يوكون 2006 وحساسات الدفع الرباعي - فزعتكم

[النائب]

عندي مشكلة في الدفع الرباعي في يوكون 2006 حيث ظهرت لي على الشاشة عبارة يجب تصليح العجلات 4 في 4 وبعدها صار الدبل ما يشتغل إلا بعد أن اطفي السيارة وأشغلها وبعد فترة ما عاد صار يشتغل نهائيا

رحت به للوكالة قالوا من الحساسات وصلحوها على الضمان بعد ما طلعوا المر في كبدي وبعد فترة بسيطة رجعت المشكلة مرة ثانية فهل مرت المشكلة على أحد منكم وهل هناك ورش في الرياض تقوم بتصليحها وكم تكلف.

فزعتكم يا أهل الخبرة ..

[الدحبول]

ودها الوكالة إذا كان ممشاة تحت 60 الاف

[.أبوعبدالرحمن]

ما عليك من الورش الخارجية


رجعها للوكالة يصلحونها ورجليهم فوق روسهم

[badernt]

مساء الخير . انا حصلي مثلك وتعبت من الورش مالك الي الوكاله. لابد من تغيير الموجل كارد حق الدبل. اتمني ان السياره علي الضمان لان تغيير الموجل كارد علي حسابك يكلفك حوالي 2400 ريال.

[النائب]

شكرا لمروركم الكريم

بقي في الضمان 3000 كم

لكن وش الحل بعد نهاية الضمان لأن شغلهم لك عليه في المرة الأولى ما صار له 3 شهور ورجعت المشكلة!

[badernt]

نصيحه يالغالي تراجع الوكالة بأسرع وقت قبل انتهاء الضمان وتخش في عيونهم وتذكرهم ان المشكله رجعت مره ثانيه وطلب من مدير الورشه تمديد فترة الضمان علي الدبل وهذا حق من حقوقك. لأنه يوجد مشكله في الدبل فترة الضمان. أنا حصل لي نفس المشكله وتم تمديد فترة الضمان ... الله يوفقك أرجوا منك الدعاء

[حمرعين1]

سؤال هل لمبات الدبل يولعن اذا شغلت السيارة ,اذا الجواب . لا.فالمشكله جدآ بسيطه .

[HEMI SRT]

عزيزي بالنسبة لأعمال الإصلاح التي تتم في الوكاله يكون عليها ضمان سنه أو عشرين ألف كم بالنسبه للقطعه المستبدله وشغل اليد حتى لو كانت السياره موديل 80 والضمان منتهي فبما أنك أصلحتها لديهم فهم يضمنون القطعه أو شغل اليد, يعني حتى لو أصلحت السياره على حسابك والضمان منتهي ورجع نفس الخراب فهم مسئولين عنه طالما أنك لم تتعدى عشرين ألف أو مدة سنه والكلام هذا أكيد وروح للوكاله واسأل.
يعني لو اضطريت فيما بعد لإصلاح نفس القطعه فالأفضل إصلاحها في الوكاله حتى لو الفرق 500 أو 600 ريال لأنك بتجيب نفس القطعه من الوكاله أو أصلي.

[النائب]

شاكر للجميع فزعتهم وما قصرتوا ، معلومات مهمة ومفيدة استفدتها من ردودكم ،

الأخ حمرعين1 (http://www.mekshat.com/vb/member.php?u=53042) بالنسبة للمبات الدبل البرتقالية ، أحيانا تولع وأحيانا تطفى وأحيانا تولع لمبة حمراء بين الأزرار ، وأحيانا يشبك الدبل الثقيل من نفسه مع تشغيل السيارة ! يعني ماله حالة ثابتة كل وقت يشكل ..

[حمرعين1]

المشكله جدآ بسيطه وسبق وحصلة لي وهو ازرار الدبل الاكتروني منفصل من الخلف والحل تغيير السوتش بالكامل او الافضل تلحيمها بسلك اكتروني عند كهربائي متخصص سبق ومرت عليه .