الشور يا أهل الشور

[شقن بقا]

يا أخواني المكشاتية أبي رأيكم والشور وهداية الله
عندي جيب نيسان باترول موديل 93 من أحسن مايكون ولله الحمد وكنت موقفه لفترة قرابة سنة ما رحت فيه مشاوير للبر ويوم رحت للبر في أواخر رمضان لاحظت فيه ملاحظة جديدة ماقد شكيت منها ولا مرت علي والمشكلة ( لين أشبك الدبل الخفيف يشبك معاي بالراحة ويشتغل زين لكن لين أفصله مايفصل بسرعه وأحس بالكفرات إنها ممسوكة يعني الدبل شغال مع إنه اللمبة تطفي واليد ترجع لمكانها مثل العادة ) أرجوكم شوروا علي إن كان مرّت عليكم مثل هالمشكلة وصراحة خايف أوديه للورش ويحوسون أبو الدبل ويفكون ويربطون وفي الأخير ما يرجعونه مثل ما كان وأنا في جدة وأكون شاكر لكم ---- تحياتي

[قناص*07]

في بعض الاوقات وخاصه لاكان الدبل ماهو مستخدم دائم والتروس مليانه مايفصل الدبل بسرعه وهذا موضح في كتلوج السياره.
جرب بعد فصل الدبل انك تقف وترجع تقوم السياره من جديد.
شيك على زيت الدبل عند اقرب بنشري ونصيحه لا تغيره بل زده زياده فقط.
وإلا مشكلتك في قاعدة عصاية الدبل وراجع اقرب ورشه الله لا يهينك.والشباب لهم رأى وخبره ونسمع منهم

[شقن بقا]

مشكور يبوفيصل 2020 على هالنصيحة وفعلا أنا أمشي شوي قدام ومرة أرجع ورا وبعض الأحيان أمشّي السيارة في منحدر لين يفصل عموما بارك الله فيك ولا نستغني عن الباقين ننتظر آراءهم يابعدي
تحياتي

[عاشق السيل]

كلام أبوفيصل سليم الله يعافيه ،،

أولا : من الخطأ إنك توقف السيارة أكثر من شهر والمفروض كل فترة تدق سلف وتاخذ لفة بالحارة وتشغل الدبل وبعدين ترجع الموتر لمكانه ولاتنس تفصل البطارية ،،

ثانيا : شيك على الزيت وتأكد إنه مليان ولاتفكر تغيره مثل ماقال أبوفيصل بس زود عليه ،،

ثالثا : ماأنصحك تروح للميكانيكي تراها كم طلعة للبر ويرجع الدبل زي ماكان لأنه يحتاج تدريب ،،

رابعا : إذا صارت معك المشكلة ثاني مرة وقف ودق ريوس وقدم قدام وإن شاء الله يفصل بسرعة ،،

وهذا اللي عندي أتمنى أكون أفدتك وتقبل مروري يالغالي .....




.

[شقن بقا]

مشكور أخوي عاشق السيل وأكرر شكري لأبوفيصل 2020 ورايح آخذ بشورتكم وأجرب وعساها تنفع .....دعواتكم معاي الله يسلمكم

[قناص*07]

يا شباب هذا ان دل فيدل ماشاء الله تبارك الله على ان مجموعة تروس الدبل مليانه واعني بانها غير مكدوده ولا يوجد بها فراغات.اترك عنك الميكانيكيه ولعبهم بالسياره
بارك الله فيكم اجمعيين ويسر أمورنا انشاء الله.

[NissaN 1990]

الأخ شقا بقا ما عندي كلام أزيده على الأخوان ماقصرو فلاكن لاتروح للميكانيكي ولا توجع راسك هذا طبيعي إذا صار معك كيذا وهو راح يتكرر ما عليك إلا إنك تلف الطاره يسار أو يمين والدبل مفصول وتمشي ومجرد ماتمشي السياره نصف خطوه راح يفك معك وراح تشعر بالشي هذا وأما الحل الثاني إنك ترجع ريوس فلاكن الحل الأول هو الأحسن