انوي تركيب تناكي ماء وسيارتي فورتشنر وش رايكم وبماذا تنصحوني ؟

[ابن المذنب]

أنوي إن شاء الله تركيب توانك وسيارتي تويوتا فور تشنر وحبيت أخذ رايكم وين تنصحوني أركب بالرياض يعني أي ورشة تكون أفضل والأسعار المتوقعة

والله يحفظكم ويخليكم

[ab0saif]

مسكين ما لقيت احد يعبرك انا بعد عندي فورتشنر وودي ازبطه و لا عرفت


خخخخخخخخخخخخخخخخخخ

[الساهر2003]

اخوي اذا بتلغي المرتبه الثالثه فيكون التانكي واقف خلف المرتبه الثانية واذا تبيه تحت السيارة فليس لي به علم وممكن تمر ورشة المواهب ويفيدونك باللي تبي

[إعصار]

اذا ماتحتاج المرتبة الثالثة .. حط التانكي ورى المرتبة الثانية مباشرة ..

واذا تبي الراي .. انص المواهب .. عز الله أنك بلتقى رجاجيل تنصحك .. وأهل خبرة .. والله يعينك على الأسعار مو المواهب بس بشكل عام التوانكي غالية ..

[النوفلي]

تبي النصيحة
رح للسنيدي بالقصيم وفصله عنده :)

[قروي الأول]

لا تروح لمواهب ولا غيره أما المواهب فهو يقول ما عندي لك حل


يارجال مالنا إلا الجيوك والله في رايي أنها فيها ميزة حلوة وهي أنك تفتك من وزنها عليك في السيارة

[نمر 33]

أنصحك بالواقف وتلغي المرتبة الثالثة

وإنشاء الله تلقاه عند برق الحياء أو البرية

[الساهر2003]

التانكي الداخلي وخلف المرتبة الثانية مباشرة يكون المنيوم وملبس وهو خفيف جدا وبلعكس ممتاز ودايم يكون فيه ماء مقدار قليل 10 لتر افضل لطوارء

[بن نويشر]

أسمع يالذيب !!!

لا تلف ولا تحتار ، خذها مني نصيحة أخ لأخوه . معي نفس سيارتك بالضبط .. لفيت ودرت ورحت وجيت وما خليت محل حتى خرجت بحل تجعلني أحمل عفشي من غير نقصان ولا هم يحزنون وبالإمكان يركب معك شخصان من أخوياك . أسمع يا طويل العمر ..

أولاً : ما لك بد من الإستغناء عن المرتبة الثالثة .
ثانياً : توجه فوراً للغرابي إن كنت من سكان الرياض وقم بتلبيس المنطقة بشراع تنزاني حجم اللاند كروزر تقلقاه جاهز ومفصل وله جيوب أماميه وعلى الجوانب بسعر يتراوح بين 150 و 200 ريال .
ثالثاً : قم بشراء رواق مقاس ارتفاع متر ونصف × 10م مقصول من النص ومكيس لكي يحافظ على ديكور سيارتك من التمخش وسعره 150 ريال .
رابعاً : قم بالتوجه إلى محل البرية حيث تجد هناك مقاسان من التوانك بركب على موترك ومن أحسن ما يكون ياخذ حوال 100 لتر بسعر 750 ريال من الألمنيوم وخذ القصير المتين علشان تقدر تحط فوقه الرواق.
خامساً : أشتر لك شنطتين عزبه واحده للشاي والقهوة وملحقاته والأخرى للطبخ ودافور مع كيسه وذرايه مع تلبستها ومركب مع تلبيسته ، وهذه تلقاها عند البريه أو برق الحيا وعليك بالنوعيه الجيده .
سادساً : يوجد محول كهرب خط 220 لونه أصفر 350 وات بـ 195 ريال ياباني تقى عليه علامة نخله تلقاه عند البريه أرخص ، وخذ لك توصيله لمبات 10م (3 لمبات) تلقاها جاهزه عند برق الحيا بـ 25 ريال . وشنطة محول تلقاها عند برق الحيا وأشتر لك 4 لمبات (واحده احتياط) لون أبيض أصابع أصغر حجم خط 220 فولت وما صورة معلاق عقد ، وبكذا يكون لديك مصدر للإضاءه ولا أروع ولا هم يحزنون وخل عنك الماطور . وللأمان بإمكانك شراء بطارية متنقلة من العليان بـ390 ريال قم بشحنها في البيت خط 220 فولت وخلها معك للطوارئ في إحالة بطارية السيارة فضت .
سابعاً : بالنسبة للخيام ، توجه فوراً للسنيدي في الرياض مخرج 15 الدائري الشرقي شرق الرياض وخلك على خط الخدمة بعد 3 أو 4 إشارة على يمينك مقابل مقبرة النسيم عندهم خيام وعليك بالتنهاة المطورة على ما أظن مكيسه وحجم صغير في سيارتك وما تاخذ حيز وتكفى 4 أشخاص نايمين .
ثامناً : طق لك جهاز جارمن العربي بالخرائط وجهاز نداء وأستمتع برحلتك وربي يحفضك .

أتمنى أن أكون قدمت ما هو مفيد والسلام عليكم ..

[سالم بن سالم]

الاخ العزيز بن نويشر ماقصرت ذكرت المختصر المفيد للرحلات اخي العزيز عندي استفسار عن الخيمة الموجودة عند السنيدي (التنهات) كيف شكلها وهل هي عملية عند الرياح والامطار وكذلك هل هي سهلة التركيب وكم سعرها .

وجزاك الله خيراً ووفقك واسعدك

[ab0saif]

الاخ العزيز بن نويشر ماقصرت


يعطيك العافية