لكل من بهت الباترول بصرفية البانزين إليكم تجربتي

[الروض]

السلام عليكم يا أعضاء مكشات وكل عام وانتم بخير وتقبل الله طاعاتكم وإليكم الموضوع دون ديباجة
=============================================
المسافة التي قطعتها 712 km من عالية نجد إلى الدمام بـ7 ساعات إلا ثلث
وقد عبيت الخزانين من نقطة الانطلاق ببنزين أوكتين 95
حيث قطعت أول 70 km بسرعة بين 110:130 km
باقي المسافة ثبت السرعة فوق 130 بشرطة
وكان معي جركل إسعاف 24 لتر معبيه بنزين لو انقطع البنزين أثناء التجربة لأنه مانواني أعبي من المحطات
طبعا تخلل الرحلة توقف لنقاط التفتيش وشراء مايلزم حيث وقفت في ثلاث محطات
قطعت هذه المسافة ببنزين مقداره 118 لتر.
ملاحظة :
السيارة باترول سوبر سفاري 2007م قير أوتو تبترونيك
الخزان الرئيسي 95 لتر
الخزان الفرعي 40 لتر
يعني باقي في الخزان ما يقارب 17 لتر
يعني بإمكان الخزانين قطع 800 كيلو
حيث أن كل 16.6 لتر تمشيني 100كيلو متر بحسب تجربتي
وش رايكم بهذه الصرفية هل هي أكثر اقتصاد من البترولات السابقة أم لا

[باترول للأبد]

وعليكم السلام ورحمة الله وبركاتة

ماقصرت يا أخوي افدتنا لأن الكثير يسأل عن صرفية الباترول

وصراحة صرفية الباترول الجديد أفضل من أي وقت مضى

[أبو فيصل]

و عليكم السلام والرحمه وكل عام وانتم بخير
ترى الممشى من الرياض الى الدمام الموتر في دحديره يعني نزول تدريجي لسطح البحر و تصرف بنزين أقل من صرفية عكس الطريق يعني من الدمام الى الرياض كنك تذب ظهرة نجد و نبعد عن مستوى سطح البحر

لا تمدح البترول ترى أهوز نفسي على الجديد لأول مره بدل التويوتا

تحياتي

[Black VTC]

ما شاء الله تبارك الرحمن ... المسافة افضل من ممتازة وربما الاسباب هي التالي :-

1- تضاريس الارض يعني (مدحدر) .

2- ربما الهواء معك يعني نفس الدعسه من الهواء ..

3- الموتر ما شاء الله تبارك الرحمن جديد و الاسطوانات في المكينة يمكن ما بعد اخذت الحجم الطبيعي .

ومع هذا فالباترول عموماً في الخط ما شاء الله تبارك الرحمن ما يصرف مشكلته في الديرة ... ما يمشي ولا 500 كم ...

( تلميح ) *** انتبه لمستوى البنزين في التانكي الكبير ( الاساسي ) لا ينقص عن الربع لانك ستضطر الى حمله على سطحة بسبب طرمبة البنزين (تحترق) اذا فضى عليك التانكي كثيراً...

[VTC]

السلام عليكم
معي باترول 2004 مكينة 4800
معبي في الخبر ومشيت في الليل الساعة 7.40 ومثبت على 160 وصلت لمدخل الرياض الساعة 10.15 واشتغلت لمبة التانكي الاول يعني مامشاني الى تقريبا 400 كيلو
ماالمشكلة هل هو عادي والا الموتر فيه بلا

[أبو أسامة]

السلام عليكم ورحمة الله وبركاته

أخي الكريم : فتك ................ موترك مافيه إلا العافيه لكن المشكله أن سرعتك كانت عاليه ولذلك من الطبيعي أن يصرف ...... لأنه البخاخات لها وزنية رش خفيفه حتى سرعة 120 وإذا تعديت 120 تزداد وزنية الرش كلما أزادادت السرعه ..........

والسلام عليكم ورحمة الله وبركاته

[طحنون]

اول مانزل موديل 2005 سفاري وقم 2 مشيت عليه من الدمام وعبيت من محطه العسيس اللي عند الشارع التجاري
ووصلني الى الطائف ولعــت اللبه عند ثالث اشاره ونا داخل الطائف وكانت السرعه مثبته 120 والوقوف مره
واحده وكانت للصلاه فقط
.................................................. ............
وبعدها بكم شهر مشيت عليه الىمكه ونفس التعبئه من نفس المحطه ونفس السرعه لاكن هاذي المره
وصلني الى الحويه وولعـــت اللبه ليه (علشان توسعت البساتم وفتحات الابرالبخاخات )
لاكن يعتبر صرفيته ممتازه جدا
بالنسبه للجيوب الثانيه
بالرغم ان حجم البسات اكبرمن حجم البساتم بالكرورزريعني المفروض انه يصرف اكثر
لاكنه مع ذالك لايصرف ولاننسى توين كام يمكن انها تخفف من الضغط على عموت التيمن

ان اشهد انه وحش في الخط وبالبر
(دقشه )
امس على طريق الجبيل بااتجاه كبري البحرين تتطارحت مع كرورز vxr
موديل 2006 ووصل معي الى 210لكن تعوذت من ابليس وخليته يولي اول مره يوصل معي الكروزرالى 200العاده 190 ويرجع ريوس لاكن الحق يقال كان سواق محترف وعرف يسايس الموتر
لاين صك الــ210
بعدين الرجول قامت تنتفض الى ان وصلت البيت (ادري بتقولون السرعه مافيها خير)
لاكن الله يكفينا شر كانت مجرد تحدي هودعس ونا ماصدقت على الله وادعس وراه الى ان طيحت اللي براسي
وكسرت راسه هاذاللي باقي
راعي ............لاتزعلون ياراعيين الكرورزر ترى الدوه مزح...
تراني ماني راعي سرعه لاكن الباترول هواللي دعس ماهوانا

[Black VTC]

(دقشه )
امس على طريق الجبيل بااتجاه كبري البحرين تتطارحت مع كرورز vxr
موديل 2006 ووصل معي الى 210لكن تعوذت من ابليس وخليته يولي اول مره يوصل معي الكروزرالى 200العاده 190 ويرجع ريوس لاكن الحق يقال كان سواق محترف وعرف يسايس الموتر
لاين صك الــ210
بعدين الرجول قامت تنتفض الى ان وصلت البيت (ادري بتقولون السرعه مافيها خير)
لاكن الله يكفينا شر كانت مجرد تحدي هودعس ونا ماصدقت على الله وادعس وراه الى ان طيحت اللي براسي
وكسرت راسه هاذاللي باقي
راعي ............لاتزعلون ياراعيين الكرورزر ترى الدوه مزح...
تراني ماني راعي سرعه لاكن الباترول هواللي دعس ماهوانا


ما شاء الله تبارك الرحمن :) بس انتبه ترا السرعة قاتلة ;) طبعاً انا اكلم على الباترول اللي دعس مو عليك :p الا انت تدري ان شركات التامين ما تغطي الحوادث الناتجة عن السرعات الرياضية ...يعني ثنين يتقاومون وصار حادث بخطاء احدهم راح يتحمل تصليح سيارة الخصم :confused:

[jomran]

مشكور اخوي الروض على الموضوع الحلو والله يعطيك الف عافيه والله انك سكة كل من يقول ان الباترول يصرف بنزين ولا يصلح ومشكورين اخواني عل الردود الجميله .



مع تحيات jomran

[القناص نت]

بارك الله فيك

[B.A]

اسمع ياخوي من نزول الجيب الحوض 99 الي 2003 وانا كل مايطلع موديل اشريه صراحه صرفية البنزين ماهي طبيعيه ابد عليه شرب بنزين ماهو صاحي مافيه محطه بنزين يمر من عندها الا تعبي يعني ناوي يخلص علي بالصرفيه قلت ياولد مالك ومال صداع الراس والله واتخلص من اخر جيب حوض حرمت اركبه بمعارض النسيم بالرياض وهالحين الحمدلله محطات البنزين مدري وين موقعهن

[AL-OTAIBI]

على طاري الصرفيه يا شباب ابي واحد يقولي و ش بلا موتري اعبيه فل من الدمام و يخلص التانكي قبل الرياض بخمسين او اربعين كيلو السرعه تكون غالبا بين ال160 او 170 و الله اني محتار على فكره الموتر ددسن 2006 غماره

[راعي كيف]

السلام عليكم
اخوي معه هدد 2007 راح ابها من القصيم وعلى طريق بيشة يقول مايمشيني 600كلم والسرعه ماياصل 140كلم .
تجربتي مع الباترول لنفس الرحله لكن من الرياض الطائف الباحة ابها اقل ممشى مشاني 650كلم السرعه ماتقل عن 140كلم .
مرة اخرى رحت مكه وانا راجع عبيت من ساسكو اللي بعد مكه 80كلم تقريباً السرعه من 140 الى 150كلم دخلت الرياض والحمد لله من دون ماعبي .
اخر مره رحت القصيم خرب على المكيف وانا توي طالع من الرياض الظهر في رمضان الله يعيدة قلت اسرع علشان اصل بسرعه السرعه ماقلت عن 170كلم الله يستر علينا طبعاً انا رايح الرس 500كلم من بيتي الى بيت الأهل ولعت اللمبه بالرس .
باترول 2001 صالون .

راعي كيف
ابو ناصر

[الروض]

الأخوة:
باترول للأبد
مشكور ومرورك اسعدني
======================
أبو فيصل
هذه تجربتي بين يديك ولا هناك أي مدح ليش هو االنيسان و أخوي والا ابوي؟
وبالنسبة للمشى وأنا مسند ياكثرها مشيت من الدمام للرياض وممشاي بين 150 و170
ويوصلني للرياض على توليعة اللمبة
ومشكور
==================================
Black VTC
مشكور على مرورك وعلى النصيحة

[الروض]

Vtc على هالسرعة صرفيتك ممتازة
ومشكور
=======================
أبو أسامة شكرا لمرورك
======================
طحنون حياك الله
ذكرتني بيت ابن سرور
روس الطوال اللي ورى حد طحنون يامابها من عنز ريم فريدي
================================

[العريني1]

اما عن تجربتي باترول 99 يمشيني في السفر سرعة140/150 مع المكيف يمشي تقريبا 600/650 اكثر من مره على طريق الطائف...
لكن مقارنة الناس باللاند كروزر وينسون بان تانكي اللاند اكبر

[سفاري959]

يا جماعه اللي يقول الباترول يصرف والتايوتا ما يصرف كان عندنا جي اكس ار 2003 جديد على وقته اعبي التانكي الاساسي فل امشي 120 مع المكيف يوصلني مسافه 300 ك وتولع اللمبه يشرب شرب غير طبيعي وكان جديد يعني لا احد يقول الموتر فيه شي

[mjmo55]

الله يجزاكم خير
ماشاء الله صرفية سياراتكم بوادي وسيارتي سوبر سفاري 98 بوادي
مسكين حده حول 300 كم ويدور اقرب محطه
رغم انه تم تغيير البواجي والفلتر والصفايه ودسك وكلتش وتنضيف بخاخات وما ادري وش عاد باقي
فهل لوغيرت البخاخات بجديده تهقون يضبط ؟؟؟؟؟؟؟
وهل فرة الديلكو للآخر لها دخل بالصرفية وهل فيه مضره للسياره ؟
أفيدوني يالنشامى
وتحياتي للجميع

[الروض]

الأخوة الكرام جميعا دون تحديد
شكرا على ردودكم وإثرائكم للموضوع

[Abu Saad]

شخصيا عندي فتك 2005
مشى معي 620 كلم للتانكيين بنزين 91
مع العلم اني مشيت منها مسافة 300 كيلو والسرعة من 170 الى 200 كلم
والكيلوات الباقية داخل الرياض وكلها دعس في دعس .
كنت ناوي اسوي تجربه اني اسوق بركاده اشوف كم يمشيني لكن انسى وادعس ولا اذكر الا بعد يومين ! وهكذا

[الوايلي...501]

انا عن تجربتي معي باترول م2001 4500بخخات قير تماتيك
عبيت فل من الرياض كل التانكيين ووصلني لحد داخل حايل نص المدينه وتو تولع اللمبه
ومره من تبوك وصلني حايل وكل التجربتين كان الموتر محمل والمكيف شغال
السرعه مابين 130 الى 160

[الربذي]

الله يجزاكم خير
ماشاء الله صرفية سياراتكم بوادي وسيارتي سوبر سفاري 98 بوادي
مسكين حده حول 300 كم ويدور اقرب محطه
رغم انه تم تغيير البواجي والفلتر والصفايه ودسك وكلتش وتنضيف بخاخات وما ادري وش عاد باقي
فهل لوغيرت البخاخات بجديده تهقون يضبط ؟؟؟؟؟؟؟
وهل فرة الديلكو للآخر لها دخل بالصرفية وهل فيه مضره للسياره ؟
أفيدوني يالنشامى
وتحياتي للجميع

قير توماتيك ولا عادي يمكن انك تمشي والدبل شغال ههههههههههه
99سوبر سفاري يمشيني حول 400 وفوقهن تانكي واحد قير عادي السرعة 140كم

[هوايتي مكشات]

ياجماعه الباترول يذبحك بالبانزين

[الفليحاني]

انا ولله الحمد معاي باترول 99 4500 قطعت حوالي 700 كيلو بالتنكين
والامور تمام على الخط
لكن المشكلة اذا نزلت للنفوذ ما اريد ابالغ اذا قلت انه تنك بنزين ينتهي بمسافة أقل من 100 كيلو مع العلم بأن هوء الكفرات 30 وتأصل حرارة السيارة دون الفل
هل المشكلة بالسيارة ام من الهوء داخل الكفرات

[الربذي]

انا ولله الحمد معاي باترول 99 4500 قطعت حوالي 700 كيلو بالتنكين
والامور تمام على الخط
لكن المشكلة اذا نزلت للنفوذ ما اريد ابالغ اذا قلت انه تنك بنزين ينتهي بمسافة أقل من 100 كيلو مع العلم بأن هوء الكفرات 30 وتأصل حرارة السيارة دون الفل
هل المشكلة بالسيارة ام من الهوء داخل الكفرات


تقول مع العلم ان الهواء بالكفرات 30 يعني هذا ترا مدح له 30 المفروض مايمشي بالنفود لان انا مع مثله هواه بالسفر28 وبالنفود 15 ومع ذلك احسه يبي تنزيل اكثر
زين مافرط معك الصحن 30كثير بالنفود

[الربذي]

السلام عليكم
معي باترول 2004 مكينة 4800
معبي في الخبر ومشيت في الليل الساعة 7.40 ومثبت على 160 وصلت لمدخل الرياض الساعة 10.15 واشتغلت لمبة التانكي الاول يعني مامشاني الى تقريبا 400 كيلو
ماالمشكلة هل هو عادي والا الموتر فيه بلا
لو تمشي 120 لوصلك 540

[الفليحاني]

تقول مع العلم ان الهواء بالكفرات 30 يعني هذا ترا مدح له 30 المفروض مايمشي بالنفود لان انا مع مثله هواه بالسفر28 وبالنفود 15 ومع ذلك احسه يبي تنزيل اكثر
زين مافرط معك الصحن 30كثير بالنفود
حياك
انا ادري انه 30 واجد لكن انا حبيت اشوف البنزين كم يشرب
وللمعلومية مراح يمشي بالنفوذ وهواءه30 لكن يمشي باطراف النفوذ بطعوس خفيفة ماتذكر

[راعي الصطحه]

يعطيك العاافيه على الموضوووع وتقبل مرووووري

[الخفاره]

يااخوانن ترى من سياره الى سياره تفرق صرفية البنزين - انا عندي سفاري 96 يمشيني داخل المنطقه اوعلى السريع 450 كيلومتر بالراحه وتانكيه على ما اضن 80 لتر

[ذيب الحرار]

يفيدوانك الخوان

[الروض]

ارفعه للاطلاع وإثراء الموضوع
وحبيت اقول لكم
رمضان مبارك عليكم وعساكم من المقبولين

[مقلع الرمث]

ما شاء الله تبارك الرحمن ... المسافة افضل من ممتازة وربما الاسباب هي التالي :-

1- تضاريس الارض يعني (مدحدر) .

2- ربما الهواء معك يعني نفس الدعسه من الهواء ..

3- الموتر ما شاء الله تبارك الرحمن جديد و الاسطوانات في المكينة يمكن ما بعد اخذت الحجم الطبيعي .

ومع هذا فالباترول عموماً في الخط ما شاء الله تبارك الرحمن ما يصرف مشكلته في الديرة ... ما يمشي ولا 500 كم ...

( تلميح ) *** انتبه لمستوى البنزين في التانكي الكبير ( الاساسي ) لا ينقص عن الربع لانك ستضطر الى حمله على سطحة بسبب طرمبة البنزين (تحترق) اذا فضى عليك التانكي كثيراً...


يمشيني 550 بالراحه داخل الديره وبالطريق على حسب السرعه

[SIF]

كان عندي سوبر سفاري موديل 99

والله أنه يشرب البنزين شرب كرهني بكل السفاري

بالتوفيق

[النجم السيار]

الصرفية قليلة جدا ؟؟؟؟؟
يمكن الطريق ما فيه هواء ولا عجاج والا الهواء معك في نفس الاتجاه

[فهد بن مشبب العاصمي]

اخوي انا معي ربع نيسان 99 دايم عطشات .. ويعلم الله اني بعته عشان البنزين ورجعت عليه ماهو طيبن فيه لا لأني مالقيت جيب زي سعره التويوتا غالي وهو الافضل من بعد التويوتا

وللأسف ياليت تدفع فلوس البنزين على نشاط يسوى لكن العزم دمار

وتحسف على البنزين

داخل الديره اعبيه فل 40 تقريبا 91 ويالله يمشي 350 وخط امشي 120 اذا كثر 400 وممكن تزود 50

يااخوان انا معي نيسان وماني متعصبب واقول انه يشرب شررررررب لكن لو نشوف اغلب المواضيع عن صرفية الباترول

وقليل الي شكوا من الاند

تكفون نبي حلوووووووووول

[سارق الكحل]

باترول 91 ربع

أعبيه و91 يمشي 380 كيلو من أخر محطة بالدمام إلى أول محطة بالرياض خلف خزامى (( صاروا يعرفوني أوصلهم هلكان )) بس السرعة متغيرة بس ماتقل عن 140 وشوى أسفط طبلونه

[راعي الركيات]

الله يطعمك خيرة ويكفيك شرة

[oula]

معي 2003 سوبر سفاري 4800
المهم عبيته وانا جاي من تبوك اخر محطة قبل التفتيش الي على الطلعه
المهم انا لحالي وشبعان نوم وممشاي على 160 الى 170
المهم قبل اوصل مدخل حايل تقريبا حول 700 كيلو ولعت اللمبة والخزانات فضت قمت ادربيه لين وصلت لي محطة وعبيته
بس له اربع او خمس اشهر والله صرت اتضايق من صرفيته الـ20 ماتبيض الوجه ابد

[على رمشي تمشي]

الموضوع من 2007 والمديلات القديمة كلبريتر اكيد يبي يصرف عكس البخاخ
اخويoula (http://www.mekshat.com/vb/member.php?u=66400) زين يارجال انت شفت طريق الجوف حايل شلون هو قايل طلعات ونزلات يبي يصرف معك انا قاطع بي قبل لا ادخل حائل اشوا لقيت من يفزع معي