مشكلة في الفورتشنر

[قروي الأول]

السلام عليكم ورحمة الله وبركاته


يسر الله لي وشريت موتر فوتشنر من عبداللطيف جميل والحمد لله ماشي زي الحلاوة لكن العيب اللي عندي ومضيق خلقي



هو تهريب الهواء لداخل السيارة (المقطورة) وسألت بعض ممن يملك السيارة فقالوا لي أنها مشكلة عنددهم جميعا .




السؤال للجميع :

1.من يلقى لي حل للمشكلة

2.سمعت أنهم يحشون الربلات بليات صغار وقيل لي أن الحل هذا وقتي

3.الوكالة ما عندهم حل يقولون ما في يدنا إلا تغيير الربلات ومادامت السيارة جديدة فلا يمكن تغييرها



وجزاكم الله خير

[hdd4004]

كذابين الوكاله حتى المحلات لو حلو المشكله يكون مؤقت وترجع المشكله مره ثانيه خل الوضع زي ما هو هذا الباثفيندر عندي تقول ددسن موديل 84 مدام السياره ماشيه زين ولا عندك خرابات احمد الله وشكره ترى الحرص الزايد يجيب الوسواس

[الساهر2003]

للمعلومية اغلب السيارات الجديدة يوجد تنسيم ولا يبين الا مع المطامر الجامد يلين الحديد ويميل ويتغير صوت الباب اذا صكيته
وللاسف لحقت باللاند والشاص وغيره من السيارات اليابانية المنشأ

[.أبوعبدالرحمن]

وانا اخوك كان معي هايلكس 2000 وصوت الهواء فيه احسن من صوت الباث فندر 2003 اللي عندي حاليا يعني شف القهر كيف


اصبر وتحمل اهم شيء الخرابات اذا الموتر خالي من الخربات فا حمد ربك وحب يدك مقلوبة

[الجفن]

اخوي قروي بغيت اسئلك عن موديل موترك الله لا يهينك

[قناص الوعول]

ابشر بالحل الحل عندي لمشكلتك كنت مره جالس مع شباب ونسولف في تنسيم الابواب وقال واحد من الشباب ان فيه ورشة في صناعيه الرياض تصلح اي سياره يجي فيها صوت تنسيم وتعطيك ضمان لمدة شهر كامل واذا سمعت صوت تنسيم ترجع لهم ويصلحونه اتمنى اني ساعدك .... ملاحضه انا لا اعرف مكان الورشه ولا اسمها بس ابحث عنها في الصناعيه وانشاء الله تحصلها

[قروي الأول]

الاخوة الفضلاء شكرا وما قصرتوا

أخوي الجفن موديله 2007

أخوي قناص الوعول

ياليت اسم الورشة وطريقتهم في علاج المشكلة الله لا يهينك

[عاشق برادو]

هذه المشكلة أخوي قروي موجودة عندي في البرادو وسألت واحد من الزملاء فقالي خويه كان عنده نفس المشكلة وراح الوكالة وقالوا صلحوها لكن رجعت المشكلة وبعد فترة خوينا قلب بالموتر وصلح الموتر وراح التنسيم !! ( عسى موترك يروح منه التنسيم من دون بلية)

[الساهر2003]

الله يكفينا الشر التنسيم ولا قلبه
شكلهم ليصوه معجون وشوي ربل

[قروي الأول]

الأخوة الفضلاء طيب


ما فيه حل يعني ؟

[ق ب م 632]

والله انا كان معي كامري فاكه وكاله من ابو جميل ومثل ماهو معروف التنسيم بالكامري رحت لهم وسويت عندهم سالفه طويله عريضه المهم اخذو الموتر وغيروا لي الربلات الى ربلات اكبر من الاوله والحمد لله خفت عن اول كثير لكن هي ماراحت

[بن نويشر]

يا الحبيب لاحظ أنه فورتنر يعني هايلوكس بس مصندق ، والله لو أنه Bmw ولا بانورما .

وعلى فكرة ترى سيارتي فورتنر موديل 2006 Gx2 .

[الثلج الاسود]

انا عندي نفس المشكلة في الفورتشنر 2007 وان شاء الله القاء الحل وافيدكم ،،،،
اخوكم / ابو روان

[الطمار]

اخوي انا عندي فورشنر2007 /4سلندر ومافيه اي تهريب للهوا او صوت ولله الحمد واذا عندك الشي هذا اتوقع انه من الربلات نفسها حاول يوم من الايام انت بيدك تلعب بالربلات تحركها بدون ما تقطعها يمكن تتمدد وان شاء الله انها تروح هالمشكله عندك يارب

[مساير الليل]

خالي عندهـ فرتنشر 2007 وعندهـ نفس المشكله

حتى إذا أسرعت يالله تسمع ألي جمبك

والسيارهـ ماشيه 2000 بس

[رجل كريم]

السلام عليكم ورحمة الله وبركاته:

انصح بتركيب زوائد توضع اعلى الابواب تبعد الهواء عن الارتطام بربلات الابواب والنافذة بشكل معقول وتباع لدى محلات الزينة ..

تحياتي ..

[LOGAMALOGA]

__________________________________________________

[LOGAMALOGA]

وانا اخوك كان معي هايلكس 2000 وصوت الهواء فيه احسن من صوت الباث فندر 2003 اللي عندي حاليا يعني شف القهر كيف


اصبر وتحمل اهم شيء الخرابات اذا الموتر خالي من الخربات فا حمد ربك وحب يدك مقلوبة


الحمد لله الباث الجديد افضل بكثيييييييير من القديم

وتقريباً مافيه تنسيم

أما من ناحية التنسيم.... فتعتمد اعتماد كلي على وزنية الباب وخصوصاً من الجهة العلوية (الفراغ بين الباب والبدي)

والربلات وتصميم السيارة من جهة

واذا مانفع اللي فوق

حط لك شريط قرآن ولا محاضرة ويروح التنسيم بأنواعة :D

[عبدالرحمن السالم]

شف ترا غيسل السياره ووقفت السياره بالشمس هي إلى تسبب المشكله لان الربلات تنعدم من الداخل .. وترا كل السيارات تقريباً تنسم لاتشيل هم