مناشدة

[شلفان]

الاخوة الاعضاء والاخوة الزوار
السلام عليكم

الحقيقة كلما رحت للبر والربيع ولقيت الزبالة منتشرة ومبعثرة ضاق صدري
واضطر اني اجمعها وانظف المكان حتى يكون المكان ممتع ومبهج

لذلك أناشد كل الكشاته انهم يجمعون زبالتهم في اكياس أو حرقها أو دفنها ، فانتم تحبون الجلوس في الربيع النظيف

أسال الله لكم المثوبة والاجر


شلفان

[عبدالعزيز الدباسي]

جزاك الله خير اخوي شلفان على التنبيه لهذا الموضوع المهم

والحقيقة انه شىء مهم ان تهتم بنظافة المكان وايضا ان تعوّد اللي معك على النظافه ، وان يكون شعاركم (( اترك المكان كما كان او احسن مما كان ))

[الرمثة]

ياكثر الأماكن اللي من أول تفتح النفس ولا ترتاح إلا فيها ويتهيض الواحد فيها وتجيه القصايد ولو ما هوب شاعر من حلا المكان وزينه أما هالحين والله لو يقالك الأرض هذي لك ببلاش ما أخذته ( إيه هين ) ما أخذته من الوساخة .:mad: :mad: :mad: :mad:



ولا يغثك بعد إلا هالحفايظ حقات البزارين ما هيب....:confused:

[راعي عنيزة]

صح لسانك اخوي شلفان ذا موضوع مهم جدا ومشكور جدا على طرحه وللاسف الوعي فيه قليل

يعني الشخص اذا طلع لمكان ربيعه زين اكيد ودك ترجع له بعد اسبوع او شهر او سنه ولو انت تركت زبالتك وغيره ترك زبالته خرب المكان عليك وعلى غيرك

وش المانع تخلي معك كرتون او كيس زباله وجمع فيه كل المخلفات واذا وصلت لاقرب زبالة كبه فيها :confused: الكيس ترا ما يكلف ولا ربع قرش وما ياخذ منك تجميع المخلفات من المكان خمس دقايق وبكذا انت تقدر ترجع في المكان وتترك المجال لغيرك انه يطلع فيه بدون ماحد يدعي عليك واظن فيه حديث (اتقو اللاعنين) وهو لمن يحدث في مكان ظل الاشجار وترك الزباله لا يقل عن هذا الامر

وفيه عبارة جميله اعتقد ان الاخ مكشات وضعها في الموقع :
لا تاخذ من المكان سوى الصور ولا تترك في المكان سوى الذكريات

[مخاوي الذيب]

[glow=blue]صح لسانك يا شلفان
هذي المشكله لها عده حلولاهمها:
1- كل واحد يشيل زبالته معه في كيس ويحطها في اقرب برميل
2- او يدفنها
3- او يحرقها
4- اي واحد يرى نفايات يساهم في النظافة

ولكم تحياتي على هذا الموضوع الجيد وارجو من الاعضاء ابداء آرؤهم

[خــشــــــــــم]

شلفان

مو ضوعك والله مهم جد1. الحين كثروا الكواشيت بكل مناطق المملكه والحمد لله . وللاسف كثرت وراهم المخلفات . اعرف راعي نياق المسكين يمشي ويدفن اكياس النايلو كل ما شافهن فى منطقته, خايف على نياقه يمرضن او يموتن من التلوث الي تركوه الكواشيت .

منظر مولم شفته قبل كم يوم وانا كاشت ادور الربيع , يمين ويسار الخط كل قشعه وكل شجره ناشبن فيها كيس , غير القواطي وال ...

الموضوع بكل بساطه والله لا يهين الكواشيت. مثل ما تحرص على نظافه بيتك حافظ على نظافه ديرتك (وطنك) يعني بيتك الصغير نظيف وبيتك الكبير ما يهم ارمي .. حرام والله

شكرا اخوي شلفان.

[شلفان]

وما قصرتوا

واتمنى اشوف البر نظيف

[مغرم البر]

مشكور أخوي شلفان علي هذا الموضوع المميز

وأنا أضم صوتي إلى صوتكم.:) :)