((( سوبر سفاري كحيلان )))

[ناصر الدهمشي]

السلام عليكم ورحمة الله وبركاتة ،،

خدمه يا أخوان لاهل الخبرة

عندي سوبر سفاري 98

فيه ونه اسمعها قدام بعد سرعة 120 كيلو ومرات ماسمعها
واحس برجة مثل هزت البيجر :)
مع اني شاد كفرات اربعة جديدة
واحس بالموتر يحذف يسار شوي

وناس نصحوني اركب فرارات وناسن يقولون غير المساعدات واليايات
وبالنسبة للفرارات اشوف ناسن مدحوها لي ومن وين اشريهن

مع ان طلعات للبر ماهي واجد ... لاكن اسافر بالشهر مرتين حول ال 1000 كيلو

وخدمة بسيطة كان تعرفون لي ورشة طيبة بالرياض لواحد ثقه يفيدني

وله مني الدعاء والشكر والامتنان ...

[Mr.Patrol]

عزيزي (ابوجزا)

الرجة ركب مساعد للدركسون من عند الرماية
الحذفه امر عادي فى اكثر السيارات واذا تحب ورشة روح للعضيب او اليرموك فى الصناعية القديمه ويعدلونه
راى خاص
السيارة طالم هى شغاله فلا تدقق كثير لانك راح تتعب ماراح تلقى سيارة فالدنيا مافيها عيب ولا ماتخرب والله اعلم.

[ناصر الدهمشي]

الله يجزاك خير اخوي مستر بترول
وكلامك عين الصواب
وانا الحمد لله مرتاح للموتر بس اني احب احط على الموتر لراحتي

[NissaN 1990]

بالنسبه للرجه أخي الفاضل أبوجزا ركب مساعد دركسون إضافي أما عن الحذفه فهذا شي طبيعي حتى السيارات الصغيره مثل الكامري و الهوندا تحذف مع الخط إذا موترك يحذف على طول على جهه وحده مثل يسار فهذي مشكله أتوقع تكون جلب أما إذا مره يمين ومره يسار فهذا طبيعي يعني على أتجاه الهوى إذا صار كيذا لاتدقق لأن ما لها حل....أما عن الفرارات فهي ما هي مخصصه لأهل البر بالعكس هي للي مثلك يروحون خطوط لأن الموتر بيرتاح وبيخف وأنصحك إذا أنك راعي خطوط أو راعي ديره ركبها
أتمنى أني قدمت لك معلومه مفيده ولا ثقلت عليك

[عاشق السيل]

وعليكم السلام ورحمة الله وبركاته ،،

الشباب عطوك المفيد وماقصروا الله يبارك بجهودهم ،، وأنا أقول من ناحية الونة تأكد من زيت الكرونة اللي قدام اخاف لايكون ناقص أو فاضي ،، وبالنسبة للرجة أنصحك وبقوة إنك تركب فرارات لأنها تفيدك أكثر من غيرك وتلقاها بالغرابي عند السليماني ،، ومن ناحية الحذفة رح لأقرب ميزان ويحلها لك بكل سهولة وأنصحك بميزان اليرموك أو الحرمين بالصناعية القديمة ....

هذا اللي عندي وتقبل مروري يالغالي .......




.

[bader0009]

السلام عليكم ورحمة الله وبركاته
انا كانت عندي رجه بالفورد على 120 أو 100 وفوق وفريت الصناعية القديمه كلها دون أي جدوا كل واحد يقول شي ولكن واحد من العيال يعني موالورش قالي ان الكبوت مرتفع شي بسيط عن مكانه وفعلاً كان هذا موجود فصلحت وزنية الكبوت وضبط الفورد 100% ولله الحمد وترني في الصناعية رحت لافضل الورش الموجودة فيها

[النجم الأول]

أخوي تأكد من ترصيص الكفرات فيه محلات تركب الكفرات بدون ترصيص أوبترصيص ردي وألزق عنده ليا جاء يرصص الكفرحتى تشوف على المؤشر حق الجهاز أربعة أصفار (أثنين للداخل وأثنين للخارج).ومن ثم تأكد من المساعد العرضي أمام ذراع التوجيه الرئيسي (مثل ماتفضل الأخوان)وتأكد من وزن الأذرعه والمقصات.اما الفرارات ممتازه جدا تريحلك الدفرنس الأمامي وعمود الدبل.
والونين اللي تسمعه أحياناً من صوت الهواء حول السياره .

[رجل كريم]

السلام عليكم ورحمة الله وبركاته:

انصحك توديها لمحل ترصيص الاطارات بشرط يكون جهاز الترصيص الماني او ايطالي اهم شي ابعد عن الماليزي لان قراءته غير صحيحة اطلاقا .. وانصحك ايضا بالتأكد من سلامة البيرنجات الرمان بللي حق الهوبات واعادة تشحيمهما اذا كانوا سليمين ..

تحياتي ..

[مقلع الرمث]

:D اخوي الرجه لها عدة اسباب كانك امرصص الكفرات عند واحد مظبوط فاتوقع اما من عمود الدبل وبنفس الوقت يطلع صوت يعني لو تفك عامود الدبل وتجرب اذا راحت الرجه ممتاز واذا راح الصوت يعني حداهن اعرف ان العامود مع العلم ان عامود الدبل له دخل كبير بالصوت والرجه لذلك جرب بدال ماتركب فرارات او تروح لم واحد وتبتل تفك وتربط اما الرجه اذا كانك تضرب مطب بعدين يبداء الدركسون يلعب فانا انصحك انك تركب مساعد تدبيله يعني زود على حق الوكاله اما اذا كان يرج عند بس 120 على قولك فانا اقولك لو تبتل تركب مساعد دركسون ماراح ينفع لإني انا مجرب وكم واحد من الزملاء صارت عليه نفس المشكله وحط مساعد ومانفع بس ينفع عند ضرب مطب او جفرة يعني يمسك الموتر اشوي وانا من رايي شف قدام الكارونه الي قدام فيه عامودين واحد بعد الكارونه على طول فيه ربلات هو دايمن منهن الرجه انصحك بتغييرهن لان موترك 98 يبيله ربلات حقت العامود الي قلتك بعدين لا فكيتهن لو رحت تشري ماراح تلقى عند الحمراني ربلات يبي يقلوك العامود كااامل بملغ وقدرة كومه دراهم :confused: رح لم الغامدي الي بصناعية النسيم وقله ابي ربلات تحصل عنده وبتراب الفلوس وتركبهن عند اقرب مخرطه وانشاء الله يظبط موترك ونسيت اقولك كان الصوت راح اعرف انه من العامود رح عاد ركب فرارات ونم:o والسلام عليكم

[نمرnmr]

السلام عليكم ورحمة الله وبركاته:



انصحك توديها لمحل ترصيص الاطارات بشرط يكون جهاز الترصيص الماني او ايطالي اهم شي ابعد عن الماليزي لان قراءته غير صحيحة اطلاقا .. وانصحك ايضا بالتأكد من سلامة البيرنجات الرمان بللي حق الهوبات واعادة تشحيمهما اذا كانوا سليمين ..



تحياتي ..


عين الصواب

[المميـز]

من واقــــــــــع تجربــــــــــــه

هذي الرجـــــــه كنت اعاني منها بموتري الســـابق

هي مهب رجه اقرب مالها رعشه او مثل ماتفضلت مثل هزاز البيجر او الجوال

وهي غالبا ماتجي الا من عمود الدوران الدبل أو عمود دفرنس ورا

واذا كنت تبي تعرف اي واحد منهم الخربان

رح لأي ورشه خله يفك لك عمود الدبل واطلع على الموتر وامش عليه 120 وشف الرجه تجي والا لا

اذا الرجه ماجت معناته المشكله من عمود الدبل وحلها / أفضل حل تركب فرار وتريح نفسك
احسن فرار للباترول البرازيلي AVM قيمته 420 ريال

اما اذا الرجه ماراحت ارجع للورشه وركب عمود الدبل وفك عمود الدفرنس الخلفي
واطلع على الموتر ( طبعا لازم تمشي بالدبل الخفيف ) وامش 120 اذا الرجه راحت

اذا المشكله بعمود الدفرنس الخلفي وحل هذي المشكله / تغيير العمود ,,, قيمته جديد على ماسمعت بـ 1800 ريال
ومستعمل من التشليح يتراوح مابين الـ 600 ريال الى 800 ريال

وفيه حل اخر للعمود وهو الترصيص ولكن الكثير اجمع على انه مايطول ويرجع يخرب مره ثانيه




اتمنى اني اكون افدتك وافدت الجميع

واعذروني على الاطاله

[ناصر الدهمشي]

بيض الله وجيهكم جميعاً

بيض الله اوجيهكم جميعاً

واسال الله الواحد الأحد

ان يجزيكم جميعاً كل خيــر
ويبارك لكم
ويحرم هالوجيه عن عذاب النار

كل الشكر والتقدير للجميع ... عز الله رجالن محكحكتن معادنها

وانا ابسوي الي قلتوه .. ونسأل الله الخيره

وللجميع خالص التحية والاحترام والتقدير ...