توي جاي من الصمان.. ولقيت طايرات هليوكبتر تدوركم

[حفرلوجيا]

سلام يالربع كل(ن) باسمه
أمس مسكت درب الصمان انا وخوي لي.. يوم انقطع الزفلت وحنا على مشارف الصمان.. ويوقفنا جيب شكله ولونه غريب أول مره اشوفه..واللي راكبينه لبسهم (رسمي) ايضا أول مره اشوفه.. قال لي واحد منهم بأدب واحترام ( لحظه من فضلك).. ونزل يبي يفتح شنطة سيارته ..قلت أنا بس يبي يجيب المشعاب.. ناوي شر.. قلت لخويي بسرعه طرف السلاح.. يمكنه حرامي .. لكنه طلع من سيارته كيس وأيضا بأدب قال تفضلوا.. وسأل تعرفون الطريق والوجهة اللي انتم رايحين لها.. قلت نعم وترى معنا ( مطقع الجدي) اقصد ( القارمن عطية الله).. وأيضا بأدب ودعنا وقال ( الله يسمح دربكم) .. بلخير ياريس( السمح)..
شكرناهم بعد ماعرفنا انهم .... صدق اولاتصدق...(خويا من هيئة السياحة).. ويوم تشطرنا عنهم شوي وافتح الكيس وألقى:
1- كتيب حلو مطبوع طباعة مصقولة يحتوي على معلومات عن الصمان وتاريخه وخرايطه الطبوغرافية .. وارشادات عن الرحلات والاشارات الدولية..وأشياء كثيرة ترشدك للمتبع لو تعرضت لعطل أو احتجت إلى انقاذ..
2- أكياس زبالة ( الله يكرمكم) وسفر طعام.. مطبوع عليها عبارة ( هذا برك يالشقردي..زبالتك فيه لاتخلي.. ان مااحرقتها لازم للديرة تردي).. هاه ذا شعر ياولد واسلوب جديد للتوعية .. أظنه المشرف شقردي صار يشرف حتى على الصمان .. ليا...( شروف)..
3- كتيب صغير فيه ارشادات عن العدد والادوات الضرورية اللازمة للرحلات وأرقام هواتف الجهات المسؤولة .. وعليه ختم ( الهيئة العليا للسياحة)!!!
عاد أنا استانست وقلت لخويي وش رايك براس ذاك الحزم المتطرف عن الطريق نكسر فنجال ونقرا الكتيب.. وفعلا تطرفنا وبدا خويي ينثر معاميله.. وشوي.. والا ذيك الطيارة الهليوكبتر تحوم حولنا .. ( لحول ..وش حنا مسوين ) وتوقع بأرض مستوية جنبنا وينزل ثلاثة منها.. بالاولة بيني وبينكم خفت.. لكني ارتحت يوم شفت شعار ( الجيش السعودي ) على الطيارة .. والطيار يومي بيده ويقول سلام يالربع.... قلت هلا تفضلوا حياكم.. قال واحد منهم مدري عسكري أو ضابط عسى ماشر متشطرين ..انتم متعطلين..قلنا لا.. بس نبي نتقهوى وجابكم الله معنا .. وجلسوا..هاه يالاخوان هبلتونا وليش جايين بالطيارة.. قال العسكري لا بس جتنا أوامر جديدة من مسؤول كبير يقول كلفوا الجيش ابتداء من هالسنه بمهمات انقاذ وبحث بدل ماهالطيارات رابضة بمهابطها طالما ماهنا حرب والحمد لله.. وفرقوا الطيارات على كل المناطق وصار نصيب الصمان ثلاث طيارات لمهمات الانقاذ والبحث واعطاء المخالفات..أفا.. مخالفات..
ترى نسيت اقول لكم .. ان الثالث اللي معهم ولابس زي حقين الجيب ماجلس.. يحوم حول السيارة سألت الضابط ورى مايجلس ذا .. قال هذي شغلته قاعد يدور اذا انتم قاطعين لكم شجر والا ناثرين ممنوع أو زبايل يبي يعطيكم قسيمة غرامه .. (عجيب)..
والله ذا شي جديد ويوسع الصدر .. عاد يوم شافوا ماعندنا مخالفات ودعونا ..
وأقلعت الطيارة وانا اتفرج عليها لمين دخت وأخذت لي غفوة .. وشوي والا اللي يرش على وجهي ماء.. (قم يالهيس ورى ماتقوم لصلاة الفجر)..
أثاريه الوالده الله يسلمه وأنا لابالصمان ولا هم يحزنون .. وذا كابوس .. وتذكرت إني قبل ماأنام كنت أقرأ موضوع الريس (مكشات)..الصمان وماذا بعد .. الله يسامح مكشات جاب لي الكوابيس... وسلامتكم

[مراكي الذيب]

رائع ياحفرلوجيا


الصراحه حلم توعوي ياليت يتحقق

مشكور ماقصرت:good: :good:

[السمح]

هههههه حللللوة أخوي حفرلوجيا
شكلك مؤلف روايات ولا فيكتور هوجو
ولا أخفيك إني أول ما بديت أقرا وصلت لقولك : " يوم انقطع الزفلت " قلت لنفسي هاه مسكت عليه كذبة :D لأن الزفلت ماهوب على خبرك ينتهي بالصمان ، وصلوه عقبك إلى الرفيعة
وبديت أحس إن المسألة فيها إن عقب ما قريت قولك : " لكنه طلع من سيارته كيس وأيضا بأدب قال تفضلوا" ... وين حنا يابعدي تونا على هالحكي :p
على كل حال استمتعت بطريقة سردك وترتيبك للموضوع والهدف وصلت إليه حتى وإن كان حلم والمعنى بين السطور
حياك وبارك الله فيك وننتظر المزيد من الإبداع

أحلى تحية

[قتال]

السلام عليكم ورحمة الله وبركاته ،،،

حلوه منك أخوي حفرلوجيا .. :D :D

نحن بحاجة أن نكون أكثر حرص على البيئة ..

فكلنا يتذكر البر في الماضي وكيف كان والآن كيف أصبح ..

فلنتخيل كيف سيكون في المستقبل .. وأين ستكون رحلاتنا ..

[فرد حمزة]

حفرلوجيا

أقسم لك

جلست أقرى وشوي ينشد أنتباهي وتبرز أسارير وجهي وأقرأ بشغف عميق ،
شدني الموضوع وكلامك وكأني معكم ،،

وجالت في مخيلتي أفكار وأفكار

وتجدد النشاط والهمة في الحث على الحفاظ على البيئة

وتحمست أكثر فأكثر وكدت أخرج في فناء منزلي أصرخ من شدت الفرح بهذه الأخبار

حقاً أنها توعية ، ونقله نوعية في الوعي للحفاظ على البيئة

ويبدو أنهم حريصين جداً لهذا العام فبدؤ قبل الموسم

ياااااااااااااااه كم أنا سعيد ومسرور وأحس أني أطير من تلك الأخبار

لالالالالا أكاد أصدق ،،،

وفجأه ...

وأنا في شدت أندماجي فبين السطور وبطيات الكلامات وتختلجني الأفكار والمشاريع التطوعية .... و... و... ألخ

وأصتدم بعنف بتلك السطور الأخيرة ... ولم أستعيد وعي إلا على رش ماء والدتك عليك :(

ليتك تركتنا لبضع أيام نعيش هذا الحلم واقعاً ... أخ أخ أخ

لا تعد لمثلها بارك الله فيك :) فلربما لن نستعيد وعينا في المرات القادمة

تحية إجلال وإكبار لقلمك السيال

أخوك

فرد حمزة

[صقر]

هههههه ...(خويا من هيئة السياحة)..

والله وانا اقرأ الموضوع قلت حتى السياحة صار لها خويا..

والثانية قلت الصمان يخلف الله علينا...... هلكوبترات وازعاج وحنا هاجين من صوت السيارات يجي لنا هلوكبترات لا وبعد الخويا قاعدين جنبك يتلقطون عليك لو ترمي منديل والا قشر بصل عطوك مخالفة ... طيب وين نسدد هالمخالفة وتحت اي مسمى نسددها (مخالفة برية) .

قصة راعة وهادفة ... بورك قلمك ايها المبدع.

وبارك الله فيك.....

[حفرلوجيا]

اخوي مراكي الذيب:
شكرا..وانا اقول ياليت غيرنا يصحى من نومه ويكون المسؤول.. مواطن اولا ويمارس دوره الحقيقي ..كان تشوف ان أحلامنا بسيطة جدا..
أخوي السمح :
شكرا..يازينك يا(ريس) وانت تمارس دور الرقيب وترصدلي..تدور (الارانب) ..تبي تتعب بعدين..لكن من قلبي... أشكرك.. واقف لك احتراما..
أخوي قتال:
اصبر خل أجلس بعد ماوقفت على شان اخوي السمح..
شكرا.. كلامك اللي تقول به..( فكلنا يتذكر البر في الماضي وكيف كان والآن كيف أصبح ) .. تخيلتك مسؤول كبير...لايق تكمل ( وهذا المشروع من اكبر المشاريع في الشرق الاوسط....و... ( أمزح ).. بس تدري .. أغليك بلحيل يا( ريس)..
اخوي فرد حمزه :
شكرا.. ردك يوضح انك كنت في دهشه.. تدري لحد ماقلت في كلامك(وتحمست أكثر فأكثر وكدت أخرج في فناء منزلي... ياااااااااااااااه كم أنا سعيد ومسرور وأحس أني أطير....) تخيلتك بسروال السنه ( الله يشفيك ) واقف على خط حايل بمفرق شري تشر لحد يوصلك لبقعاء..
ايه....اللحين حسيت اني انتقمت ورديت ثاري منك... اجل هبلت حتى بالخكاريه وطلعتهم يم لينه وفياضها وخربوها علينا العام.. بصورك اللي سحرت الجميع ..
اه من هو يقدر يحمى له عشرين روضه بغابات الاسود اللي باثيوبيا ويخليك تصور مخصوص لخكاريه العام كودك تقلعهم عنا هالسنه ويروحون طعام(.......) ويفكوننا من حوستهم..
عاد اقولك .. اذا شفت اسم فرد حمزه... تدري وش أفكر فيه ..ينصرف ذهني لشبات أهل منطقة حايل والمراجل..
أخوي صقر :
شكرا.. ايه ليش لا ( خويا هيئة السياحة).. بس ذولا خويا و محترمين موديل 2005 .. معذور ياصقر متعود على قشارة (بعض) الناس.. ياحبي لك وأنت بلش(ن) بالمخالفة ووين تسددها..

[المسفهل]

والله إني عرفت إنها أحلام اليقضة من وحين وصلت في قراءتي إلى قولك : ( صدق اولاتصدق...

(خويا من هيئة السياحة)..

بيننا وبين ذلك خطوات واسعة ومسافات طويلة ! !

ولكني أعجبت كل الإعجاب بهذا السرد الجميل والأسلوب الأخاذ والفكرة الرائعة ...

ننتظر مثل هذه الكتابات الهادفة والتي تشد القارئ وتمتعه ...

[القماري]

حفرلوجيا
نم عندما تنام :D
تراني صدقتك لين ذكرت الهليوكبتر (قلت بس السالفة لو حلم لو قصة)
عموما تراك قاص مبدع وجيولوجي فلته

[ذيب البر]

رائع واكثر من رائع بس الي قلته كابوس وسيظل كابوس للأسف


على طاري الطائرات الى متى وهي قابعة في مهابطها زي ما تقول

لابد ان يفعل دورها على الاقل في مجال الاسعاف ولا احد يقولي كلامك

سياسة فكنا .........

لاني شفت حوادث على طرق يموت الميت قبل وصول سيارة الاسعاف

اكثر من واحد رحمهم الله

تحيااااااااااااااااااااااااتي

[طيـــ بر ـــر]

يلعن ابليسك .. والله صدقت :D

بغيت أجزم بكره أروح للصمان :D

[خشم الحصان]

الاخ حفر لوجيا
السلام عليكم
الله يرج بليسك اقر المعوذات قبل لاتنام بس بيني وبينك وادي ان حلمك يتحقق كل الي فيه
وركد تراء الارض مسكونه
و السلام عليكم
اخوك
خشم الحصان

[عاشق البسمه]

الله يقطع بليسك ياحفر لوجيل والله يا أنا دخلت جو:confused:



تحياتي:)

[عبدالعزيز الدباسي]

والله لا اوريهم العين الحمراء

و ابي اشتكيهم على وزارة الاعلام

ليه يستفيدون من اسمي على مطبوعاتهم من دون استإذان .

الحقيقة انك ((غير شكل)) يا حفرولوجيا ، ، ومنتب سهل ،،

بارك الله فيك وماقصرت على هالموضوع الجميل والمعاني الفياضة

فليس شرطاً بان الموضوع الجيد يكون محاضرة ،، والمبدوعون فقط هم الذين يكتبون مواضيع جميلة وبدون محاضرات .

================

سبق وان قلت لك يا حفرولوجيا بان عندك شى كثير ، واكيد بان مكشات كسبت عضو ((غير شكل)) وحنا بانتظار جديدك يالغالي

[Najd^Prince]

بسم الله الرحمن الرحيم


رائع يا(( حفر لوجيا )) فالقلم الجيد يكتب عن إبداعات تكون للمستقبل (( المستقبل البعيد عندنا :p ))

بصراحه القصه رائعه من حيث :

1/ الأسلوب القصصي .
2/ طريقه ترتيب الأحداث .
3/ إبداع الافكار القصصيه (( المشاهد في القصه )) .

و الاكثر أهميه في نظري و نظر الكثير من المكشاتيين :) الهدف .

ياليت هالاشياء تتحقق تخيل حراسه جويه :rolleyes: ,, بس الي لفت نظري في القصه

( مطقع الجدي) اقصد ( القارمن عطية الله).. :good: .

الله يعطيك العافيه ونحن في إنتظار المزيد من إبداعات قلمك .

Najd ^ Prince

[فرد حمزة]

الرسالة الأصلية كتبت بواسطة حفرلوجيا
اخوي فرد حمزه :
شكرا.. ردك يوضح انك كنت في دهشه.. تدري لحد ماقلت في كلامك(وتحمست أكثر فأكثر وكدت أخرج في فناء منزلي... ياااااااااااااااه كم أنا سعيد ومسرور وأحس أني أطير....) تخيلتك بسروال السنه ( الله يشفيك ) واقف على خط حايل بمفرق شري تشر لحد يوصلك لبقعاء..
ايه....اللحين حسيت اني انتقمت ورديت ثاري منك... اجل هبلت حتى بالخكاريه وطلعتهم يم لينه وفياضها وخربوها علينا العام.. بصورك اللي سحرت الجميع ..
اه من هو يقدر يحمى له عشرين روضه بغابات الاسود اللي باثيوبيا ويخليك تصور مخصوص لخكاريه العام كودك تقلعهم عنا هالسنه ويروحون طعام(.......) ويفكوننا من حوستهم..
عاد اقولك .. اذا شفت اسم فرد حمزه... تدري وش أفكر فيه ..ينصرف ذهني لشبات أهل منطقة حايل والمراجل..



تصدق عاد يا حفرلوجيا... ولا يهون خويانا..

أني ما نزلت صور في مكشات بعد هذا الموضوع أسفل ... صراحه أنصدمت ولازلت أعاني من تأنيب الضمير.. أدعوك لزيارته ... :)

http://www.mekshat.com/vb/showthread.php?s=&threadid=6981

بارك الله فيك

[نجمة سهيل]

رائع ياحفرولوجيا:heart:

تصدق ، هذا حلم ولا في الأحلام:D يتحقق ،،

لكن صراحه طريقة سردك وكتابتك للقصه خياليه ،،

وش رايك توقع عقد معي:rolleyes: تكتب بالمجله :D

[حفرلوجيا]

أخوي المسفهل... وأخوي القماري.:
شكرا ياذوق..
أخوي ذيب البر:
شكرا.. وخلك متفائل يابعدي... رغم اني.. وإلا تدري ..( بلاش)..
اخوي طير بر:
شكرا وعساك تعديت طق الخنزيرة بمشروع توقيعك اللي تحت الانشاء..
أخوي خشم الحصان:
شكرا الله يسلم هالخشم..
أخوي عاشق البسمه :
شكرا.. ويازين توقيعك أويلاه لاتغيره.. كود بعض الناس تفهم وتصير رايقة..
أخوي شقردي
شكرا .. لك كم رد (صار قلابي ذا).. اقول بردودك تغمرني . بل وتغرق(ن).. بعبارات الثناء والاطراء .. ارجو ان أكون ممن يستحقها.. (شفت التواضع ياريس ).. وخوفتي ان اللي عندي ان كنت تراه ماشي (برضك متواضع).. يكون (بيضة ديك.. مع الاعتذار لدجاج حوش جيراننا).. همين(ن) يسرقنا بعدها العمل.. تصدق عاد من جد مكشات كله (حلى)... وانت (التطلي) حقه.. وأقولها ويشهد علي ربي ... أحبك في الله...
اخوي Najd^Prince :
شكرا .. ويعلك تسلم على هالكلام النظيف
أما انت يا......... فرد حمزه:
ياحيي .. يابعدي.. كنت أداعبك (بفتح الحاء) لهجتي حايلية..
وحسبي على المشاغل اللي ماخلتني العام اتابع مكشات( زين )
ياخوي ماشفت موضوعك اللي رابطه بردك حق (تأنيب الضمير).. وإلا والله ماكنت داعبتك..
لكن الخلاصة ان (الزقرت) بردودهم على ذاك الموضوع كفو ووفو..
أويلاه عليك .. قلت أنا اذا جاء طاري فرد حمزه تذكروا المراجل .. شوفو (الشمالي).. محمل نفسه أخطاء الآخرين.. يابعدي ذا التأنيب من (حسن ذاتك).. وإلا لو انت المتسبب كان الي صنع السيارات تسبب بالحوادث.. واللي اخترع (gps) حاس علينا البر.. واللي صنع الطايرات كسر عماير (... اح.. )... رحنا وطي إلا شوين.. وترى السكين يعشى بها الضيف ويقطع بها الطريق..
ولا أظن ان مسألة تزويدنا بالأخبار والصور.. محل خلاف في النشر.. إلا انشروا ( نعنبو الفقر ) واستمتعوا بهواياتكم النظيفة.. وخل ها( السملق).. لهم يوم ويعقلون.. ولو انهم كثروا الله لايكثر ( العفون..والحونش )

وتصدق ..

تأثرت من تأثرك (حلها)...... وودي انسحب من (النت) كلها
( ياولد اثاريي الشعر سهل)..
لكن اقول الله عليك ....
أعديتنا......


صدقت..؟

الا.. نبي .. نبوبز.. بـ(هه)..

ترى الربيع الجاي .. أبتزعم مجموعة من الأعضاء نطالب الريس الكبير .. يفصلك ان ماجبت لنا صور رحلاتك.. ان مامتعتنا بكاميرتك انت وأمثالك منهو اللي يمتعنا

نجمة سهيل.. يابعدي:
شكرا وأناجاهز للتوقيع وشروطي مع راتب أول شهر 20 سطل سكري

[عبدالعزيز الدباسي]

اخوي حفرولوجيا ، احبك الله الذي احببتني فيه .

والحقيقة اني تقطعت وتشقــــققت ورحت في خرايطها يوم شفت كلامك (حشا رسايل غرام)

والحمد لله انك صرت فاضي هاليومين علشان تعطينا من مواضيعك الدسمه ، الجميلة في مضمونها والبسيطة في عباراتها

ولاحظت عليك (ما شاء الله عليك) انك متابع جيد لمكشات وعرفت انك من محبي مكشات واولها من يوم جبت طاري (الماب سورس) في احد ردودك لي ، ،،،،،،،،،،،، قلت وش ذا اللي توه مسجل ويدري عن سالفة الماب سورس ،،،

لكن الله يتمم عليك بالصحة والعافية ، وآمل ان تجد الفرصة الكافية ، وان تكتب لمكشات بروحٍ عالية

(حلوووووة هذي ما ادري وشلون جت) واترك عنك مازولا وعافية وخلك مع المقرصة الحامية :p

[aldrawy]

السلام عليكم ورحمة الله وبركاته
حلوه أخوي حفرلوجبا نصيحه بطريقه محببه وأرجوانها وصلة للجميع مع احترامي لهم

[مكشات]

هلا اخوي حفرولوجيا
مادام كل هالحلم سبته موضوعي ..
أجل إنتظر موضوع عن الزواج :)
يمكن الله يوفقك تتزوج الثانية لو بالأحلام :p
أخيرا أشكر لك هذا الموضوع الذي يحمل بين سطوره الكثير من الأهداف الجميلة بإسلوب ساحر جذاب ..
تحياتي لك وإلى مزيد من هذه الدرر الجميلة ..

[ابوعزيزm]

ههههههههه الله يرج بليسك

صراحة أني رحمت راعين السياحة قاعدين بالشمس لجل عيوننا

وإلا الهلوكوبتر ... قلت هذولا أنهبلوا وإلا فيهم مس والله صرنا مهمين يتابعون همومنا حتى بالبر

لكن فكرة رااااائعة وأسلوب راااائع

ماقصرت . . . :)

تحياتي ابوعزيز:)

[عبدان]

هههههههههههههههههههههه

ااااااالله يعطيك العافية على الموضوع الشيق

[جلمود1]

تبي الصراحه انت فلته رهيب
شكرا لك

[عيون الغلا]

اما سواق الهيلكوبتر يقول سلام يالربع سمممم وين حنا به
ولاكن اللي اقدر اقوله مع اني اعجز اوفيك حقك انك انت وموضوعك أكثر وأكثر وأكثرمن رائع
وإلى الأمام
وتحياااااااااااااااااااتي لك

[هبوب]

هههههههههههههههه

[نقا هشال]

ياعيني عليك يياابو سليمان

جعلك تسلمممممم

على الموضوع الرائع

والاسلوووب الرايق

[قاهر الفري]

والله صدقت :d

[كان]

حفرلوجيا الله يقطع ابليسك والله اني صدقتك ههههههههههههه

[معدي المرقاب]

حلوه ياحفرلوجيا .. بس ونا اقر مادخلت راسي قلت شكلنا ماحنا ببلدنا ببلد ثاني طيارات وحركات ووو((حترام)) زين الي مازينوبك زي ((مناحي)) يسحبونك انت وسيارتك بالطيارة. لاكن حلم جميل ولاعمرك تحلم بزي ذي حلوم تحلم انك مغرز او ضايع او مبنشر وذابحك الضما والجوع ولاعندك احد والله محد يجيك حتا بالحلم ههههههههه؟
اخوكم معدي المرقاب

[ولد المزاحمية]

ياليت حلمك يتحقق
والله فتحت ثمي مع السالفة

[الخادم]

اخواني :D

ركبت عفشي و عزبتي بالجيب و ابي اروح اشوف الطيارات واثرها حلم و لكن الله رحمني برمضان 0
اتمنى ان نحقق حلم الغالي ولو بدون رقابة و مخالفات يارب يا كريم 0

اخوكم
الخادم
:j