يا جماعة الخير وش فائدة كفرات البالون؟؟

[خشيمان]

السلام عليكم

اخواني بغيت اسألكم لا هنتو وش فائدة كفرات البالون؟؟
وكم اسعارها؟؟
ووش الفرق بينها وبين الشاهين؟؟

أرجوا الافادة لان خويكم عليمي

ودمتم سالمين

[ابوحمد..]

والله يااخوي الي اعرفه ان البالون اذا نسمت بطحت معك
وريحتك في النفود ..وفي المناطق الوعره الي كلها حصى.
لينه ترتاح فيها ..وحسب علمي ان افضل نوع منها ماكسيس ودنلوب..
لكن في الزفلت غثا.وهذا الي عندي وارجوا من الاخوان يفيدونك اكثر.
وشكرا

[خشيمان]

مشكور اخوي ابو حمد

وننتظر الافادة من الاخوان

[الدحبول]

الكفرات البالون يلي هي 900
هذا يلي المناطق الرملية لانه إذا نسمتها تفرش بالرحة وتسهل على الموتر في المشي بالرمال
بدبل أو بدون الدبل
أفضل نوع هو السيام
لايصلح لاستخدام في الزفلت والحصى
شاهين مالي علم به
أم بخصوص الاسعار قديمة يلي عندي

[خشيمان]

تسلم اخوي دحبول على الافادة

[وقيان]

انا جربت البالون... الميزة الرئيسية فيه انه ينسيك شي اسمه مطناج او مطبات او طقطقة بالبر.... لين جدآ...

ماجربته كثير على الازفلت.. لكن اكيد خطر...

و اسمع انه ممتاز للتحميل... ماجربت...

[هويدي]

جربت البالون السومو تومو بس فيه عيب يهرب هوا من الجنط اذا كنت حاطه تيبلس

ومن سنتين استخدم السيام 6 كاندس ممتاز ويكد ماشاء الله بس سعره هالسنه طار بالسما

قبل سنتين ماخذه من الغرابي 340 للكفر الواحد الحين بخمسميه الظاهر ولا تلقاه

ولا ازيد على كلام الشباب شي الا ان البالون بالوعر ( السيام ) من خلال تجربه حط الهوا عشرين وانس البنشر بعد ستر الله

والربع الحين يمدحون الماكسس بس ما جربته وبعد ما يتصلخن السيام ابركب ماكسس ان شاء الله

واشوف ان البالون غير مزعج بالخط ( الزفلت ) اذا كان الهوا على 40


والشاهين لا يقربنك ركبت طقم وانلصخ واحد والثاني حبل وجدعتهن الله لا يعيدهن

وغير كذا صوتهن مزعج باللفات


وسامحونا على الاطاله واتمنى اني افدتك ياخشيمان بيه

[tiger1]

اخوي خشيمان البالون حسب علمي فايدتها بالرمل اكثر. ممشاها بالرمل اريح من الكفرات العاديه . وفي المناطق الوعره زينه جربناها ماخالفت معنا . بس عذروبها ثقيله على السياره وكذالك فيها رجه عند السرعه (90-100 ) .اذا انك منتب راعي صيد وطلعاتك قليله للبر ما انصح تركبهن تراها غثيثه بالزفلت .

[milanteam]

السلام على الجميع.
(رأي شخصي)

جربت شاهين همن سومو تومو بسيارتي الاوله..
ثم بسيارتي اللي معي هالحين:
دنلوب ( الي يسمونه نص بالون ) وعقبه سيام تاير.

والحين قلبت على الصخري ( او الطيني على ما يسميه البعض )

الحقيقه البالون ما ناسبن ابد..
بالاسفلت تقل تسوق على زيت ( جداً خطير )
يتسحتن بسرعه غريبه ( ما يكملن السنه )
ما ينشد بهن الظهر على الحصى ( يتشققن )
واذا كان تيوبلس ومنسم له اول كسرة دركسون (ولا نص تسييفه) الا هو منفصخ.

نصيحتي لا تقربهن... ان كان الصخري ما يجوز لك ( علشان الازعاج ولا القساوة ) ركب عاديات.

ومثل ما قلت بالاول ( رأي شخصي ) وترى من تجربة دامت حول الست سنين مع البالون .. وما ادري وش كان مصبرن عليه.

اتمنى اني افدتك.

والسلام عليكم.

[خشيمان]

أشهد انكم كفيتوا ووفيتوا