لكي ترتاح من الغسيل بعد العشاء

[راعي الدتسن]

بسم الله الرحمن الرحيم
السلام عليكم ورحمة الله وبركاته

طريقه افضل لكي ترتاح من الغسيل بعد العشاء(وخاصة في ليالي الشتاء البارده)

وكما انها تعطي رائحه جيده لليدين

وكما انها فعاله ((بعض الشئ)) ضد الدهون


وهي انه تأتي ب((منديل معطر)) وبعد ما تتعشى وتحمد الله

وتفك المنديل وتقوم بمسحه على يديك

ويمكن ان تضع كرتون صغير منه في (العزبه) او في درج السياره
او على الاقل حبه واحده منه في مخباتك


ونحن نطلب رايكم في هذه الطريقه
افيدونا ولكم الشكر

[الكاشت . كوم]

والله يا خيي الي أعرفه إن المنديل المعطر يستعمل بعد الأكل علشان يزيل رائحة الأكل...

وماراح يفيد إذا استخدمته لحاله..هذا رائيي الشخصي:D

[أيمن]

والله فرحت !! أحسبك تبي تفكنا من غسيل المواعين ..
يا بعدي كانها على اليدين فأمرها هين:) ..

مشكور يا راعي الدتسن على هذه المشاركات المتوالية والتي تحمل بين طياتها الكثير من الفائدة ..

تحيتي

[مكشات]

وش رأيكم نجرب وضع قصدير وسط القدر ... أما على الصحن فما يبيلها كلام :)
وبخصوص تنظيف الأيدي قالها واحد من الاعضاء قبل فترة ( تلبس جوارب بلاستيك أو نايلون ) ومايحتاج تغسل :p
بس يمكن ماتتمتع بالأكل مثل لو كان الأكل بشكل مباشر باليد :o
إذا نجحت أي طريقة للتخلص من غسل المواعين والأيدي فسيكون ذلك إنجازا ..
تحياتي للجميع

[ابوياسر 11]

ياأخوووووي
وش له أجل شاري حطب....
والله يكرمك تبقى (ريحة الدسم)يالحبيب،الاإذا
إستخدمت الصابون أوتراب،وتفرك يديك به...
===============
ولك جميع تحيااااتي من
محبكم: المجرووح

[al-nashmi]

الرسالة الأصلية كتبت بواسطة أيمن
والله فرحت !! أحسبك تبي تفكنا من غسيل المواعين ..
يا بعدي كانها على اليدين فأمرها هين:) ..

مشكور يا راعي الدتسن على هذه المشاركات المتوالية والتي تحمل بين طياتها الكثير من الفائدة ..

تحيتي



وش بلاكم ياهل المكاشيت والصيد صرتوا كسالا وزوله بعد ...خابركم شقرديه ونشيطين.....
وقفت على غسيل اليدين.....افا بس افا لا احد يدري عنكم الله يهديكم ........


الا ماتخبرون لي طريقه انزل فيه العزبه وخيام البر واسطونات الغاز وباقي الحطب اذا وصلت البيت بعد كم يوم اقضيها في البر تراي ديني ودين تنزيل هالعفوش.... ودي معي قلابي وكبها في الحوش مباشره بدون نقلها
على قطعه قطعه( لولله صرت انا الكسول):D :D :D

مشكورين على اقتراحتكم وحبيت امزح معكم........سلااااااااااام

[ابو عمر اللاحم]

النشمي:D :D :D :D

[عاشق البسمه]

الطريقه اللي افضل من هذي انك تاكل بملعقه عشان ماتغسل ((والله كشاته))!!


بعدبن ترى العشاء ماهو غصب عشان تاكل(( ياحبيلك يالنشمي ))

[ابورشيد]

ترا النشمي اسم من اسماء الشخص النشيط وهاب الريح
اترك عنك الخمال والكسل تراك اذا عودت نفسك علي الحركه والنشاط تكون عندك شي عادي
بعدين ترا الدين غالي وترا لدنيا يعطيها الله من يحب ومن لايحب لكن الدين مايعطيه الله
الا من يحب اسأل الله ان يجعلنا واياكم من عباده الذين يحبهم ويباهي بهم ملائكته وجميع
الاخوان في هذا المنتدي
اكتب هذا الكلام لانك اخوي كتبت(ديني ودين تنزيل العفش)

[فرد حمزة]

تسان حولك بعشاك ولا بعزبتك ليمون بعد العشاء أفركه بيدك حيل وغسل يدك بماء على خفيف

[al-nashmi]

اخونا ابو رشيد جزاك الله خير على النصيحه........


اخوك/ النشمي

[الرماي]

وفي طريقه افضل لاغسيل ولا بطيخ
وهي انك تحط قطعت نايلون على الصحن قبل وضع الرز او
اي حاجه ثانيه واذا انتهيت لفه والصحن من انضف مايكون
وشكراااااا

[وحيد سدير]

وفي طريقه افضل لاغسيل ولا طبخ بعد اليوم




نلبس د سوس ونشترى من المطعم ولا غسيل ولا طبخ ولا يحزنون

ونرجع للبيت بدرى ونشتري سخان لشاى على الولاعه ونروح نبيع العزبه






لا تزعل والله امزح

[الفردوس]

يخرب مطنك يا عاشق البسمة

والله طلعت فضايح الكشاته : غسيل المواعين وتحميل العفش

[عبدالله الصالح]

والله ياخوي اذا ماصر فية غرابيل بالكشتة ما صار
له طعم والله يبعدي ولا تصير عاد تبالغ:D
اخوك القصمنجي....

[عروان]

صراحة أهون شي للغسيل بعد العشاء أنك مثل ما قال فرد حمزة تفرك يدك بليمونه ثم تغسل بعده.

ما راح يضل للدسم ريحه بيدك أبد.

أما من ناحية المواعين أتركها تمسي منقعة بماء وصابون والصبح تغسلها تحت الشمس والدفاء.

أقترح عليكم تحطون طشت أو سطل مسطح للغسيل يكون بلاستك تنقع فيه كل المواعين قبل لا تنام.

أما الصحن تقدر تفرش عليه السفره وبعد الاكل تلم السفره باللي فيها وترميها في كيس الزباله.

تحياتي للجميع

[أبو ناصر]

السلام عليكم ورحمة الله وبركاته

كتبت قبل فترة طريقة توفير المياه وأنت في البر وهي : http://www.mekshat.com/vb/showthread.php?s=&threadid=6466

بالنسبة عشان تفتك من غسل المواعين إنك تحط في الصحن قبل ماتنكب الكبسة أو أي طبخة ثانية تحط سماط الشفاف اللي ماعليه روسومات وإذا قضيت تشيل السماط وتنتهي المشكلة ، البعض لايؤيد هذه الطريقة يقول إنها ضرر وانا أقول لي تقريبا 3 سنوات وأنا استعملها والحمدلله ماجانا شيء ( قولوا ماشاء الله ) .

:p

[هواوي]

افا يا رجال وش ذا الكلام

هذا وانتوا اهل البر والكشتات

الا ما يزين البر الا انك تاكل اكل حار ثم تنقز للغسيل ودرجه حرارة المويه صفر ثم تغسل يدينك الين تحس انها تجمدت مثل دجاج ساديا متجمده ثم تحطها على الجمر الين تحس انها رجعت فيها الحياه مره ثانيه واقعد تدف والله انها زينه الاكل لما تدفي يدينك بعد الاكل والله انه احسن ما يعجبني في عشا المربعانيه ذا الشي

ومن ناحيه المواعين صح غسيلها قلق ولكن تركها يجيب الهوام الي المكان الي انت فيه وخاصه الثعابين بعد البرد فانصح انك يا تنقعها في مويه او تغسلها من وقتها وهذا الافضل

ومن ناحيه تنزيل العزبه بعد الكشتات فانا من ناحيتي ما اطيق تنزيلها وعشان كذا الله لا يهين السواقين هم ينزلونها

على فكره لازم ترجع من البر وثوبك وصخ وفيه كم حرق وفي يدك كم جرح خفيف ختم انك كنت في البر ولا ماهي طلعه ماهي طلعه يعني مختم من البر انك ساري المفعول وراعي بر

[عود رمث]

الراي للي عجز يغسل يديه بعد الأكل إنه يخلي يديه بمخباته و ياكل بزقمه ..

وسلامتكم .

[صقر]

حتى الان لم نطلع بنتيجة مرضية وهي غسيل المواعين بطريقة توفر الماء والجهد وهو الاهم في هذا النقاش

وطرق غسيل المواعين كثيرة ومتنوعة ويجب ان نخرج بنتيجة حتى لا تروح الكشتة على غسيل مواعين وبس!!!

انا وربعي نستعمل طريقة حلوة في غسيل الكاتم وهو اهم مافي المواعين وهي:
الطريقة الاولى:

لما نكب العشاء نحط بالكاتم نصفه اوربعه ماء ثم نحطه على النار ريثما ننتهي من الاكل وعندما ننتهي من الاكل نرجع وبعدين تكون الحكاكة غير ملتصقة بالقدر والدهن قد ذاب وهذي توفر عليك الكرف بالفرشة والملعقة والازعاج. ويتم غسل الكاتم بسرعة قياسية واستهلاك ماء أقل.

الطريقة الثانية:

عندما نكب العشاء نحط في الكاتم شوي ماء ونسكر عليه تجي الصبح تلقاه ذاب كل الدهون اللي فيه وتتم عليه تنظيفه بيسر وسهولة.

ان هذا الموضوع مهم جدا في نظري لأن الكشتة احيانا يكون فيها ترحال ومن المهم السرعة في غسل المواعين وايضا توفير الماء الذي يندر في بعض المناطق ، وايضا توفير الوقت والجهد.

ارجو ان اكون ما طولت عليكم..

وبارك الله فيكم جميعا.

[عود رمث]

مساك الله بالخير

نسيت لأقول إني مجرب طريقتك بمسح اليدين بالمنديل المعطر وهي ناجحة بنسبة كبيرة (( طبعا بشكل مؤقت )) وهي طريقة زينة وسهلة وما منها مضرة .... لكنها ما تكفي عن الصابون .

تحياتي للجميع

[ضارب الهواءبويه]

ههههههههههههههههههههههاي
واحد طالع للبر وفي الاخير عجزان يغسل يده

والله الليل الطووويل

على كل حال مشكوووووور

ملاحظه : ارجوك << ( رجاء ) لا عاد تتعب عمرك وتطلع للبر ... << سوري

[* رمش العين *]

السلام عليكم
الموضوع ذو شقين
الاول : غسيل اليدين ::: ( واقول صرف نفسك )
الثاني : غسيل المواعين ::: واقول فيه صحون قصدير كبيرة تكفي لخمسة اشخاص او سته وتستخدم مره وحدة وتجدع بعد الاستخدام ولاغسيل ولاغيرة ولاهب غاليه يمكن قيمته نص قيمت الصحن المعدن .

[خوي حسن]

الى وشرايكم باالاندومي والى قرص بيض عشان التغسيل
مابقى الى هي افابس افا
اضرب بخمسا ولا تاكل بملعقتا ان الملاعق للنعمائي كفرانو
بعدين ان كانت على الصحن قطعت خيشه تخليه وكاله

[عبد الله الفايز]

الرجاء من الأخوة انه ماأحد يتطنز على أحد لأسباب
1- الموضوع جيد وجدير بالنقاش فتوفير الماء في البر هم عظيم وقد قالت العرب ( أن ترد الماء بماء أكيس )
2-توفير الوقت أيضا مهم
3- من قال ان الراحة شينه في البر وش زين الى حصل كشته منظمه ومريحة الله لايحرمنا مادام عندنا وسائل راحة متوفرة .
4- ترى الكسافة شينه
المهم الموضوع فيه نقاط ينبغي أن نتأكد منها
1- الصحة
الأكل بدسوس بلاستيك أو على سفرة البلاستيك خطر عظيم ولا يعني أنها قد تسبب الأذى مباشرة فكما هو معروف أن السموم تتراكم شيئا فشيئا قد يستطيع الجسم التخلص منها وقد لايستطيع لاسمح الله فلماذا أوذي نفسي.
يوجد في الصيدليات ( سائل هلامي الشكل في قارورة تشبه قارورة الصابون اسمه هاند جل أو شيء قريب من هذا لاتحتاج معه إلى الماء ) ولكن أيضا يجب أن نتأكد منه صحيا
2- المواعين التي تستخدم لمرة واحدة جيدة ولكن ينبغي أن نتأكد أننا لانرميها في أماكن التنزه وأحسن حل لها
إما تجمع وترمى في أقرب مكب زبالة أو تدفن في أماكن بعيدة عن أماكن التنزه
إذا عدمت الصابون أو كان في القدر والصحن بقايا طعام لاصقه فترى الرمل الخشن فعال جدا وحتى للأيدي فجربوه.. و وكذلك نبات الحمض إن كان قريب منك أو الشنان فهما يعملان عمل الصابون تقريبا
3- الغسيل بالليمون في قلبي منه شيء فهل لنا أن نتعامل مع نعم الله بهذا الشكل ... لاأدري
4- إذا تريد تستخدم الماء فلا تغسل من خزان السيارة أو الجراكل مباشرة حتى لاتسرف في استخدام الماء استعمل ابريق وصب شوي شوي

[ملقاط]

يالله لك الحمد

انا قلت ها الفكرة بتفكنا من غسل القدور والصحون

طلعت تفكر وشلون اتغسل يدك

مااااااااش والا ان كان تغكيرك بغسل يدك بس

اظاهر ما انت بذيب وهب ريح بطلعات مغير تبطح بالخيمة :)

مثل واحد من الشباب يقول انا كل مابغيت اقوم اشتغل معهم يحلفون علي

يقولون انت نبيك تسولف بس

هو مبسوط على باله انة راعي سوالف وماسك الجلسة
مايدري انه دابل كبودهم بجلستة وانهم ينغزونة وهو مايفهم

هههههههههههههههه
بس بقولة عن طريقتك السحرية

ههههههههههههههههههههههههههههاي

[عود رمث]

احبيبي ملقاط

والجميع كل عام وأنتم بخير ..

لكن اللي مايعجبه الموضوع رجاء فضل منه وإحسان ( لنفسه ) يسكت ولا أحد يلومك على سكوتك !!
أجبرك أحد تكلم ؟؟

وما وضع هذا المنتدى إلا لنستفيد من تجارب بعضنا .. ولا يلزم إنها تناسب كل من قراها .. أو تعجبه ..

==== انا أتحدا أي واحد ممن انتقد هالفكرة أتحداه إنه يطلع للبر مثل طلعات القدامى .. بدون سيارة ولا أدوات إلا الضروري جدا جدا جدا .. ثم يقوم بصيد غداه وعشاه بدون سلاح ( أقصد البندق لأنه حديث أظنه ما يتناسب مع جلافة وخشونة البر !! )!! ويشب النار بدون كبريت ولا يستخدم لمبات ولا... ووو حتى ناصل استخدام الإحداثيات للأماكن البعيدة أو المجهولة .. ويجلس عدة أيام على هالحالة ..
وأقل الأحوال لايستخدم صابون لغسيل يديه أو أواني الطبخ ..

و طلعات البر تراها تتم الرجوله فيها لو إنك ماغسلت بالماء البارد !!


مع شكري وتقديري لصاحب الموضوع - راعي الدتسن - ولكل من أفادنا بأمور تسهل علينا طلعاتنا وتوفر الجهد والوقت ..



وسلامتكم

[خيال الغلبا]

أخوي الله يحفظك إن كانك عجاز الى هالدرجة
فأنصحك بالبسكوت والشاهي


علما بأن هناك طريقة أخرى الا وهي نصف ليمونه تزيل كل ماعلق بيديك من سمن ودبق
ولاتواخذني على لقافتي

[مكشوتي]

الله يخلي الصابون الطبيعي ...

التراااااااااب :D

[* ضب *]

الا فيه طريقة لليدين احسن مجربه وفيها فايدة للي في رجليهم شطوب مثل اخونا السماوي الله يشفيه
وهي ان الواحد بعد العشا اذا لحس اصابعه يفركهن في رجلينه استفاد
راحه .. ودهون.. ويفتك من الغسيل :D
اما القدر فيستعمل كما ذكر احد الاخوة علبة النيدو (اطبخ ..ونطل)
اما الصحون فامرها هين
عندك صحون البلاستيك
او وانك تحط السماط فوق الصحن

وفيه حل احسن من هذا كله

اقعد في البيت وكبر المخدة وشلك والغثا
برد ..وحر. .. وبق .. وتغسيل صحون ..
يارجال الراحة الربح.:D

[بن نويشر]

أهم شيئ التعاون الفعال بين الجميع وتوزيع العمل على الجميع ،،،

وفكونا من ضيوف الشرف ..

تحياتي المندفع بقوة (سنيدي)

[خوي حسن]

السلام عليكم ورحمة الله وبركاته
افا بس وشهالهرج دسوس بلاستيك ملاعق مناديل معطرة
الى وراى ماتصير الكشتة في ملحق البيت مهوب احسن
والله يالرجاجيل لمنك سميت بالله ثم ضربت بالخمس من نعم الله
ثم لحست ادياتك ثم فركت ادياتك مع بعض والله انه احسن من جميع
الكريمات وكانك ماتبي يبقى ريحه بدينك جبلك منديل فاين وحط عليه
اشوي صابون وربصه بالماء وفرك ادينك بوه والحمد لله
اما تنضيف الصحن جبلك خيشة رز مع خمس نقط فيري مع بيالة
ماء وفركه فركتين ويادار مادخلك شر
يجماعة الخير لا تطرون دسوس بلاستيك ملااعق مناديل معطرة
تراه تضيق الصدر
اضرب بخمسا ولاتاكل بملعقتا
ان الملاعق للنعمائي كفرانو
تحياتي للجميع

[الجوني]

Originally posted by أيمن
والله فرحت !! أحسبك تبي تفكنا من غسيل المواعين ..
يا بعدي كانها على اليدين فأمرها هين:) ..

مشكور يا راعي الدتسن على هذه المشاركات المتوالية والتي تحمل بين طياتها الكثير من الفائدة ..

تحيتي

[line]

نفس شعورك انا جيت اركض

[ابن عجيم]

السلام عليكم ورحمة الله وبركاته

حلات المكشات بتعبه وشطته

[راعي الدتسن]

اشكركم على تفاعلكم مع الموضوع










والله يجزاكم خير

[هاوي نفود]

طيب وش رايكم بالببسي ...

تراه شي في غسل اليدين ...

وبالنسبة للدهون ترا مالها أثر بعد ما يمر عليها الببسي ...

وبجربها على المواعين وأرد لكم ...

تحياتي ...




http://www.mekshat.com/pix/upload/sign/images/mk9302.gif