ما هي أصول وفن ومهارات التطعيس ؟ هنا ... كل يدلي بدلوه ... شاركنا الرأي والمشورة

[عالي الصيت]

بسم الله الرحمن الرحيم


حياكم الله ومساكم الله بالخير

دائما ما نسمع مقولة منتشرة وشهورة في التطعيس وتقول المقولة : التطعيس على السواق وليس السيارة

( هذا في الغالب )

فقد تجد موتر عادي يطعس احسن من بعض الجيوب !

فهنا في هذا الموضوع نريد من كل عضو في هذا المنتدى ( الغالي ) أن يخبرنا عن أصول وفن ومهارات التطعيس

كلكم شاركوا كل يخبرنا عن هذا الموضوع بحسب : تجربته وخبرته أو بحسب ما سمع او بحسب ما شاهد

علمنا أسرار التطعيس بحسب خبرتك

[بدوي جنوبي]

اعطيك واحد من اسرار التطعيس

تنسيم الكفرات

والباقي علي الشباب

تحياتي لك

[دايم البر]

نسم الكفرات ولاتوقف في المنحدرات

[ابوجعفر]

انا اعطيكم من اسرار التطعيس

اذا كنت تمشي بنفود او طعس لا تضغظ البريك فجاة

[NuMaS]

بـارك الله فـيك أخي
مثل ما ذكروا الشـباب أهم شيئ تنسـيم إطارات السـيارة
بين الــ 10 إلــى 20 حيب المنطقة
وبعـدين السـايق و مهاراته مهمة جــداً
وأتـرك الباقي للشـباب

تحـياتي .. وتقبلوا مــروري

سـبحانك أللهم لا إله إلا إنت أسـتغفرك وأتـوب إلـيــك

أخوكم/ V.8.4X4

للتواصل: V.8.4X4@hotmail.com (V.8.4X4@hotmail.com)

[نجم الوادي]

طري 17
واستخدم فن المحاكاة مع الموتر
وخل العيون جرادة مع سطح الارض

[أبو صندوق]

أخي الكريم : عالي الصيت
وضع القيرعلى نمرة مناسبة وعدم التغيير مع مراعاة الدعسة المناسبة والثابتة ( وشبه الثابت لكن مناسبة )
تعديل الطارة وإذا احتاج للف السيارة يكون ذلك بتدرج ..
ترامي ماني مطعس ولا عمري طعست .. لكن خبرتي في ( القيزان ) اللي بالديرة ..
القيزان : الكثبان الرملية .

[الساهر2003]

الرمل مثل السيل داره مادمت بداره وامش في مجاريه ولا تمشي في مذاريه وابعد عن(الرباظة) وهي سهول رملية منبسطه والتنسيم افضل علاج لرمل والتنسيم الخفيف لطين يعني تخلي في الكفر 20 او 15 وامش في الطين زي الحلاوة
والتطعيس فن منها فن جنون وهو المراقى اللي ماله سنع رايح جاي تفجير مكاين وقيور وفن هادي تطعس وانت تشرب شاهي ومنسم الكفر 10 ولا شغلت الدبل
والمطعس يجب ان يكون معه عزيمة قوية اذا نوى يرقى يرقا مو يتردد ولا يديور هذي ماترحم ولا ينزل مع سيف و يهون
وللمعلومية كل من غرز انه بيطلع بالثقيل لا
يوجد نقر او فناجيل لا يصلح لها الا الدبل الخفيف والاول او الثاني لان الخروج منها بوسيله واحده وهي السرعة فقط

[المُغير]

عند الوصول إلى قمة الطعس عليك عدم التردد ومواصلة السير بهدوء وثقة حتى ولوكنت ترى عمق وبعد المكان اللذي ستنزل له ( عمق النقرة ) المهم أن تكون مسيطرعلى السيار لا تدعس على الفرامل وستنزل السيارة بانسياب .

[الهجاني]

الذي يريد شق الطعس لا يمشي عمودي امش على الجنب والقير على الثالث على أساس مانعدم العزم

وشكراً

[ع.ف.الدرويش]

الاصل فيها.. القلب الجامد والهدوء بالقيادة مع الميل الى الحذر لان النفود ماهي واحده واحيانا تتفاجأ بوجود نكبات فلا بد من الهدوء بالتعامل معاها حتى وان كان سريعا وبالاخير ما يضر لو الواحد يغرز لانه يتعلم دائما والأهم بالغراز انك ما ترتبك ولا تنفعل لانك لحظتها تتعب نفسيا وجسديا ولا تقدر حتى تسوي شيء يعني ممكن تجلس بمكانك مثل المريض ولا حتى تدبر عمرك وايضا يمكن تأثر على نفسية اللي معاك بالذات ان كنت مسؤول عنهم مثل الابناء او العائلة..

والله يحفظنا واياكم من كل شر

[ع.ف.الدرويش]

اضافة الى الرد السابق.. موضوع القيادة بدبل او بدون دبل ماهو مقياس على الفهم او الغشامه لانه احيانا اللي يسوق بدون دبل تكون سواقته فيها طفاقه وسرعه زايدة عن اللزوم وهذه اكبر غشامه بالمقابل آخر يسوق السيارة وهو مشغل الدبل وبهدوء وركادة.. واعتقد ان الدبل ما صمم ولا تم تصنيعه في الجيوب الا علشان يريح القير والدفرنس ولا يكون فيه جور على الموتر وامثالكم يعرفون فرق بين جيب وهايلوكس او ددسن..

[رزم الغرب]

للمعلومية الرمل في نجد ارتفاعه تدريجي من ناحية الغرب و ( عزاز ) أي صلب . أما من ناحية الشرق فارتفاعه فجائي أغلب الأحيان والنقرة لها مخرجان من الناحية الجنوبية الشرقية والشمالية الشرقية . وتعاريج الرياح كلما تقاربت فا الأرض عزاز وكلما تباعدت فالأرض( هيار) أي غير متماسكة . وحبة الرمل الناعمة في المذاري هيار . حاول أن تقترب من( العثامير ) لأن الأرض أصلب كما يجب أن تكون في الأعالي وأنت تسير بسيارتك لأن الأرض في هذه الحالة صلبة كما في الأسفب أما الهيار فإنه يكون عادة في نهاية الإنحدارات من الأسفل أو في ( المسافط ) أي بين ارتفاعين

[برادو vx]

أهم شي إنتبه من السيوف . .

وإذا نزلت من سيف أقشر انزل عدال لأنك لو لفيت مع شوي فرامل ممكن لا قدر الله يحدث انقلاب . .

يروح الوجه ولا تروح السيارة كلها مع ضرر للركاب . .

[عالي الصيت]

أسأل الله ان يكتب أجركم ويجزيكم خيرا على معلوماتكم القيمة والمفيدة

[Y A S S E R]

موضوع رائع ..

أهم شي التنسيم الى 15 ,, وكذلك الدبل الخفيف .. وكذلك الانتباه من قمه الطعس عدم ظرب الفر امل بقووة

[رجل كريم]

اضافة الى الرد السابق.. موضوع القيادة بدبل او بدون دبل ماهو مقياس على الفهم او الغشامه لانه احيانا اللي يسوق بدون دبل تكون سواقته فيها طفاقه وسرعه زايدة عن اللزوم وهذه اكبر غشامه بالمقابل آخر يسوق السيارة وهو مشغل الدبل وبهدوء وركادة.. واعتقد ان الدبل ما صمم ولا تم تصنيعه في الجيوب الا علشان يريح القير والدفرنس ولا يكون فيه جور على الموتر وامثالكم يعرفون فرق بين جيب وهايلوكس او ددسن..




كلام عقلاني :good:

اتفق معك ..

تحياتي ..

[milanteam]

السلام عليكم.
الشباب كفوا ووفوا..
لكن اكرر عدم الارتباك والفرامل الفجأة خطير.. طلوع الطعس والنزول منه يجب الا يكون بشكل عمودي وانما مائل .. ضبط النفس مهم ويزيد ذلك مع الممارسة .. إذا كنت في أعلى الطعس وواجهك سيف لا تتردد وتذكر دائما أن السيف يكون من جهة واحدة فقط اي اسلك الجهة الأخرى.

تنسيم ، دبل ، عدم تهور..... والأهم وماتغفل عنه الناس دائماً:
حزام الأمان... في أثناء القيادة ككل.. ولكن دون التفريط ابدا في الطعوس والبر عموماً.. لأن طمرة واحده اثرك في مكان الراكب.. بعدين نشوف من يوقف السيارة.. اضف انه حوادث الطعوس يغلب عليها الانقلاب والحزام خير حافظ بعد الله لهكذا حوادث.
والسلام عليكم.

[الباثفايندر3]

نسم الهواء على 10 والدبل الخفيف

[ابوعزوز]

عندي تنسيم الكفارات اهم من الدبل ودليل كثير من الجيوب تغرز بسبب عدم التنسيم

[حاتم نجد]

اهم شي المسايس ماهو كل شي يجي بالقوة
والدبل وقت الحاجة لكن اهم شي انك تكون جزوم خص وقت الزحمة مثل الثمامة دايم نشوف حوادث داخل النفود
لازم تكون جازم يعني لا تهوز اذا لفيت لف لا تردد لان كل الناس آخذين النفود سرعة وهو لا مسايس
والله الحامي سبحانة

[اول الحب]

طيب يا شباب الحين ابي اطعس وسيارتي لاند كروزر تما تيك نسمت الكفرات طيب وبعدين اضغط الزر (اي الدبل الخفيف لحاله) والا لازم الدبل الثقيل ونمره ثقيله 000 يعني تطعيس تمشيه مو تحدي ابي الرد الله يخليكم وتسلمون على طيلة بالكم

[LOGAMALOGA]

السلام عليكم.
الشباب كفوا ووفوا..
لكن اكرر عدم الارتباك والفرامل الفجأة خطير.. طلوع الطعس والنزول منه يجب الا يكون بشكل عمودي وانما مائل .. ضبط النفس مهم ويزيد ذلك مع الممارسة .. إذا كنت في أعلى الطعس وواجهك سيف لا تتردد وتذكر دائما أن السيف يكون من جهة واحدة فقط اي اسلك الجهة الأخرى.

تنسيم ، دبل ، عدم تهور..... والأهم وماتغفل عنه الناس دائماً:
حزام الأمان... في أثناء القيادة ككل.. ولكن دون التفريط ابدا في الطعوس والبر عموماً.. لأن طمرة واحده اثرك في مكان الراكب.. بعدين نشوف من يوقف السيارة.. اضف انه حوادث الطعوس يغلب عليها الانقلاب والحزام خير حافظ بعد الله لهكذا حوادث.
والسلام عليكم.


ياسلام عليك

عين العقل

[رجل كريم]

طيب يا شباب الحين ابي اطعس وسيارتي لاند كروزر تما تيك نسمت الكفرات طيب وبعدين اضغط الزر (اي الدبل الخفيف لحاله) والا لازم الدبل الثقيل ونمره ثقيله 000 يعني تطعيس تمشيه مو تحدي ابي الرد الله يخليكم وتسلمون على طيلة بالكم



اللاند كروزر وزنه حول طنين ونصف وبما انك جديد على التطعيس انصحك بالاتي :


1/ المنطقة اللي تطعس فيها لازم تكون مليانة جيوب
2/ لازم يكون عندك واير سحب
3/ نسم الكفرات على 10
4/ استخدم الدبل الخفيف
5/ اذا حسيت الموتر صار ثقيل خل الدركسون سيدة جهة الامام ولا تلف يمين او يسار حتى تزداد سرعة الموتر
واذا ما قدرت تتحكم بالموتر عشق الدبل الثقيل وارجع للخلف هذا اسلم لك الين تصير عندك خبرة في القيادة مع الوقت وكثرة الطلعات ..
6/ اذا بغيت تلف يمين او يسار لا تكسر الطارة مرة واحدة خذها بالتدريج
7/ دائما كن حذر عند الرجوع للخلف واذا كان معك عايلة واطفال خلهم شوف عينك يعني على الرملة جهة السواق ترى الاطفال داهية الدواهي :D
8/ دائما مو في طلعة البر بس اقرا اذكار الصباح والمساء حسب المستطاع
9/ اذا غرزت او طب الموتر في حفرة اذكر الله وتعوذ من الشيطان وخل اعصابك هادية جدا لان الانفعال يخليك مشلول الارادة حتى لو كان الامر بسيط جدا ..
10/ لاتتردد ابد في طلب المساعدة اذا شفت انك ماتقدر تطلع الموتر وهذا الشي ماهو بعيب .. ياما تعلقت مواترنا وغرزنا لين تعلمنا ولله الحمد والمنة ..


بالتوفيق وتقبل تحياتي ..

[وقيان]

خلك حذر جدآ اذا كنت تمشي من الشمال الى الجنوب....

لأن اغلب السيوف...(( الطعوس القص ))..اغلبها وجهها من جنوب...

اذا صرت جاي من الشمال تكون في ظهر الطعس... وفجأة تشوف نفسك هويت الى الاسفل....

انا لم اواجه سيف وجهه الى الشمال...

وطبعآ ذلك يرجع الى ان الرياح بشكل عام في الجزيرة العربية اغلبها شمالية....

و طبعــــــــآ هذا كله يدخل في باب الركاااااااااااااااااااادة....

سواقة البر تبي ركادة . . وانتباه دائم...

[Under_net]

اللاند كروزر وزنه حول طنين ونصف وبما انك جديد على التطعيس انصحك بالاتي :


1/ المنطقة اللي تطعس فيها لازم تكون مليانة جيوب
2/ لازم يكون عندك واير سحب
3/ نسم الكفرات على 10
4/ استخدم الدبل الخفيف
5/ اذا حسيت الموتر صار ثقيل خل الدركسون سيدة جهة الامام ولا تلف يمين او يسار حتى تزداد سرعة الموتر
واذا ما قدرت تتحكم بالموتر عشق الدبل الثقيل وارجع للخلف هذا اسلم لك الين تصير عندك خبرة في القيادة مع الوقت وكثرة الطلعات ..
6/ اذا بغيت تلف يمين او يسار لا تكسر الطارة مرة واحدة خذها بالتدريج
7/ دائما كن حذر عند الرجوع للخلف واذا كان معك عايلة واطفال خلهم شوف عينك يعني على الرملة جهة السواق ترى الاطفال داهية الدواهي :D
8/ دائما مو في طلعة البر بس اقرا اذكار الصباح والمساء حسب المستطاع
9/ اذا غرزت او طب الموتر في حفرة اذكر الله وتعوذ من الشيطان وخل اعصابك هادية جدا لان الانفعال يخليك مشلول الارادة حتى لو كان الامر بسيط جدا ..
10/ لاتتردد ابد في طلب المساعدة اذا شفت انك ماتقدر تطلع الموتر وهذا الشي ماهو بعيب .. ياما تعلقت مواترنا وغرزنا لين تعلمنا ولله الحمد والمنة ..



بالتوفيق وتقبل تحياتي ..


كلام مهم للميتدئين

[الرسن]

ماقصرو الشباب وفو وكفو وكلن عطاك الزبدة
لكن تعلم دائما ان تحمل معك ماطور هواء كفو يوفي ويكفي ويعبي الكفرات تعبية سنعه تراه ضروري
للي يحب يتمشى في النفود اما المتهورين اللي يطامرون مطامر تقل انه مواجر انه يدمر هالسيارة اللي راكبها
لاتقتدي بهم.
التمشي في النفود او الطعوس يبي له ركاده ورزانه وخبرة واحتكاك يعني تمش كل عصرية لوحدك وخلك قريب لاتغامر بعيد وبعدين اركب بحور النفود وغرد كما جيب يعشق طعوس.

[الساهر2003]

للمبتدئين
يجب مصاحبة شخص فاهم في الطعوس وراكد جدا ومن ثم يخاويك واحد فاهم وبعد ماتعرف اساسيات التطعيس طعس لحالك
(مجرد رائي )
والشباب كفوو ووفوو
مع اطيب تحية للجميع

[مقلع الرمث]

والله الجيوب ماتبي سواق نسم وبس العلم على الي ساق ددسن ولا هايلكس دفرنس هذي تعتمد على السواق

[أبو مرضي]

والمطعس يجب ان يكون معه عزيمة قوية اذا نوى يرقى يرقا مو يتردد ولا يديور هذي ماترحم ولا ينزل مع سيف و يهون

عندي ملاحظة بكلامك أخوي الساهر
الا وهي أذا شفت الموتر أرتخى عزمه وأنت راقي الطعس لف للجهه الي الأنحناء يكون أكثر وديور ثم تعال بعزم أكثر
وسلامتك يالغالي

[الساهر2003]

عندي ملاحظة بكلامك أخوي الساهر
الا وهي أذا شفت الموتر أرتخى عزمه وأنت راقي الطعس لف للجهه الي الأنحناء يكون أكثر وديور ثم تعال بعزم أكثر
وسلامتك يالغالي

صحيح اخوي يديور اذا الموتر بيعطيه كامل اللفه لكن اذا عزمه راح وديور الموتر ووقف في النص في بعض الحالات ينقلب مباشرة ولا يثولث الافضل يرجع ريوس
مع اطيب تحية للجميع

[saudi_saudi]

جميع الردود راقيه تدل على وعي وادراك جميع المشاركين ، وحرصهم على السلامه أولا والبعد عن التهورتحيه للجميع

[ذيب بلاده]

السلام عليكم ورحمة الله وبركاته

عندي نصيحه مهمه كثير من الناس أذا شاف السيارة
بدت تغرس زاد الدعسه غلط وأكبر غلط يجب يكون منسم على
التواير(الكفرات) ومعشق دبل الكبير ويبدا يعطي ريس شويش شوي بس هبابه يدور التاير
بيلاقي نفسه في البر :j بس مب أي بر... بر ألأمان بأذن الله


أذا أخطأت بشي خبروني كل ابن أدم خطاء

[مريقب العيفار]

للمعلومية الرمل في نجد ارتفاعه تدريجي من ناحية الغرب و ( عزاز ) أي صلب . أما من ناحية الشرق فارتفاعه فجائي أغلب الأحيان والنقرة لها مخرجان من الناحية الجنوبية الشرقية والشمالية الشرقية . وتعاريج الرياح كلما تقاربت فا الأرض عزاز وكلما تباعدت فالأرض( هيار) أي غير متماسكة . وحبة الرمل الناعمة في المذاري هيار . حاول أن تقترب من( العثامير ) لأن الأرض أصلب كما يجب أن تكون في الأعالي وأنت تسير بسيارتك لأن الأرض في هذه الحالة صلبة كما في الأسفب أما الهيار فإنه يكون عادة في نهاية الإنحدارات من الأسفل أو في ( المسافط ) أي بين ارتفاعين

كلام خبرة وعميق

واحب أاكد على تسيم الموتر

لأن تنسيم الموتر أفضل له من الدبل

[برق4]

أهم شي في سواقة البر الجساره والتعلم من الأشخاص الفاهمين...
والركاده مطلوبه...! وفي اوقات غير مرغوبه ...!عساس تخلص نفسك من التغريز. وخلك جزوم وابعد عن التردد واذا نزلت من طعس وانت على جنب لا تفرمل وما تدري الا انت منتسفي :D :D على جنب سايس الموتر واعدل وجهه للأمام.
وجيد انك تدرب على القياده شوي شوي يعني مو اول ما تعلم سواقة البر على طول تنصى اعلى راس طعس ولا تقص طعس من الجوانب اركد اللين تعلم...

[qwertyu987]

الموضوع قديم

لكن للرفع والفائدة

[منفلوط]

موضوع قيــَم جدا

[anaaloosh]

أسعد الله أوقاتكم بالخير، مع البرد صار وقت التطعيس، لا بد من عمل التالي:
1. تأكد من وجود: منفاخ كهرباء، ورفش علشان التغريز، وماء شرب، وحبل سحب، ولا مانع من وجود سير بلاستيك لوضعه تحت الكفرات عند التغريز
2. حزام الأمان ضروري جداً
3. الأفضل في رحلات البر يكون في سيارتين على الأقل يعني لا تطلع بسيارة واحدة في منطقة معزولة
4. عند التطعيس نسم الكفرات: خلفي 20 أمامي 15 أو خلفي 15 أمامي 10
5. طفي زر ESP(إن وجد)
6. شغل الدبل
7. خليك جريئ ولا يهمك شي
8. السيارة ما تقلب إلا إذا ارتبكت
9. خلي السيارة تاخذ عزم دوران (ممكن بالرجوع بمسافة كبيرة أو بالدوران)
10. لمن تطلع الطعس خلي رجلك ثابتة وزد دعست البنزين إذا حست في حاجة بس إذا حسيت السيارة ما قادرة تكمل وقف وارجع بنفس مسارك
11. إذا لقيت نفسك على حفت الطعس وعالي وما في مجال إلا نزوله لا ترتبك السيارة ما راح تقلب خليك ماشي علطول مع شوية بنزين (ولا تدعس البريك) وللمعلومية الرمل ما يقلب سيارة بس الارتباك يقلبها
12. إذا كنت أعلى الطعس وحسيت السيارة بدأت تغرز زود البنزين شوي إذا ما نفع وقف مباشرة وإنزل وشوف وين التغريز
13. خذلك كاسة شاي إذا كنت مرتبك ومن بعدها شيل الرفش ومهد الطريق من تحت الكفرات وجنبها وتحت السيارة وارجع عطيها بنزين وبتطلع بإذن الله
14. إذا ما طلعت سوي التالي: شوي قدام شوي ورا (شوي يعني سم) وعليها إلى أن تطلع (بالكثير 20 دقيقة)
15. في حال علق الجير (في الأوتوماتيك) لا تخاف عادي طفي السيارة شوي وشغلها بيشتغل
16. أهم شي إذا شفت واحد متوهق ومغرز لا تضحك وتمشي على الأقل وقف وحاول تهدي أعصابه
17. في التسييف لا تضغط بريك ولا تخفف السرعة وإلا بتنقلب، عطيها وخليك معطيها وما راح تنقلب بإذن الله سبحانه وتعالى
18. طلب المساعدة ما هو عيب والتغريز ما هو عيب، العيب إنك ما تحاول
19. حزام الأمان لك وللي معاك أهم من كل ما ذكرنا سابقاً
20. سؤال اختباري: في حال علقت السيارة على حفت الطعس (يعني من الخلف على الأرض ومن الأمام بالهوا) ماذا تفعل؟ :D

[المشنقة]

هناك التطعيس (صعود النقيان) أو(المراقي)

وهناك القيادة في الرمال (بين العروق )

العامل الأول الكفر ونوعه ومقياس الهواء داخله

العامل الثاني نوع السياره

العامل الثالث الدفع الرباعي والعايدي

العامل الرابع نوع مغير السرعة اوتوماتيك ام عايدي

العامل الخامس التحميل أو الحمولة بعكس السيارة الفارغة

العامل السادس اختيار النمرة المناسبه 1-2-3
تعشيق الدبل احيانا تحتاج الي الثقيل بنمرة 3

لأنه لايبرد

الأخير اختيار الطريق المناسب لصعود النقاء

[aaaa73]

تنسيم الكفرات ولا توس فجاة ولا تتبع جرت المواتر الي قبلك قدر الامكان

[أبو أصيل 07]

السلام عليكم ورحمة الله وبركاته

أنا عندي ميركوري مونتنير 6 سلندر بدون دبل

ياليت اللي يعرف يعطيني طريقه بحيث إني أطعس به بدون ما يغرز

وجزاكم الله كل خير :good2:

[أبو أصيل 07]

السلام عليكم ورحمة الله وبركاته

أنا عندي ميركوري مونتنير 6 سلندر بدون دبل

ياليت اللي يعرف يعطيني طريقه بحيث إني أطعس به بدون ما يغرز

وجزاكم الله كل خير :good2:


للمعلومية موديل السياره 2002 والقير علاقي أوتوماتيك ;)

[بن نويشر]

أهم شي إنتبه من السيوف . .

وإذا نزلت من سيف أقشر انزل عدال لأنك لو لفيت مع شوي فرامل ممكن لا قدر الله يحدث انقلاب . .

يروح الوجه ولا تروح السيارة كلها مع ضرر للركاب . .

عزا الله انك صادق ، من اسبوعين حدث هذا الموقف والصراحة اني توهقت وكدنا ننقلب إلا شوي لكن الله لطف ، وبفضل الله ثم الجماعة استطعنا ان ننزل السيارة ..

وفي نظري ان هذا الموقف مهم جداً للأخوان واتمنى التوسع فيه بإسهاب ..

حدث لي هالموقف في الدهناء ، كنت داعس وطالع النفود على جنب واتضح المكان مقص وكسرت يمين ولكن صارت النزله سيف اقشر غطس وجه الموتر وارتفع مقفاه .. فقمنا بدفن الكفرارت على الأجنب الأيمن وحفر الجزء الأيسر لكي يسقط الموتر ..

سلامات للجميع ،،،

[بن نويشر]

أسعد الله أوقاتكم بالخير، مع البرد صار وقت التطعيس، لا بد من عمل التالي:
1. تأكد من وجود: منفاخ كهرباء، ورفش علشان التغريز، وماء شرب، وحبل سحب، ولا مانع من وجود سير بلاستيك لوضعه تحت الكفرات عند التغريز
2. حزام الأمان ضروري جداً
3. الأفضل في رحلات البر يكون في سيارتين على الأقل يعني لا تطلع بسيارة واحدة في منطقة معزولة
4. عند التطعيس نسم الكفرات: خلفي 20 أمامي 15 أو خلفي 15 أمامي 10
5. طفي زر ESP(إن وجد)
6. شغل الدبل
7. خليك جريئ ولا يهمك شي
8. السيارة ما تقلب إلا إذا ارتبكت
9. خلي السيارة تاخذ عزم دوران (ممكن بالرجوع بمسافة كبيرة أو بالدوران)
10. لمن تطلع الطعس خلي رجلك ثابتة وزد دعست البنزين إذا حست في حاجة بس إذا حسيت السيارة ما قادرة تكمل وقف وارجع بنفس مسارك
11. إذا لقيت نفسك على حفت الطعس وعالي وما في مجال إلا نزوله لا ترتبك السيارة ما راح تقلب خليك ماشي علطول مع شوية بنزين (ولا تدعس البريك) وللمعلومية الرمل ما يقلب سيارة بس الارتباك يقلبها
12. إذا كنت أعلى الطعس وحسيت السيارة بدأت تغرز زود البنزين شوي إذا ما نفع وقف مباشرة وإنزل وشوف وين التغريز
13. خذلك كاسة شاي إذا كنت مرتبك ومن بعدها شيل الرفش ومهد الطريق من تحت الكفرات وجنبها وتحت السيارة وارجع عطيها بنزين وبتطلع بإذن الله
14. إذا ما طلعت سوي التالي: شوي قدام شوي ورا (شوي يعني سم) وعليها إلى أن تطلع (بالكثير 20 دقيقة)
15. في حال علق الجير (في الأوتوماتيك) لا تخاف عادي طفي السيارة شوي وشغلها بيشتغل
16. أهم شي إذا شفت واحد متوهق ومغرز لا تضحك وتمشي على الأقل وقف وحاول تهدي أعصابه
17. في التسييف لا تضغط بريك ولا تخفف السرعة وإلا بتنقلب، عطيها وخليك معطيها وما راح تنقلب بإذن الله سبحانه وتعالى
18. طلب المساعدة ما هو عيب والتغريز ما هو عيب، العيب إنك ما تحاول
19. حزام الأمان لك وللي معاك أهم من كل ما ذكرنا سابقاً
20. سؤال اختباري: في حال علقت السيارة على حفت الطعس (يعني من الخلف على الأرض ومن الأمام بالهوا) ماذا تفعل؟ :D


الله يبض وجهك .. شكلك خبره ما شاء الله عليك .

بس ممكن توضيح النقطة الـ 17 الله لا يهينك يعني إذا طلعت السيف وجيت بنزل وكان السيف نزوله قوي الف يمين ولا امسك فرامل واخليها يجي على وجه ولا وشلون ؟؟

[ابوكشتات]

مثل ماقالو الشباب بس اهم شي ان اللي راكب معك يسكت لأنه هو اللي يربشك بالتطعيس ( رح يمين رح يسار ) وهاذا اللي يخلي الواحد لاقدر الله ينقلب . اذا انت اللي تطعس سكت اللي راكبين معك .

[أبو أصيل 07]

السلام عليكم ورحمة الله وبركاته

أنا عندي ميركوري مونتنير 6 سلندر بدون دبل

ياليت اللي يعرف يعطيني طريقه بحيث إني أطعس به بدون ما يغرز

وجزاكم الله كل خير :good2:

ياشباب تكفون أحد يجاوبني لأن ناوي أطلع نهاية الأسبوع ذا إن شاء الله

[Joker fj]

رأيي الطريق اليي ماكد جربته لاتسرع. به والسيف لاوصلته سايروه. ولاترخي قير التماتيك بالبر ولاتخليه يبدل واجد.
ومن خاف سَلَم
تم الإرسال من جهازي GT-I9300 بواسطة تاباتوك 2

[تميم2222]

والله الموتر له دوور كبير ... ونشاطه بعد ..والاهم من ذالك السواق ....والتطعيس فن وركاده ..والمتهور يتحمل اللي يجيه .

[أبو أصيل 07]

يعطيكم العافية

لكن باقي سؤال واللي هو إذا غرز الموتر وش أفضل طريقه أخرجه بها

[sgl2002]

دعس خفيف وتلف يمين ويسار مع الدبل الثقيل

[أبو أصيل 07]

دعس خفيف وتلف يمين ويسار مع الدبل الثقيل

طيب موتري بدون دبل

وش الحل ؟؟

[وجعين]

اركب معي وعلمك عى الطبيعة

[أبو أصيل 07]

اركب معي وعلمك عى الطبيعة



مشكور ياخوي بس أنا أشوف ناس كثير بالطعوس وما عندهم دبل وماشيه أمورهم

فقلت خلني أجرب بنفسي بس الواحد لازم يكون عنده شوي معلمات علشان يعرف كيف يتصرف بالمواقف اللي ممكن تصادفه

والله يعطيكم العافيه

[تميم2222]

ابد نسم الكفرات ... ويسهل الله امرك .... لكن فيه اماكن مستحيل تدخلها بدون دبل ...والله يوفقك

[حسين2002]

إذا غرزت لا تدعس على البنزين علشان ما يبرك الموتر على بطنه
تنزل هواء الكفرات تحاول تزح الرمل اللي حول الكفرات بعدها حاول تطلع للإمام والخلف حتى تسوي لك سكة واذا حولك احجار او اعواد حاول تحطها تحت الكفر لكي يسهل خروجك من الغراز

[أبوخالد501]

السلام عليكم اخوي ابو آصيل ,,


آسمع يالغالي موتركك الميروكي والله ماقد مر عليه من قبل بس آذا كان قير عادي وزنه خفيف ودفع خلفي بيمشي معك زي الحلاوة ان شاء الله بس يبي لك تنسم ل 10 او 14 اما اذا قير تماتيكك ودفع خلفي فيبغا لكك شدة عزمم عليه عشان مايطيح الموتر وخل ممشاك دايم على الروس الحمر(جوانب الطعوس)
وان شاء الله تسآهيل وانا اخوك وحاول انكك ماتوقف قدر الامكان واذا جيت توقف وقف في مكان مستوي لا هو نازل ولا هو طالع عشان يمديك تحرك بعدها ولا تروح مواقع بعيدة لن يمكن تحتاج المساعدةة
,, وهذا الي عندي يالغالي وموفق ’’

[أبو أصيل 07]

السلام عليكم اخوي ابو آصيل ,,


آسمع يالغالي موتركك الميروكي والله ماقد مر عليه من قبل بس آذا كان قير عادي وزنه خفيف ودفع خلفي بيمشي معك زي الحلاوة ان شاء الله بس يبي لك تنسم ل 10 او 14 اما اذا قير تماتيكك ودفع خلفي فيبغا لكك شدة عزمم عليه عشان مايطيح الموتر وخل ممشاك دايم على الروس الحمر(جوانب الطعوس)
وان شاء الله تسآهيل وانا اخوك وحاول انكك ماتوقف قدر الامكان واذا جيت توقف وقف في مكان مستوي لا هو نازل ولا هو طالع عشان يمديك تحرك بعدها ولا تروح مواقع بعيدة لن يمكن تحتاج المساعدةة
,, وهذا الي عندي يالغالي وموفق ’’


أخي أبو خالد جزاك الله خير ولا مهونة للأخوان الباقين
بالنسبة لموتري أتماتيك دفع خلفي ووزنه 1984 كيلو

وإذا تبي تعرفه إدخل على خيمو الأحوال الجوية وشوف موضوع تغطية أجواء مكة راح تلاقي صور له هناك

والله يعطيكم العافية على معلوماتكم الطيبة