أفضل سيّارة أرشحها ( لطيور البرّ ) isuzu حوض 4×4>>> ادخل وشوف

[طيـــ بر ـــر]

هذه السيّارة لها مواصفات يطلبها ..( طيور البرّ ) ومواصفاتها كالتالي :
1-( القوّة ) فهي ذات محرّك 6 سلندر على شكل v ( <<< سوّالي فيها ) وقوّة المكينة 3000 - بخّاخ.
2-( سعتها ) تكفي خمسة ( غربان .. قصدي طيور برّ ) .
3-( حوض) وهذي الصفة يعشقها طيور البرّ.. خصوصا اذا كانت السيّارة قوية 6 سلندر .
4-( 4×4) وهذه ميزة .. لنفس الطيور اللي فوق :D
5- المراتب الأماميّة ( منفصلة ) وهذه تضفي راحة للسوّاق واللي جنبه ( واللي وراهم ماكلين هواء ) .
6- هناك مساحة ( كبيرة ) بين الراكبين الأماميين والركّاب بالخلف .. وهذه الميزة (( يفتقدها الددسن والهايلكس الدبل )) .
7- ( سرفيّة البنزين) إنس .. الموتر سرفيته في البلد ( بلا مبالغة مثل سرفيّة الأربع سلندر ) ..هذا للبنزين.. أما الديزل التيربو .. يمشيك ( ألف وشوي ) بثلاثة وعشرين ريال ..!! وهو سته سلندر كما أسلفنا ..
8-( مطبّ الموتر ) مهوب صاحي .. ليّن وكأنك راكب أمريكي .. ويفسّر هذا بسبب مشاركة جنرال موتورز في صناعة الموتر .. كما يقال ..!!
9- الموتر ( طامن) مقارنة بالمدعو ( هايلكس 4×4اللي مع كل لفّه تخاف ينقلب بك ) :p .. وهذه الميزة هي التي تريحك في ( الديرة مع اللفات ) وكذلك في المراوغة <<< استر عليه جمس بوند :D
10-( سعره ) مناسب جدّا مقارنة بالمدعوّان (( ددسن 4×4- هايلكس 4×4)) فهما أربعة سلندر ويفتقدون لبعض المزايا التي هي في هذه السيّارة ..
11- ( يابانيّة الصنع)
12- ( حرارتها ) ثابتة في الصيف وشتاء .. في السهول والجبال .. في البر وفي البلد .. سيم سيم ;)


# الخلاصة .. المتر قويّ وعزمه جنان .. وفي المطبات والجلد ( ليّن ) ووسيع ومناسب في البلد ( لنزوله نسبيّا ) .. وأكثر الناس مايغرفون عن هذا ( الموتر ) .. ولكن الآن بدأ ينتشر عند ( طيور البرّ مثلي ) ..

اتحدّاكم وشهو هالموتر ..

فزروا

.
.
.
.
.
.
.
.
.
.
.
.
.انها
.
.
.
.
.
بلا
.
.
.
.
.
. شكّ
.
.
.
.
.
isuzu 3÷4 .... قصدي ....4×4

.
.
<<<<<<< يصلح في دعاية ( تويكس ):D

أحبابي ... شكل هذه السيّارة من عام 1999 - 2003 لم يتغيّر ....... ولكنها أطلّت علينا في 2004 بخشّه ..قصدي (بوجه جديد)..


وسأضع بإذن الله .. صور السيّارة .. حتّى 2003 ( مثل اللي معي 2003)
ثم سأضع صور الموديل الجديد أبو خشّه 2004

والى الصور :

http://www.mekshat.com/pix/upload/images2/Isuzu%20Mega%20silver%201.jpe

http://www.mekshat.com/pix/upload/images2/gsview.jpe

http://www.mekshat.com/pix/upload/images2/isuzu1thumb.jpe

يتبع ...... بقيّة الصور ..

طيـــ بر ـــر

[طيـــ بر ـــر]

http://www.mekshat.com/pix/upload/images2/Isuzu%20Mega%202%20Red.jpe

http://www.mekshat.com/pix/upload/images2/isuzu_mega.jpe

http://www.mekshat.com/pix/upload/images2/mv195300.jpe

يتبعه بقيّة الصور لموديل 2004 .....

[طيـــ بر ـــر]

وهذه صور الموديل الجديد .. 2004

وسأذكر ... أسعار الديزل والبنزين منها .. في نهاية الموضوع .. ان شاء الله ..


http://www.mekshat.com/pix/upload/images2/powertrain_01.jpg

http://www.mekshat.com/pix/upload/images2/line_up_2_1.jpg

http://www.mekshat.com/pix/upload/images2/isuzdmax-1.jpg


http://www.mekshat.com/pix/upload/images2/d_max.jpg

يتبع .. بقيّة الصور

[طيـــ بر ـــر]

تتوفّر هذه المركبة التي تدعى isuzu واسم الدلع حقها ( سيزو) ..تتوفّر بأحجام مختلفة .... فهناك ( غرفتين وحوش ) = غمارتين .. كما في الصور السابقة ...

وتتوفّر أيضا ( بغرفة ومطبخ وحوش ) قصدي غمارة ونص .. وحوض ..
كما في هذه الصورة ..
http://www.mekshat.com/pix/upload/images2/line_up_3_1.jpg

وغرفة وحدة وحوش .. كما في الصورة اللي تحت هذا السطر <<<< ساقط في التوصيف :D
http://www.mekshat.com/pix/upload/images2/line_up_6_1.jpg

وهذه مقصورة القيادة ..<<< استر عليه :p

http://www.mekshat.com/pix/upload/images2/002.jpg

وهذه صور من الداخل يتضح فيها المرتب المنفصلة ..
http://www.mekshat.com/pix/upload/images2/isudmax-4.jpg


يتبع ...

[طيـــ بر ـــر]

متوفر بألوان ( مدري وش تبي )

http://www.mekshat.com/pix/upload/images2/rear_acc.jpg



وبأشكال ( من جنبها ) .. <<<<< خربت علاقته مع الوكيل .. وحرمه الوكيل من حصته من الدعاية .. وقلب على السيّارة :D
http://www.mekshat.com/pix/upload/images2/side.jpg

:D


http://www.mekshat.com/pix/upload/images2/picgalBIG-5715.jpg

وش يبي ذا القديم ....... أقول يمدحون المعارض هالأيام رح يمكن تلقى نصيبك :D .... <<<< المشكلة ان عنده مثل هالموديل .. الله يعين ..

يتبع ...

[طيـــ بر ـــر]

<<<<<< صلحت علاقته مع ( الوكيل ) وبيعطيه حصته من الدعاية ( احلق حاجبي ) :D

ياشباب .. هذي صور من الداخل .. (( للدلوعة سيزو ))

http://www.mekshat.com/pix/upload/images2/comfort002.jpg

ومتوفرة ..بقير ( عادي ) وقير ( تماتيك) أرضي ... والدبل .. بأزرار (صار مدلّع )


http://www.mekshat.com/pix/upload/images2/004.jpg

وهذي صورة للقير العادي ( أبو راس )
http://www.mekshat.com/pix/upload/images2/006.jpg



وفي الأخير .......... أقول :





.







.











.












.






سلمني على هالخشّه ...
http://www.mekshat.com/pix/upload/images2/isudmax-2.jpg


<< اسعل مجرّب .. واردع الطبيب :D

[ابو عايد]

مشكور أخي العزيز 00 طيـــ بر ـــر

يعطيك ألف عافيه

وتقبل تحياتي // العاشق الولهان

[طيـــ بر ـــر]

العفو .....أخوي عايد

وشرّفنا مرورك ...


طيـــ بر ــــر

[قناص القرائن]

ممتاز بالحيل

[ابوبرقاء]

انا اقول وش المدح الموتر:confused: ؟؟؟؟؟
؟؟؟؟؟؟؟؟؟؟؟؟؟
وثرها معك 2003 :p الله يطعمك من عيرها ويكفيك شرهااااااااا
والله من مدحك اعجبتني ..............بس;)
......................... يوم دريت انها معك قلت هيه بس عرفت السالفه:D

بس حلوه ياليت نقدر عليها :::

[طيـــ بر ـــر]

قنّاص القرائن .... أشكرك على مرورك ..

[طيـــ بر ـــر]

أبو برقاء ..

ههههههههه والله جبتها .. نعم .. أمدح الموتر .. مهوب لأنه ( موتري ) ولكن ..لأنه فعلا يناسبني ( كطير برّ ) <<< احلق رمشي

وكذلك ..لأنها نادرة والناس ماتدري عنها شيء ... والموتر أفضل من بعض المواتر المعروفة .. فحبيت الخير لي ولغيري .. من خلال هذا الموضوع ..

الخلاصة : مدحتي للموتر من واقع تجربة .. وأنا ولله الحمد من المنصفين .. ولذلك الى الآن أبحث عن عيب في السيّارة مالقيت .. وهي الآن تبي تتم سنه في الشهر القادم بإذن الله ..

هناك مثل رهيب يقول : (( أسأل مجرّب .....وصكّه واستريح !!)

طيـــ بر ــــر

[الدبل الثقيل]

انا اخوك هذا الموتر وهو ديزل تيربو مكينته 2800 سي سي 100حصان.. وسعر طرمبة الديزل 9الاف .. اما سعر الموتر لموديل 2003 الغمارتين دبل وديزل تيربو60الف هذا العادي اما الفل كامل منه ب66الف

اما بالنسبة للأسطورة هايلكس ديزل (عادي مهو تيربو) مكينته2800 سي سي 94حصان (عاد كيف لو فيه تيربو).. وسعر طرمبة الديزل 4الاف .. اما سعر الموتر لموديل 2004 خليجي (عماني عند معرض اليحيى في بريدة) فل كامل 59الف مع اللوحة والأستمارة..

ورأيي الشخصي ان الهايلكس افضل بدون مقارنة مع اي ونيت...

اما بالنسبة للراحة ... في البر مافيه راحة يعني بتناقز سواء هايلكس ولى بي ام..

ولاتزعل ياخوي ترى رضاك اهم من الهايلكس وغيره.. بس انا كنت في وكالة الزيزو امس..

وجزاك الله خير...

[العـــــطاف]

اخوي طير بر
سألة واحد من الشباب كان معه ايسوزو ديزل وصدم عليه ثم باعه
عن سبب بيعه له
قال تخيل تروح للوكاله ولا تلقا قطع غيار وش تسوي
يقول ان الوكيل بسعوديه مو فاضي للونيتات هم الوكاله كله للدنات تلقى قطع الغيار
كله بالوكاله لدنات
وعلى فكره السياره جداً رائعة وكنت ابشري وحده مثله بس الله فكني
من ذا الوكيل التعبان .

[Bader-M]

شركة
ايسوز من افضل الشركات العالميه
ان لم تكن الافضل في صناعة محركات الديزل
وهي شركة تتبع شركه جنرال موتر الامركية
........
مشكور يالذيب
........................

[طيـــ بر ـــر]

الدبل الثقيل :
والله تشرفت بمرورك ...... وبودّي أن أوضح بعض الإشكاليّات ..... أخي الكريم .....أنا لمّا عملت مقارنة بين isuzu والهايلكس ( 4×4) كانت المقارنة من جميع النواحي ... وكانت لكل النوعين ( البنزين - والديزل ) ...

لو تلاحظ أخي الكريم إن أكثر كلامي في هذا الموضوع عن ( البنزين 6 سلندر .. وعن قوته وعن سرفيّة البنزين ) ..... وخصوصا ...أنني أمتلك موديل 2003 بنزين ..... ولا أنصح ( طيور البرّ ) في الديزل..... إلا اللي لهم وضع خاص ... لأن الديزل كما ذكرت ..مشاكله وقطعه كثيره ...... وأنا واجهت كثير من ( طيور البر ) معهم مثل سيّارتي .....بس ( ديزل ) وكلّهم يشتكون .. من عزمه .. لأنه أربعه سلندر ( جميع الموديلات الى 2003 ) ....... فأنا لاأنصح بالديزل ..... ياطيور البرّ ...لأني أعرف ناس معهم 2002 ديزل يبون يشرون 2003 بنزين .....


:)

اقتباس : (اما بالنسبة للراحة ... في البر مافيه راحة يعني بتناقز سواء هايلكس ولى بي ام.. )

أما في هذي أخوي الدبل الثقيل ... أنا لاأوافقك ....لأنك ماشريت الموتر (( للبرّ فقط )) الى إذا كنت ولد نعمة هذا شيء ثاني :D أنت ياأخي الكريم ..تطلب الراحة ( في البلد .. لأنه الموتر بيقعد معك في البلد تقريبا تسعة أشهر بدون طلعات للبر .. هالتسعة أشهر .. تبي تعاني فيها اذا كان معك المدعو ( هايلكس 4×4) :D ... وكذلك في البرّ ... أخوي الكريم ...

مثال : الباترول ممتاز بالطعوس ... لكن بالأرض الحجرية .. مايأكل عيش .. ويتفكك ..صح ..
أما اللانكروزر ... في الطعوس ... وفي الأرض الحجرية ....( بلا مبالغة .. والله إن سواقة السيزو البنزين ميجا ..في البرّ طعوس أو أرض حجريّة .... مثل اللاند كروزر ... )... يعني لاتسمع طقطقة ... ولا يتفكك ... والمتور.. شادّ ... وليّن في نفس الوقت ...

اقتباس : (ولاتزعل ياخوي ترى رضاك اهم من الهايلكس وغيره.. بس انا كنت في وكالة الزيزو امس..)

ههههههههه وش دعوه ... والله مابينّا هالكلام يالحبيب ....
:D


لكن ياليت أخوي ( الدبل الثقيل ) تعطينا أخر تسعيره للسيّارة في الوكالة .... للبنزين والديزل ..

أما الأسعار :
أنا شريت موتري ( mega) فل كامل بنزين ... في رمضان العام الماضي .. وأتوقّع أنا أول واحد يشتري من ذيك الدفعة ... وشريته بـــــ( 64) ألف .... لكن الغريب أنك تقول ان الديزل (66) ...أتوقّع بسبب ارتفاع عملة(الينّ مقابل الدولار ) <<<<< محنّك وسياسي .... احلق رمشي الثاني:D

أما ( موديل 2004 الشكل الجديد ) سألت عنه قالوا عن البنزين الفل كامل وقير تماتيك ( 72) ألف.. غالي بالحيل..

ولقيت منه ديزل ...(لكن الرفارف سود يعني نص فل ) ومن داخل قزاز كهرب وتيربو ومرايات كهرب ..لقيته (55) ألف ... ولا أدري هل هو 6 سلندر أو لا !!

====================
لكن نصيحة :
اللي ( طير بر ) ولا يهمّه الشكل واللون ..... ياخذ البنزين ( نص الفل ) لأنه مافي فرق بينه وبين ( الفل ) الا حاجات بسيطة ..
فمثلا :.. أنا لمّا شريت موتري ( البنزين الفل كامل ) ولونين رصاصي ورصاصي غامق من تحت ...شريته بــــ(64) ألف....... في المقابل هناك ( نص فل ) لونه أبيض .. ومن داخله نفس ( الفل كامل - كل شيء كهرب ) لكن من برّا .. ماله رفارف .. ولا له دعاسة طويلة ... وكفراته سخيفة وجبليّة ...هذا سعره ( 52) ألف ...:eek:
شفتوا الفرق ( تقريبا 12ألف ) .. بثلاثة آلاف من هالثنعش ... يمديك تحطّ .. كفرات عريضة + دعّامة من المواهب + شراع مثل الشاص+ أنوار وكتاوت + كشافات أماميّة ... وتصير ((( طير برّ )) والتسعة الباقية ...تحطها بجيبك ....:) ....

وكذلك .. الموديل الجديد .... الفرق بين الفل والنص فل ..(( تقلّص )) .. فأصبح في كلا النوعين رفارف ( ولكنها في نص الفل ..لونها أسود ) .. ومن داخل ...هوّ هوّ ..... ويمكن الفرق في السعر واجد ... فنصيحتي لـ( طيور البرّ ) عليكم بنص الفل ....

وفي الأخير .. أشكر أخوي ( الدبل الثقيل ) على هالمداخلة الطيّبة.... فله منّا جزيل الشكر ...



طيـــ بر ــــر

[طيـــ بر ـــر]

الرسالة الأصلية كتبت بواسطة العـــــطاف
اخوي طير بر
سألة واحد من الشباب كان معه ايسوزو ديزل وصدم عليه ثم باعه
عن سبب بيعه له
قال تخيل تروح للوكاله ولا تلقا قطع غيار وش تسوي
يقول ان الوكيل بسعوديه مو فاضي للونيتات هم الوكاله كله للدنات تلقى قطع الغيار
كله بالوكاله لدنات
وعلى فكره السياره جداً رائعة وكنت ابشري وحده مثله بس الله فكني
من ذا الوكيل التعبان .

حيّاك الله أخوي العطاف ...

نعم ..صحيح ..قد يكون اهتمام الوكالة في الدنات ... أكثر من غيرها ... ولكن ألاحظ .. أنه في الفترة الأخيرة ... وبعد انتشار ...mega انتشار بسيط .... بدأ الأهتمام في هذا النوع الدفرنسين... وأتوقع في المستقبل القريب... راح يهتمّون في البكب 4×4 .. لأن نزول الشكل الجديد كمنافس في السوق ... راح يخلّي الوكيل يهتم في هالنوع... والآن ...بصراحة بديت أشوف الشكل الجديد 2004 4×4 في معارض النسيم ... ومتشره .. يبيعونها جديده ...وفي السابق ( أي : قبل سنه ) ماكن أحد يعرضها... لاحظت الفرق ... فيه تطوّر شوي

نعم .. الوكيل تعبان أنا معك .. لكن هذا مهوب ذاك العيب .... لأنك اذا شريت موتر جديد ( وكفاك الله من الحوادث ) راح يجلس مع على الأقل 4 سنوات من غير تغيير قطع ..ماعدا القطع الاستهلاكيّة ( السيور - الفحمات وغيرها ) .. وبعد اربع سنوات ... يمديك ان شاء الله شريت الشكل الجديد اللي بعده ....

طيـــ بر ــــر

[طيـــ بر ـــر]

أشكر ..أخوي ( طاير بالعجّة ) على المعلومة ... المهمّة .. وهي أنّ ايسوزو ... تتبع جنرال موتورز .... ( وأنا كنت أعتقد أن متعاونة معها ) ...

والآن اتضح .. أنها تتبع تلك الشركة العالميّة ...


مشكور يالذيب ..

[mohamad1121]

الاخ العزيز طير بر

مع التحيه

السياره بوجه عام قويه جدا وتحتمل الظروف المناخيه الخليجيه وزودت بمكائن قويه ، ولكن غطى عليها سيارات النيسان والتويوتا لقيمتها في السوق ولا يعرفها الا من جربها .



ابوكاسر

[بـــدر]

مريت الوكاله ولقيت غمارتين دبل لونها بفتح النفس (ملينا من اللون الابيض:D :D ) ديزل محركها (Diesel 3000 turbo)
افضل هي ولا ا محرك البنزين (V6) ابي من اهل الخبره المجربين الديزل :what: :what:
اما يا خوي mohamad1121 بالنسبه سيارات التويوتا الديزل خاصه مثل الهايلكس تفشل عزمها ضعيف وقرقعه زايده يعني ما ظن تقارن بمحركات اوسوزو الديزل

[طيـــ بر ـــر]

أخوي بدر :

إن كنت تقدر على ( البنزين v6) فتوكّل على الله .. ..

وان كنت تبي الاقتصادي ..الديزل ...

مع أن فيه بعض أخوياي ..... معهم ديزل 4×4 ..2002 يبون يبيعونها ويشرون ( بنزين سته سلندر ) لأنها قويّة بالحيل .... ولا تسرف ....وعزما هبال ..

لعلّي أكون أفدتك ... وننتظر أرآء الأخوة ....


طيـــ بر ـــر

[طيـــ بر ـــر]

أخوي بدر :

هل الديزل اللي شفتها أنت ( 3000) مكينتها .. وهل موديلها 2004 .... لأن موديلات 2003 وتحت الديزل ماهي ( 3000)؟؟ انتظر ردك

وياليت تعطينا أسعار الديزل والبنزين .. وهل هي فل ..أو نص ؟؟

أرجو أني ماأكون طوّلت عليك ..

طيـــ بر ـــر

[عاشق الصفاري]

شوي شوي علينا بالصور
مشكور ياطيربر على الصور الي تطير العقل

[فرد حمزة]

هلا والله بـ طيـــ بر ـــر اللي والله ما يقر إلا على أعلى الشواهق

حقيقه أعجبني سردك وموضوعك في الصميم

على طاري مريت الوكالة عندنا في حايل وسألت عنها الـ2004 الفل كامل قالي بـ70000ألف مع الاستماره والمرور
وعنده النوع الثاني اللي تقول صرااحه سعرها مغري بـ55000 ريال والفرق واجد !!!

حقيقه لم أقتنع بالفرق من ناحية الكماليات والأكسسوارات ! ليس معقولاً يكون الفرق هكذا!

كلمت أحد الأصدقاء ممن أعتزه به رأياً ومشوره وقد أقتنى الموديل 2004 فل كامل ديزل رما هو أول من أقتناه في الرياض :)

يمدح الموتر يقول في شعبان نعرفها وبالجيب ندووس عليها خوفاً من الربضه إلا أنها عدك تتمشى في الشعيب

لكن قال لي كلمه لم يأكدها وهي أن الطراز الثاني اللي سعره بـ55000 الماكينة التي فيه ليست كما في الفل كامل ...!!! بل أقل ربما قوتها أو سعتها 2500 أو 2800 !

أنا لست متأكد من المعلومة ،، وسأحاول زيارة الوكيل للأستفسار عن هذه النقطة

أغلى تحية للجميع

أخوكم

فرد حمزة

[طيـــ بر ـــر]

عاشق الصفاري ... حيّاك الله .. :)

فرد حمزة....... أشكرك على المعلومات المفيدة وتوني أدري ليش هالفرق بالسعر ... وياليت تسأل عن البنزين اللي بنفس مواصفات الديزل ياللي بــ(( 55 )) ألف .. وأكون لك من الشاكرين..






الرسالة الأصلية كتبت بواسطة فرد حمزة
يمدح الموتر يقول في شعبان نعرفها وبالجيب ندووس عليها خوفاً من الربضه إلا أنها عدك تتمشى في الشعيب



أخوي فرد حمزة ... مافهمت الجملة السابقة .. ياليت توضّح أكثر ..


طيـــ بر ــر

[صقر]

مشكور اخوي طيـــ بر ـــر

الحقيقة موضوعك يعتبر مرجع كامل عن هذه السيارة البرية ومثل ما قال طاير بالعجة تعتبر هذه السيارة رائدة في صناعة مكائن الديزل ولها تعاون وثيق مع شركة جنرال موتورز.

والشكر موصول للأعضاء الآخرين الذين تفاعلوا مع الموضوع وقدموا تجاربهم واستفسارتهم

بارك الله فيك.

[الزعيم]

السلام عليكم

اخي طير بر احترم وجهتة نظرك ورأيك وذوقك

بس عاد مدرى وشاسمها يسزو والله ما ظنيت ان اطلع بها البر افضل منها ما ينضمن في الطعوس خل عاد ايسزو
ياخي خلنا على تويوتا، نيسان الدهايستو .

وبعدين لانفرح بهذه الموديلات في السعودية ابدأ ابداً . هذا حتى ولو ان فكرت اشترى وحده مثلها .

وجهة نظر خاصة بي

شاكر لك على مشاركتك لك تحياتي ؛

[طيـــ بر ـــر]

أخوي ( الزعيم ) أما قولتك (( ان الأيسوزو .. ماتنظمن في الطعوس )) أقولك

<<<<<< أخوك كان معه جيب ربع نيسان باترول 2000.....بلا مبالغة السيزو أخف منه وأحسن منه في الطعوس (( اسأل مجرّب )) أنا أتكلم عن البنزين 6سلندر

بس الغريب انك تفضّل مع النيسان والتويوتا (( ديهاتسو )) !! بالله وين تنصرف هذي
ههههههه ديهاتسو .... وش هي من لحية هالسيّارة ...

وأشكرك على وجهة نظرك أخي العزيز ...

[الجمس]

اخوي طير بر
موضوع ممتاز جدا في طريقة السرد والتفنيد ولكن سمحلي ( عمر الرخم ماتصير صقور).

مع تحياتي للجميع.

[بوعبود]

موضوع راااائع واحلى مافيه طريقة عرضك :good:

اتمنى لك دوام التوفيق وبانتظار ابداعاتك :)

تحياتي لك
بوعبود:D

[طيـــ بر ـــر]

الجمس : الله يسامحك ... ترانا في ( خيمة الورش والصيانة ) ..يمكنّك غلطان تبي ( خيمة الطيور والصقور ) تراهم بجنبنا :D

ولا يمكن أنك يوم تلقى كل الناس معهم مثل السيّارة اللي تحبها أنت وتقدّرها في البر ..أبد ... الناس أجناس .. وأذواق وألوان مختلفة ... وروايح( والا مالها دخل الريحة ) :D

--------
بو عبود .... تسلم يالطيب ... وان شاء نوافيكم لبكل جديد مفيد ..

طيـــ بر ـــر

[الجمس]

اخوي طير البر
اسعد الله ايامك
ليش الزعل ؟ هذى وجهة نظري ومبنيه على تجربة واحد من المعارف شراله ونيت اسوزو(ديزل) لمطبخه لتوصيل الطلبات وفي بعض الاحيان ياتي عليه للشبه , بدون مبالغه تسمع قرشته على بعد كيلو! لاسمعنا القرشه قلنا هظل فلان , اضف الي ذلك عزمه يسبقه سيكل . صدم بالموتر هندي عنده وقعد ستة اشهر يبحث عن القطع بالوكاله مالقاها ويالله من التشليح وبسعر لايصدق تقل متفقين مع الوكيل . هذا راي ( واختلاف الراي لايفسد للود قضيه ) والا وش رايك.

تحياتي للجميع.

[الزعيم]

السلام عليكم
اخي طير بر
بخصوص تعقيبك على ردي بخصوص المقارنة بين التايوتا والنيسان ((( الديهاتسو))) ان معك انه لا يوجد مقارنة وبخاصة الديهاتسو ولكن من باب تجربتي لهذه السيارة الديهاتسو استطيع اقول لك انه تعتبر من سيارات الدفع الرباعي الجيدة جدا (( روكي ) هذا النوع

وحهة نظر

[طيـــ بر ـــر]

حياك الله يالجمس .... أبد مايزعلنا منك سيّارة ...

بس أنت تقول كلامك هذا من واقع تجربة .. وأنا كذلك أمدح الموتر من واقع تجربة ...
لكن عندي أسئلة ..

# خويّك اللي معه ايسوزو هل هي ( دفع رباعي 4×4) ؟؟
# هل موديلها فوق (2001)؟؟

وعلى فكرة .... ترا الفرق كبير بين الدفرنس والدفرنسين ... من ناحية الراحة

<<<<< أسأل مجرّب واترك عنك الطبيب

انتظر أجوبتك علشان تتضح الصورة ..

ومثل ماقلت (( الخلاف لايفسد في الودّ قضيّة ))

ومشكور يالغالي ..


طيـــ بر ــــر

[أبرق الضيان]

جزاك الله خير أخونا طير البر :D

و لكن ياليت لو أحد الشباب يضع لنا الأسعار لهذه السيارة ( ديزل - بنزين ) و يكون عن طريق الوكيل لكي يصبح الموضوع متكاملاً عن هذه السيارة اللي دوختني و شكلي خلاص أبشتريها ، و حسبي الله عليك أنت و هالصور اللي أخذت العقل .

[طيـــ بر ـــر]

أخوي ( الزعيم ) أنت مدحت الديهاتسو .... من خلال تجربتك ....
أنا نفس فكرتك ..... مدحت الايسوزو ... من خلال تجربتي .. وتجربة أناس أعرفهم ..

============
أبرق الضيان ....

الديزل ... 2004 .. اللي صورتها في الموضوع ... توجد عند الوكيل بــ( 70) للقير العادي .. والتماتيك .. تزود أربعة آلاف .... ومكينتها 3000 ( أما النص فل مكينتها 2500) ..وبقوة 138 حصان ... أي أقوى من البنزين .. اللي في المديل اللي قبلها (( 2003 وانت نازل )) ... وبصراحة بدت السيارة تنتشر ... وانا رحت يوم من الايام للوكيل ولقيت البشريّة يتفرجون في السيّارة ... ويمدحونها ...


أما البنزين ... فللأسف .. الوكيل يقول ..ماطلبنا البنزين لأن الطلب عليه قليل .... لكن ممكن تطلبه ( طلبيّة )) ...

==============
انتهى كلامه رحمه الله ..

[ابو عمر اللاحم]

اخونا الكريم طير بر .. الحقيقه اشكرك كثيراً على تفانيك في طرح تجربتك مع السيارة الغربيه سوزو وابداء النصح لنا في هذا الموقع الغالي جزاك الله كل خير. وبصراحه طرحك مغري ومشوق ولديك موهبة البيان والتي هي من السحر الحلال ..... ودعايتك لها هنا لا تقدر بثمن بالنسبة لوكالت سوزو عساهم يعطونك وحده فل كامل كهدية .

السوال : هل السيارة مريحه في السفر يعني هل تسمع ضجيج اذا مسكت الخط وحطيت رجلك ام لا.

شكلي طولته ... شكراً لك وتقبل تحيات اخوك نهار،،،،

[طيـــ بر ـــر]

أخوي ( نهار ) ...

من ناحية ( الراحة ) في الدفرنسين .... خذ راحة ..... أخوي نهار ..... تعرف مركب الأمريكي ....( بلا مبالغة - مثله ) .. وأذكر أن واحد من الشباب .. قال لي سبب راحتها: وهي أن ايسوزو .... ( شريكة للشركة العالمة - جنرال موتورز ) وأذكر أني قريت في كتيّب .. أن المكينة والمساعدات .. وعوامل الراحة ( أمريكيّة ) لذلك .. هناك سيّارة دائما نراها ( شبيهة بالايسوزو ) ولكن علامتها من الخلف GMCاذا دققت في السيّارة هذي ستجد أنها مستنسخة من الايسوزو ..ولكنها أمريكيّة .. وتباع في الجميح ..

أما بالخطوط..
<<<<< توني راجع من الصمّان ...

أمشي 170 والسيّارة راسية .. ولينة في الحفر .. عيون القطط ( انس تحس فيها )

يعني وش أقولك ..... ( كأنك راكب جمس صغيّر ) ماشاء الله تبارك الله ..

كان معي باترول (99) والله أنها أحسن منه في البر وفي البلد وفي الخطوط ..

هذا ماأردت قوله ..

طيـــ بر ـــر

[فرد حمزة]

الرسالة الأصلية كتبت بواسطة طيـــ بر ـــر


الديزل ... 2004 .. اللي صورتها في الموضوع ... توجد عند الوكيل بــ( 70) للقير العادي .. والتماتيك .. تزود أربعة آلاف .... ومكينتها 3000 ( أما النص فل مكينتها 2500) ..وبقوة 138 حصان ... أي أقوى من البنزين .. اللي في المديل اللي قبلها (( 2003 وانت نازل )) ... وبصراحة بدت السيارة تنتشر ... وانا رحت يوم من الايام للوكيل ولقيت البشريّة يتفرجون في السيّارة ... ويمدحونها ...




طيـــ بر ـــر

السلام عليكم ورحمة الله وبركاته

عذراً على التأخير وعدم تأكيد المعلومة

لكن يبدو لي أنك قد تأكد منها ، أليس كذلك ؟

وبالنسبة لتسألك عن الجمله أسفل

يمدح الموتر يقول في شعبان نعرفها وبالجيب ندووس عليها خوفاً من الربضه إلا أنها عدك تتمشى في الشعيب


أقصد منها :
أن زميلي صاحب الايسيو 4×4 موديل 2004 .. يقول سابقاً على الجيب ندووس في شعبان نعرفها خوفاً من الربضة والتغريز .. إلا أنها أي الايسيو 4×4 موديل 2004 إلا أنها في الشعيب عدك تتمشى من طيبها

هاه عساها زبطت وركبت الجمله صح :D:D:D


عز الله أنك طيـــ بر ـــر وزيادة

[السمح]

يا جماعة اسمحوا لي ودي أشترك معكم في النقاش
ومشاركتي تنبع من تجربة لهذه السيارة حيث أني أملك واحدة
أقصد اللي صورتها فوق 4×4 تيربو ديزل موديل 2004 بمواصفات كاملة ( فل )
الحقيقة إني اندهشت من السيارة من ناحيتين : الراحة والعزم
أما الراحة فهي أكثر مما تتصور ، ومثل ما تفضل أخوي طير بر .. مطاب .. بطناج شي خيال .. وصح حتى عيون القطط اللي بالسفلت ما تسمعهن
أما العزم فهي وبدون مبالغة لا تفرق عن الجيوب في الرمل وفي البطحاء وغيره إن لم تتفوق ولا يحتاج لك إنك تشد على الموتر بل بالعكس بكل هدوء وراحة تقطع وتتمشى في أي شعيب
ولأنها تيربو فهي في الخطوط الطويلة لا تفرق عن البنزين في التجاوب والتسارع في الطلوع وعند تجاوز السيارات
طبلون السيارة 180 كيلو وأقصى سرعة مشيتها 150 وبإلحاح من صديق معي يريد أن يرى كيف هي في السرعة ورفعت رجلي والسيارة في زيادة .. بس كم تاصل ما أدري .. وأنا إنسان خواف ما أتعدى 140 بأي حال من الأحوال
ومن مزايا السيارة اتساع الغمارة الخلفية بعكس بقية السيارات الغمارتين المعروفة ، والمراتب الأمامية مفصولة مما يعطي راحة أكثر للسائق والراكب
من عيوب السيارة صغر تانكي الديزل فهو يتسع لأكثر قليلاً من 60 لتر ، وفي اعتقادي أن السيارة تصرف ديزل إذ إن التانكي بالكاد يوصلها 500 كيلو ، والتانكي إذا ولعت اللمبة تعبيه بما يقارب العشرين ريالاً
وصغر التانكي يمكن القضاء عليه بتفصيل تانكي إضافي مع تانكي ماء بحيث تفرش أرضية السيارة كاملة بارتفاع 10 سم وتركب فوقهن الفيبر ولن يشعر الرائي أن معك توانكي حيث أن حوض السيارة عميق ( 50 سم )
هذا مالدي عن هذه السيارة ، وشهادة لم أزد أو أبالغ فيما قلت ، وأعتقد أنها ستكون في المستقبل هي سيارة أهل البر والروحات والجيات

أحلى تحية

[طيـــ بر ـــر]

فرد حمزة : ههههههه الحمد لله وصلت الجملة وفهمتها .. وشهادتك للموتر نعتز فيها .. على فكرة أخوي فرد حمزة .. الى الحين ماثرت ؟؟ .. امزح .. الله يجعلك ممن يثور ويثخن في اليهود .. اللهم آمين

السمح : ماشاء الله .. مبارك مبارك .. الله يعطيك خيره ويكفيك شرّه ... وفعلا العيب الوحيد في الموتر .. هو صغر التانكي حتّى البنزين .. أفلله بخمسين ريال .. مايزبّن للطلعات الطويله .. لكن الله يخلي الجراكل..

أخوي السمح .. شهادتك دعاية .. المفروض تاخذ عليها حق الدعاية من الوكيل .... لأنك من طيور البر .. ومجرّب الموتر ..

[نجمة سهيل]

في الحقيقه كل الكلام الي ذكره اخوي طير بر ، هو فعلا متوفر في الايسوزو لازاد عليه ولانقص ولاشي:) ((ماشاءالله ماهوب تقول اني نظلتك الحين:D)) , وفاجأني الوالد قبل امس عندما ذهبنا للصلاة بعد الافطار ،
قال : شف الهيلوكس الجديد الي مع عمك اذا هو زين اخذنا مثله :) ، قلت له هو زين لكن الهيلوكس من موديل2002 وطالع القير ماهوب بالحيل:( . قالي انا عارف هالشي فلذلك ماودي اخذه للبر وهمن يبدى يخرب يعذبكم بالبر , قال نبي نروح نشوف الايسوزو الجديد 6 سلندر (بنزين) دبل . قلت له عز الله انك جبتها الايسوزو موتر يعتمد عليه ، حتى خالي الي مايسمع بتويوتا يقولي لاتاخذ غير الايسوزو للبر:) مع انه معه شاص2000 للبر ، لكنه نصحني بالايسوزو لانه جربه .

وفعلا السياره صارت محط انظار الكثير من هواة البر:)

[ALMEGNAS]

السلام عليكم حياكم الله ياشباب انا اتكلم لكم وعن سابق خبره ان افضل شي للمقناص و وللطعوس ولكل شي هو الفورد الجديد وهو مثل الهلوكس والددسن والسوزو جامع بينهن كلهن يعني هجين وفيه مزايا رووووووووووووووووعه وش اخلي وش اعد ولاكن هذي صور للموتر

http://megnas.com/vb/files/66.jpg

http://megnas.com/vb/files/67.jpg


فيه ديزل وبنزين الي جربت ديزل دفرنسين لاتسمع صوت ولاهب رفيع مثل الهايلكس مراتب مفصله كنك راكب فياقرى من الراحة ولاحتى فيه فرارات شد بلد زر وفيه اثنين ارباق ولاوحتى النفود مايعوق معه يشقه شق كنه همر ولاهب غالى بس بـ55000
جرب وانت الحكم واجزم انه هو الافضل

[طيـــ بر ـــر]

المقناص .. ماقصرت

والله ممتازة هالسيّارة .. فرارات - مراتب مفصلة - مريحة ( فورد )- دبل

[MOR300]

صراحه صياره شكلها حلوووو مره وسعرها شبه معقول

ومواصفاتها ولا اروع

مشكور اخوي طير بر بس كيف قطع الغيار وبالطعوس الديزل فيها حيل ولا زي 99 ماتمشي ابد


عموما مشكور اخوي طير بر

[عاشق الشروكي]

ياخي انا مجرب ايسوزو تروبر جيب 5 ابوب والصراحه من اقوى مايكون ولا يطلب صيانه الا ما ندر

[نقا هشال]

طيـــ بر ـــر
مشكور ولاهنت

[فواد بن بطاح]

مشكووووووووووور اخوي

[sss]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته طيـــ بر ـــر
اسم الدلع (سوسانا) isuzu



مشكور ولاهنت


طيـــ بر ـــر



يعطيك ألف عافيه



sss

[sss]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
طيـــ بر ـــر السلام عليكم ورحمة الله وبركاته

سوزانا (isuzu) غمارتين 4x4 2003 المقص الامامي محمل علا الربله
كلمت الوكله قالو طبيعي كل ال4x4 كذ
صا يره ازعاج بلهويات تردح
هل الركب له مسعدات اكبر
ماهوانوع المناسب لحل المشكله



مشكور طيـــ بر ـــر

sss

[طيـــ بر ـــر]

السلام عليكم ..


اثري قديييييييييييييييييم هههه

المعذرة ياشباب ... على التأخر في الرد .. لاتلوموني .. أنا منقطع عن المنتدى فترة مهيب سهلة ( أقصد الكتابة ) ولا القراية أنا معكم الى مالا نهاية ( قايلكم أصلح في الدعايات ) ابتسامه تسبيرة

أقول للأخوة اللى شكروني .. (( لاشكر على واجب )) وهذي مشاركة بسيطة في هالمنتدى النادر ..

الأخ sss
أنا ماطلع عندي الصوت اللي تقول عنه ..
لكن وش قالوا لك الوكالة .. العيب وش منه ؟ من الركب ولا المساعدات ولا الربل ؟
أما من ناحية حل المشكلة ... تراي ماأديرها .. عندك فطاحلة الترهيم والصيانة في هالمنتدى الله يبارك فيهم ... بما فيهم الأخ ( طاير في العجّة ) وغيره من الشباب ممكن يساعدوك ..

أخوك : طيـــ بر ـــر

[ابوحمد2001]

السلام عليكم افضل سيارة الهايلوكس 4*4

[اسيزو 4x4]

احلى اسيزو انا ارشح الاسيزو الحوض الدبل 100%

والهيلوكس الدبل مع احترامي لااصحابها احلى لفة ونت منقلب

وبكل جدارة اقول الاسيزو الديزل التيربو افضل شي

الهايلوكس الدبل والله يالة ترقا الطعوس

والله انا مجرب الاسيزو يتمشى على الطعس تمشية

وكنك في زفلت.......

[الوانيت1]

احلى اسيزو انا ارشح الاسيزو الحوض الدبل 100%

http://www.alnwady.com/stock/images/smilies/050103gig_prv.gif والهيلوكس الدبل مع احترامي لااصحابها احلى لفة ونت منقلب http://www.alnwady.com/stock/images/smilies/050103gig_prv.gif

وبكل جدارة اقول الاسيزو الديزل التيربو افضل شي

الهايلوكس الدبل والله يالة ترقا الطعوس

والله انا مجرب الاسيزو يتمشى على الطعس تمشية

وكنك في زفلت.......



http://www.alnwady.com/stock/images/smilies/ANSmile30.gif





http://www.alnwady.com/stock/images/smilies/21_20.gif


.



http://www.alnwady.com/stock/images/smilies/050103gig_prv.gif http://www.alnwady.com/stock/images/smilies/050103gig_prv.gif http://www.alnwady.com/stock/images/smilies/050103gig_prv.gif


بدون تعصب
بس الرد يدل على خفت النفس وعدم المجاملة
شكرا لك وجزاك الله خير ..............////.