دودة الدركسون لاندكروزر

[aziz2727]

يا اخوان مساكم الله بالخير
صار عندي مشكله تهريب زيت من اصلاح دودة الدركسون وصلحتها بس المشكله الي طلعت لي هي ان لمبة الايرباق والعه على طول !! وبوري السيارة معد اشتغل!! وش السالفه اذا احد عنده خبر يفيدني الله لا يهينه ؟
السيارة نوع لاندكروزر gx-r 2004
بارك الله في الجميع

[sameer_1798]

يا عزيز صارت معاي المشكلة هذه قبل فترة و غيرت قطعة داخل الدركسون بعد البوري و الايرباق أضنه حساس للأيرباق قطعة كهربائية على شكل حلقة بلاستيكية قيمتها من الوكالة بحوالي 300 ريال .
نوع سيارتي Gx.r 2000

[aziz2727]

عزالله ياخوي يا سمير انك تقول الصحيح
من صباح الله خير اليوم وانا عند الورشة وقال المهندس ان فيه قطعة في الدركسون تحتاج اننا نفحصها وينادي الفني الفلبيني كهربائي ويفك الدركسون ويطلع من خلف اليرباق قطعه دائريه ملفوفن حوليها سلك يشبه سلك التوصيل الى في جهاز الكمبيوتر وشكلها عريض شفت وتحتاج الى تلحيم وشفت المسئلة بتطول قلته خل عندك القطعة وباخذ السيارة واجيك بعدين
وان شاء الله انها تصلح والى الله يعينى نشتري قطعة جديده
شكرا" اخوي سمير على الرد

[بدوي جنوبي]

نعم هذي القطعه هي المسئولة عن البوري
ومثبت السرعه ولمبة الايرباق

واذا كان عندك زر الاوفر درايف يضلي يغمز علي طول


انظر الصورة اول مره خربت عندي فكيت الطاره وصلحت القطعه كانت مكسوره طبعا الصوره غير واضحه

http://img525.imageshack.us/img525/4391/5643bmp6wq8.png
القطعه هذي حق سيارة لكزس خربت علي مره ثانيه ولقيت سعرها تقريبا 500 ريال شريت قطعه من التشليح ب 100 ريال
اهم شي اذا بغيت تشري قطعه تشوف كم عدد اللفات ابتدأ من السهم الاحمر

تحياتي لك
http://img525.imageshack.us/my.php?image=5643bmp6wq8.png

[مجتهد***]

صارت تقريبًا نفس المشكلة في سيارتي وغيرت القطعة الدائرية خلف الأير باق بـ300 ريال

[aziz2727]

هلا بمشرفنا الغالي
صحيح الي في الصورة زيها بالضبط
وابشرك صلحها الفلبيني وخذيت السياره قبل شوي ونقول ان شاء الله تمام لمبنة الاير باق طفت والبوري رجع تمام وتسلم يالغالي

[aziz2727]

هلا اخوي مجتهد
وتسلم على حضورك
كلفتني تصليح القطعه 100 ريال
حقيقة في اشياء في السيارة لما تراجع فيها الورش يقولك تحتاج الى تغيير وطبعا" كثير من القطع اسعارها نار وتقدر في نفس الوقت انك تصلحا بس يبيلك واحد اول شي فاهم وثاني شي شاطر بعد توفيق الله
وتحياتي للجميع