ماهي اكثر حركه ترفع ضغطك بالشارع ؟ او بالبر؟ ادخل وشارك من فضلك [الأرشيف]

راعي الدتسن

01/09/2003, 05:36 AM

بسم الله الرحمن الرحيم
السلام عليكم ورحمة الله وبركاته

سؤال موجه لكل واحد منكم

ماهي اكثر حركه ترفع ضغطك بالشارع ؟ او بالبر؟

بصراحه انا عن نفسي اذا وقفت عند اشاره وجا وقف بجنبك بعض الشباب(الله يهديهم)
وهو مطول الاغاني لاعلى درجه

مافيه احترام للي واقف بجانبه ولا كانه شي

او اللي يجدع قمامه(الله يكرمكم)من نافذه السياره , ويمكن ان يتسبب بضرر لاحد السيارات الي تمشي وراه

او بالبر الي يقوم ويغبر على العالم

او اللي يخلي المكان عقب مايقوم وسخ(حضرته ما يقوم يتكلف وينظف المكان بعده)mad: :mad:

وهناك الكثير من الحركات التي ترفع الضغط

ونحن بانتظار ردودكم (لا تبخلون علينا بها )

وجزاكم الله خير:

الخماسين

01/09/2003, 05:48 AM

حدث ولا حرج ، من رمي علب الببسي ، واعقاب السجائر ، المصيبة البعض يدخن بجانب مضخة البنزين ؟!!
لا ادري كيف يأتي هذا الغباء !!

شاهد عيان

01/09/2003, 12:17 PM

أنا أشوف إن ( أقــذر ) حركه يسويها بعض الشباب هي :

إذا كنت واقف عند الاشارة بالصف الأول ثم يجيك واحد من يمينك ويضع سيارته قدامك ( يعني أسخف من هالحركة ماشفت !!! ) ... وين أحترام الاخرين ؟

Bader-M

01/09/2003, 12:33 PM

البر
الزبايل (الله يكرمكم )
اما في الديره
المبزه الي تفحط

عاشق النحم

01/09/2003, 01:08 PM

السلام عليكم ورحمة الله وبركاتة

بالنسبه للبر الزبايل والوصاخات

وبالنسبه للخط المصاقط اللي ماله داعي

أما الحركه اللي اذا سويت فيني أطق أكنس الطبلون260 اذا أحد حدن

والله ياهي قلة حيا :mab:

مخاوي الذيب

01/09/2003, 02:04 PM

السلام عليكم
بحكم اننا بوقت الصيد اكثر ما يرفع ضغطي
إذا كنت متجه لشجرة طلح وناوي اصيد فيها يجيك واحد من ها المطافيق مسرع يبي يسبقك على الشجرة ويغبر عليك لا حيا ولا اخلاق

وتسلم ياراعي الدتسن

ابوياسر 11

01/09/2003, 02:57 PM

الصراحه أخوي(راعي الدتسن)،،
مشكور على ها الابداع ،والصراحه
(نداء لكل من يعمل هذه الاعمال يفهمها تراها
طريقه جديدة بدل الكلام الطويل)
--------------------
في الديرة اللي يجيك وياقف عند الاشارة على اليمين والناس تضرب له من
هالبواري،ولا عندك أحد.... خاش جو (غلط)؟؟؟
خاصة أوقات الذروة،وبالطرق المزدحمة
------------------
بالبر اللي يقوم من مكانه ويخلي كل شيئ مكانه!!!
الصراحه أنا عن نفسي أعتبرها قلة حياء؛؛؛
ياأخي :هل ترضى إنك تجلس بمكان مليان (زبايل)،،وأنتم بكرامة
الواحد إذاجاء يجلس راح يدور مكان نظيف ثم يقوم وهومليان (قواطي،أكياس...إلخ
المفروض إنك تحط نفسه مكان اللي بيجي بعد ك هل يرضيك تلقى المكان كذا....
خاصة إذاكان تحت طلحه كبيرة أو بالشتاء بمكان (ذرى)،عن الهواء!!!!!!
----------------------
إعذرونا على الاطالة....
بس اللي بالديرة قبل شوي حصلت لي وأنا جاي للبيت .. ودي الصراحه
لوأمسكه وأتوطى ابطنه قدام البشريه!!!!..
لكن............................................... ......؟؟؟؟؟!!!!!!!!!!!!!!!!!!!!!!!!
----------------------

وتقبلو تحياتي ،،،
محبكم :المجرووح

الكاشت . كوم

01/09/2003, 04:43 PM

عاشق الكشتات

07/09/2003, 02:07 PM

ما شاءالله كل الحركات اللي ذكرتوها ترفع الضغط بس عندي أضافه بسيطه

أذا صرت عند الاشاره وقدامك ددسن موديل70:p وأذا فتحت الاشاره:BUTT1: طفأ موتره وأنت وراه واللي وراك بيييييييب:redcar: طااااااااااااط وأنت متوهق:D مايمديك تسوي شيء لا تقدر تروح لا يمين ولا يسار لانك ملحم في الددسن واللي وراك ملحمين فيك:(:(

Najd^Prince

14/09/2003, 07:33 AM

بسم الله الرحمن الرحيم

ماراح أتكلم عن الحركات الي تقهر في البر لان أخواني من قبلي كفوو و وفوو :D .

بس من الاشياء الغبيه الي يسويها البعض في المدن والطرق السريعه :

1/ تسقط على واحد حاط العالي :mad: ومايحترمك و لا يعبرك .

2/ التجمهر عند المدارس وخاصتاً أيام الاختبارات .

3/ مطارد التفحيط والاهتمام بأخبارهم .

4/ تلقاك بالضهريه كاره نفسك وتحصل حادث والي قدامك مبسوط ويمشي ( 20 )

هذا إذا ماوقف بعد .

هذي بعض الاشياء الي لفتت إنتباهي وماخفي أعظم .

لكم أجمل التحيه و التقدير ;) .

أبو ريم

14/09/2003, 03:14 PM

السلام عليكم
سراحة اكرة حركة عندي هي
اذا قام واحط وطلع من مخباتة بكت الدخان وقام يدخن قدامي
والاعضم من هذا يكون مركب معة عيالة ويدخن والبزر يقلد ابوة
ومعليش للاسائة

معمرها

14/09/2003, 03:27 PM

......بسم الله الرحمن الرحيم........

السلام عليكم ورحمة الله وبركاته .............

ــــــــ:: يعطيكم ألف عافيه على الموضوع

اما في المدينه ليس لى اضافه الشباب ماقصرو

اما البر الزباله(( اكرمكم الله))

شـــكـــراُ

قمره

15/09/2003, 08:40 AM

http://al3no0od.jeeran.com/qmrah/pastelflwbar.gif

يا هلا وغلا بالجميع

اشكر على الموضوع اخوي

بس ودي اقول انها اتعس حركه بالبر لا جيت بتلقى لك مكان تقعد فيه وتبتدي تنزل اغراضك

يجونك عرب ربي يستر عليهم ويقعدون جنبك ولا كأنك موجود؟؟

اما الحركه التعيسه اللي بالمدينه لا وقفت عند الاشاره

تسمع لك منوعات ما عمرك سمعتها

تحياتي

قمره

http://al3no0od.jeeran.com/qmrah/pastelflwbar.gif

ابومدين

16/09/2003, 06:31 AM

يعطيكم العـافية

ايضايقني بعض الناس عند الإشارة عندما يفتح باب سيارته
ثم يبصق اكرمكم الله دون مراعاة لاحد من عباد الله
وهذه عادة قبيحة

قناص القرائن

17/09/2003, 09:35 PM

موضوع قيم جدا
كما قلت الدتسن الاغاني إذا رفعوا عليها وهذه ظاهره خطيره يخشى علينا من العذاب فارجوا من راى من يرفعه النصيحه النصيحه

في البر إذا انعم الله علينا بالربيع جوا بعض الشباب يفحطون عليه هذي الحركه ترفع الظغط وترفع السكر وتعورالقلب انا لا ادري من اي كوب هذا الشباب هل لهم عقول الله اعلم؟؟؟؟!!

اااطلق سعودي

13/01/2006, 04:34 AM

من نحيه البر مثل ماقولو اخواني النضافه وفيه بعد بعض البران القربيه الي يكون فيه بعض الناس قربيه منك وبمعنا اصح الخليطي العزاب والعوائل تلقى شباب الله يهديهم مطولين المسجل وناس تصلي جنبهم جماعه والله مايستحون بس تبي الشور ابعد عن اماكنهم وعاد المشكله انك لكنت انت جالس قبلهم ونزلت عفشك وانت عارف لكان الواحد ضعيف نفس وفي الديره لاجاك عاد الواحد مفهي والا يكلم بالجوال ومسرح ولا يقدرمشاعر الناس ونص السياره المسار الايسر والنص الثاني المسار الاوسط والبعض يبك تفتحله الخط ويكبس عشرين الف مره كبستين تنفع شفته طول مره ثانيه عطه كبستين والله يوفق الجميع

قرناس الشمال

13/01/2006, 07:32 PM

الي يسد اليمين عند الاشارة يولع:mad: :mad: :mad: :mad: فيني
اروح اعلق علية البوري واذا ما راح ادفة شوي شوي>مركب دعامية<:D :D واذا نزل
اقول ما دريت:rolleyes: :rolleyes: :rolleyes: اسو نفسي بريء>اذا كانو كثيرين>

ثعل البرد

13/01/2006, 09:00 PM

عن نفسي يقهرني ويشب كبدي حركتين بالديرة هما:
1- إذا وقفت سيارتك عند سوق أو مسجد أو بنك أو أي شي بعدين يجيك واحد أناني مايفكر الا بنفسه يوقف سيارته بجنب سيارتك ويلز ((يعني مايترك فراغ)) يلز سيارتك من جهة باب السواق وبعدين تضطر أنك تركب من الباب الأيمن وتنقز لمرتبة السواق !!!!!
2- إذا صار مطر والشوارع غدران وسيول ... يجيك المستهتر بالناس ويدوس يمشي 100 في شارع صغير ويسقط عليك ويرشق كل ما في الأرض من ماء عليك ويروش سيارتك كلها والأدهى أنك قد تكون فاتح النافذة !!!!

أما بالبر :
1- شباب يجون يكشتون جنب عائلة ويحجرون حريمهم .
2- بعض الشباب ياخذون الدش (عربسات في أقل الأحوال) أو البلاي ستيشن للبران ... هذي كشتة بالله ؟؟!!!

جمار

14/01/2006, 01:13 AM

السلام عليكم :
في المدينة : من يقف في المكان المخصص للراغب في الإنعطاف لليمين في الإشارة .
وكذلك بعض الشباب عندما تقف سيارتان متجاورتان في الشارع واصحابها يسولفون ولا همهم الناس اللي خلفهم ( فعلاً الحركة توحي بالنقص والغرض منها التميز حسب ما عرفت من بعضهم وللفت الأنضار )
في البر : الزبالة ثم الزبالة .

http://www.mekshat.com/pix/upload/sign/images/mk21972.gif

سبت العلايه

14/01/2006, 07:37 PM

بصراحه كفيتو ووفيتو ...

والى الاخ عاشق الكشتات الموقف الي قلته قد صار معي وانا في سيارتي ددسن 84
وانا واقف عند اشاره صحارى طريق الملك عبدالله طفاء الموتر مافيه بنزين((يا شين الطفرة)) وتفتح الاشاره اكثر من مرة و تعال اسمع البواري بس البواري ما اشتغلت لوحدها يمر الواحد ويفتح القزاز ويسب والي يتـفل((اكرمك الله)) والي ياشر بيده ((اجلكم الله)) وعلى ذا الحال لين فتحت الاشاره حوالي اربع مرات وسياره الدورية تمر بجانبي ولا ترد ااقول له: لا هنت دفني ويصد بوجه عني...
واخيراًَ عقدت العزم اني انزل وادف السياره قاطعاً الاشاره واذ بكاميره الاشاره تصور وجبت المخالفة فاذا باحد الاخوانبعد ان دفيت الموتر حوالي الثلاثه امتار يضرب بوري واشر لي ان اركب الموتر علشان يدفني الله يجزاه بالخير

الوقت :كان الوقت الساعة الرابعه عصراً
الموتر :محمل املاء الصندوق يعني

بودحيم

14/01/2006, 07:53 PM

مشكلك انك واقف عند الاشاره بتروح يسار يجيك واحدمن اليمين ويبي يديور لا وينفخ عليك هذا في المدينه
في البر انت جالس موسع صدرك مع عيالك مع ربعك يجيك واحد يفحط او يرفع على المسجل
الله يهدي الجميع
هذا الي يضيق صدري
مشكورين يعطيكم العافيه

سيرفر

15/01/2006, 09:46 PM

السلام عليكم

ام انا مايرفع ضغطي ويفجرني الا شيء واحد اذا كان فيه حادث يتعطل ماهو الطريف الى فيه الادث لا الطريق الثاني ليه حب لقفه:no:

ليث الوغى

16/01/2006, 08:00 AM

الله لا يهينك اخوي على هذا الموضوع وعندي اضافه لربع الي هي على طريق البر المصاقط الي ماله داعي والطريق خط واحد ((سيد))

يعني فيه بعض الطرق مكسره وسرعه ومصاقط الله يستر على المسلمين

أبو ثا بـت

16/01/2006, 10:13 PM

الحل هنا ؟
إقرأ وإذا كنت غلطان أعطني حلاً؟ :confused:

ترى الغلط .. يبدأمننا أولا يعني أنا وإنت والثاني والثالث .. تستغربون كيف !! لاتزعلون مني .. بس إحنا إللي غلط ..!

لأن هذي الأفعال غالباً مايفعلها إلا شباب في سن المراهقة .. وأحيانن كبار بس العقلية عقليه صغيرة شوي .. لذلك لازم ننبهم .. بالنصيحة الطيبة .. والله مايسوون كذا إلا لأنهم إما متضايقيين ويبون يعبرون عن الهم إلي بداخلهم بطريقة خاطئة . ولأنهم وللأسف إذا سووا غلط مايلاقون من ينتقدهم ويوجهم بل في بعض الأحيان يلاقون تشجيع وللأسف .. لاكن لو قمنا بالنصيحة الطيبة يعني إبتسم في وجهه ولوكان غلطان وسلم عليه وإسأله عن السبب ؟ راح يكون الجواب على طول .. فراغ ..طفش .. هم .. ضايق .. أو في بعض الأحيان إذا كانوا شلة : يكون الجواب : وش دخلك !! أو متى المعرفة ؟ أو إقلب وجهك . (( نادرا لاكن تحصل )) .
الزبدة : ذكر أخوك المسلم ولو ماستجاب لأنك راح تأجر قلله فقط : قال تعالى : ومن أعرض عن ذكري فإن له معيشةً ضنكا )) .
صدقوني لو ماإستجاب في وقتها وإلا كابر قدامك وإلا رد عليك رد مايسر يكفي إنك بلغت .. ويكفي إنك تؤجر ويكفي إنك حاولت تغير المنكر .. صدقوني !! لو إن كل شاب شاف شاب على خطأ سوى كذا كان المجتمع أفضل حال . . لأن الشاب لما ينصحه واحد شاب مثله يستقبل منه على طول يقول في نفسه هذا شاب مثلي وعايش سعيد وماسوى إلي أنا سويته فيحاول يقلده .. لاكن للأسف إحنا يالشباب ماحاولنا نغير المنكر نخاف:j يقول : إقلب وجهك وإلا إنقلع .. نسينا : إن رسولنا وضع على رأسه سنا جزور وصبر .
وإلي مومصدق .. يسأل نفسه ليش غالب الشباب إذا شاف جمبه مطوع قصر المسجل وإستحى ؟ لأنه يعلم أنه بيجي يذكره .. لاكن لوكان كل المجتمع كذا .. كان كل المجتمع إستحى ..
لماذا لاتحاول .. فقد تكون سبباً لتغيير منكر أو هداية شخص ..

آسف على الإطالة .. وعدم الترتيب .

المشراق

17/01/2006, 12:02 PM

السلام عليكم ورحمة الله وبركاته

كل الإخوان ماقصروا قالو كل شيء وحتى اللى في بالي قلتوه وهو إذا كنت في البر ونزلت وجاء جنبك شباب وسكنو وهات رفع للمسجل وانت تبي تنام بدري حتى تستطيع القيام لصلاة الفجر وما أطولك يليل تبي تنحاش عنهم الصبح وفي البلد عد وأغلط وخاصة من أصحاب السيارات يجيك من آخر اليمين ويلف يساروكل اللي قلتوه بس وسع صدرك ولاتعجل في الرد عليهم وأعمل نفسك ماشفت شيء وكلام الأخ فص فص أعظم من رائع ودمتم سالمين0

هاوي صيد

18/01/2006, 06:28 AM

موضوع جميل حقيقه

بس فيه حركه ماحد ذكرها من الشباب وهي هاللي يمسك الاصفر ويشغل العالم بالتكبيس والتلحيم الا تفتح له بالقوه ومع العلم انه يشوف الطريق زحمه
والحركه الثانيه اللي تخليني اولع اذا مافتحت خط له لحم فيـــــــــــــــــــــــــــــــــــــك وش تسوي بها الحاله وهو طاق العالي

تقوان

18/01/2006, 06:57 AM

بالنسبة في البر.............
طال عمرك هي اذا كشتو وجمعت الشمرت واخنترتوا مكان مضبوط ويوم انكم ارتحتوا في هاالمكان جاكم واحد الله يستر علينا وعلية يمتلك هذه الصفات:::
1/غثيث
2/بخيل
3/نشبه
4/مايشتغل
5/انواع ضرب المطبات مع الشباب يعني فاهمين وش معنى مطبات
6/يمسك جهاز الكنود ويدخلك في مشاكل مع جيرانك في الاجهزة المجاورة الصديقة ويغلط بكلام ماله داعي واخر شي ما يفزع..
7/اكثر واحد مسرف في الاكل هو.
وشكرا لكم جميعاً..................................اخوكم/ تقــــــــــــــــــــــــــــــــــــتوان

نجـ*سهيل*ــم

18/01/2006, 07:19 AM

السلام عليكم ورحمة الله وبركاته
اشكرك اخوي راعي الددسن على طرح هذا الموضوع
اما بالنسبة لي الحركة اللي ترفع ضغطي داخل الديره
هي اذا كنت تمشي بالشارع وجنبك سياره فيها اجنبي ياسواق عائله او سواق لموزين وبغى يلف على طول راح يدق اشاره ويلف وما عليه فيه احد جنبه او لا يعني مسوي ان الحق معه لانه نظامي داق اشاره ويحدك ولاعليه منك

اما في البر فهي حركة بعض الناس هدانا الله واياهم بترك المخلفات واكثر شي يقهرك اذا حصلت لك شجره وظل واذا قربت منها حصلت معلق عليها جلد ذبيحه وتحتها قطع من الذبيحه لاكن اللي يرمي المخلفات في البر فهذا يعكس نظافته في بيته يعني لو هو عايش في بيت نظيف ماوصخ البر يعني المفروض انه يترك المكان احسن مما كان
وآسف على الإطاله والسلام عليكم

ابوسليمان119

18/01/2006, 08:00 AM

فتى التويم

18/01/2006, 02:10 PM

أنا أشوف إن ( أقــذر ) حركه يسويها بعض الشباب هي :

إذا كنت واقف عند الاشارة بالصف الأول ثم يجيك واحد من يمينك ويضع سيارته قدامك ( يعني أسخف من هالحركة ماشفت !!! ) ... وين أحترام الاخرين ؟

انا مع اخوي شاهد عيان صراحه حركه مالها داعي..................!

أبومناحي

19/01/2006, 11:28 PM

السلام عليكم

أكثر حركه ترفع ظغطي

المزح الثقيل

عنتر بن شداد

20/01/2006, 10:07 AM

راعي الدتسن

05/10/2010, 09:03 AM

بصراحه مره من المرات وأنا ماسك الخط واحد قدامي رمى سيجارته من دريشته وقامت وضربت بقزازة سيارتي ، وبصراحه خوفني ذاك اليوم

رعد البرديه

05/10/2010, 09:34 AM

http://www.al-3reen.com/album/data/media/21/barrrrb2.gif

والله أكثر شي يقهرني بالديرة هو إنك واقف عند أحد صرافات البنوك الي وأنت بالسيارة ثم يجي واحد وراك وكل إشوي يدق بوري أو يدق إشارة يبيك تستعجل ........... طبعا أنت ما خاصت شغلك بس يبيك تستعجل بقوة ..
يمكن عندة شغل بس شغلة ما يعطل أشغال الناس ....

هذي تحصل معي أكثر من مرة وبديت إذا دق الواحد بوري وراي أمخمخ على الصرافة أكثر<<<<<<طبعا غالبا أطول إذاكانت الفواتير طالعة كهرب وإتصالات ..

وشكرا

أخوكم / أبو سليمان

والله شكلك من اللي يطولون عند الصرافات وهذه مشكله نعاني منها كثيراً ، بحيث ياخذ الواحد تقريباً عشر داقائق وانت واقف وراه بدون أن تصدر حركه لا بوري ولا إشاره أحياناً تضطر انك تنتظر لما يخلص أو تترك السرى وتمشي لصرافه أخرى

بصراحه هذي مشكله والمفروض الصرافات اللي بالشارع تكون للسحب فقط وليس لتسديد الفواتير ووالتحويلات ، اللي يبي يطول فيه صرافات عند البنوك كثيره واقعد لوتبي ساعه كامله

ربما يقول شخص هذه حريه شخصيه أنا بكيفي فأقول يجب أن تقدر الآخرين ولا تنظر لنفسك فقط فما أعظم أن تقدر الآخرين وتحترمهم قبل أن ينبهوك هم

رعد البرديه

05/10/2010, 09:43 AM

أشين حركة بالشارع :
1: واحد يكبس لك العالي وإذا رحت عنه وجا جنبي قام يناظرني .
2:عند الحوادث الله يجيرنا منها تلقاه ماشي 10 <<<< و الناس اللي وراه طيب لو واحد معه مريض .
3:واحد يضرب طااااااااط (بوري ) ويروح يدق اشارات .
أشين حركة بالبر :
1: إذا انت ناصي شجرة و تبي تجلس تحتها تشوف واحد مقلع كنه في رالي سيارات .
2: وانتم بكرامة ( الزبايل )
3: معك عائلة ويجون ناس شباب قربين عندكم <<<<< هذا ودك تمسكه بمشعاب وتضرب فيه الين يتفل العافية.
و آآآآآآآسف للاطالة وما خفي كان اعظم
تحياتي
أخوكم : عنتر بن شداد

ياعنتر رقم واحد هذا الذي ذكرت من ملاحظاتك بالشارع : ينطبق عليه المثل اللي يقول ( شين وقوي عين ) لأنه بنظره هو يرى نفسه أمير وانت تأخرت مافتحت له الخط الله يهديك :D

على العموم أكثر طارات السيارات يقعد خلفها بزران لا يعرفون أخلاق ولا يقدرون أحد وقد تربوا في الإستراحات أمام القنوات الفضائيه الهابطه التي تربي على فساد الأخلاق والدين .. الله المستعان

MUZAH100

05/10/2010, 10:40 AM

الحركة اللي ترفع ضغطي من جد
انك ماشي في طريق عام ثم يجي من ورائك يلحم صدامه بصدامك الخلفي ما بينهن الا شبر
او انك في وسط زحمة ويجي بزر من ورائك يضغط بواري و يكبس كانه بيفتحونه الطريق له
او انه يجي طااااير من ورائك و يكبس لك و الاشارة قدامك 100 متر

محمد-الرس

05/10/2010, 07:50 PM

جدعة الوجة.... بالقصيم
يناظرفيني....الرياض

مثلا بأي مكان بسيارة وأنت ماشي ولا قاعد المهم يناظر فيك يطول ...خير تبي شي ...

محمد-الرس

05/10/2010, 07:50 PM

حزين الكون

06/10/2010, 11:24 AM

اشين شي عندي لا جا واحد من ورى وقعد يكبس بالنور ..

اول شي اسوي المس الفرامل شوي ..

وشف وين بيكون

باث 3

06/10/2010, 12:50 PM

:mad:

:mad:

:mad:

:mad:

:mad:

:mad:

باث 3

06/10/2010, 12:51 PM

:mad:

:mad:

:mad:

:mad:

:mad:

:mad:

باث 3

06/10/2010, 12:53 PM

:mad:

:mad:

:mad:

:mad:

:mad:

:mad:

باث 3

06/10/2010, 12:54 PM

ما شاء الله الشباب ما بقوا شئ, لكن عندي نقطه مهمة،

أبيخ حركة على وجه الأرض يجيك سواق هندي وتلقاه يتجاوز خطأ:mad:
ومسرع في وسط حاره:mad:
وإذا غلط عليك ومعه
عرب قام ينافخ وهو في سيارته:mad::mad:

هذا ودك تفقع راسه بجنط محلي وتلمخه بكم كف وتختمها بمشعاب في الجبهه:good:

خل أبو هنود يتأدب

-ظل الجزيرة-

06/10/2010, 02:35 PM

الحرررررررررررررركه الي ترفع ضغطك لاصرت تبي تصيد طير يجي ملقوف ويظرب بوري

-ظل الجزيرة-

06/10/2010, 02:36 PM

الحرررررررررررررركه الي ترفع ضغطك لاصرت تبي تصيدلك طير يجي ملقوف ويظرب بوري

-ظل الجزيرة-

06/10/2010, 02:37 PM

الحرررررررررررررركه الي ترفع ضغطك لاصرت تبي تصيدلك طير يجي ملقوف ويظرب بوري:hot::hot::hot::hot::butt3:

**محمد الجبرتي**

06/10/2010, 03:00 PM

مرة كنت راكب مع رحيمي وواقفين عند الاشارة في الامام
وكان باكستاني صاحب لموزين واقف جنبنا ولعت الاشارة بالون الاخضر ويعطيك الباكستاني ذاك البوري طااااااااااااط والمشكلة ما في احد قدامة وربي كنت بأنزل بأصقع وجه بكف مستشفى السعودي الألماني ما يصلح وجهه

ماعليش على الاطاله

a7md al-q9em

09/10/2010, 03:30 PM

1/ تسقط على واحد حاط العالي ومايحترمك و لا يعبرك .

2/ التجمهر عند المدارس وخاصتاً أيام الاختبارات .

3/ مطارد التفحيط والاهتمام بأخبارهم .

صامولي

09/10/2010, 04:09 PM

خخخخخخخخخخخخخخخخخخخخخخخخخ
الموضوع من عام 2003م

قنااااص

09/10/2010, 08:31 PM

اللي يرفع الضغط بالبر إذغ جيت مكان تلقى فيه بقايا ناس قبلك ,,,

وين النظافه وهي والله ماتكلف الشخص أي شي أكلف ماعليه يجمع نفاياته

ويحطها بكيس ويشب فيها,,,

الله يهديهم...

عاشق الماركيز

10/10/2010, 02:43 PM

ماقصرت على الموضوع الجميل ياراعي الددسن
انا الي يرفع ضغطي الصبح وانا رايح للجامعه اشوف باصات محمله طالبات وراعي الباص داعس حاط رجله ولا اهتم بالارواح الي معه وهاذا اشوفه كل يوم وخاصة الضهر وقت خروج الدوامات يعيني بالعربي زحمه ولاخ مسرع

نسناس غربي

12/10/2010, 05:03 PM

خخخخخخخخخخخخخخخخخخخخخخخخخ
الموضوع من عام 2003م

صحيح الموضوع له 7 او 8 سنين لكن لازال محتفظ بجوهره والناس تشارك فيه..

بالنسبه لي مايرفع ضغطي الاشي واحد
وهو السلتوح اللي اذا وقف جنب عايله رفع المسجل للاخير يعني شوفوني ذوق وداخل جو وطربان
هذا اللي ودك تنزل عليه ومعك سيخ عماير مقاس 21 و وتبطحه على بطنه ثم تحمي السيخ لين يتقاود حماره وتحشره في .......
" المنتدى واعضاءه يكرمون عن باقي التفاصيل"

السلمان2010

12/10/2010, 11:10 PM

بزارين الديره اللي يجي مطفي النور ومكبتن بالنور الصغير(السكن) ثم يكش العالي يحسبك مطنشه وانت اصلا ماشفته الله يهديهم

صاحب حي

12/10/2010, 11:31 PM

لسلام عليكم
سراحة اكرة حركة عندي هي
اذا قام واحط وطلع من مخباتة بكت الدخان وقام يدخن قدامي
والاعضم من هذا يكون مركب معة عيالة ويدخن والبزر يقلد ابوة

بارق المراويح

17/10/2010, 07:13 AM

انا مايرفع ظغطي الااصحاب الماشية اذا كنت كاشت بالبر يطب عليك لااحم ولادستور
وتكون عائلتك معك ويسوي من الحبة قبة ويحب يتأكد ان كنا حراميه وتلقاه طول الوقت يراقبك
ويتلفض عليك بكلمات تطلعك من طورك واغلبهم كبار بسن و احترامهم افضل
نصيحة ابعد عن الشر وغنيله

العودالازرق

17/10/2010, 02:35 PM

أنا أشوف إن ( أقــذر ) حركه يسويها بعض الشباب هي :

إذا كنت واقف عند الاشارة بالصف الأول ثم يجيك واحد من يمينك ويضع سيارته قدامك ( يعني أسخف من هالحركة ماشفت !!! ) ... وين أحترام الاخرين ؟

زيد على ذلك تمسك اليمين وتلقى واحد يكبس افتح طريق

مرقاب

18/10/2010, 10:59 AM

لو كان قله الوعي رجلا لقتلته
الوعي يأتي بالعمل وليس بالكلام وهو لايشترى ولايباع وياتي بتظافر( البيت -المسجد-المدرسه -الوسائل الاعلاميه -المجتمع-النت-الحملات التوعيه مهمه جدا)
مع الاسف على ان لدينا امكانيات وحققنا بعض المنجزات الا اني ارى ان الوعي في انحدار بعكس الدول المماثله لنا

دلهميز

18/10/2010, 11:33 AM

تسلم يا راعي التتسن وتسلمون

الا شفت سواق ينزل العائلة او ياقف عند مدارس البنات يحتري ثم ينزل وهو كادن الشويشة اللي تلمع وفاتح الزرار العلوي للقميص وفاسرن كمومه ولابس بنطلون ضيق ويمشي على هونه ونظارات شمسية وتقول بطل فيلم هندي

ثم ينضم للشلة من ربعه اللي قاعدين يحترون ,,, ودق سواليف وبطولات وخبرات واخبار

الستانس

18/10/2010, 11:49 AM

انا ما اداني اللي يصك الطريق عل الناس عند الإشاره ولا يخليهم يروحون يمين او يساقط الناس عند الإشاره

لانه هو سبب الزحمة يسبب مشاكل وزحمة ولا يمر إلا سيارتين ثلاث وهو السبب

واحلى شي في الشوارع تطقطق على ها الأشكال

عطه بوريين تأتش معة ويبي يدخل غصب هههههههههه واذا طلع قدامك قام يدعس
خخخخخخخ احلى شي يوسع الصدر وهو متبهذل جربوها على هالأشكال

اذا اقلقك بكبوس عطه دقه بوري وتفرج على الدلاخه

هوايتي مكشات

18/10/2010, 11:56 AM

السفر خصوصا اذا كانت دينا تلقاه رافع العالي واذا تجاوزته ماقصر النور

عاشق الطرمبه

24/10/2010, 01:23 PM

مايفقع مرارتي الا سلمكم الله اللي يوقف سيارته في وسط الشارع ونشوفها دائما عند المطاعم الوجبات السريعة
علشان محد يوقف وراه طيب مواقف المطعم فاضيه قدم 4 متر لو اني في المرور والله لانهي دفتر المخالفات على هالاشكال
المشكله انها دايم تتسبب في حوادث.... الاحترام مطلوب في كل مكان

...........................

يقولون وكر الحر مايعتليه البوم ... وانا شوف عيني وكر حر تحت بومه

العميد ابواروى

24/10/2010, 09:08 PM

اكره اي حركه سلبيه اي كانت

كثيره وغلبها من المراهقين
والي يقهرن الي اذا كنت كاشت وجاء فرش بجنبك ضاقت الارض الى حولك
:mad:

ALBDRANE

25/10/2010, 09:02 PM

عند الأشارة أذا نط واحد قدام العالم الي ماسكين سرا عند الأشارة

راعي-gx97

26/10/2010, 01:25 AM

زيد على ذلك تمسك اليمين وتلقى واحد يكبس افتح طريق

والله صارت معي كم من مرة طيب وين يبيك تروح تلحم بالصبة !!!!!
والله شي يقهر ؟؟؟؟
بعض السواقين حرام يمسكون الطااااارة !!!!!!

راعي-gx97

26/10/2010, 01:45 AM

(بالديره)

أشكال وأنواع اللي مسكر المسار الايمن وكنة مخصص لة واللي يبي يسار وماسك اليمين ويجيك عرض واللي يدق بواري عند الاشارة وهي حمراء واللي قالب السيارة مرقص تسمع انواع الغربي وأقطع يدي أذا كان يفهم منه شي ووووووووو

(على الخط )
النوار (( الزنن )) اللي أخونا مرهمها ومسوي فيها شوفو أنوار سيارتي زرقاء عساها تزرق عيون العدو ..

(البر)
حدث ولا حرج بس يجي الربيع وتزهي الارض بالخضار وتجي عالم تقول بينها وبين جمال الطبيعة عداوه ترك مخلفات أعزكم الله وتفحيط بالروض الاخضر وشب نيراااان في كل مكااان وووووووووووو ....

المرزم

26/10/2010, 02:32 PM

والله فيه اشياء كثيره
اول شي اذا جيت بتجلس تحت طلحه ولا كلها قمايم
ثانيا اذا طلعت تتمشى بالمطر يجونك المبزره يفحطون بالطين ومشغلين اغاني :@
ثالثا وانت طالع انت واهلك بالبر تقول مافيه طريق الا من عندك لازم يخطم عليك
رابعا وانت بالديره التفحيط لازم كل يوم ولا يجيك طاير ويسقط من يمين ولا اذا صرت طالع يجيك صافق طبلون ويشطفك طيب مثل لو صدمته بالحركه ذي وش ينفعك

ع العموم الله يهدي الجميع ويعافيهم

دل البحار

26/10/2010, 02:37 PM

التهاون واللعب بالسياره في الشارع وأزعاج البوري والاشاره حمراء وبعض الجاليات المستهترين بالنظام وكأنهم اقوى شعب وأعظم شعب ومحدش ادهم بعكس بعضهم محترم ومؤدب

حبران والمسمى

26/10/2010, 02:50 PM

الصراحة إنكم ما خليتوا شي ... لكن عندي إضافة..

بعض الناس إذا كنت ماشي بخط وهو قدامك ما تدري إلا وهو جادع الموتر يبي يلف!!

تقل الإشارات عليه فواتير!!!

وللا بعض العمالة الله يهديهم (ينشق)الله يكرمكم وبعدين>>>> تففففففففففففففف!!

آسف على الصراحة الزايدة بس شي يقهر!!
اغتقد اوصخ حركة حركة العمالة وخاصتن الصبح وانت رايح الدوام ولا بعد يفتح الباب يعني انتبهوا
هذا اشوفها بالديره
ودك تنزل وتربطه وتويه للصناعيه يفصولن له مزلاج بقفل :D

ملك الفكتوريا

26/10/2010, 09:45 PM

ما يرفع ضغطي الا التكاسي يمشي باليسار واذا شاف زبون خش يمين وحشر البشريه

والا المصري والسوري يمسك مسارين ويكلم والا فاغر ومهدي واذا عطيتهب بوري عصب هذا انشبه بالرصيف

والا ورع معه النترا ويهايط مسوي معه جمس اذا حدك لا تبعد وخله يصفق فيك وامش وخله

مثلي هع هع ورع ازعجني وبالاخير مسوي يحد الاوله بعدت عنه الثانيه بعدت الثالثة ما بعدت

واكلها رفرف ايسر وصدام ووزن كبوت وتغيير اصطبات وصعوبه في فتح باب السواق

وسيارتك شل بويته من سيارتك

وقل له هذي لوحة سيارتي اذا تبغى تبلغ بلغ

السواق والغباء لكن مو منه من الحريم اللي معه

مكشاتي 2011

27/10/2010, 04:44 PM

ابو فغن ياقف و الاشاره برتقاليه وانا طاير ابلحق الاشاره مار انا عند الكبوت

قناص تربه

29/10/2010, 06:07 PM

موضوع جدا ممتاز وبيض الله وجهك على طرحه ليستفيد منه بعض الناس

الشباب ماخلوا شي بس عندي اضافه فيه بعض الشباب الله يهديهم عند الاشاره يرفع في صوت المسجل أنا اشوف هذا أترك الجواب لكم والتعليق على من مثل هاالشاكله

ساحووق

29/10/2010, 06:18 PM

ماايرفع الضغط غييييييييييييير السواااااااااقين ابو فسيه

بـدر

24/05/2011, 02:29 AM

خذ عندك
التعريض قدام الاشارة
التكبيس
تطويل على الاغاني
التلحيم
الوقوف الممنوع
رمي المخلفات سواء في الشارع او البر
التفحيط سواء في الشارع او في البر
التطعيس المتهور
الدوران
الوقوف على خط المشاة
عدم ربط حزام الامان
التكتيم (التضليل الغامق جدا)
عدم استخدام الاشارات عند الانعطاف
النزول من السيارة لرجل المرور
عدم احترام المشاة
استحقار العمالة وسيارات الاجرة
وغيرهم كثير

يعني اتمنى المثالية في القيادة والاستمتاع بالاجواء الربيبعة بعيداً عن اللعب بالارواح واستحقار الاخرين

سلمت يداك على هذه الموضوع

إلقناصه

26/05/2011, 05:11 PM

السلام عليكم
موضوع رايق اخوي
اكثر شي يرفع ضغطي اذا وقفت عند الاشاره وفاتح الدريشه يجيك واحد غبي ويحذف الرقم غصب وقمة الغباء واحد بطريق الدماام السريع تخيلوا شي يفطر الكبد يحدك طول الطريق وماشي 180ثم يرمي رقمه وشكله محترف لان الرقم صاب الهدف ولاشافه الرقيب
عقول متخلفه تتبلى ناس ماهم من مستواهم الله يهدي الجميع
اما بالنسبه للبر اذا بنيت خيمتك وجيت بترتاح طلعت على بيت نمل يآهي مصيبه
ودي وتقديري لصاحب الموضوع

ولد الأجاويد

26/05/2011, 08:52 PM

والله وش أقول وش أخلي
داخل الديرة

عدم احترام من في الطريق
واحتقار كل الناس أهم شي أنا وبس

وفي البر

يا خوي لا تقلب المواجع
المشكلة تكمن في قلة الوعي والتوجيه
أحياناً تلقى شباب طالعين مع عوايل وتلقى أنواع الهياط منهم الله يهديهم والكبار يطالعونهم ولا كأنهم مخطين ولو جيت تشتكيهم للكبار اسمع أنواع الردود اللي تدل على عدم تحمل المسئولية.

بربنجي

27/05/2011, 07:40 PM

نسأل الله ان يهدي شبابنا
من الحاجات الي اكرهها فيهم وقد نكون حنا منهم لا نزكي انفسنا
فيه حاجتين او اكثر خطيره مثل التفحيط وقطع الاشارة الحمراء هذي تعتبر جريمة وللاسف القانون متساهل فيها مع ان الضحية قد تكون ارواح البشر الله يحفظنا واياكم
صراحه للاسف المخالفات كثيرة الله يهدي شبابنا ويحفظنا واياكم

عنودالصيد

29/05/2011, 11:05 PM

الشارع والبر ماله ذنب !!!بريء:)
هي حركه بس
كللللللللل حاجه تهتك قدسية القانون الرباني سوء فشارع اوالبر
ترفع الظغط وكمان ماتعجبني أحس إننا دائماً ضد التيار اللي أمرنا فيه ديننا...ليه؟؟
!!!!!
لا نظافة شوارع ولاحدايق ولابر ولاسيارات ولادورات مياه
ولا ولا ولا ....:mad:
اكثر واغلب الدول الغربيه تمشي فالشارع وكأنك تمشى على مرمر من النظافه:)
لاه والإحتراااام حدث ولا حرج قممممممه
تصدقوا إن عامل النظافه له احترام غير
تدرون ليه؟؟؟؟
لأنهم يعرفوا قيمة وظيفته
يعني ماخذين اخلاق الإسلام ومطبقينها بحذافيرها
!!!!
واحنا
بعض الشباب ربي يهديهم في الشارع يلغي من قاموسه إحترام اللي أقل منه
( العمال خاصة اللي فالمحطات ازدراء لهم بشكل غير طبيعي ليه!!
مخلوق ضعيف ومحتاج وجاي يخدمك!!!
بس تئول لمين؟؟
الظاهر لسى بعض الناس ماتعرف قيمة النعمه لحد ماتفقدها
!!!!
بجدعندنا فكل مكان فشارع اوالبر تلقى اللي يحرق الدم يالطييييييييف
وربي مو إتهام للشباب حتى البنات ....!!!
بس الظاهرإنها مظاهر
في المولات تاكل شوكليت وترمي غلافها عند اشجار الزينه ولاتحت الكراسي:mad: شي فضيع
وعوائل في المسطحات الخضراء اللي عالشارع تترك مخلفاتها
يعني لاإعاقه فيهم ولا مشوار حتى ياصلوا الحاوية
مدري شقول حاجات كثييييييييييرة ترفع الظغط وتجيب الهم والغم
اخيراً المعذره والسموحه على الصراحه
اللهم اجعلنا من عبادك الشكور
كفااااااااااااااايه لحد كذا قلق
مشكووووور كثييييييييييييير
عالطرح اللي جاء عالجرح

عشقي الصحاري

30/05/2011, 09:48 AM

وش اقووول وش اخلي@
عندك بالشوارع اللي يجدع الزجائر وعلب الببسي وغيرها @
ولا يجيك واحديمشي قدامك ويكلم بالجوال ولا كان احد وراه@
والبر عاد عندك المخلفات حدث ولا حرج@

واو سين

31/05/2011, 11:43 PM

1-اللعب في الجوال ويمشي صفر تقول بلحاله يمشي واذا خلص المعفن من جواله ركبه بليس طيران
2- عند الاشارة مسارين ثم تصير 5مسارات بسبب التخلف والجهل والحماقة والدلاخه والثورة وايضا الحميره
3- السرعة ويشغلك ثم يوقف عند محل او بقالة
4-دلاخة البعض ماتدري بيلف يمن اويسار
5-توقف سيارتك عند بقالة او محل معين ثم يجيك ثور يوقف وراك وفيه مواقف
6-عند المطاعم تتسكر مسارات الشارع بسبب تخلف البعض والكسل انه يمشي على رجليه يامال الكسر 100 الى 50 متر
7-بعض الجحوش الصغار يسكرون مسار الشارع يسولفون اذن طين اذان عجين
8- البر الوساخة والمزابل جعلت الصحراء ذات الرونق الجميل الى مخمات