ان دجــيـت بالنفود مسوليتكم ... لا تخلوني تكفون

[خــشــــــــــم]

السلام عليكم ورحمه الله وبركاته


شباب اذا ممكن مساعده عاجله .. فضلا لا امرا

حنا مجموعه من الشباب نحتاج فزعتكم بمعلومات تساعدنا فى عبور النفود من الشمال الى الجنوب بالاضافه لاحداثيات الاماكن المهمه فى النفود مثل محطات الوقود وموارد المياه اذا وجدت . والاهم من ذلك اذا احد عنده احداثيات مكاشيت زينه فى النفود او شي يستاهل العنوة لايخلينا.
الاحداثيات الي عندي جبه والعليم والشقيق وهي غير كافيه.

شكرا من هالحين.



اخوكم ـ خشم
khashim2@yahoo.com

[خــشــــــــــم]

يا شباب , قرب موعد الرحله وما جاني رد منكم .. يا اهل حايل يا اهل الجوف تكفون ابغى احداثيات النفود .
الاخوان :
aiman
شقردي
عاشق حايل
المجفل
راعي عنيزه
البتار
ايمن
السمح
الشاص
راعي الشاص
راعي الجيب
القناااص
والاخوان الي فاتني ذكر اسمائهم من غير قصد الله لا يهينكم , فضلا لا امرا ,, احتاج احداثيات النفود من الجوف الى حايل.
واشهد يا شاهد عيان , لهالحين ما احد فزع لي .

اخوكم / خشم

[عبدالعزيز الدباسي]

والله اني ودي اساعدك لكن خبرتي في ذيك المناطق ما هي بالحيل ،، علشان كذا ما ودي اوهقك في معلوما ماني متأكد منها ميه ميه ،،

لكن انا منزل موضوع عن احداثيات مناطق كثيرة في الممكلة تبي تلقى بعض ماتريد

وتحياتي لك وللاخوة المرافقين معك

[شلفان]

الاخ خشم
السلام عليك

الحقيقة ماعندي اي معلومات عن ذيك المناطق
ومثل ماقال شقردي مانبي نوهقك
وان شاء الله ترجع بالسلامة غانم وسالم .

شلفان

[خــشــــــــــم]

اخوي شقردي
والله ما قصرت لك مني اغلى شكر , وللمعلوميه انا دخلت هذا المنتدى بعد ما قريت موضوعك الخاص بالاحداثيات وكذلك موضوع اخوي السمح عن تجهيز القارمن 3 .
وابشرك استفدت من موضوعك وكذلك موضوع اخونا السمح وطبعتهم وان شاء الله استفيد منهم على طول, لانهم الحين دايم مخاويني.

انا ما اخفى عليك حصلت على كم احداثيه من بعض الكتب والخرايط لكن الي ينقصني هو احداثيات اهل التجربه واهل المنطقه.

جزاكم الله خير وسلمت ودمت يا شقردينا. :p

[خــشــــــــــم]

الاخ الكريم شلفان

ان شاء الله ما توهقوني سلمت ودمت يكفيني مرورك الكريم و مشاعرك الطيبه.

الف شكر:p

[راعي عنيزة]

المعذره يا خشمي ويا عصابة راسي بس ياخوي ماقد طبيت ذيك الارض ولا ادري اصلا وينها :)

لكن كانك تقصد بالنفود (الدهنا) فما خبرت الا محطة الدخول

[خــشــــــــــم]

راعي عنيزه
يكفى مرورك وما قصرت والديار الي ما تعرفها ادلك عليها. وتراني مفرز مرقه القمري (مسويها مثل طريقه ماجي لكن فى الفريزر) .. اعتبرها دعوه مفتوحه.
انا قصدت النفود الكبير بين الجوف وحايل.

وسلمت يالغالي.

[محب الصمت]

هلا بخوي خشم
لدي معلومات بسيطة عن ذيك الأراضي لكن ربما انها تفيدكم !
هذه المعلومات كونتها من خلال رحلة مع شباب قبل سنتين بالضبط , بهدف التعرف على اماكن
جديدة بالنسبة لنا .
افضِل ان اسردهاعلى شكل نقاط :
= اتجاه الرحلة كان من الجنوب الى الشمال , اي من جبة الى سكاكا الجوف .
= نوع السيارة لاند كروزر VX R , واكثر ماضايقنا فيه تانكي الماء المليان ( 120 لتر ) !!
هذا الثقل مع ثقل العفش اثر على عزم السيارة فغرزنا مرتين لهذا السبب !! ( لا تقولون السبب السواق , فالسواق خبير وطير بر على مايقولون , بس ترى مهو انا :p )
= الارض ذيك الايام كانت نوعا ما زينة , يعني كان فيها تالي ربيع , والجو كان معتدل .
= الحطب هشيم وجذوعه كبيرة بالحيل !
= من ناحية البنزين عبينا سيارتنا من جبة , ويوم وصلنا الى العليم ( 90 كلم بالجهاز من جبة ) والى باقي بالتانكي الربع تقريبا .
= مابين العليم وجبة في الطريق يوجد علامات ( لوحات ) صغيرة تساعد عابري الطريق .
= العليم عبارة عن جبلين احدهما اكبر من الآخر , يوجد فيه مقر صغير لمدرسة واهم من ذلك
بير الماءالذي يتميز بصفاوته ويوجد كذلك مضخة( طرمبة ) بنزين .
= بعد العليم من جهة الشمال على بعد 35 كلم تقريبا يقع مارد " طـناب " وهو مارد صغير ,
فيه بعض الخيام لبعض البدو الرحل .
= الطريق مابين العليم وطناب سهل ( غير وعر ) والعكس بالنسبة للطريق بين العليم وجبة لكن الأول غير واضح بسبب كثرة الخطوط .
= الكناود بالنفود شغالة وما ينقطع عنك الصوت ابد , واذا احتجت شىء رح للعامة وما راح يقصرون معك .
= بعد " طناب " تزود وعورة الطريق شوي ( حوالي 40 كلم تقريبا ) وقبل نهاية ال40 فيه طريق ممهد جاي من الشمال يدخل للنفود وبعدين ينقطع .
= وانت ماشي باتجاه الشمال المائل قليلا الى الغرب اي بعد ال 40 كلم ينتهي النفود من جهة الشمال والعلامة يوجد تانكي ماء واضح في الصحراء عند مفترق طرق ممهدة اذا اخذت الايسر منهم يوصلك الى الاسفلت القريب من دومة الجندل ولا اعرف الى اين يذهب الايمن منهما.
=اما اذا طولت سيدا اي باتجاه الشمال فان الطريق سهل جدا وتستمر على هذه الحال لمسافة50 كلم تقريبا حتى تشرف على مطار الجوف ( يصير المطار بحجاجك الايسر ).
= من جهة الجوف اذا انك اتجهت من سكاكا الى المطار وتعديت خزانات الوقود اللي على يسارك لف يسار , تجد طريق ممسوح ( هذا الكلام قبل سنتين و هالحين ما ادري يمكن معبد )
, هذا الطريق هو نقطة البداية للنفود الكبير من جهة سكاكا وفيه نقاط بداية اخرى من جهة الدومة وغيرها لكن لم نذهب معها . كما يوجد نقاط بداية من جهات اخرى بالاتجاه المعاكس( مهو حق الجزيرة .;) ) وحسب ما اسمع انها سهلة ومنها على سبيل المثال الطريق اللي يبدا من عدفاء.

باقي نقطة مهمة جدا وهي احداثيات المواقع خاصة " طنـاب وتانكي الماء :D مخزنة في جهاز احد اعضاء الرحلة احاول ان احصل عليها واحطها هنا وان كنت اظن ان بعض الشباب اللي هنا يعرفونها .


واخيرا ارجوان هذا الكلام اللي كتبته من الذاكرة والذاكرة هاالايام انتم عارفينها ( مامن امور ) , اقول ارجو انه ينفع احد منكم والعذر من الله ثم منكم على الخطأ
وسلامتكم ,,,,

[خــشــــــــــم]

حبيب الصمت
حب ي بي , والله ما قصرت وبارك الله فيك , معلوماتك وافيه والله, وخوفتني من البنزين يمكن الفكس ار يصرف؟ , لكن ما يمنع نزيد حمل الشاص الي معنا بنزين وما و ان شاء الله يكفى.
الطريق الي وصفته يسمونه طريق القوافل قديما حسب ما قريت عنه وانا ودي اروغ يمين ويسار لكن اخاف اطب فى المحميه ونبلش.


ما صادفتو صيد فى طريقكم.؟

تسلم يالمحب