طاالعين الاسبوع الجاي بحول الله .. بس ويييييين؟؟

[تيتشر]

احلى سلام للأخوهـ المكشاتيين

ناوين نطلع الويكند الجاي حنا وخوالي ( عوائل )

ونبي مكان نفود نظيف وبنفس الوقت مهوب بعيد

المكان المقترح مبدئيا سعد

هل فيه اقتراح آخر

لحد يقولي الثمامه مالي خلق مبزره ودبابات

تحياتي

[عاشق ا لمطر]

والله يالغالي ماحولك بر قريب:confused: !!!!!!!!!!!!!!!!

[القمم]

إذا كنت تبي تخيم
فمالك إلا الدهنه
أما إذا كانت طلعه بسيطه
أقرب شيء عندك الزويليات على طريق الخرج
نفودها نظيف ولا فيها زحمه

[دغيم1]

السلام عليكم
حياك الله أخوي
بالنسبة للأماكن الجيدة
عندك منطقة نساح ، رمل وجبل
جنوب هجرة الأوسط
أو إمتداد شعيب الحائر باتجاه وادي نساح منطقة رملية وجيدة ويوجد أشجار
كذلك لديك شعيب الرمحية أشجار ومنطقة جيدة وقريب من هجرة الرمحية
تقبل تحياتي

[راعي تميم]

عندك ياطويل العمر طريق القصيم بعد نقطة التفتيش منطقه سهله وصياهد بالتوفيق سواء يمين او يسار
راعي تميم

[د.كبسه]

سعدحلوه وعندك ياحبيبي على خط القصيم بعد مفرق الحسي محطة وزن الشاحنات وراها فيه نفيدات
مافيه الا أنت (لاتنسون أورادكم)

[sosososo]

السلام عليكم
مزاين ام رقيبة
في الاسواق والتجمعات وكل ماتريددددددددددددددد

[مشوت قواطي]

فيه مكان يحبة قلبك وقريب انشاء الله
المكان ( يسمى المشاعلة على طريق مكة بعد المزاحمية ) مكان هادي ونفود والعائلة تاخذ راحتها في ها المكان وفيه أقرب منه يسمونه ( ابرق اعبيد ) هذا بعد الكديه بعد اقصور مقبل .:good: ......


مع التوفيق

[ماطور]

ممكن تكملون معروفكم وتعطونا إحداثيات
الواحد بعد ذا الأجهزة صار كسول ياخذ وصف

[أبو علي 444]

عندك شعيب عبيثران ثادق عند مفرق طريق صلبوخ -القصب

نظافة وبرااد وفلة حجاج ..

وإذا تبي طعس عندك قبل محطة العتش على طريق القصيم السريع ..

تحصل معبر جمال هناك طعيسات يحبها قلبك ..


ولاتنساني من دعائك

[ابومحمدالراحل]

الدهنا وبس ،،،،،،،،،،،،،،،،،،،،،،،،،،،،،،،،،،،
لي تعديت عرق التنهات أفرق يمين نفود ولاأحسن منها وعندك أرطى ولا أحلى منها

بالتوفيق

[بحر الظلمات]

انا ماني من اهل الرياض والشباب ماقصروا معك ومن رايي انكم تختارون مكان مناسب للاطفال والعوائل والباقي بسيط اهم شي تطلعون تغيرون جو