إذا صرت بفنجال وحصل لك هالموقف وش تسوي ؟؟؟ (( بالصور ))

[سلطان بن محمد]

السلام عليكم . . .


كيف حالكم ياشباب . . . . بخير أنشاء الله



بصراحة حصل لي موقف بنقرة من النقر رحت أطلع واحد من العيال مغرز
المهم ويوم سحبته بعض الشيء وبغيت أطلع إلا وأحضر جنبه
كلما بغبت أطلع إلا يزح الموتر إلين لزقت به كلما حركت شوي حك الباب
بباب الصندوق.
إليكم بالصور
الصورة الأولى
http://www.saudifree.com/up/pic15/saudifree_a0b66.jpg (http://www.saudifree.com/up)

الصورة الثانية
http://www.saudifree.com/up/pic15/saudifree_1c19c.jpg (http://www.saudifree.com/up)






.

ننتظر تعليقاتكم








.

[ولد وايل]

اولا .. توكل على ربك
ثانيا .. نسم الكفرات الى حد 5 ..
ثالثاً .. الدبل الثقيل وتسايس السياره طبعاً تكون فاصل الواير اللي شابك فيها السياره الثانيه

رابعاً.. مفروض قبل الثالثه تبرح للكفرات مسافه حلوه

تحياتي لك

[سعد777]

هذا انت هلحين؟؟؟
اهم شي موترك ماجاه شي

ماله الا تنسيم لحد 5 ودبل ثقيل مع دفلك ان وجد

[ABO-AZIZ]

اولا .. توكل على ربك
ثانيا .. نسم الكفرات الى حد 5 ..
ثالثاً .. الدبل الثقيل وتسايس السياره طبعاً تكون فاصل الواير اللي شابك فيها السياره الثانيه

رابعاً.. مفروض قبل الثالثه تبرح للكفرات مسافه حلوه

تحياتي لك


ازيد على اخوي
بان حدا الشباب يجلس على صدام الهايلوكس ويدفع برجليه الجيب اثنا المسايس

تقبل تحياتي
ابو عفجة

[أبــومنــصور]

مثل هالنقر ماينزل فيها لانها تذب الموتر
مالك الا يجي واحد ويسحب الهايلكس من قدام .
( ولا أقول حرج على السيارات في محلها)
ويليت تعلمنى وشلون طلعت ......
تحياتي...............

[هدار]

عله ماعاده تلقى راعي الجيب يقول ياليتنا من حجنا سالمين

[نمر 33]

1- أما تسحب الهايلكس من قدام.
2- تستفيد من الونش وتطلع الجيب.

كيف طلعتوه

[فايز العامر]

معليش تقدر تطلع بسهولة ،، هذا جيب ماهو كامري عشان ماتقدر عليه ... الله يسهل أمرك ..

اجل وش تبي تسوي لو تصير بموقف مثل هذا ؟؟؟


انزل

.







.





.











http://www.mekshat.com/pix/upload02/images57/mk8796_jeep-shaass.jpg

[سلطان بن محمد]

مثل هالنقر ماينزل فيها لانها تذب الموتر
مالك الا يجي واحد ويسحب الهايلكس من قدام .
( ولا أقول حرج على السيارات في محلها)
ويليت تعلمنى وشلون طلعت ......
تحياتي...............


أخوي أبو منصور شكرا لمرورك وحلوه حرج على الموتر بمحله
وشاكر لجميع الأخوان على التعليقات

أييييييييه قلتلي وشلون طلعتها

جبنا لنا مرهم شنب وسحب الهايلكس من قدام شوي بس لأنه قدام الهايلكس طلعة قوية
وحررنا الجيب وطلع وبعدين رجع راعي الهايلكس



.

[الإستراتيجي]

الأول : تقدر له بتبريح طويل ولا سحب الموتر من قدام ، بس الثاني




معليش تقدر تطلع بسهولة ،، هذا جيب ماهو كامري عشان ماتقدر عليه ... الله يسهل أمرك ..



اجل وش تبي تسوي لو تصير بموقف مثل هذا ؟؟؟



انزل


.








.






.













http://www.mekshat.com/pix/upload02/images57/mk8796_jeep-shaass.jpg



هذا تجيب لك مسحات وتحفر قبره في النفود بدل ما تطلعه :D شكل راعيه ماسك خط وما أنتبه :p

[الرسن]

مثل ماقالو الشباب معك جيب مهوب ددسن ومايحتاج لها راي او حل
انا اقول ان هذي حركات المكشاتيين المحترفين وخلو عنكم . . .!!
معالسلامة

[Lxe]

وعليكم السلام

المفروض جادع وجه الهلكس يسار
تبرحله تحط تحت الكفر قدام يسار حفره لابأس عشان تطب فيه ومع الدف مع الجنب الثاني بتزح السياره يسار وبتصير فيه مسافه تحرك الجيب
والجيب منزل هواه 5 وحاط 2 يوقفون على الدعاميه حقت الجيب يسار ورى
ومريوس بالجيب ولاف الطاره يمين كان يطلع باذن الله

[ذئب اليل]

مزود على كلام الخوان واقولك الحمدلله على اسلامه

[عاشق السيل]

الحمد لله إنك طلعت !!!!

أما تغريزة الشاص لازم واحد يسحبه من الصدام الخلفي على جهة اليمين علشان يعتدل وجه الموتر وبعدين يمشي عادي ،، والحمد لله على كل حال ....

تقبل مروري يالغالي .....


.

[.أبوعبدالرحمن]

الحمدلله على السلامة


ماشاء الله طلعت الخبرات في التغاريز

[يا من يراعيني]

اخوي مطوق الحمدلله على سلامتكم ......وطريقتكم هو الحل الوحيد وخير ما سويتوا.
اما راعي الشاص يبيله واحد يسحبه من الصدام الخلفي بجة اليمين الين يتساوى مع الارض وبعدها يعطيه الريوس ويكمل تطعيس.
هذا اللي عندي ..وتقبلوا مروري

[المزن الحقوق]

ياشينها إذا جت تسذا

والله مره بغت تصير لي حول هالموقف

لا وانا معي هايلوكس

الله يكتب مافيه الخــير

ولاهنت أخوي الغالي مطوق

يخليكـ ربي

,, المزن الحقوق

[محب الرمنغتون]

أقرب حراثة من أقرب مزرعة 00 وينتهي الموضوع

[مهتوي الكشتة]

عذرا الموضوع مايبيله تراها جيوب ماهي كوامر الله لايبلانا

[شمالات نجد]

الحين من المغرز الهايلكس أو الجيب أو كلهم!!

:)

الوضع عادي إن شاء الله والحمد لله على السلامة والفنجال غثيث ودواه الدف لك والتنسيم

[رجل كريم]

http://www.saudifree.com/up/pic15/saudifree_a0b66.jpg (http://www.saudifree.com/up)


الصورة الثانية
http://www.saudifree.com/up/pic15/saudifree_1c19c.jpg (http://www.saudifree.com/up)





وعليكم السلام ورحمة الله وبركاته:

اولا ينبغي عمل مسارات امامية وخلفية للاطارات الاربعة وثانيا يلزم تنسيم الاطارات الى 12 او 10 وثالثا تحريك السيارة ببطء شديد للامام فقط وعندما تدور الاطارات نصف دائرة (بعد تحرك السيارة من مكانها ) تبدأ بتوجيه خفيف جدا باتجاه اليسار ولا تزيد عليه حتى تكون في بعد آمن عن السيارة المجاورة وبعدها تستطيع ان تناور بسهولة حتى تخرج من الموقف ..

تحياتي ..

[سنعوسي111]

الحمد لله على السلام للجميع

[غضنفر]

اوه
يبيلها جلسة هالتغريزة
اولا
تحليلي للموقف
ان راعي الجيب سحب الهلكس وهو ما نسم
او انه نسم لكن ما نسم واجد
والا
الجيب اذا كانت كفراته منسمه الى 10 او 15 يتحرك بسهولة
يبدولي ايضا
ان الواير او الحبل قصير
مع اني ما تصورت الموقف زين
لكن اتوقع لو سحبت الهلكس من قدام كان افضل من الخلف
ثانيا
وقد وقع الفاس بالراس
يلزم تنسيم كفرات الجيب الى 10
ثم عشان تحل مشكلة قرب الهلكس من الجيب
ادفن صدام الهلكس الخلفي بالرمل تماما
وخل بينه وبين الجيب اشبه ما يكون بالخندق عشان ما يميل الجيب عليه
الجيب خله على كسرة الطارة كما بالصور
برح للكفرات الي قدام واللي ورى
عشق الدبل الثقيل لأن هذا وقته
وخل 2 من ربعك يوقفون على صدام الجيب الخلفي ويقامزون (ينططون) عليه
وباقي الشباب خلهم يدفون من قدام
وان شاء الله يطلع الجيب
بدون سحب

-----

قد طحنا في مثلها وأسوأ
بهولوكس غمارة
والحمد لله طلعنا منها
بأنفسنا بدون سحب
وكان السر
1- تعشق 2 ولا تعشق 1 (لأن واحد يحفر بينما 2 يعطي الكفرات مساحة للتحرك)
2- المقامز على الصدام (لأنه ما يعطي الكفرات مجال تحفر بسبب انها ترقى وتنزل)



والسلام

[سلطان بن محمد]

أولا:
أشكر جميع الأعضاء الذين ردو جزيل الشكر. . .
ثانيا:
وأقول للي قالوا الحمد لله على السلامة (( الله يسلمكم سلامة دايمة )).


ثالثا:
أخواني الأعزاء أنتم لو تدرون أن هذا اليوم هو يوم الوقفة ( عرفة ) يعني الناس صيام وأنا (( اللهم لا رياء ))
الساعة 3:30 وتوني قايم من النوم وحالتي حالة المهم أنا على بالي جيب ودبل وأني ماراح أغرز ومانسمت
الكفرات يوم أني قعدت نسمت وما عاد ينفع الصوت لا فات الفوت.
المهم اني من بعد صلاة العصر إلى حول أذان المغرب وأنا وراعي السيارة شيل وحط يعني مافيه على قولة
الإخوان حط واحد على الصدام وواحد مدري وين. . . .مغير أنا أحرك السيارة شوي شوي. . .
وهو يقول وقف وقف حْكيت . . . على فكره الجيب جاه خدشين بالباب من الهايلكس. . . .
المهم يوم شفت مافيه فايدة . . . . وذبحني الضما ( العطش ) دقيت على ذيبان (( اللي هو راهي المرهم ))
وقلت له السالفة هيك وهيك . . . . قال أنا عند باب البيت شوي وأجيك . . . وأشوف الساعة إلا وبقي على الأذان
إلا بضع دقائق . . . قلت له لا خلاص أفطر عند أمك وبعد الفطور لنا كلام. . . . رحت وأفطرت
وبعد طاش . . !!؟؟ وإلا صح مافيه طاش:D . . . . ((على فكرة أنا بنفود مزرعتنا )) . . . . يعني الشباب تحت
جايبين الفطور . . . المهم بعد الفطور ويجي ذيبان ومعه المرهم . . . . وين موقع الجريمة قلت قدام ويالله
على مسرح الجريمة ونحط القنص ( الواير ) ونسحب الهايلكس من قدام (( صح أن من قدام الهايلكس طلعة
قوية شوي بس ذيبان ماعنده لف ودوران يسحبها وهي ماتشوف الجادة ))
المهم ويتحرر الجيب وطلَعنا المبروك ولله الحمد.



ردود الإخوان:
أخوي / محب الرمنغتون
(( أقرب حراثة من أقرب مزرعة 00 وينتهي الموضوع ))
الحراثة والله قريبة بس مشوار أنزل للمطين وأشغل يبيلها وقت


أخوي / غضنفر
كلامك سليم ميه بالميه وأنا شاكر لك جزيل الشكر
بس لما تكون بالموقف اللي أنا فيه صيام وعطش وأخلاق تجاريه مايمديك تمخمخ



.
. . . . . . آسف على الإطالة وشاكر لكم حسن الاستماع . . . . . .

[Black VTC]

اولاً الحمد لله على سلامتك ...

ثانيا ً ... الموقف صار و الله يعوض عليك الحكة اللي في الباب و ان شاء الله ستكون درس لك واكيد استفدت منه كثير ..

اما هالحين ما راح تستفيد الا من الدروس اللي تتلقاه من الاخوان اللي ماقصروا شرحوا واوفوا...

ولكن تخيل لو انك انت وراعي الهايلكس في مكان بعيد ( وسط الدهناء .. الربع الخالي ... النفود الكبير ... ) و ما حولك ارسال جوال ولا موبايلي وما معك ثرياء و كيف الحال امورك :)...


انا اعلمك ان شاء الله وش لون تطلع خصوصاً ان موترك فيه ونش في الامام ...

1- تنسم كفرات المبروك الى 10 لا تنقص لانه يبي يفسخ الكفر عن الجنط .

2-تفك جنط الهيلوكس ( طبعاً لانه هو صاحب المصيبة في الاساس ) وتدفنه قدام الجيب على حجاجه الايسر فوق الطعس ..وتشبك فيه الواير .

3- عش الدبل الثقيل بس .. ولا تشبك الدفلوك ولو كان عندك لانه يبي يخلي الموتر يروغ لليمين .

4 - امش بشويش وعلى مهل و في نفس الوقت خويك راعي الهايلوكس ماسكن الريموت حق الونش و يعطيه قوة سحب مرافقه للقوة الدفع حقت الجيب ...

اخيراً ان شاء الله الجيب هالحين تجاوز الهايلكس بكامل محيطة و ديوير وانتل الهايلكس اللين يحك خشمة في الارض عشان عقبه ما يقرب الفناجيل :)...


تصدق وانا ادقق بالصورة رحمتكم ودعيت لكم :).. خصوصا ً يوم دريت انكم صايمين يوم عرفه وكلكم خير وبركة ..

اشوف ظلال اللي يصور واقف فوق الطعس و جنبه واحد جالس ضايق صدره ومدنق رأسه تحت و مهموم .. انا متأكد ان راعي الهايلكس هو اللي يصور وانت اللي جالسن تهوجس ... واكيد كنت تكلم نفسك وتقول لا عادت على فزعة :):) .. بس ابشر بالخير ترا كل من فزع لاحد و جاه مصيبة او بلا ترا اجره عند الله ولا تحقرن من المعروف شي ... بارك الرحمن بك و نعم الصديق انت ..

[سلطان بن محمد]

أخوي black VTC
يعطيك ألف ألف عافية على الرد الجميل والتوجيهات الكريم
يعطيك ألف ألف عافية عز الله إنك وفيت وكفت.

ويعجبني تدقيقك بالصور ( الظلال )

شاكر لك عالمرور