استفسار ياخوان بخصوص السفاري2003

[الحاوي]

السلام عليكم ورحمة الله وبركاته
السياره سوبر سفاري اتوماتيك لين شغلت السياره وحطيت القير على اي نمره تسمع طقطقه شينه اوتفتفه قويه اول تقعد لين يحتمي الموتر وتروح الحين تقعد واجد ماتروح وصارت الطقه اقوى

[مقلع الرمث]

شف اخوي اذا كانت الطقه الي تقول عند التعشيق وتروح هذي عادي كانك ماتعوت على الباترول اما اذا كانت طقه جديده مثلا لا جيت تاقف تطق او لا اطلقت الفرامل يطق الموتر جيت تمشي يطق من نقطه الصفر اما التفتفه فاتوقع انها من البواجي ولا صفاي نزيم ولا عندك حدى الكويلات خربان لاني اذكر واحد من الربع معه موتر فيه اكويلات وبدا يقطع وصار من الكويل الخامس والسادس وانصحك بالفحص قبل كل شي وغير القطع الاستهلاكيه في السياره من صفايات من كل شي وفيه حساس اسمه حساس الهواء تحصله جنب القربه بس انتبه تراه حساس مره ممكن تفكه غلط ولا شي يروح عليك ممكن برضو يصير منه واسف على الاطاله

[الحاوي]

بيض الله وجهك وشاكر لك تجاوبك يامقلع الرمث
الطقه تطلع والسياره بارده اكثر شي ولين احتمت راحت لكن الان تزيد وانا امشي في خطي تسمع الطقه واجد وبشكل غير منتظم وتطول ماتروح وللمعلوميه لين حطيت السياره على الفاضي ماتسمع الطقه
وهي اقرب للطقه اكثر من التفتفه وشاكر لك

[VTC-209]

انا أتوقع والله اعلم انه زيت القير عادة تكون طقة قوية عند التغيير اذا صار الموتر بارد وتروح اذا احترر

أحياناً تجيني زي كذا تكون يطق القير طقه قوية .. لكن تروح اذا احتر الموتر

وفيه طقه اذا فرملت عند الإشارة تحس كن احد صدمك من وراء صدمة خفيفة
هذي أنصحك أنك تشحم العمود الخلفي في أقرب محل غيار زيت بشحم هواء مظغوط حتى يمتليءبسرعة وأفضل لك

وبعد ذلك جرب الموتر...


أتمنى أني افدتك أخوي الحاوي...

[الحاوي]

مشكور اخوي vtc على تجاوبك لكن الحين الطقه تطلع وانا ماشي والسياره حاره واحس السياره ودها تطفي وعساك سالم

[الوعب]

السلام عليكم ورحمه الله و بركاته


الله يعطيكم العافيه جميعا
الحاوي مساك الله بالخير , اخوي ان شالله ان ردي هذا يفيدك
انا معاي سياره مثل سيارتك ولكن موديلها 2004 اعتقد مافيه فرق كبير بين الموديلين
صار معاي شي مشابه للي صار معاك , اولا حط في بالك ان النيسان هذا شي مش غريب عليه صوت طقه او رجه او غيره ,, مع العلم اني من محبي النيسان
الصوت هذا لاحظته في السياره اول ماشريتها (شاري السياره مستعمله) وازعجني بصراحه
لانه يطلع اول ما اعشق القير و امشي و عند التوقف واحيانا مع الدعسه على البانزين او اشيل رجلي من البانزين او البريك , الوكاد كان شي محير و مزعج
و الي سويته اني خذيت السياره و دخلتها شركه نيسان عندنا في قطر و سويت لها تشييك كامل و قال لي مسؤول الصيانه بعد ماجرب السياره في السارع معاي عشان اسمعه الصوت قالي بالحرف الواحد اذا هو الصوت الي في بالي فا 50% من النياسين التماتيك هالشي فيهن
وسببه غالبا عمود الشفت الي يربط بين الجير و الدفرنش يكون مستهلك شوي وتخترب قطع صغيره فيه داخل
وخصوصا ان السياره ترتفع و تنزل مع البريك و التعشيق و انت تعرف هالشي
والحل هو تغيير عمود الشفت و كان شي مكلف انا ماسويته بصراحه تقريبا 3000 ريال
و السبب الثاني المحتمل هو الله يسلمك البريك ؟ طبعا استغربت يوم قالي البريك ,, صعبه البريك يسوي طقه ,, قالي لايصير لانه السفايف تمسك و لاشلت رجلك من البريك تكون مجيمه شوي و بعدين تفلت مره وحده و تسوي هالطقه
الوكاد قالي بحاول اسويها لك
ويوم طلعت السياره من الشركه كانت تقريبا رايحه منها هالطقه ,, لكن ما ادري بالضبط ايش سوى و للعلم من الاشياء الي سووها لي هو تغيير السفايف الي قدام والي ورى و خرط للدرامات ويل

و ايضا فيه موضوع ثاني سوالي مشكله في احد المرات و السالفه كان فيها طقه و ايضا كان الموتر فيه كتمه وتفتفه و الصبح لاشغلته لازم يطفي مره و الثانيه لا يشتغل و يوم طحت على الخلل راحت كل الامور الي ذكرت لك

وللامانه انا ولله كنت ناوي احط موضوع في مكشا عن هالشي الي صار معاي عشان الكل يستفيد
لكن الشكوى لله القصور مني وموضوعك مبروك

شف الصوره الي راح احط و توقع ايش هذا ؟؟



http://www.m5zn.com/uploads/2130d71c63.JPG



هذا الله يسلمك طلع من دبه السياره

رحت لاحد الميكانيكيه (محل صغير ) وقلت له سيارتي فيها كذا و كذا ,,, نزلت تحت السياره و طل في المكينه قالي سيارتك مافيها شي
رحت لمحل الشكامين الي جمبي و قل له شيك لي على دبه التلوث ؟؟

وفعلا رحت لراعي الشكامين و قلت له سيارتي فيها كذا و مذا و الرجال الي جمبك قالي اجيك .. قالي الموضوع سهل
خذا سبانه و نزل تحت السياره و شوي ولا شايل دبه صغيره جايه بالطول شوي ,, مكانها بالضبط تحت كرسي السواق

دخل فيها صيخ حديد و قوم يكسر من البلا الي فيها و انا منصدم ,, قال هذي دبه تمسك الكربون الي يطلع من المكينه و هذي تسوي مشاكل و انت عندك الدبه هذي تشبعت كربون و تسكرت نهائيا و الي فيها داخل مثل الاسفنج يابس و متكسر كسر كبار و هو الي يطق طق عنك مع المطبات ويخلي السياره تكتم عندك
للعلم السياره تردى عزمها لين اخر الايام صارت ماتجيب الا 140
وبعد العمليه الجراحيه هذي لله الحمد تغيرت السياره 180 درجه ,, حتى صرف البانزين قل عندي بشكل ملحوض
وسبب قله الصرفيه على ما اعتقد ان السياره كانت ثقيله و الهوى مايطلع بسرعه يعني الجير كان مايريح النمر بالسرعه المطلوبه ,, كانت التعاشيق تاخر وقت وهالشي الي قلل الصرفيه لله الحمد

تقريبا كذا شرحت لك قصة حياه السياره
اتمنى انه يكون فيها الحل لك و الفايده لباقي الاعضاء
و ماتشوف شر والله يبارك لك بالسيارة

[بـتّاع]

صباح الخير

انا مسجل رد عشان اشكر الأخ عزيز (ولايهون راعي الموضوع والأخوان )

واسأل الله ان لايريك مكروه ...
ولاتحرمنا من هالتجارب المميزه الله يبارك فيك

[الحاوي]

ماقصرت ياعزيز وجعل دربك اخضر وكل من تجاوب مع الموضوع
انا بجرب موضوع الدبه وانظفها وبالنسبه للتشحيم شحمة العمود وكل شي حوله ونفس المشكله وشاكر لكم ولاهنت يابتاع

[مقلع الرمث]

مشكور اخوي عزيز ولا يهون اخوي الحاوي
اخوي احب ازيد على كلامك اشوي على اساس الطقه الي بالقير الاسبوع اللي راح رحت وديت السيارة لإحد اقاربي ميكانيكي كهربائي يعني ابتاع كله وقلتله فيه طقه لا مسكت ابريك ولا اطلقت البريك ولا لا جيت امشي ولا اذا اخذت مطب ولا هديت مره اسمع طقه تقل بالقير
قالي افتح الكبوت لما فتحته جاب مفك وحطه بالفراغ الي بين كرسي المكينه الي يخلي المكينه تحرك عند المطب وكذا حط مفك وقالي رح جررب السيارة
رحت جربتها ولقيت ان الطقه راحت مره ضربت مطبات لين قلت بس ضربت فرامل لين قلت بس وقفت ومشيت ولا طلعت الطقه قلت خلاص بس هذا كراسي القير اغيرهن وخلاص
لما رحت لمه قالي لا تغير شي قالي جبلك حديده ولا شي وسو نفس الي قلتلك وخلها كم يوم بعدين اذا ظبط غيره
وقالي اتوقع ان الربل الي داخل الكرسي دار عليه الزمن ولان صار لين يعني اذا مسكت فرامل تحرك المكينه واذا ضرب مطب مايمسك المكينه مزبوط لذالك راح يطق
وانشاء الله راح اجربه واعلمكم عن قريب

[الحاوي]

مشكور اخوي مقلع الرمث على المعلومات الثريه وبجرب والله يكتب اللي فيه الخير .
ملاحظه وانت اعرف مني انشاءالله كراسي الجير لوفيها مشكله كان تستمر ماتروح الى احتر الموتر والله لايهينك ومشكور

[VTC-209]

موضوع مهم جداً لأهل الباترول وخصوصاَ (الفتك)

الله يعطيكم العافية على التوضيح ,,,

فعلاً أستفدنا من تجاربكم
,,,

[سفاري نجد]

مرحبا شباب ،،،

الصوت اللي عندك من عمود الكردان فيه فضاوه وكتب عنده بمكشات كثير ابحث وتحصل اللي يطيب خاطرك ،،، وتراه عااادي لا تخاف لانه كان بسيارتي وغيرته على الضمان عمود الكردان واشوفه رجع زي اول بس أخف ،،، سيارتي سوبر سفاري 2003 قير اوتوماتيك ،،،
وعشان أتفادى الطقه قبل ما اوقف السياره اخلي نمرة القير على N ولا تحس فيها ،،،

تحياتي

[ibrahim_isz]

موضوعك أفادني كثير (كثر الله خيرك )