المشورة يا رجال عن الجيوب

[الشويطي]

اولاً السلام عليكم ورحمة الله وبركاتة يا رجال ابغا مشورتكم ان ناوي اشتري جيب وابغا منكم المشورة عن افضل انواع الجيوب انا احترت بين النيسان والتيوتا كلاًيشور علي بي النصيحة ناس تمدح النيسان السفاري والبعض الباثفندر وناس تمدح التيوتا بي انواعها بعض يمدح المتسبيشي وناس تمدح التمتيك وناس القير العايدي ارجو من عندة النصيحة والمعلومات يعطيني الراي ولافضل لو يكون يعطيني افضل مواصفات الجيوب ولكم خالض الشكر والتقدير.

[ق ب م 632]

والله المشوره انت اللي تقدر تحددها يالغالي



يعنى على حسب استعمالك




اذا انت تبيه للعائله وعندك موتر ثاني خفيف وصغير انصحك بجيب التويوتا لانه اوسع واكشخ وبالبر والطلعات زين ومافيه عذرايب........




اما اذا انت تبي الجيب علشان البر والطعوس والمقنايص وطلعات الشباب وايضا تبي تستعمله استعمال يومي انصحك بالفتك لانه خفيف نفس وبالبر قوي بالحيل وشبابي اكثر من التويوتا ....





وهالحين نوع القير

الصراحه انا اؤيد القير الاوتوماتيك لانه اريح داخل الديره والطلعات للبر اللي مافيها وعر بالحيل فهو ممتاز واما العادي هو يصلح للي يروحون للبر بشكل يومي اوشبه يومي ويواجه الكثير من الطعوس والرمال وسحب السيارات او المقطورات اكيد العادي راح يصبر معك اكثر ويتحمل مع انه متعب شوي ..........




واي خدمه ترانا نعين ونعاون

[.أبوعبدالرحمن]

انت ما حددت استخدامك


ولا حددت اللي بيركبون معك


يعني يمكن اقول لك باثفندر وتقول لا العائلة ما ينفع لهم لانهم كثيرين على الباث


ويمكن اقول اللاند وتقول لا كبير علي


حدد وان شاء الله نحدد

[الشويطي]

الله يعطيكم العافية انا عائلتي متوسطة وانا ناوي انشاء اللة يكون الجيب السيارة الرئيسية لي مع الاضافة لسيارة صغيرة لي الاستخدام البسيط وانا من النوع الي يحب السفر ويحب طلعات البر كثير فلا تبخلون علي في المشورة ولو احد يعطيني افضل الانواع من واقع استخدامة واكرر الله يعطيكم الف عافية وتقبلو خالص شكري وتقديري .

[الفتكي]

السلام عليكم
كل عام وانتم بخير
شوف اخوي ولا يهونون الربع انا معي سفاري 2004م مركب له ياي استرالي (200كيلو 3سم) يعني وسط وكفرات بالون ماكسس واحمل علي عفش ثقيل ( خيمة البيرق +تانكي ماء 100لتر وكذلك اغراض اخرى وفرش واربعة رجال شرواكم اجسام كبيره شوي) وامشي في الصحرى او نفود مافي امل يردح ومرتاح من ناحية العزم والسرعة.
لكن الجيب ركبنا عليه استرالي نفس المقاس وحملنا عليه نفس العفش ويردح لأنه لا يرتفع والسبب ان الجيب ما تستطيع ترفعه من الأمام. وانت بكيفك اخوي

[أبويوسف]

خذ TOYOTA
سواء أستخدمت أو جيت تبيع

[راعي الرود]

مايبيلها وانا اخوك

الباثفاندر

ان بغيته مدينه ولا اريح منه وان بغيته بر ترا ينشد به الظهر

ولا كأنك تسوق جيب من خفته ماشاء الله

بس كأنك بتبيع بعد مده معينه ما انصحك إلا بـ التايوتا طبعاً

والله يكتب لك اللي فيه الخير

والله يعطيك خيره ويكفيك شره مقدماً

[أبونورة777]

شف اخوي .. انا جربت جميع انواع السيارات ..

غير التويوتا لا تدور .. خلنا واقعيين ومن غير عواطف ..

سيارة بر .. وطريق .. وكشخة اكثر من غيرها .. واذا جيت تبيع ما تزعلك ..

طبعاً لو حددت دراهمك وايش توصل .. كان فزعنا معك بالضبط وعطيناك الشور اللي يسرك !!

بالتوفيق ..

[عاشق السيل]

وعليكم السلام ورحمة الله وبركاته ،،

أنا مع كلام أخوي ( ق ب م 632 ) وأضيف :

إذا كانت قروشك واجد اشتر لاند كروزر جديد وخذ أفضل المواصفات ،،

وإذا كانت قروشك ماتوصل لللاند الجديد خذ سوبر سفاري جديد ،،

وإذا أقل خذ لاند مستعمل بس نظيف ،،

وإذا قلت ماتوصل قروشي أقولك خذ سوبر سفاري مستعمل واحرص على النظيف ،،

يعني باختصار قلي كم قروشك أقولك وش تشتري !!!!

وأنا بانتظارك ،،،،،،،،

[باترول 82]

أعتقد ان الفتك أقوى واكشخ وأريح لك في المشي

والتويوتا اللاند عند البيع افضل فقط هذي ميزته

اسأل الله لك التوفيق

[z a n h o r]

شف يالغالي الاند زين والباترول زين

لكن انا لو باخذ باخذ باترول

وبالنسبه للقير

الباترول فتك اوتو

والاند عادي

[راعي البرهـ]

اخي ا لحبيب اراء الاخوه كلها ممتازه..وانا ادلي بدلوي فاقول اذا بتشتري سياره وتكون جديده فخذ اي سياره بحيث لا تتعدى التويوتا والنيسان اما نوع القير فلا تتعدى التماتيبك (خذ نصيحه واحد شايف المر من العايدي 9

[الشويطي]

الله يعطيكم العافية انا ناوي استخدام ولا لي نية بيع قريب اذا وفق الله وشريت ونا ابغا الاخوان يختصرون الخيارات في نوعين من الجيوب واي مديلاتها افضل لأن الجديد يصعب علي شوي وفلوسي حول الخمسينات ولكم خالص الشكر والتقدير .

[سيف الظفير]

خذ لك سفاري نظيــف تلقاه بـ 90 // 85 الف

[سيد النشاما..]

سفاري وأمسك الدرب
موتر قوي و مريح وراسي وفيه النشاط اللي يكسر الرقبة من الفزة :p

[4800VTC]

اذا فلوسك حول الخمسينات فانا انصحك بالباثفاندر لانك بالسعر هذا راح تحصل نظيفوممكن تحصل سفاري نضيف بس الموديل لك عليه بحدود موديل2000 يعنياما الاند فلن تحصل من الموديلات الجديد نظييييييييف

[عاشق السيل]

إذا كانت فلوسك بالخمسينات مالك إلا سوبر سفاري 98 بس دور النظيف ،، وأنا أقولك سوبر لأنه يفرق كثييييييير عن العادي وخاصة إنه يجي تماتيك ودف لوك ومميزات كثيرة ذكرها يحتاج وقت !!!!

وعسى الله يوفقك بالمبروك والنظيف ويطعمك من خيره ويكفيك شره .....