quote=ابوجعفر;1188413]
الفتك صرفيه اقل ومن ناحية العزم هو قوي جداْ

ومن ناحية السعر اتوقع ياصل 66او69
و الصيانه هو على حسب الستعمال


صار الباثفندر اغلى من السوبر سفاري ؟؟؟؟؟؟؟؟
اسعارهن من ال 95 وفوووووووووووووووووووووووق

[دحيم العبود]

اخي اذا السياره نظيفه اشتر ونت امغمض
صدقني جربت كل السيارات ولم اجد مثله
صرفيه البنزين التربونتك اقل من سيارات التايوتا ( اخي لديه فوتشنر ويصرف اكثر من السفاري )
التانكيين يوصلنك اكثر من 700 كيلوا ونا جربت ذلك عدة مرات
بالنسبه لتفكك انا جربت باثفندر 2003 لمده 3 سنوات ولا سمعت منه اي اصوات مع صديق لي سفاري 99 ماشي اكثر من 350000 كيلوا ولم يربطه بتاتا ولا يوجد فيه اصوات
(( خذ مني العلم وتكل على الله ))
سعر سوبر سفاري 2005 فوق 100 الف اذاكان سليم من السمكره ونظيف

اتمنى لك التوفيق

[برادو vx]

يا خوي بس عندي سؤال بتنقل اللوحة حقتك والا لا . .

لأني شفتها في المجمعة على كامري ههههههههههههههههههههههه . . أجل باثفندر

[عاشق نيساني]

هلا ومرحبا اخوي العبدلي ......

الفتك يا الغالي خذ رجال معي واحد موديل 2006 قير عادي وعز الله ينحط على يمناك ...

بس في شي يمكن يضيق صدرك وهو ان اسعارها الفتكات شاااااااااااااابه نار لان واحد من العيال

يدور من قبل رمضان وكلها غاليه يعني تخيل موديل 2004 sgl ابورفارف سود ماشي 140 الف مسيوم

ب75 الف ولا باع اما موديلات 2005 من 88 الف هذا سفاري 1 وال 2 ياصل 92 الف وطالع

عموما الله يعينك على التدوير لان الفتكات ماتقعد في المعارض .....

وسالفة الصرفيه يمشيك التانكيين بالديره حول 550 كيلو وخط 650 كيلو هذا القير العادي

اما التبترونيك يمشي اكثر وموفق يا الغالي ....

[دحيم العبود]

يا خوي بس عندي سؤال بتنقل اللوحة حقتك والا لا . .

لأني شفتها في المجمعة على كامري ههههههههههههههههههههههه . . أجل باثفندر

صااااااااادوه :D :D :D (( ماودك الواحد يحط معرفه رقم لوحته )) :no2:

[ق ب م 632]

ماقصرتوا ياشباب وانا طلعت للمعارض وعجزت لاالقى كلهن غاليات بالحيل واسعارهن من 95 الف الى 105 على حسب النظافه والمواصفات



وعلشان كذا ابي اصرف النظيف عنه ماهوب ردا به الا والله مل قل الريال



بارك الله فيكم