الكلام لاصحاب الخبره وش رايكم بين... و... ؟

[mojahed]

انا يااخوان جاب الله لي دراهم محتار بين
الشيروكي واليوكن ناس يمدحون هذا ويذمون الثاني والعكس
وش رايكم من جميع النواحي استخدام وااستهلاك السياره من القطع وغيره انتظر ردكم يااخوان :rolleyes:



محبكم / ابوعبدالله

[سندهم]

أشتر اليوكن وأنت مغمض
هذا والله أعلم

وأنتظر أهل الخبرة

[mojahed]

بس اخوي ابوسند انا معجبني حاجه واحده في الشيروكي صغر حجمه وانه في الرياض ماتزمل لموقفه بس اليوكن رفيع بعدين انا خايف منه عشان دبله ازرار والشيروكي قير ارضي

[شبح الصحراء]

خذلك برادو احسن لك من الأمريكي البرداو ياباني كد ومد بإذن الله والشروكي معروف بكثرة أعطاله اسأل اصحاب الشروكي واليوكون مشكلته الأزلية طرمبة البنزين دائم تتعطل وهو ثقيل وغثيث البرادو تحس انه غزال خاصتاً الستة سيلندر منه وعقلك في راسك تعرف خلاصك .

[mojahed]

والله الشيروكي مع الشباب ماقد اشتكوا منه شكله وذف وش رايكم

[دغيم1]

السلام عليكم ورحمة الله وبركاته
حياك الله أخي الكريم
أسأل الله لك التوفيق والإعانة وأن يدلك على الصواب
لاشك أن اليوكن - او - التاهو
قطع قصير
أفضل بكثير من الشيروكي
الشيروكي قوي وجيد ولكن يعاب عليه كثرة الأعطال وكثرة مصاريف الصيانة
أما اليوكن - والتاهو - فالقطع متوفرة وأفضل في القيادة والسعة أكبر
وكذلك إقتصادي في البنزين
تمنياتي لك بالتوفيق
دمت بود

[mojahed]

وشلون اليوكن او التاهو قطع قصير

[mojahed]

محتاج مشوركم وين اهل الخبره مااحد من اهل الشيروكي او اليوكن ياالله يااخوان المكاشيت قربت

[اول الوسم]

السلام عليكم

والله شوري عليك تفتك من شي اسمه شيروكي كل يوم وهو واقف له في جوووو والله انه شريت الخساره
وتبي نصيحتي لاتشتري الا السيارات اليابانيه بكل انواعها اسئل مجرب واليوكن ابرك من الشيروكي بوااااجد

تقبل تحياتي وعيدك مبارك وكل عام وانت بخير

[مرعش هدب]

انا مع اخوي اول الوسم خلك من الشروكي واعطاله
وخذ الياباني احسن بواجد عندك الهدد لا يعلى عليه
وعندك الباترول يبيض الوجه...
والخيار راجع لك اخوي mogahed

[بدرالقصيم]

الشيروكي انا مجربه اذا بغيت شروكي خذ وكاله ولا نظيف النظيف
اما الكسر اللي ملعوب بها فالله يعينك تاخذ يوكون احسن لك

[mojahed]

ابغاكم تفيدوني اكثر طيب اليوكن كم يمشيه التانكي حقه

[الفتكي]

السلام عليكم
عيدكم مبارك وكل عام وانتم بخير

شوف اخوي مجاهد اذا انت صاحب طلعات للبر لا تأخذ الا سيارتين الهدد او السفاري فقط لا يعلى عليهن أما اذا انت مانت صاحب طلعات عليك باليوكون ممتاز وسيع وكويس واترك الشيروكي ويكون بعلمك ان الشيروكي من 2002م فما فوق صغير حجمه ولا ياخذ عفش الا قليل
مجرد رأي ممتاز:good: :good: :good:
the.5555@hotmail.com

[بدوي جنوبي]

الشروكي ممتاز اذا طبيت في سياره نظيفه

بمعني الكلمه ،،، يعني ما تخاف منه

واليوكن سياره رائعه ما يحتاج اعلق عليها

بالتوفيق

[abc-00-abc]

السلام عليكم ورحمة الله وبركاته

اذا تبي القوة وسعة الصدر و التطعيس
خذ شروكي


واذا حاط في بالك الراحه والسفريات الطويلة
خذ اليوكون اوسع وانفه

و الله يبارك لك في السياره اللي بتاخذها
ويعطيك خيرها ويكفيك شرها

[شمالات نجد]

الياباني وبس.. والله يوفقك أخوي

[mojahed]

اسال الله العظيم الرحمن الكريم المنان ان يكفينا واياكم شر هالسيارات ويجعلها عون على الطاعه ويجزاكم خير على مشورتكم :good:
اخوكم /مجاهد
ابي عبدالله

[احب البرواهله]

انصحك بقوه وبلا تردد ومن واقع تجربه والله يشهد بالشيروكي إذا تبي تتعرف على اصحاب التشاليح ومحلات قطع الغيار إذا حصلت له محلات تبيع قطعه الله يقطعه من موتر .
أما اليوكون الشكل الأول مشاكله بالطرمبه من واقع ما أسمعه وأنا معي تاهو جديد ما شفت منه إلا كل خير ومركب فيه ونش وسحبت فيه لاند كروزر البارح مغرز ( كتجربه عشان ما يزعلون أهل اللاند ولا اللأند محشوم ما يغرز )