مشكلة في الباترول....

[m666]

السلام عليكم

مساكم الله بالخير

ياجماعة عندي باترول 91 ومن يوم ما بدا يبرد الجو وانا في مشكلة امل ان يحلها احد..


المشكلة تكمن في الصباح عند تسخين السيارة ... السيارة ترتجف أو تنتع ويطلع منها دخان فما ادري ليش

مع ان توي منضف الكرليتر وكل شي سليم واذا سخنت السيارة ماتشوف ما ازين منه ولا دخان ولا غيره

هل للبلف حق الحرارة علاقة ... ارجو من الجميع التفاعل وحل المشكلة وله مني الدعاء

وشكرا

[najazy]

آسف لأني رديت وأنا ماعندي علم لكن
أتمنى من الأخوان إنهم يفيدونك
ولاتكلف عليك شي وأنا رأيي مادام السيارة سليمة ماله داعي الحرص الزايد
يعني إذا الرجه تقعد دقيقة وتروح فأنت إسحب علية وإذا هي مبلشك حتى بعد ما تمشي فأنت صلحه الله يصلح قلوب المسلمين

[قناص الوعول]

ارتجاف في السياره في الصباح عادي جدا ـــــــــ السيارات الجديد ترتجف اذا جيت تحميها في الصباح ويطلع منها دخان على خفيف .
اذا كان هناك رجه عطه دعستين بنزين قبل ما تشغل وتخف الرجه .وشيك على كراسي المكينه يمكن جلدها خربانه

[ابو فرح1]

يمكن فيه تهريب بقاعدة الشكمان اللى واصله بالمكينه

لانه اذا حصل تهريب تسوى رجه للمكينه شيك عليها .

واتمنى لك التوفيق

[تنوم]

فيه شفاط تماتيك بنفس الكلبليتر يمكن عطلان او عطه دعستين قبل التشغيل

[المتليك]

فيه مواصير (لي) اسود وبعباره اخرى هوز صغير تلقاه مشبوك بالكبليتر شيك عليه تقاه يمكن به شق صغير وهذا سبب المشكلة
ربي يرعاك

[قراعيط]

اناصارلي زي ماحصلك وغيرت الكلبليتر وكلفني حوالي 2000 وركبت مراوح سوبارو وارتحت من كل شي التفتفه والكربون والحين زي العسل ماشالله

[tiger1]

وانا مع اخوي المتليكتأكد من الليات اللي موصله مع الكلبليتر احتما كبير فيها تنسيم .انصحك تغير جميع الليات الموصله مع الكلبليتر تراها ما تكلفك شي كلها لي بطول متر ونصف نفس المقاس بحدود 25 ريال وغيرها بنفسكماتحتاج ورشه .وانصحك قبل نزع الليات تضع علامات عليها (الغير متخصص ) .بالتوفيق .....

[ابو ليان]

صمام التسخين يقفل زيادة عن الازم وفية مسمار لوزنيته واذا مازينوه لك ثبت صمام التسخين شوفه الغطاء المتحرك على فتحة الكربريتر العلوية

[الأشجعي]

يا أخي انا عندي نيسان 91
الزبدة (كلنا في الهوى سوا)
طبيعي جدا لا وازيدك من الشعر بيت وقت البرد الصح ما تقدر تمشي إلا بعد 5 دقايق :d
المهم حاول انك توقف السيارة عكس الهوى في البر (يعني الهوى يجي على شنطة السيارة)
واذا انت مرة حط كرتون ولا قصدير على الكبوت(في البرد)

[shaheenshah]

صمام التسخين يقفل زيادة عن الازم وفية مسمار لوزنيته واذا مازينوه لك ثبت صمام التسخين شوفه الغطاء المتحرك على فتحة الكربريتر العلوية
انا مع ابوليان المشكلة في صمام التسخين
واستبعد ان تكون المشكلة من ليات الهواء لان الليات لو فيها تهريب هواء كان ترج السيارة في كل الأوقات بس مشكلتك تقول انها في بداية التسخين

[NissaN 1990]

رجعه للميكانيكي اللي صفالك الكربريتر وخله يوزنلك الحساس حق التعليق اللي إذا شغلت السياره وهي بارده يخليها تعلق من نفسها وهو يجي مع الإصلاح حق الكربريتر إذا أنك مغيره جديد ولا يقدر يوزنه إلا إلين تبرد السياره..