أحسن وأجود مواطير هواء لإطارات السيارات

[شاهد عيان]

عند الذهاب لشراء ماطور هواء يحتار الواحد من كثر المواطير ، حيث يوجد بعض المواطير لاتدري جودته هل هو عملي أولا ، حيث إني قد اشتريت ماطور الذي له الخرطوم الأصفر الملتوي لكنه ترتفع درجة حرارته عند أول نفخه للكفر فوضعت مروحة كمبيوتر عليه ومازالت الحرارة ملتهبه ...

والسؤال :
- هل هذا طبيعي ؟؟؟ .
- ماهي مسميات المواطير الجيدة وصناعتها ؟
- وماهي طرق تسريع نفخ الماطور ؟ .

شكلي طولتها معاكم ... لكن نخرج بفائدة للجميع ... وشكراً .

[الخبير]

السلام عليكم
فيه انواع واجد يا الحبيب من مواطير الهواء افضلها الكمبرسورات.
افضل طريقة لنفخ الكفرات (http://www.mekshat.com/vb/showthread.php?s=&threadid=618)

[أيمن]

يا هلا ويا مرحبا أخوي شاهد عيان ..
موضوع جميل، تشكر عليه ..

هذه بعض المواضيع المكملة :
ماطور الهوا الاسترالي (http://www.mekshat.com/vb/showthread.php?s=&threadid=618)
أفضل طريقة للحصول على الهواء !! (http://www.mekshat.com/vb/showthread.php?s=&threadid=595)

تحيتي

[راعي عنيزة]

ياخوي انا شاروت صديق عنده محل زينات وعنده خبره كبيره في المواطير وشار علي بنفس الماطور الي معك امريكي تجميع صيني وسريع (الكفر بدقيقتين) والاحظ حرارته واتوقع انها طبيعيه ويعجبك سعره معقول اظنه ب 240 ريال مهب مثل الاسترالي حول 1000 ريال

[البتار]

اخوي الكريم شاهد تعبان :D

وجميع الأخوة الكرام :o

أنا اشتريت منفاخ هواء من محلات الرماية بحدود 1000 ريال تقريباً والمنفاخ مضمون لمدة سنة وهو يعمل بطريقة البستم وقوي جداً وعملي أكثر

[عبدالعزيز الدباسي]

مشكور اخوي شاهد عيان على طرح هذا الموضوع المهم للكشاتيه

الماطور اللي عندك فيه منه نوعين واحد سعره الآن 160الى 180 ريال وهذا تقليد الاصلي والثاني سعره 200 الى 220 ريال وهو الأصلي وما فيه فرق بين الاثنين الا شى بسيط حتى بالصور اللي بالكرتون وهذا النوع اسمه SUPPER SAFARI والحقيقة انه جيد واذا كانت السيارة اللي معك لاندكروزر او باترول تقدر تعمل ترهيم وتجمع الاثنين في واحد 2 + 1وتبي تحصل على اقوى هواء في وقت قياسي ،،، وعلشان باقي الشباب يدرون وشو شف هالصورة

http://www.jcwhitney.com/images/imagecache/I22114.gif

اما الجهاز اللي يتكلمون عنه الشباب فهو تلقاه عند دار الرماية بـ980 ريال وهو استرالي وعليه ضمان لمدة سنه وهو قوي وما عليه كلام ،،، لكن ترى مافيه فرق بين هذا الجهاز واذا جمعت جهازين في واحد 2 +1.

طبعاً هذه المواطير تعتبر الافضل في السوق ،، لكن اذا بغيت طرق غير منفاخ الهواء خذ عندك

* ترهيم بساتم بيوك في سيارتك ،، وتلقاهن عند اهل التشليح تقريبا 700 ريال (لكن ماانصحك بهن لان البساتم مع تقادم الزمن تبداً تتسكر وتضعف قوته

* عمل ماطور هواء من كمروسورالثلاجات وهو عملي وجيد (لكن يحتاج ماطور كهرباء)

* يوجد عند محلات الزينة لي هواء بـ 10 ريال تأخذ هواء من كفر الى كفر بسرعه قوية

* اذا كان تقدر تفرغ مكان وسيع في السيارة لدبة غاز ترى تقدر تعمل منها طرمبة هواء لكن يجب ان تغير في صمام الأمان علشان يكون يأخذ ويعطي ، وتقدر بعدين تعبيه من البنشري كل ما بغيت

هذا ماعندي وبالله التوفيق

[شلفان]

الشباب كلهم
السلام عليكم

على ذكر مواطير الهوا
شفت ماطور هواء على البطارية ما أعتقد ان فيه اقوى منه وهو عبارة عن مكبس دبة هواء البناشر
مقاس صغير ويدوره سير و دينمو أظنه دينمو سلف ( يعني مجمع او مولف ) صراحة ماأظن فيه اقوى منه .

تبون تعرفون وين لقيته؟ وبكم ؟

شلفان

[الخبير]

السلام عليكم
يا شباب الجهاز الاسترالي تعبان والله انه تعبان جربته و الله و ما ينفع بريال شوفوا الكمبرسرات إلي بسير على المروحة و الله انها تبيض الوجه.
فيه جهاز جديد في الغرابي كمبرسر يشبك على البطارية يقولون انه زين لكن ما جربته سعره 1250 الصراحة غالي بالحيل !

[القماري]

أنا بصراحة أستخدم ماطور هواء أمريكي بس مو ذاك الزود يحتاج وقت مو هين لنفخ الكفر وصوته قوي مرة ومزعج - وبصراحة لقيت شباب مرهمين كمبرسور مكيف بيت وعندهم محول الكهرباء من 12 فولت إلى 220 فولت وصاير يعطي دفع هواء ولا كمبرسور البنشري - طبعا لاحد يسألني عن كيف الطريقة ، ماعندي فكرة وإلي عنده فكرة يخبرنا

[ابوراكان الاول]

للجميع السلام عليكم ورحمه الله وبركاته
ارجو ابدا الراي حول ماطور الهوا اللي هو في الاصل لسيارة البيوك

ارجو الافادة العاجلة
ولكم جزيل الشكر

[باترول 99]

السلام عليكم ورحمة الله وبركاته ... يا أخوان أنا جربت المنفاخ الأمريكي والله إنه ممتاز بالحيل و ما عليه خلاف وتبيه ينجزلك بسرعه أرفع الكفر وما تدري إلا إنه نافخلك الكفر أسأل مجرب ..............

[همام]

كمبرسر البيوك عندي له اكثر من خمس سنين

وانا اجلده جلد ماضره

وهو جديد 450

وبالتشليح250

بس ما تلقاه بالتشليح قاضي يشيلونه الناس مايخلونه

واعرف شيبان معهم على وقت القطع عشرة الى الحين

[الهاوي]

عندي مجرب ماطور سفاري الاول مهوب مثل اللي في الصورة مع اخونا شقردي يعني حوله ممتاز بس فيه عيب واحد انه يحتمي ويقفل يبيلك تصبر اللين يبرد يعني تقريبا بعد ما اعبي 3 كفرات على عيار 35 الرابع ياكل هواء يصبر اللين يسمح خاطر الماطور ويعود يشتغل بس ممتاز نوعا ما .. والله اعلم حبيت اشارك بتجربتي !!:cool:
وعلى فكرة قبل هذا كان معي الماطور الامريكي في علبة مستطيلة اسود ممتاز كديتة اللين داخ وما خالف بس بطئ شوي ..

[مسعود]

السلام عليكم
فيه موجود بالسوق دبه مثل اسطوانة الغاز الصغيره تستخدم لنفخ الهواء بعد ماتعبيها من عند البنشري الي 125 psi
بصراحه عمليه - سعرها انا حصلت عليها من الحراج بسبعين ريال بس جديده
قد شفتها عند ساكو بس مادري عن سعرها
والسلام عليكم

[نقا هشال]

مشكورين على المعلومات...

[إلياس المطلق]

يــــــــا ســــــــــــــلام ,,,,

[رحال الغربية]

المثل يقول أشترى الزين ولو بالدين
http://arb.com.au/Honda/Home/ARB_logo.jpg
له عندى أكثر من خمس سنوات ولا يعلى عليه وأفضل ماطور هواء وكذلك يمكنه نفخ إطارات الشاحنات ويعمل لأكثر من ساعة متواصلة وسخونته خفيفة وموجود عند محلات الرماية
http://arb.com.au/arb-air-compressors/arb-air-compressor.jpg
http://arb.com.au/arb-air-compressors/ckmp12.jpg http://arb.com.au/arb-air-compressors/on-board-air-compressor.jpg
http://arb.com.au/arb-air-compressors/ckma12.jpg

[المسااااافر]

السلام عليكم وشرايكم بابو جمل وشتقولون عنه.

[الرسن]

الاخوان اللي يبي ماطور عملي وفعال واصلي ولك وللزمن وسريع وقوي وياباني ومجرب عليك

بماطور الهواء اللي يجي مع الجيب اللكزس


تراه ينفخ الكفر من صفر الى اربعين خلال 90ثانية عن تجربة.
معالسلامة

[ناصرالربيعان]

خلونا نرسي علي بر كل واحد يمدح نوع وش نشتري ؟؟؟؟؟

[عشانا]

عنك الماطور الي ذكره الاخ الرسن ممتاز بالمرة
وعندك الماطور ماركة الجمل

[مقلع الرمث]

اقول ابو جمل لا يرخص عليك
سعرة يتراوح بين 240 الى 260

[DAIVER]

السلام عليكم
ما فيه احسن من منفاخ الرمايه الاسترالي
لك وللزمن واصلي وقطع غيار متوفر وعملي
انا شاريه من اكثر من 5 سنوات وشغال زي لحلاوه ولا عمره خذلني
ولا اعتقد فيه احسن منه
بلا بستم بيوك ولا كمبرسور مكيف ولا ترهيم :no:
خله يخرب عليك ونت في البر وتعرف انا لله حق
راح يكلف واحتمال اعطابه كبير لو شريت كمبروسر جديد راح يكلف ووزنه عالي وياخذ حيز بالسياره ولا تنسي راح تحتاج محول طاقه من 12-24 v الى 220vمن نوع ممتاز والنوع الممتاز يكلف اكثر من 500 ريال ووزنه اكثر من 2-3 كيلو جرام
يكفي انك تشتري شي لك وللزمن ومصمم خصيصا للمههمات الشاقه
وبخصوص ارتفاع حراره الكمبرسور الإسترالي شي طبيعي لإنه بستم وتبريده عن طريق الهواء
ممكن تخليه بشنطته ولا تركبه بجانب مكينه السياره

ARBوبس :good:
ممكن تزور موقع الشركه المصنعه
http://www.arb.com.au/new-products/On-Board-Air.pdf
http://www.arb.com.au
http://arb.com.au/arb-air-compressors.php

[مسامرالليل]

اخى : Daiver
طيب كم سعره منفاخ الرماية الاسترالى , وين يباع فيه وهل فيه اصلى وتجارى وبالنسبة لحجمة لاءن الصورة توضح انه متوسط امل الافادة وشكرا

[هبيس]

الى وش رأيكم بالماطور الي يجي مع الهايلكس والكامري ويجي معه مثلث وكشاف وطفايه في شنطه وحده ؟

صراحه شريت واحد من محلات الزينه بمية ريال

على كلامكم شكلي توهقت الظاهر انه مايصلح

فيه احد جربه ؟

[غواص الشمال]

http://asas123.jeeran.com/جزاك-الله-يااخي.gif

[عاشق البروق]

السلام عليكم ورحمة الله وبركاتة
مع السيارة جاء مطور نفس الي يقول الاخ هبيس
ممتاز واستخدمتة اكثر من مرة
( الاخ هبيس اشتراه من محلات الزينة اما انا اتى مع السيارة يمكن يكون اجود وافضل )

[هبيس]

السلام عليكم ورحمة الله وبركاتة

مع السيارة جاء مطور نفس الي يقول الاخ هبيس
ممتاز واستخدمتة اكثر من مرة

( الاخ هبيس اشتراه من محلات الزينة اما انا اتى مع السيارة يمكن يكون اجود وافضل )


الاخ عاشق

انا شريته من محل زينه ولكن في الاساس هو الي يجي مع السياره ويبيعونه على المحلات

بالله عليك وش السياره الي جا معها وكم مره استخدمه ؟؟

وهل يسخن عليك ويطول في النفخ ؟؟

[vx444]

الاخوان اللي يبي ماطور عملي وفعال واصلي ولك وللزمن وسريع وقوي وياباني ومجرب عليك

بماطور الهواء اللي يجي مع الجيب اللكزس

تراه ينفخ الكفر من صفر الى اربعين خلال 90ثانية عن تجربة.
معالسلامة

تعال وين رايح
وووووووووووين يباع وبكم ؟؟؟؟؟؟

[الفتكي]

افضل واقوى واجود ماطور هواء هو الايطالي من نوع فيني 12 فولت و600 وات وهو الآن معي اكثر من اربع سنوات وفيه مروحة تبريد قويه بشرط تعبي فيه اكثر من 4 سيارات ولا يظره بقيمة 1200 ريال عند محل التويجري في الرياض بشارع الريل الإشاره الثانية يمين بإتجاه الشمال واذا انت في القصيم مستعد اوريك اياه وتحكم بنفسك. ولك الشكر

[camaro]

بوجمل الاصلي 250 ريال


سبحان الله وبحمده
سبحان الله العظيم

[القاطور]

يا اخوان لو كل شي نبي نشتريه للبر اجود شي جلسنا نشحد
نبي شي نعقول وعملي ومناسب لاستخدام الرحلات
انا مانيب فاتح بنشر بالخلا
وحق اللكزز ذا كيف نجيبه اذا سعره من 500 وجاي

[مكشاتي سبشل]

بالنسبه لي شاري ماطور ابو جمل الجديد اتوماتيك تزنه على عيار ٣٥ اول مايوصل الكفر للعيار هذا يفصل الماطور كم واحد نسم على الصفر وحط ماطوره يتفخ ونساه جلس يسوي له شغله ولا يكلم تلفون والسعر ٣٠٠ وعليها اذكر

[قليقلان]

الموضوع ممتاز و فيه معلومات مفيده

لكن عمره 11 سنة يعني لو ان فيه عيل انولد هاك الوقت هالحين يدرس بخامس

[عبدالعزيز4]

الموضوع من عام 2002 :)

[mmmm2mmmm]

الأحبة في رفيق الدرب

أفضل هو أم ماطور ايو جمل


كم سعره؟

[VXR2007]

السلام عليكم
موضوع جميل، تشكر عليه ..

[أبو نادر.]

ماطور استرالي
واللي يقول ماطور ايطالي

الحين وين نلقاهم وفي اي محلات
موضوع مهم بس انه ناقص وقديم

[ابوظبي 987]

عند الذهاب لشراء ماطور هواء يحتار الواحد من كثر المواطير ، حيث يوجد بعض المواطير لاتدري جودته هل هو عملي أولا ، حيث إني قد اشتريت ماطور الذي له الخرطوم الأصفر الملتوي لكنه ترتفع درجة حرارته عند أول نفخه للكفر فوضعت مروحة كمبيوتر عليه ومازالت الحرارة ملتهبه ...

والسؤال :
- هل هذا طبيعي ؟؟؟ .
- ماهي مسميات المواطير الجيدة وصناعتها ؟
- وماهي طرق تسريع نفخ الماطور ؟ .

شكلي طولتها معاكم ... لكن نخرج بفائدة للجميع ... وشكراً .

شوف هذا الرابط لعله يفيدك

http://www.mekshat.com/vb/showthread.php?t=452841

[بوبدر الصهيبي]

السلام عليكم
أنا منفاخي فيه نفس الشي والظاهر إنه طبيعي

[4x4ofroad]

انا جربت ماطور الرمايه ب345 ريال
له معي سنه وزود وانفخ فيه البالون الى 40 واحيان نكون سيارتين يعني 8 كفرات وممتاز بالحيل ويتحمل وعيبه يحتر بس اتوقع طبيعي

[4x4ofroad]

هههههههه
الموضوع عمره 11 سنه
لله درك يامكشات

[جراند شروكي]

السلام عليكم ورحمة الله وبركاته
وكل عام وأنتم بألف خير
تجربتي بصراحه خذلتني واعلمكم فيها :
طبعا انا معي ماطور ابو جمل شريته من الغرابي الاصلي بستم واحد يعني اصغر شي ،، ومعي جيب لاندكروزر وتعرفون يجي مع التويوتا ماطور هواء معروف اكيد لديكم ،،
الحاصل : طلعت مع زميل لي معه يوكن ونسمنا الكفرات ويوم احنا طالعين وقفنا ننفخ الكفرات بديت بسياره رفيقي واستعملت ماطور ابو جمل ما كمل معي الى رابع كفر الا هو محتر ووقف ابد ووقف ما عاد يشتغل !!! رحت السياره وطلعت ماطور التويوتا : ما كملت كفر واحد الا والدخان يطلع منه مدري احترق والله وش فيه بصراحه احرجني وتوهقت شوي ومشيت زعلان للمحطه كانت تبعد عنا ابو 5 كلم اخذتها بر خوفا من ضرر الكفر والمشي عليه بالاسفلت وهو منسم !!!!
رميت مواطيري بموتري والى يومكم وانا ما رجعت لها وودي اشوف حل واشتري شي لي وللزمن ؟
اسف على الاطاله وتقبلوا تحيات اخوكم
ابو طلال

[عاشق بوظبى]

أخذ ARB شوي غالي لكنه قوي وله عندي 3 سنين لله الحمد 100% أداءه ومعاهد جناته والعوز ومرتبة. أو تقدر تفكر وتثبت وتحتفظ بالجنة بالبيت عندك.

[أبوفاطمة]

صبحكم الله بالخير و السرور
ركبت ما طور هوا من ورشة السوافي بالرياض عام 2009 ابو جمل و بعدها بسنة ركبة ما طور ابو جمل ثاني في ورشة البتار بالدمام وشبك الماطورينا على خط واحد و الحمد لله إلى هذي اللحظة ما أذكر إني أشتكية من المواطير و قوة الهوا وطبعاً النفخ سريع

[كاس شاهي]

يا اخوان لو كل شي نبي نشتريه للبر اجود شي جلسنا نشحد
نبي شي نعقول وعملي ومناسب لاستخدام الرحلات
انا مانيب فاتح بنشر بالخلا
وحق اللكزز ذا كيف نجيبه اذا سعره من 500 وجاي

حلووووه ههههه اعجبني تفكيرك

بس فية مثل اشري الزين لو بدين

[أبو نادر.]

ماعندي مشكله خاصه مع الامواراللي زي كذا للطواري واشياء مهمه
حتي كان سعره شوي عالي
ماطور الهواء من الغراض الاساسيه والمهمه

لكن السوال الاهم
مافيه ماطور يتحمل الكرف