الددسن ما يجيب الا 120 .. وش المشكله ؟؟

[القرهود]

السلام عليكم ورحمة الله ..

مساكم الله بالخير ..

يالربع معي ددسن بخاخ 2002 دفرنسين .. موتر ما عليه كلام في البر وفي الديره ..

ومن تالي معد يجيب في الخط مع أن أخوه يجيب 170-200 .. ولا أدري وش السبب ..

غيرت كلتش وغيرت بواجي وغيرت صفاي بنزين وصفيت بخاخاته وصار يجيب 140 ثم يدقر وإذا صار الهوا في وجهي الله لايوريكم ..

ارجوا ممن عنده خبر يعلمني لاهنتوا

[غضنفر]

يمكن عندك انسداد في الشكمان او حدى الدبات
شيك على القزوز كامل من المكينة الى اخر الشكمان

[ولد وايل]

اخي الكريم لازم تفحصه كهرباء هذا من حساس البخاخ واذا فحصت الكهرب اشرط عليه قبل التغيير


هذا اكيد من حساس البخاخ

[شروكي ربع]

الاحتمالات واجد وانا ..


اذا انت رافع الموتر احتمال كبير يكون من الرفعه ..


ويمكن فلتر الهواء اذا هو دمران او قربت الهواء في شي سادها ..


وهلم جره ..

[أبو مها]

اخوي خذ العلم من مجرب تبهذل
المشكله من طرمبة البنزين ضعيفة يبيلها تغيير والله اني غيرتها في الوكالة
في رمضان في الاواخر تبهذلت مثلك مايجيب الموتر الا 90كأعلى سرعة واخرتها طرمبة

(كانت مشكلتي نفس مشكلتك الي شرحتها)



تحياتي
لك

[مهوس صيد]

احيانن يكون من الهوا اذا الموتر مرتفع انا معي هايلكس لمن يكون في هوا ما يطلع عن 160 يوم يكون الجو ما في هوا يمشي 200

[القرهود]

لأشكر جميع الإخوان .. بالنسبه للشكمان ما فيه أي إنسداد والفلتر جديد ..وحساس البخاخ ما فيه الا العافيه ..صحيح أن الموتر مشقول لكن إذا صار الهوا معي ما يجيب الا 140 ..!!

وبالنسبه لطرمبة البنزين وش تتوقع فيها ؟؟ وهل لها ترهيم ولا شيء ؟؟

أنا الصراحه منب راعي سرعه لكن أخاف أن الموتر فيه بلا ثم يتعبني بعدين ..

على العموم بارك الله في الجميع .. ونسمع ممن عنده خبره في هذا المجال ..

[(سكود)]

معي نفس الموتر ولا يتعدى 170والظاهر ان المشكلة في حجم المكينة اربعة سلندروانا فكرت اركب ماطوروجرابقس باث فندر اذا بيركب انحلت المشكلة

[الكونترولCONTROL]

هناك عدة اباب محتملة !!

1- أسباب أدبية : يمكن الموتر نظامي و حالف ما يتعدى 120 و لا وده يوهقك بمخالفات أو أخطار
2- أسباب فنية : ان كان يصرف زيت : معناه لا يهمك امش عليه لين يصير ما يجيب الا 90 ثم اعمل مسح للمكينة
3- ان كان ما يصرف زيت فالمشكلة كهرباء (( بواجي )) او اسلاك بواجي او البخاخ يبي تنظيف
4- صفاية البنزين منسدة و ما تعطي بنزين كافي على الدعسة العالية
5- كما أن فلتر الهواء و اللي الصغير المنظم له دخل في المسألة تأكد من نظافته و عدم كسر الليات

=======================================
و السبب الأول هو الأقرب لكن لا تفكر فيه كثيرا ....
خلك في صفاية البنزين و البواجي ..!!!!!
بالتوفيق

[ابوريناد1979]

هناك عدة اباب محتملة !!


1- أسباب أدبية : يمكن الموتر نظامي و حالف ما يتعدى 120 و لا وده يوهقك بمخالفات أو أخطار
2- أسباب فنية : ان كان يصرف زيت : معناه لا يهمك امش عليه لين يصير ما يجيب الا 90 ثم اعمل مسح للمكينة





هههههههههههههههههههههههههههههههههههههههههههههههههه ههه
بالنسبه للسبب الأول احتمال وارد جدا اذا كان الموتر مع شايب وموصيه مايتعداها :D واحتمال يكون مركب له فاصل .
والسبب الفني (الثاني ) اعجبي كثيرا لأنه يريحك من وجع الراس والتفكير ويخليك تسوي delete للمكينه من أصلها :D :D