المساعد الشخصي الرقمي

مشاهدة النسخة كاملة : أبي أجهز موتري Gxr من عنده علم


بن عواد
15/12/2007, 11:43 PM
السلام عليكم ورحمة الله وبركاته
أبي الصفحة أو الرابط اللي فيها جميع تجهيزات اللاندكروزر لأن ماشاء الله الصفحات واجد وتعبت وأنا أدور
بواسامه
16/12/2007, 12:20 AM
اترس البوك دريهمات
ورح لم برق الحيا ولا محل متكامل مثله
وخذلك رواق وطبق وعزبه وتانكي ماء ومشدات للجر ووووو واللي في بالك بتلقاه هناك بس لا تاخذ الا حاجتك
موفق
بن عواد
16/12/2007, 12:26 AM
لاهنت بس هذا وين محله إذا تخبر شي في الشرقيه دلني عليه
راعي الصطحه
16/12/2007, 12:26 AM
رح محل الرحلات وتحصل العزبه كلها السنيدي بالرياض
سليمان VIP
16/12/2007, 02:46 AM
حدد وش تبغى بالضبط والاخوان ما يقصرون ان شاء الله
ابـ معزي ـو
16/12/2007, 03:36 AM
اخوي : بن عواد
مساك الله بالخير والجميع
ماقصرو الشباب بالافاده
لكن انا حبيت ازيد على كلام الاخوان القليل

ياطويل العمر الموتر اللي معك يبيله .. بعض الاشياء اللي هي :-

تكميلات الجيب الخارجيه :
* شبك حموله اللي يركب على التنده وشكله جميل ومايبين ويجي على لون السياره وهذا موجود على ما اعتقد بالرياض وبالقصيم وبالشرقيه وحائل والكويت .
* جنوط هلل (( هدد )) وكفرات شواهين ويكون الجنط مبرز (( بارز )) عشان يكون للموتر خفه وتخف عليك ثقل كفرات الدونولوب حقت الوكاله .
* رفع الموتر من وراء كعكه وحده مع كل الجهتين وترفعه من قدام بس مايكون رفعه من قدام ارفع من ورا
مثلاً اللي ورا 29 خل اللي قدام 27 او 28 عشان ما يأثر رفع الموتر على الركب والاذرعه والمساعدات الاماميه .
* صدام (( دعاميه )) اماميه مكمله اللي يوجد بها ( شاكوش - مسحاة - كريك ) .

تكميلات دخليه :
* فرش خليفة السياره فرش تنزاني اصلي لحماية السياره من العزبه ومن الاغراض عشان مايخرب فرش الموتر حق الوكاله .
*تفصيل تانكي ماء وهو موجود بأكثر من منطقه واتوقع تلقاه بالشرقيه وياليت يفيدونك بعض الاخوه اللي مركبينه من الشرقيه .
*تلبيس القير لبس السنيدي اللي يتوفر فيه مخابي كثيره عشان تحط فيه الكشافات والسكاكين و.... إلخ .
*تلبيس التكايه ( الثلاجه ) قماش تنزاني مخفف له مخابي مع الجنب عشان تحط فيه الاغراض الصغيره .

اما اذا كان ودك تشتري عزب وتكمل الموتر فيهم .. عندي الحل إن شاء الله :
* عزبة قهوه وشاهي .
* عزبة طبخ .
* الدفور الازرق لجودته .
* كشاف Maglite .. او كشاف strong .. وهذا متوفر بمحلات الرحلات .
* كرسي نار عشان تحط عليه دلالك واغراضك وقت المكشات او المقناص .
* فرشه + مركه + مساند اذا رغبت فيها .
* لمبه خارجيه وقت المراح او الجلوس بالخارج .
* ذرا (( رواق او تيزار )) على حسب المسمى .
ولاتخلو الكشته بدون جهازين مهمين
---------
::: (( كـنـود + قـارمـن )) :::
---------
وإن شاء الله إني افدت ولو بالقليل .. وهذا على حسب خبرتي بموتر الجي اكس ار
والله الموفق
اخوك

( سلطان الهاجري )
ابـ معزي ـو
:)
بن عواد
16/12/2007, 05:02 AM
أشكركم جزيل الشكر جميع
أخوي أبو معزي كفيت ووفيت لاهنت
جنتلمان نجد
16/12/2007, 10:32 AM
ابومعزي ,, بيض الله وجهك ع المشاركه المميزه
ابو عادل1
16/12/2007, 12:25 PM
بارك الله في الجميع وفي الحقيقة ان اخوي الهاجري وفى وكفى جزاه الله خير بس بغيت أسأل عن تلبيس القير والتكاية
ابـ معزي ـو
16/12/2007, 05:12 PM
الله يبيض وجيهكم
وهذا اقل ما اقدمه .. والنفع لاخوي بن عواد وللمنتدى عامه
---------------
اخوي : ابو عادل
اسأل طال عمرك .. وإن شاء الله تلقىء الجواب ..؟
صدق_المشاعر
16/12/2007, 07:54 PM
الله يبارك فيكم والله ان الواحد في ها الموقع ما يقدر الا ان يقول الله يوفق الجميع ويجمعنا على طاعة وفي مستقر رحمته في جنات النعيم امــيـــــــن
ابو ايمن
17/12/2007, 12:40 AM
اولها ابارك لك السيارة الله يطعمك من خيرها ويكفيك شرها .

وثانيها ماقصروا الاخوان خاصة ابو معزي .. كفى ووفى ..

للجميع مني تحية عطرة
العابر سبيل2
17/12/2007, 12:59 AM
عز الله انك شرحت ووفيت وكفيت فجزاك الله عنا خيرا ونفع بك ا ميــــــــــــــــــــن
ابـ معزي ـو
17/12/2007, 04:06 PM
الله يعطيكم العافيه جميعاً
كفتنا شوفتكم ومروركم على موضوع اخوي
وإن شاء الله إني سويت ولو القليل لاجلكم ولأجل منتديات (( مكشات ))
شاكر لكم جزيل الشكر
--------
الله يرحم والدينا ووالدينكم والمسلمين

:)
بن عواد
18/12/2007, 05:56 PM
بصراحه يعجز اللسان عن الشكر ألـــــــــــف شكر
الرحال11
18/12/2007, 06:58 PM
فيه تلبيسة للتكايه روعه تركب على الثلاجة ماشفته إلا في قطر إذا تعرفون عنها شىء دلوني عنها (العلامة مرسوم عليها علامة تويوتا)سعرها في قطر حوالي 40ريال