سيارتك كامري تعال ابيك بسالفه

[ابو_ مشاري]

:( الموضوع ومافيه يالربع !!!!
اخوكم سيارته كامري 2003 ومع بداية العشر التوالي نوينا العمره ’ المهم الله يطول عماركم قطعناا حوالي 400 كيلوو من الرياض بتجاه الحجاز ويجي وقت الفطور قالو اللي معي الحق على المحطه ناخذ ماء بارد قلت المحطه باقي 30 كيلوو ولاذان على وشك المهم قرصت للموتر شوي عشان نلحق الوقت . لاحد يقول كم مشيت ماني معلم :D بس فوق الميه :no: المهم ويوم وقفت عند المحطه الا لمبة الزيت يوم ولعت ادوس للموتر وتطفي ولامور زينه بس كن السياره تبي تطفي ولا طفت دوستين وراحت المشكله ,المهم مالكم بطول الهرج مشينا وكل شي تمام و3 كيلوو الا والطقطقه يارب استر وش اللي انطلق قالو ربعي يمكن الجنزير قلنا الا يارب تخلف حملناها للرياض بسبب عدم وجود ورشات على طريق الحجاز تفهم , وصلنا للورشه فكو المكينه قالو تروس الثقال عليها العوض بالمكينه من تحت طيب وش الحل قالو توضيب قلنا وش سبب الخراب قال السيفون اللي مركب مقلد:( معقول؟ قالو جاك العلم ولاهو اول مره تصير !! المشكله شاريه من موزع تويوتا
ارجو الانتباه للسيفون ولا تشرونه الا من الوكيل وقيمته 15 ريال فقط لاغير واسف لللاطاله

[بحرالحياة]

مشكور وما قصرت ....
لكن المشكلة إلي في ديرة ما بها وكالة ما غير موزعين
.....
أعرف واحد معه كامري موديل 2003 طلعت عليه بساتم المكينة ... (من السرعة طبعا )
يعني لازم يشوف له غيرها ..
سأل بالوكالة تفاجأ أنها رخيصة بس 20.000 ( إي نعم عشرين ألف )
عشان كذا راعي الكامري يحرص على الزيت بشكل دوري ...
وينتبه من السرعة الزايدة خصوصا الأربعة سلندر ...
تحياتي

[الوشاح]

نفس السالفه صارت لثنين من الربع الاول لحق على الموتر والثاني .. وضبه

حسبي الله على ابويمن .. لاتخذك بهم رئفه .. ارجع للبنشري واشتكه وخله يعوضك كل خسايرك

[ابوعزيزm]

المشكلة مو من حقين الورش . .

المشكلة من الموزعين الباكستانيين والبنقاليين يبيعون عليهم ويقولون لهم هذا أصلي

فصاحب محل الزيت يصدق هالكذبة . .

وأيضاً فلتر الزيت يغشون بها

فالحذر . . .الحذر

[ابو_ مشاري]

طبعا لااحد ينكر رداءة قطع الغيار المتواجده بالاسواق والغش الذي يحصل من بائعي قطع الغيار والتي تحمل شعار توتيا العالمي !! العجب العجاب انها تباع من موزعين لديهم تصريح للبيع من وكيل سيارات تويتا المعروف لدى المواطنين ,, مانقول الا ياعزتي لك يالمواطن السعودي مطبق عليك المثل اللي يقول خل الدرعاء تدرعاء ,
بالنسبه لموضوعنا عن الكامري على فكره لا عمود كردان ينخرط ولا السرندل ينخرط يعني لوصار شي لعمود كردان ,بامكانك تشريه بسعر 1300 ريال اما السرندل فاطلب ربك لعوض ورح للتشليح دور واذا لقيت مكينه 2003 باقل من 7000 ريال يابختك اذا هي شد بلد

[قناص الوعول]

تعال بزيدك من الشعر بيت حقين البناشر يغشون في الزيت يعني تجيه وتقول له غير الزيت عنده حركتين
1- اذا كنت جالس عنده لين يفك الصره اكثر اناس اذا شاف ان العامل فك الزيت يروح يم البقاله او مكان ثاني ويحط لك زيت محروق حق سياره ثانيه طبعا هو مجهز هاذا الزيت في علب يعني سريع سريع قبل ما تجي واذا جيت تلقه حاط العلب الي طلبتها على الطاوله الي قدام السياره يعني هاذي علبك غيرت الزيت جيب فلوس واكثرهم يعطيه الفلوس بدون ما ينتبه ويروح
2- تطلب زيت معين ويكون مجهز لك علب نفس الي طلبت في غرفته معبات بزيت الرخيص الرديى اذا قلت للعامل ليش ما فتحت العلب قدامي يقول لك انا في افتح في غرفه يعني ينصب عليك واكثر الناس تمشي عليهم هاذي الحركه .
نصيحه اخيره السيفون التجاري يخرب اكثر مما يفيد يعني يتقطع ويتنف ويسوي سدد في طربه الزيت الي في المكينه يعني معادي يدور الزيت واكثر الاحيان تخبط المكينه بهاذا السبب

[ابو_ مشاري]

مشكور اخوي قناص الوعول وفعلا كلامك في محله والغش حاصل من اغلب مغيرين الزيوت الاماهداء الله سبحانه واخذ الحيطه والحذر مطلوب وكما قال الشااعر
احفظ حلالك اللي عن الناس مغنيك

[الوعب]

السلام عليكم


الله يعوض عليك بالخير ان شالله

اخواني عندي سؤال ربيء :)
ماهو السيفون ؟ كذا مره سمعت الاسم هذا ولا اعرف ايش القطعه هذي ؟

[شفر 10]

السلام عليكم


الله يعوض عليك بالخير ان شالله

اخواني عندي سؤال ربيء :)
ماهو السيفون ؟ كذا مره سمعت الاسم هذا ولا اعرف ايش القطعه هذي ؟

السيفون هو فلتر الزيت ووظيفته ينقي الزيت من الشوائب قبل ما يوصل المكينة وهذي صورته


http://tbn0.google.com/images?q=tbn:5StSL5tIfQRSSM:http://www.acdelco.com/worldwide/images/pl_oil_filter.jpg


ومشكلة التقليد إنه من محشو بفاين و(حفايظ )الله يكرمكم وكراتين


وخاصة الفلتر (الأردني)

[ابو ليان]

اخي الكريم
الكامري 2003 مكاينها تعبانة وشفت كثير خبطت

[مسك الختام]

الافضل الواحد يشتري الزيت والسيفون من الوكاله ويجلس مع ابو يمن عند التغيير والله يوفق الجميع