يا شباب لو سمحتوا الموضوع للمره الثانية سؤال عن الدفلك ؟ ؟ ؟

[سلطان بن محمد]

السلام عليكم

ياشباب عندي الجيب بدون دفلك.

السؤال ؟ ؟ ؟
هل يمديني أركب وإلا لا

وإلا أبيع الموتر وا شتر بـ دفلك ؟
عطونا العلم لو سمحتوووووووووووا




.

[khaled99]

تقدر تركب دف لوك.
http://www.arbusa.com/alac/215109.pdf
هذا الملف فيه أسماء السيارات اللي متوفر لها دف لوك من شركة arb الاسترالية

وهو دف لوك هوائي وليس ميكانيكي كالمتوفر في شد البلد لكن يؤدي نفس الغرض.

على حد علمي القاصر ليس متوفر في السعودية وانما بالطلب من الشركة..

فقارن بين سعره مع الشحن والتركيب أو شراء سيارة أخرى فيها شد بلد.

بالتوفيق

[المتر]

وعليكم السلام

حياك الله اخوي مطوق

من يقول مايمديك تركب دفك الا تقدر تركبه بس يبي يكلف عليك شوي

انا كان معي جيب ربع وركبت عليه دفلك وكلف علي 4000 تقريبا

[سعد777]

تقدر تركب دف لوك.
http://www.arbusa.com/alac/215109.pdf
هذا الملف فيه أسماء السيارات اللي متوفر لها دف لوك من شركة arb الاسترالية

وهو دف لوك هوائي وليس ميكانيكي كالمتوفر في شد البلد لكن يؤدي نفس الغرض.

على حد علمي القاصر ليس متوفر في السعودية وانما بالطلب من الشركة..

فقارن بين سعره مع الشحن والتركيب أو شراء سيارة أخرى فيها شد بلد.

بالتوفيق

ممكن توضحون عن هذا الملف

[عشق البر]

اتوقع يمديك بس مهب نافعك واجد قليييييل مره استخدامه
وما يسوى انك تبيع موترك وتشتري واحد ثاني يجي به شد بلد

[شاص&نص]

السلام عليكم ورحمة الله و بركاته
من ناحية القدرة فأنت تقدر و بيكلفك أقل شيء 2000 ريال طبعا القطع كلها من التشليح و الشغل شغل إستراحات ((هذي إفادة واحد توه مركبه على ربع))
أبو عبدالكريم

[جنتلمان نجد]

وش فايدة الدفلوك وطريقة عمله؟

[الضاعن]

ياشباب وشو الدفلك؟
وما اهميته في سيارة الدفع الرباعي

[رعد النجدي]

هذا ردي تحت

[رعد النجدي]

الفلك يا شباب بكل بساطه
نظام حركه يعمل مع الكرونه ( الدفرنس)
وبالعامي
اذا السياره غرزت ما يصير احيناً كفر ثابت والثاني يدور بوش يحفر على الفاضي
هنا اذا شغلت الدف لوك يحول كل العزم على الكفر الي ما يتحرك لانه على عزا ومثبته ثقل الموتر ويحرك هالكفر الثابت ويطلع السياره
ومن عيوبه انك تشغله بس عند الغراز ولا تزيد السعره عن 5 كيلومتر في الساعه يعني حبه حبه
هو ينفع بشكل اساسي عند تسلق الجبال ام في الرمل ينفع للغشمان
وعموماً يعتبر ميزه لصالح السياره
تركيبه يتطلب شراء نظام الحركه بالكامل وفك الكرونه وتركيب النظام الجديد مع ليات وظواغط هواء
ولا تدري بعد تظبط ولا لا
خلك على طمام المرحوم احسن

[رجل كريم]

وعليكم السلام ورحمة الله وبركاته:


الورشة المتخصصة في هذا المجال هي العالمية لصيانة السيارات بجدة يطلبون لك القطع ويركبونها لك ويعطوكـ عليها ضمان محدد .. التكلفة التقريبية من 3500 الى 4500 ريال ..

تحياتي ..

[مجتهد***]

مدري لو حصلت في التشليح حق شد بلد بيظبط ولا لالالالا

أفيدوني الله يرحم والديكم

[شاص&نص]

أخوي مجتهد يضبط بس يحتاج تعمل فتحه له عند الكارونه و بيكلفك حول ال 2000

[الدحبول]

انصحك خلك على موترك ترى ماتحتاج له إلا نادر
انا عندي موتر بدون دفلوك

[سلطان بن محمد]

بسم الله الرحمن الرحيم



شاكر كل من عطر الموضوع بأنامله الكريمة ووضح.

وأنا أقول للإخوان اللي قالوا أنه بيكلفك فتح فته عند الكارونة
على حسب مذكره أحد الإخوان إنه جاهز بس يبغى القطعة ويطبق تطبيق فقط
لآن الكارونة مفتوحة وجاهزة لأن بعض الجيوب مثله يجي فيها دفلك

واللي أنا أبغاه هو وين اللي يركبونه وبكم تقريبا لأن اللإخوان بالمنتدى ذكروا
بالربع والربع مايجي جاهز يبغاله كارونه أما الجيب فـ يبغى القطعة فقط
وأتوقع أن أهل القصيم لهم خبرة كبيرة في هذا المجال.

وأتمنى التزويد بالمعلومات.



شاكر لكم ومقدر لكم مروركم أخوكم مطوق

[سيف الظفير]

السلام عليكم

ياشباب عندي الجيب بدون دفلك.

السؤال ؟ ؟ ؟
هل يمديني أركب وإلا لا

وإلا أبيع الموتر وا شتر بـ دفلك ؟
عطونا العلم لو سمحتوووووووووووا




.



نصيحة من أخ /

اذا كانت سيارتك اللي في توقيعك لاتبيـــع السيارة لأجل الدف لوك

[سيد النشاما..]

ماقول ألا
الله يوفقك يالطيب

[Khalid AlGhamdi]

لاتشغل نفسك الموضوع مايستحق العنا
مايستخدم الا ناااااااااادراً ويمكن تبيع موترك ماشغلته

[سفاري فتك]

لاتشغل نفسك الموضوع مايستحق العنا
مايستخدم الا ناااااااااادراً ويمكن تبيع موترك ماشغلته


اضم صوتي لك اخوي

واحد من الجماعه مع جيب سفاري فيه دفلك سئلته مره وقلت جربت الدفلك علشان تشوف ان كانه شغال
قال وش الدفلك قلت يعني الهزاز قال اسمع به لكن ماعرفه وانا راكب مع وريته زر الدفلك قال سنين والسيارة
معي وما ادري هذا وشو ,,,,,, على العموم بصراحه الدفلك مواصفات لكن غير عملي في السيارة يعني الشخص يشتري الموتر ويبيعه ولايكون عمره شغل الدفلك وبعدين حسب علمي يقولون خطير اذا شغلت الدفلك وانت لاف الكفرات الاماميه ممكن يكسر العكوس وهذا كلام غيري انا ماجربت بصراحه ,,,,, بأختصار الدفلك غير نافع في السيارة
تحياتي

[بواسامه]

نصيحه لله
لا تركبه ولا تبيع موترك
صدقني ماتحتاجه الا في مثولث فقط ولا شعيب وعر جدا
احفظ مويترك وانا اخوك من العبث وتجارب الاخرين

[البجلى]

السلام عليكم
كما ذكر احد الاخوان ان الدف لاك يستفاد منه في حالات نادره جدا وهو عدم دوران احد الكفرات دون الاخر
ولذالك سمى باالدف لاك يعنى قفل الدفرنشل لكى يدور مع بعض وهو ينفع عند الطلوع لمنع الانزلاق
عند ما تكون الارض غير متساويه
وكذالك فى التغريز العسر مند مايدور احد الكفرات دون الاخر ويستعمل بحذر للخروج من موطى الكفر الحافر او الذى لايدور فقط وكما ذكر لك اهل الخبر لاتحتاجه انا معى باترول كان فيه دف لك بعته مستعملته ومعى لاند من 4سنين استعملته مره لمده دقيتين وهذا مااستطيع ان اساهم به

[مقلع الرمث]

اخوي انصحك تروح لم التشليح وتشريلك دفرنس حق دفلوك وتشرط عليه كامل مع لياته مع كل شي عشان ماااايكلف عليك بعدين فك الدفرنس حقك وراكبه وممدد لياته وركب الفيش عندك وخذ الدينمو حقه لا تنسى ازيلك من بيعه السياره مع الاحتفاظ بالدفرنس العادي الي عندك ولا تعطيه اياه رجيع ممكن تحتاجه
والسلام عليكم

[مدهوش]

الأخ مطوق السلام عليكم

نعم تستطيع تركيبة وبكل سهولة وانا اتكلم من واقع معرفة والمسألة بسيطة جدآ وتحتاج للإستعانة بشخصين بعد الله الأول محمد الصمعاني بتشليح بريدة وهو معروف أسأل عن ورشة الصمعاني بالتشليح والكل يدلك عليها وبعد ما تنتهي منه يأتي دور التسليك وهي من إختصاص محمد العثيم وهو معروف أيضآ بصناعية الرواف داخل بريدة ومشهور أيضآ وللإثنين باع طويل بتركيب الدف لوك بالسيارات التي لا تدعم هذه الميزة وإن أردت مني خدمة بخصوص أرقام جوالاتهم الرجاء إرسال رسالة خاصة وسوف أقوم بالإتصال عليك

[سلطان بن محمد]

الله يجزاك ألف خير

بس ممكن سؤال ؟

كم يكلف تقريباً ؟

كانه غالي واثري أقصر العنوة