المساعد الشخصي الرقمي

مشاهدة النسخة كاملة : وش افضل مكان للكشته للعوائل قريب من الرياض


هبيس
15/12/2007, 02:21 PM
بصراحه رحت لشعيب الدقله مش ولا بد ((مهوب تكانه))

وش فيه يا الربع مكان زين وقريب لطلعه من الصباح للمغرب وعائليه

ويا ليت مع الوصف ((الكروكي))
ولد بن حمد
15/12/2007, 02:24 PM
يمدحون منتزه الثمامه البري للعوائل
رحال طويق
15/12/2007, 04:24 PM
با أخوي هبيس حياك الله فيه مكان ممتاز جدا ونظيف وأشجار وأنواع الفله وقلييل اللي يعرفه لأنه مخفي بس لا تعلم أحد !!
شكلك تحمست لا تستعجل بيجيك العلم المكان هذا داخل إسكان موظفي المطار ... وخذ الوصف : طبعا تمشي مع طريق المطار الجديد وتخلي المطار علي يدك اليمين وتبتل وتمشي مع اللوحات ليين تجيك بوابة الأسكان تبع العوايل على يدك اليسار تلف يسار ثم تلف مع أول اشارة يمين ثم ثاني ملف يسار - شكلك ضيعت - وتمشي ليين ينتهي الخط وبيجيك خط ترابي على يمناك ادخل معه وبتلقى الشعيب في وجهك وترى غرب الشعيب افضل من شرقية وعسى الوصف واضح وكانه ما صلحلك عندك شعيب الجفير وشعيب صلبوخ وشعيب حريملا وأنت ورايك
وتقبل تحياتي .
بيّن
15/12/2007, 06:49 PM
اخوي ... انت لازم تسافر ... يعني اقل من 200 كلو مافيه ... بر الرياض كله شبوك ... الله يعينك .

تحياتي
راعي البرهـ
15/12/2007, 06:56 PM
اخي الكريم:شعيب الحيسيه افضل مكان وقريب
بعد ماتطلع من العيينه والجبيله تجيك طلعه سدوس
قبلها شف الشعيب على يسارك
NuMaS
15/12/2007, 07:17 PM
أخوي: بـ أضيف على ما تفضلوا به الأخوان.....
هناك محل قريب بس يبي لك ظلال بالنهار لأن مابه أشجار كبيره وظليله ..
المكان هو: داخل شبك المطار ، الوصف: إذا جاك كُبري الطيران الخاص و فندق صحارى المطار أطلع يمين مع المخرج بإتجاه الشرق يصير الطريق حرف T وأمامك الطيران الخاص لف يمين مع طريق إسـفلت بإتجاه الجنوب (ترى الطريق لك عليه) مكسر ومعدوم لكن يمشي الحال أمـش مسـافة 2 إلى 3 كيلو متر وبعده إخـتار المكان أللي يناسـبك.. أرجو أن تكون إضافتي ممفـيده...


تقــــبـلـوا مــــــــروري وتـحـــــــــــيــاتـي ،،،
ابو نايف التميمي
15/12/2007, 07:34 PM
عليك بشعيب صلبوخ

ولا الله يعينك على الشبوك
هبيس
16/12/2007, 02:44 AM
ولد بن حمد الله يعطيك العافيه بس ما احب المنتزهات




رحال طويق
اخوي الشعيب هذا تنزله من منحدر عسر شوي صح ((اذا هو اعرفه ورحت له قبل خمس سنين بالحيل ممتاز))


بين هذا الي ما نبيه البعد

تخبر معك عائله ودك بشي خفافي وسريع

راعي البره

الحيسيه على الجدول ولازم امره بأذن الله


NuMaS (http://www.mekshat.com/vb/member.php?u=63589) مكانك زين وسبق لي زيارته وكل علومك زينه


يا هلا

صلبوخ لك عليه ومهوب وسيع صدر

الله يعطيك العافيه ويوسع صدرك
مرفــأ
16/12/2007, 05:36 AM
مكان جميل وهاديء وامن بإذن الله ويوجد به اشجار خاصة مع انعدام ربيع هذه السنة

بعد ماتعدى إشارة حريملاء وانت طالع مع طريق الدريعه صلبوخ رغبه شقراء تجيك طلعه ومنطقة جبيله وطريق متعرج ثم يستوي الطريق مرة اخرى تحصل شعيب بعيثران على يمينك ويسارك ويوجد منتزه بري على يسارك مدح لي كثير ولكن لم اراه

وانت كذلك في الطريق ياتي مفرق يوديك ثادق من يمينك اذا اطلعت معه بيجيك شعيب كبير وان شاء الله يعجبك

http://www.athagafy.com/maps/al%20riyadh.jpg
ناجز
16/12/2007, 09:07 AM
شعيب صلبوخ يمدحونه
وزي ماقالوالشباب انتبه من الشبوك
دغيم1
16/12/2007, 11:03 AM
السلام عليكم ورحمة الله وبركاته
العشر مباركة
على الرابط أدناه تجد مايفيدك إن شاء الله

تحياتي

ابى اطلع للبر وين اروح له (http://www.mekshat.com/vb/showthread.php?t=115077)
ali1392ali
16/12/2007, 08:31 PM
عندك شعيب الحيسيه او الوسيع
بر الوالدين
17/12/2007, 12:05 AM
شكراً كاتب الموضوع و الله يعطيك العافيه

الحقيقه مثلك

و الظاهر مكان الأخ العزيز الغالي / رحال طويق

زين و مناسب للعوائل



با أخوي هبيس حياك الله فيه مكان ممتاز جدا ونظيف وأشجار وأنواع الفله وقلييل اللي يعرفه لأنه مخفي بس لا تعلم أحد !!
شكلك تحمست لا تستعجل بيجيك العلم المكان هذا داخل إسكان موظفي المطار ... وخذ الوصف : طبعا تمشي مع طريق المطار الجديد وتخلي المطار علي يدك اليمين وتبتل وتمشي مع اللوحات ليين تجيك بوابة الأسكان تبع العوايل على يدك اليسار تلف يسار ثم تلف مع أول اشارة يمين ثم ثاني ملف يسار - شكلك ضيعت - وتمشي ليين ينتهي الخط وبيجيك خط ترابي على يمناك ادخل معه وبتلقى الشعيب في وجهك وترى غرب الشعيب افضل من شرقية وعسى الوصف واضح وكانه ما صلحلك عندك شعيب الجفير وشعيب صلبوخ وشعيب حريملا وأنت ورايك
وتقبل تحياتي .



يعطيك العافيه رحال طويق و إن شاء الله نزور المكان
بر الوالدين
17/12/2007, 12:06 AM
أخوي: بـ أضيف على ما تفضلوا به الأخوان.....

هناك محل قريب بس يبي لك ظلال بالنهار لأن مابه أشجار كبيره وظليله ..
المكان هو: داخل شبك المطار ، الوصف: إذا جاك كُبري الطيران الخاص و فندق صحارى المطار أطلع يمين مع المخرج بإتجاه الشرق يصير الطريق حرف T وأمامك الطيران الخاص لف يمين مع طريق إسـفلت بإتجاه الجنوب (ترى الطريق لك عليه) مكسر ومعدوم لكن يمشي الحال أمـش مسـافة 2 إلى 3 كيلو متر وبعده إخـتار المكان أللي يناسـبك.. أرجو أن تكون إضافتي ممفـيده...


تقــــبـلـوا مــــــــروري وتـحـــــــــــيــاتـي ،،،




إضافة رائعه و ممتازه و الله يوفقك على ما تفضلت به من وصف

وما يمنع نزور مكانك أخوي الغالي
براوننق
17/12/2007, 02:16 PM
عليك بخريم قريب وزين للعوايل.............الله يجيب السيل............
ولدالعم
18/12/2007, 03:36 PM
مافيه مثل شعيب الحيسيه قريب للرياض وكل شيء متوفر لقرب العيينه
صلبوخ زين بس متعب شوي