ربيع وفقع بالدبدبة.. خربها راعي كالفورنيا

[حفرلوجيا]

سلام يالربع كل(ن) باسمه
تعرفون القحويان.. اللي يتغنى به الشعراء ويشبهون زهرته بثغر المحبوبة.. ذي الزهرة اللي يسمونه شباب الفديو كلب الفضائي (وردة جبنة بوك)..واظنها -الورده ماهو الجبن -أحسن مابالبر وقت الربيع ..ولي معها قصة نكد..كيف ؟..أقول لكم:
قدر الله علي سنة ربيع طيب وعزمت عزيز (شرواكم) وقت اجازة نخيم بالدبدبة..وجاب هالعزيز معه (الله لايعيد الشر) دكتور جامعة توه جاي من بعثة بكالفورنيا ويقول انه وده يعرف البر(خذ عاد).. استقبلتهم في نقطة متفق عليها وجبتهم( يوم انقردت) للمخيم وكنا عصير والجو ربيعي خرافي ..قعدت اقهويهم واخذ علومهم برا المخيم.. وشوي وفجأه وإلا راعي (كالفورنيا) احمرت عيونه وازرق وجهه وانصرع علينا.. جربنا معه كل انواع الاسعافات مانفعت .. شلناه وانطلقنا به لهجره ماهي بعيدة لعل نلقى اسعاف وإلا يوم صحى بالسيارة ( النيص )..وقال ( الله يلـ.... هذي الوردة )..قلت أي وردة يادكتور.. قال (هذي حقت جبنة بوك)..أفا .. أثاريه ( فضائي) .. ليش يادكتور.. قال ( سوري ) أنا عندي حساسية منها ويجيني نوبة ربو اذا كانت حولي .. طيب والحل.. قال ماأبغى انكد عليكم غيرو المكان إلى ثاني مايكون فيه ( وردة جبنة بوك).. اخخخخ.. ويقول مايبي ينكد.. عاد وإلى الدبدبة ذاك الربيع ماتخلى من القحويان.. واصغر مساحة بهالحالة مافيها (وردة الرجال ) دائرة ( متر واحد).. ياسلام.. بس وويش عاد..
وإكراما للعزيز اللي عزمته اضطرينا ندج ندور محل مافيه قحويان ( عاد ذي تعقل).. ويختار (الدكتور الفضائي) ذاك المحل اللي جنب هجرة وقدامنا محرقة زبالتهم ويسارنا بقايا فطايس غنم ( الله يكرمكم) ويميننا خط اسفلت تحن عليه التريلات طول الليل والنهار.. أحول .. ويقول ماودي أنكد عليكم.. لا .. وحرمنا متعة لقط الفقع من أرضه..( ليتك والله من ورى كالفورنيا)..
أثاري الضعيف ( حنا الضعوف ذاك الوقت ) عنده مايعرف بـ(حساسية الربيع)..
والمعروف انه في فصل الربيع ( الله يجيبه بدون راعي كالفورنيا ) تتساقط من الحشائش جزيئات صغيرة تسمى لقاحات الزهور تنتشر وتتطاير في الهواء ومهمتها تخصيب أجزاء النباتات.. ولكن يفشل بعضها في التخصيب ويدخل في أنف الانسان وحلقه مسببة له الالتهابات الأنفية الموسمية والتي تسمى ايضا حساسية اللقاحات متضمنة أعراض الربو ( كحة ..ازيز وصعوبة التنفس نتيجة ضيق الشعب الهوائية في الرئة.. وزيادة افراز البلغم ( الله يكرمكم).
و بعض أنواع النباتات تأخذ اللقاح من الزهرة الخاصة بها لتلقيح نفسها ..وهناك نباتات أخرى تقوم بخلط اللقاحات بمعنى ان اللقاح يجب ان ينتقل من زهرة إلى أخرى من نفس النوع حتى يتم التكاثر.
ومعضم حساسية اللقاح في بيئتنا تأتي من نباتات تنتج كميات كبيرة.. بحيث أن عشبة صغيرة تنتج ملايين اللقاحات في اليوم الواحد ( ليته تعشعش في خياشيم اللي نكد علي أو تسدحه) .
ماأطول عليكم بهالمعلومات العلمية ( الناشفة ) .. وترى فيه اختبارات يجريها الطبيب المختص يمكن معرفة نوع الحساسية لدى الشخص.. رغم ان الأبحاث الطبية تذكر ان انواع عديدة من الحساسية لم تعرف بعد..
لكن ابنصحكم تتأكدون من نوع الحساسية التي قد تكون لدى الواحد منكم ( الله يبعد عنكم كل بلاء ).. وتسأل الطبيب في هالحالة عن نوع العلاج اللي يمكن تأخذه معك وأنت مغادر للبر وقت الربيع..
إلا ابسأل لو قدر الله عليك ومريت بهالموقف وش تسوي بالفضائي ( راعي كالفورنيا).. وسلامتكم..
**** بعض المعلومات العلميه مصدرها كتاب طبيبك للدكتور القباني

[خشم الحصان]

الاخ حفر لو جيا
السلام عليكم
اقول ياوسع صدرك علي دكتور كلفونيا الاخ شمالي وسيع صدر اهههههههههههههه من هو معك يوم
هالعله معك كان وريتك فيه اجل ربيع وفلت حجاج يالله من فضلك ولاخ يتصروع كنه في سامري
عقب ها اليوم قبل ما تطلع اكتب لوحه الي يبي يظهر معك يجب ان يكون خالي من جميع الامراض حتي لاينكد عليك الرحله ومن خالف ها لشرط وكذب عليك شب فيه بنزيم ثم طفه بخشب يعني لحقه وخبط فيه لين يطفي مره يعني مره تاكد انه طفي مره.
اخوك
خشم الحصان

[عبدالعزيز الدباسي]

:looney: :looney: :looney: :looney: :looney: :looney: :looney: :looney:

ادوووووووووووووووووووخ عند وردة بوك ، ارووووووووووووووووووح وطي معها ،، ماادري ليه

وش حلاة الواحد يلقى فيضة فيها النفل والاقحوان والخزامى ، تلقى (الخشم) يتشقق من هالروائح الزكية .

وخويك حق كلفورنيا متشقق خشمه من هالعطور المغشوشه ، ويقولون باريسي ،،، اعقب

واثرك منتب سهل يا حفرولوجيا عندك تجارب في حوش بيتكم ،،، وعندك تجارب على ناس جايين من كالفورنيا


،،،،،، لا ،،،،

وعندك حب الاستطلاع شفت حالة خويك رحت تقرأ عنه ،،، والله انك خووووووووووووش ...



شكلك منتب سهل عندك شى كثير ،،، وبأنتظار جديدك يالغالي

[فرد حمزة]

ياجماعة يا زقررررت :D

وردة جبنة بوووك :p

أبوووووك يا تفكير

يمين بالله ما تطري على سالفة وردة جبنة بوك ولا في الأحلام ...
ولا بارك الله في راعي كالفورنيا < ---- بلش بسبيلنقها سولها قص من الموضوع ولصقها :D:D:D

حفرلوجيا ،،،

بسألك سؤال أنت من المقرّد الأسلم ;)

[حفرلوجيا]

أخوي خشم الحصان :
حلوة الطريقة اللي تطفي بها النار .. اويلاه من سواها .. وسعة الصدر على شان اللي معه والا ماحنا قليلين شر.
أخوي شقردي :
ماعندي أكثر ماعندك ياالغالي .. الله يجيب الخير وندوخ معك ب ( وردة بوك ).
اخوي فرد حمزه :
هذا تفكير فضائي.
وبالنسبة لسؤالك : مالك لوا .. انا من ( طقطقة الحريشا ).

[الجوني]

هههه حفرولوجيا ابداع خويك مثل واحد يطلع مع الوالد اذا زانت الجلسة قال مشينا واذا تعبنا بالطريق قال واصلنا والله انه مقرود بس وش تسوي الوالد ماوده يضايق على احد الا احسن شي كان سوية طريقة خشم الحصان وبسسسس

[حفرلوجيا]

أخوي الجوني .. شكرا .. ماشاء الله عليك .. ردودك ( برق ) .. وقاعد تفتش بدفاتر مكشات العتيقة .. بس المشكلة ( رفيقنا ذا ) ثروة وطنية( دكتور جامعة ).. مانقدر نحلته على طريقة خشم الحصان ..
اللي مثل راعي كالفورنيا ودك تحشره طول المكشات بالسيارة مثل الوغيدان .. وترسل له الأكل مثل الشغالات .. وتامر عليه يواسي العفش مثل السواقين .. على شان ثاني مرة تنثبر ها( الثروة الوطنية ) بالديرة .

[مريقب العيفار]

الله يقطع شيطانك يا حفرلوجيا

أول ما قريت موضوعك وقفت عند القحويان

وش ذي كني اعرفها بس مضيعها او اني اعرف

شيء قريب من هالاسم

لين قريت رد اخوي شقردي اثرك تقصد الاقحوان

فما ادري انت غلطان ولا انها أحيانا تنطق كذا؟؟!!

[المربد]

شوي شوي على هونكم يا اخوان، ولو حفرولوجيا عزيز علينا،،
بس الذنب ماهو ذنب الدكتور لأنه ما قصر طلع وجلس وتحمل الى ان انصرع،، والمسألة ما هي مزاجية او ثقالة دم علشان نلومه المسألة مرض عضوي ظاهر..
بقى انه يكون حريص على تكميل الكشتة معكم هذا شيء ثاني المفروض ان اللي جايبه هو اللي يـبـتــلــش به ويرجعه للديرة، او يستاجر له غرفة في احد هالمحطات ويمر عليه كل يوم ياخذه ويتمشى معه الى ان تنتهي الكشتة.

[هواوي]

السلام عليكم يا شباب

اخوي حفر بجد من الان ما صرت اعترف بشي اسمه اقحوان صار اسمها ورده جبنه بوك


وصراحه سهل الوصف لما اوصف لواحد الزهور باقله الاقحوان هو ال مرسوم على قزازه جبنه البوك وصراحه ما بينساها

[حفرلوجيا]

الاخوان المربد وهواوي .. شكرا ومثلكم نأخذ برأيه..
أخوي مريقب العيفار : شكرا .. ماقلت وقاله شقردي على متمه .. لكن الاقحوان بلهجتنا العامية ينطق ( القحويان ) .. وفيه من قال عنه :
ياعلي لاحشيت من مجنب القاع --------- بالك شبيه سنون خلي تحشه
الرقم والحوذان حشه وش عاد ---------- والقحويان السحب خله ترشه