ارمادا جيب نيسان ارجو المساعده

[mej]

السلام عليكم ورحمة الله وبركاته

اخواني ارمادا جيب نيسان موديل 2006 شفته مستعمل طبعا وبالنسبه لمواصفاته ما ادري هو اي نوع من انواع الارمادا لكن في فتحه والدركسون في ازرار

1- كم يتراوح سعره لو قلنا ممشاه مرتفع ولو قلنا ممشاه منخفض؟؟

2- وكم سعره لو انه ستاندر؟؟

ارجو انكم تفيدوني لي شهرين وانا ادور لي سياره وعجزت

ارجو الافاده بالاجابه على اسئلتي وشاكر للجميع

اخوكم

[سعد777]

ياخوك عدل ولا بدل من الأرمادا ما يمدحونه مدري ليش وانا ما جربته ابدا حتى ركوب ماركبته ونت استخر وتوكل على الله والنصيب مانه مجناب

[mej]

ياخوك عدل ولا بدل من الأرمادا ما يمدحونه مدري ليش وانا ما جربته ابدا حتى ركوب ماركبته ونت استخر وتوكل على الله والنصيب مانه مجناب
جزاك الله خير وكثر الل من امثالك والله اعجب الاهل من ناحية الشكل وما ندور الا رضاهم وثاني شي استعمالي خفيف وما ودي اخذه الا عشان نتوسع فيه يعني مانيب مثل الي يبي استعمال ثقيل في البر

[سعد777]

جزاك الله خير وكثر الل من امثالك والله اعجب الاهل من ناحية الشكل وما ندور الا رضاهم وثاني شي استعمالي خفيف وما ودي اخذه الا عشان نتوسع فيه يعني مانيب مثل الي يبي استعمال ثقيل في البر

اجل الشباب مايقصرون بيفيدونك إن شاءالله

[جوالة]

الأرمادا وسيع مرة من الداخل وحلو بالحيل و
وتراه أمريكي وحتى بالنفود ممتاز لكن ما أدري هل هو يصبر والا لا .
على كل اختيار للعائلة موفق لكن للبر لعل الشباب يفيدونك أكثر .

[نجم الوادي]

ماكتبه الاخ جوالة لا غبار عليه واخي الذي يكبرني معه ارماد فيراني 2006 يمدحه دئما لي. للعائلة وفي الاسفار والاخوة اللي بمكشات يفيدونك اكثر

[4800VTC]

الاخ/ mej(الله يستر من الاسم)
الارمادا مثل سيارة نيسان الاخرى في السوق
تعاني من هبوط طفيف(مسوي فاهم في اللغه)في السوق بعد الاستخدام
الارمادا سياره حلوه و(بتاع كلوا) على قوله المصريين
تجي نوعين SEوLE
SEهي النوع الفخم وسعره في الوكاله على حد علمي انه 137.000
ويفرق بالشكل الخارجي بالجنوط وتجي شبه رصاصي غامق
و الدعاميه الاماميه (واجهه الصدام)تجي نيكل
وLEهي النوع الثاني منها وسعره في الوكاله 125.000
الجنوط يجي لونها فضي (فاتح)

بالنسبه للجنوط ما يفرق الا اللون اما بالنسبه للمقاسات فهي نفس الشي
وهي الفرق الواضح في السياره بين النوعين
بالنسبه للتطعيس ما جربت السياره بس شفتها في منطقه وعره جدا
تمشي بكل برود وهداوه ولا غرزت
طبعا 8 سلندر وضعه غير في البر

اتمنى اني افدتك وسامحونى على القصور

اخوكم/ 4800VTC

[مرور الكرام]

تراك عكست السالفة ...

الفل كامل تجي الجنوط فاتحه
والأقل تجي غامقة

[zmzmz9]

بكل صراحة الموتر ماجربته لاكن سألت واحد كان معه الموتر وقال لا تقربه سألته : ليش
قال يتفكك وماذكرلي غير هذا شيْ , أنا جربت المورانو فقط .

[راعي البرهـ]

ادلي ب
دلوي|السياره ماجربتها لكن منظرها الخارجي يوحي بانها سياره مدينه لكبر حجمها وثقلها ولو ترقا مطب حكت يعني طامنه (ماتنفع للبرللاستعمال القوي)

[4800VTC]

الاخ/مرور الكرام
مسيك بالخير الله لا يهينك
مر على الموتر مرور الكرام وشف المواصفات
بعدين شف الجنوط
اذا صار الكلام صحيح عطنا خبر (بعد التاكد طبعا):rolleyes:
على نفس الموقع
ومنكم نستفيد:D

[احب البرواهله]

السياره ضخمة وقيادتها مزعجة بالأماكن الضيقه

[shaheenshah]

انا جربت 2007 في النفود بصراحه حليله مهيب شينه (يعني تمشي في الرمل صح مع التنسيم طبعاً)
أما استخدامها داخل المدينة وفي الخطوط ما أقدر أفيدك بشي
العيب اللي اشوفه فيها حاجتين:
اولاً انها نيسان
ثانياً فليور خلفي يعني عكوس مهيب دفرنس

[mej]

الله يجزاكم الخير جميعا لكني اسأل عن سعر المستعمل 2006 وليس الوكاله

وشاكر للجميع المشاركه وابداء الرأي في السياره

[MyName]

يالغالي الأرمادا إذا بتقارنه باليوكن Xl او السيارات الثانيه بنفس الحجم صدقني هو افضلهم من تجربه طبعاً ..

عندنا موديل 2006 فل كامل دفرنسين ( لانه يجي دفرنس واحد ودفرنسين ) له سنتين تقريباً الحمدلله مااشتكينا من شي وموتر يخدمك ويشيل اهلك واغراضك وانت مرتاح سواءً بالمدينه او بالخط وانا مجربه بالخط ماشاء الله مايحتاج وبالبر يمشي حالك ...

العيب الوحيد اللي اشوفه هو غلاء كفرات السياره واعتقد كل السيارات حالياً كفراتها مرتفعه !

اتمنى اني افدتك ...

تحياتي

[جوالة]

إذا كنت تبحث عن الراحة والوسع فاستأجره من محلات الإيجار وجرب بينما إن كنت تبحث عن البر فالإخوان أجابوك .

[mej]

بيض الله وجيهكم لكن الى الان ما حد فادني عن السعر التقريبي له حسب ما كتبت في بداية الموضوع

اتمنى احد يقرأ بداية الموضوع ويفيدني في استفساراتي

شاكر للجميع

[ذريّع]

بالنسبة للارمادا فأنا تجربتي معها قصيرة تقريبا من اربعة اشهر فقط
يبدوا ان السيارة جميلة من حيث ان السيارة خفيفة رغم فخامتها واواسعة واقتصادية فقط مع الخط الطويل
وهي على نوعين نوع se يعتبر اقل مواصفات منle انا سيارتي se
من عيوب السيارة المرتبة الوسطى في المنتصف غير مريح تمنياتي للجميع بالتوفبق

[salehhd]

السلام عليكم

الاخوان ماقصرو والسيارة تجي بدفرش ودفرنشين
ومحركها 8 سرندل 5.6 لتر بقوة 340 حصان
مساحة ممتازة وعزم جبار وفي البر يجمل
ما ادري كم اسعارة لاكن كان جديد على ايامة في حدود 114 الف للعادي

يعني في السبعينات سعر زين ولاتنسى الاستخارة
بالتوفيق

[عاشق الكنود_]

انصحك افضل للك تأخذ جمس 2001 نظيف لانه معروف انه يتحمل وسعرها حول 60الف ريال والارماد ماعندي خلفيه عنه
سلام

[mej]

للرفع للاجايه على استفسارتي الي في الموضوع

[ابن صقيه]

أنصحك تروح للوكالة وتجربه أنت بنفسك
بالنسبة للسعر ما عندي خلفية

[ابو فرح1]

السلام عليكم ورحمة الله وبركاته

بالنسبة للسعر 2006 اذا كان دبل فاعتقد من 90 الف الى 110000 تقريبا قد يزود شي قليل
هذا الاسعار قبل شهرين حسب علمي

اما بالنسبة للارمادا كاستخدام فخذ هالنصيحه من واقع تجربة

ارمادا 2007
بشكل عام ممتاز
واقوى كثير من سيارات الدفع الرباعي اللى بفئته مثل اليكون الاكسبدشن
وصرفيته ممتازه على الخطول يمشيك 650 - 685 على حسب الهواء
بالخط ممتاز ومريح يكاد يكون صوت الهواء معدوم طبعا اعلى سرعه مشيتها 140
بالبر راح يفاجئك من زينه وخفته .
لكن لا تقارن الارمادا بالسفاري والاند طبعا استثني الاند 2008 .
الجيوب مصنوعه من اجل البر وهذا اخذ على حساب الراحه بالخطوط الطويله

هذي تجربتي لك هديه .

واي استفسار جاهز .

[ق ب م 632]

الاردمادا مشتريه واحد من جيراننا موديله 2006 ولونه ابيض يقول بـ90 الف ريال

[mej]

يعني من 90 الى 110 الف نقول حسب كلام الاخوان مشكورين ولكن عنده اضافه بالتفصيل له الشكر الجزيل لجهلي في هذا النوع من السياره

[مرور الكرام]

عند نزول موديل 2007 وجدت بالمعارض موديل 2006 أقل نوع

طبعاً الجنوط لونها غامق علشان ما يزعلون الأخوان !!

وبدون دبل كان سعره طبعاً جديد ( زيرو ) 106000 ريال

اللون أبيض الداخلي بيج
الكلام هذا من أكثر من 8 شهور ..