أسعار اللكزس 2008 (570) اليوم الأحد 4/1/1429 عند عبداللطيف جميل ..

[علي عليوه]

دقو اليوم الوكالة ( عبداللطيف جميل )

على واحد من الشباب حاجز عندهم لكزس 570

وطلعت أسعاره على النحو التالي :

1 - سعره 260000

2 - سعره 290000

3 - سعره 300000

الفروقات باختصار شديد :

النوع الثاني يفرق عن الاول بـ :

مراتب متحركة بالكهرباء حتى الخلفية

كاميرات أمامية وجانبية وخلفية - والخلفية متوفرة بجميع الأنواع -

الشنطة تفتح بالريموت

دركسون مخشب

ــــــــــــــــــــــــــــــــ

يزيد في النوع الثالث :

رادار يعمل مع المثبت بحيث يقلل السرعة كلما اقتربت من السيارة التي أمامك

دف لوك أتوماتيك مجرد ما تعطيه أمر يقوم ذاتيا بالتصرف التام بالسيارة عند التغريز دون تدخل

ـــــــــــــــــــــــــــــــــ

هذه بعض المواصفات وهناك المزيد

والتسليم بعد شهر ونصف من اليوم ...

الله يرزقنا من حل فضله ...

[علي عليوه]

يوجد في النوع الثالث شاشة دي في دي

[بدوي جنوبي]

والله يا علي سعره غالي مررررره

وهل يستاهل هالسعر ؟

موفق خير ان شاء الله

تحياتي لك واشكرك علي الموضوع

[مكشاتي غير]

نار ياحبيبي نار

تسلم الغالي ع التقرير

وحلاتها السياره استاندر

[الشقردي 12]

ما شاء الله الله يرزقنا وإياكم من واسع فضله

[ابوعبدالهادي]

تسلم لنا النظرة فقط ب 300 ألف أشتري بيت

[.أبوعبدالرحمن]

ماشاء الله


الله يعطيك العافية

[abdulrhmank]

رغم قوته ومميزاته الرائعة الا انه لايستحق كل هذا .......السعر وين ثلث مليون ................الا المقتدر ............

[دلة ملقمة]

مشكور على المعلومات

سعره طاق نسبه


يمدحون اليوكون

[علي عليوه]

أشكر الجميع

وبالنسبة للسعر فإنه يعتبر مفاجئ وأحدث صدمة لدى المستخدمين وكل اللي كانوا موجودين مسبقا

اختاروا الستاندر ولا أعلم ما الحكمة !!!!

ولكن حدثت مشكلة لدى المشتري وهي اختيار اللون

فهو محتار بين الألوان الثلاثة المعروفة والتي تعبر هي الأفضل

1 - أبيض نيلي ( بياض ناصع )

2 - لؤلؤي ( يعتبر أقدم لون في اللكزس )

3 - بيج ( ويعتبر أغمق من سابقه وهو لون جديد نوعاً ما )

أرجو ترشيح الأفضل ولكم جزيل الشكر ..

[الضاري]

ياساتر اسعار نار !!!
عزالله صدق اللي قال قيمة بيت
رغم المواصفات الموجوده فيه
لكن لايصل لهذه القيمه العاليه

[anas]

مشكوووووووووووووووور على المعلومات القيمة
اذا بادفع 300 الف اخذ بورش كايين احسن مواصفات ومميز في الشارع والكل يحترمك .. :cool:

[سيف الظفير]

غاااااااااااالي ولايستحق 300 الف والله يوفق الشاري يارب العالمين وياليت ياخذ خذرة من الوكيل وتلاعبه المشهور

[مقلع الرمث]

ماااضنه يستاااهل السعر والله لو انه رانج على هالسعر

[القصبي]

ما شاء الله موتر سنع وعلى الخط مريح كنة لكزس الصغيرة قصدي
وسعرة غالي اما التاجر فهذا عادي بالنسبة لة مهيب شي 300 الف ريال
الله يوفقة واللهم لاحسد

[علي عليوه]

أنس - مقلع الرمث شكرا وآراء موفقه

سيف الظفير - لا حرمك الله من دعائك وأشكرك على نصيحتك وأعتقد إنه في محلها

القصبي - أتمنى لك أن تكون تاجرا على دعوتك الجميلة تقبلها الله

ولكن لم تنصحونا باللون الأفضل

[سمي الزعفران]

مشكور على المعلومات ويعطيك العافيه ...

[الربذي]

اللون خله ياخذ اللابيض الناصع النيلي او الداكن اما اللولوي فكل ماشفت لكزس الا هذا لونها لون ممل

[برق بن رعد]

الله المستعان صار ربع المليون مايجيب شئ

[الهواوي]

الله يرزق كلن على هواه

[مكشاتي الجزيرة]

بصراحه ماتستاهل جيوب تويوتا هذه الاسعار الناريه.. استغفال واستهتار بالناس

بصراحه هناك مبالغه في الاسعار من عبداللطيف جميل ...

عبداللطيف يرفع والناس تشتري...
عبداللطيف يرفع والناس تشتري...
عبداللطيف يرفع والناس تشتري...
عبداللطيف يرفع والناس تشتري...

فلا استغرب بعد عدة سنوات يصير جيب تويوتا بـ 500 الف ريال

لو الناس قاموا بمقاطعة هذا الوكيل ... واستغنوا بالبديل..
كان تشوف التخفيضات السريعه والكبيرة..

قاطعوه ( دعوها تخيس ) ...

http://img503.imageshack.us/img503/5213/93794370ir9.png

[shaheenshah]

300 الف؟؟؟!!!!!!!! الله المستعان والله لو انه مع كل تشغيله يطلع لي كيلو ذهب ذيك الساعة افكر اني اشتريه
المبلغ خيالي ولا يقبله العاقل
صحيح تويوتا سيارة قويه بس عاد مصخوها مره

[ملاعب الذيب]

اسعار مجنونه 300الف في سياره بكره تنسرق والا يجيب با كستاني معه ددسن ب1500 ويصدمك وتروح عليك 0 كلن حر بموزه

[ملاعب الذيب]

:good: :good:

[emad747]

:good: :good:
شكرا

[علي عليوه]

أشكر كل باسمه وعسى الله يرخص الاسعار

والله ما جانا هالغلا إلا من أنفسنا ,,,, فالله المستعان ...

الربذي ....

كأنك حاضر ما شاء الله عليك الرجال حجز اللون النيلي على كلامك

وعسى الله يعطيه من خيره ويكفيه شره ....

[فتى التويم]

الله يعطيه من خيرخ ويكفيه شره

ويبارك له فيه ويجعله عون على الطاعه




الغالي دواه الترك

حكمة الحياة إلين ترخص الاسعار

[مكشاتي الجزيرة]

http://img503.imageshack.us/img503/5213/93794370ir9.png

[عشانا]

اصنعو مثل اليابان سيارات وبيعو بالسعر الي تبون
والمثل يقول الي مامعوش مايلزموش
الحين مستكثرين البملغ ؟؟؟؟؟؟؟؟؟؟؟
هماوه بوه بعارين تباع بالملايين وبوه غنم تباع بمئات الالوف
ولوحات سيارات تباع بالملايين

[الهواوي]

ياسلام عليك يا عشانا جعله بالعافية ...............
كلام بالصميم ....

[مخاوي الذيابه]

السعر غالي بالحيل ...

[السحاب الثقيل]

نااااااااااااااااااااااااااااااااااااااااار

[مكيشيت]

اصنعو مثل اليابان سيارات وبيعو بالسعر الي تبون
والمثل يقول الي مامعوش مايلزموش
الحين مستكثرين البملغ ؟؟؟؟؟؟؟؟؟؟؟
هماوه بوه بعارين تباع بالملايين وبوه غنم تباع بمئات الالوف
ولوحات سيارات تباع بالملايين

البعارين والغنم واللوحات هذي مايشتريها الا اللي جاته الفلوس باردة مبردة واللبيب بالاشارة يفهم

واليابان اللي تقول رح شف اسعارهم وتعال تكلم

واذا كان الله منعم عليك وعندك مايكفيك وزيادة ترى غيرك ماعنده واشكر ربك واحمده ولا تجي تتشمت ترى اللي ( مامعوش ) يمكن يجي يوم القيامة وتلقى معه الشيء الذي لو اجتمع اغنياء العالم ومعهم قارون ماجابوا مثقال ذرة من الذي معه

[علي عليوه]

من قال إنه غالي

كلامه صحيح وعداه العيب

بس المشكلة وين السيارة البديلة اللي تصبر مثله وتحافظ على شئ من قيمتها

وإذا قلت وين الشراي صفوا الشريطية على كبوته ...

الفي اكس آر الفل عند البازعي يقول بـ 250000 وأبو جميل الله يرحم أموات المسلمين بـ 240000 تقريبا
يعني خذ لكزس بعشرين ألف زود واكشخ من جد ..

[ابو فرح1]

لا با لله ما يستاهل ربع المبلغ .
والبديل كثير لكن اغلب الناس ما صار يهمها الا قولت افلان راكب الشي الفلاني وقيمة بكذا !!
يعنى بعد كم سنه راح ياصل سعره ( 500000 ) الف - كما ذكر احد الاخوان - ولا يوجد اضافه بالجديد تستحق ان يدفع له هذا المبلغ او ربعه .
بالعكس ومن منظور شخصي اذا زادت الحساسات لسيارة البر فهذا دليل على فشلها بالوقت القريب .

لا تستعجل علي خذ مثلا ( سيارة بر والشنظه تفتح باللمس ) .
( سيارة بر والتشغيل باللمس )
( الدبل الخفيف بزر ما عليه مقبول لكن الثقيل زر ) صعبه .

ما راح تعمر من السافى دون غيره . ( وكل شي بمشيئة الله ) .
الا اذا كانت ماهي للبر هذا شي ثاني .


لكن ما اقدر اقول الا الله يبارك للي شرى ويكفيه شره ويعطيه من خيره.

وحلمك يا للي ترد علي .
الله يعين على المتعصبين .

[مكشاتي الجزيرة]

لا با لله ما يستاهل ربع المبلغ .
والبديل كثير لكن اغلب الناس ما صار يهمها الا قولت افلان راكب الشي الفلاني وقيمة بكذا !!
يعنى بعد كم سنه راح ياصل سعره ( 500000 ) الف - كما ذكر احد الاخوان - ولا يوجد اضافه بالجديد تستحق ان يدفع له هذا المبلغ او ربعه .
بالعكس ومن منظور شخصي اذا زادت الحساسات لسيارة البر فهذا دليل على فشلها بالوقت القريب .

لا تستعجل علي خذ مثلا ( سيارة بر والشنظه تفتح باللمس ) .
( سيارة بر والتشغيل باللمس )
( الدبل الخفيف بزر ما عليه مقبول لكن الثقيل زر ) صعبه .

ما راح تعمر من السافى دون غيره . ( وكل شي بمشيئة الله ) .
الا اذا كانت ماهي للبر هذا شي ثاني .


لكن ما اقدر اقول الا الله يبارك للي شرى ويكفيه شره ويعطيه من خيره.

وحلمك يا للي ترد علي .
الله يعين على المتعصبين .


صح لسانك.........

[علي عليوه]

أبو فرح كلامك موزون وما يعيبه شئ

بس !!!
هل تعتقد إن شخص راعي بر على ظني وظنك راح ياخذ لكزس ؟؟؟

الجيب اللكزس سيارة لا تعتبر برية أبدا !!!

وإنما هي للتشخيص وإن احتجتها - وحط تحت الكلمة الأخيرة خطين - للبر تلقاها

بعدين أخوي أبو فرح حط في بالك إن الريال نزل شوي مع الدولار يعني اللي كنت تشتريه

بـ 100 الان تدفع فيه 110 وأنت شايف الأسعار كيف ارتفعت

المقصود هو أن لا نتهم الشركة الفلانية أو المصنع الفلاني باستغلال ثقة الناس في صناعته واستمراره

في رفع الاسعار ..

سعدت بتعليقك ...

[راعي باروود]

يعطيك العافيه اخوي
بس الله لا يهينك رقم الوكالة مع فتح الخط

[ابوسعودد]

يالله يرزقنا في مثله عزالله انه موتر

[طحنون]

الله يرزقنا الجنه
يارب والستر بالدنيا والاخره
ممكن تقول انا مالي شغل بالناس ابي اوسع صدري ماقلنا شي حلالك
لاكن قف مع نفسك قليلا
لو تشتري سياره بملغ 150 الف وتتصدق بالباقي في تيسير زواج لشخص متعسر او موقوف علشان مبلغ اواي مصيبه من مصايب الدنيا فسوف تصبح اسعد انسان في الدنيا وتنام قرير العين ومرتاح وتلقاها عند ربك
فنحن قوم نحب الوسط في شتى الامور
فخير الامور اوسطها

[NATLUS]

يعطيك العافيه اخوي
بس الله لا يهينك رقم الوكالة مع فتح الخط

السلام عليكم

اخوي انت راد على موضوع له سنة كامله

[ارنون]

الصراحه سعره نار اشري لي يوكن افضل بكثير
وش دعوه 300000 ريال كاش عدا ونقدا
الله يهني خويك فيه شكرا

[البوابه]

بسم الله الرحمن الرحيم

ابو لطيف يبي يصلخ ويقطع ويشوي من الشعب الغلبان الي يروح له يستاهل ماجاه-------- خلوها تغبر عنده----- والسياره كل مازادت الالكترونيات فيها كثر خرابها وغلى التصليح -----يعني ورش برا مافيه الا الوكاله وهات صلخ في قيمة القطع واجور العماله مع ان مافيهم فرق عن الي في الورش هنود وفلبين وماشفنا عندهم احد مت اليابانيين يشتغل على شان نقول العماله غاليه

[سيف الظفير]

300.000

رنج سبورت جديد ابيض داااااخل احمر رياضي 2009

[ابوريناد1979]

هوغالي من الاساس من سنه واكثر وهذي اسعاره

[شماريخ]

السلام عليكم ورحمة الله وبركاته / الله يكتب لك الخيرة في الامور كلها ويرزقنا واياك والقارئيين من واسع فضله /بس عندي ملاحظة غير سعره الغالي بماذا تفسر تأخير وصول السيارة اكثر من شهرونصف وهو حاسبها عليك عند كتابة الايصالات منذ مجيئك لهم/ وتوقعي انه بعد شهر ونصف ان يكون قيمتها اقل من حين وقت كتابه الايصال او المبايعة فيكون مستفيد في كلتا الحالتين واكيد بتسأل وش السوات اقول لك اذهب الى معارض النسيم المعروفة ببيع السيارات الجديدة واسأل عن سعر السيارة والميزة الوحيدة انك تستلمها جديدة من ثاني يوم واسف على الاطالة وكثرة البربرة وتقبل تحياتي

[مكشات وبس]

السيارات في طلوع وليس هناك نزول

[دانكن]

الزين غالي .. لكن الازين اغلى ..

اجل الفكسار الجديد وش تقولون عن سعره .. :) ..

[مراقب البرق]

خلوها تصدي

[راعي الهدد 77]

السلام عليكم

للي يقول غالي ...
هذي اسعار السيارات اللي عليها الكلام
موتر ونعم ...;)

واللي يقول الالكترونيات تكثر خراباتها ...:confused:


وانا اخوك اللي ياخذ جيب لكزس ماهو رايح يفحط فيه او يطعس او يباوش عليه..:no2:

اللي يبي ياخذه للرزه والامور السنعة :cool:


ارجو انك تتقبل ردي..

اخوك (راعي الهدد 77)

[وليد1]

حسبنا الله ونعم الوكيل ...
300000 سعر شقة ... واحطه في سيارة قد تصدم من غشيم في إحدى الإشارات ...
نعوذ بالله من الغلاء والبلاء ...
أحسن حل ... خلوها تصدي .

[حر المجمعه]

والله يا علي سعره غالي مررررره

[ابن عكاش]

الحق ان مافيه سياره من فئته تضاهيه لا تقول لي بورش كايين او رنج لأنها مهيب من فئته
اما بخصوص السعر غالي نسبيا لكن فيه سيارات اقل منه واغلى بالمقارنه وبصراحه اشوف ردود بعض الاعضاء مدري وش تبي يعني تبون سعره مثل الأكسنت

[الجندي2005]

انا اشوف السيارة ما هي غالية ،،،،،،،،،،،،،،،،،،،،،،( الغالي تقدر تشريه وانت مقتنع بانه غالي)






انا اشوف انها خارج نطاق المعقول ( 300الف بسيارة ) ،،،،، طبعاً انا اتكلم عن ذوي الدخل
المحدود ،،،،،،،،، لنفرض ان راتبي 10 الآف ريال ،،،،،،،، كم ابي سنه اجمع في قيمته ،،،

واذا خذيته اجار منتهي بالتمليك كم بيحسبونه ،،،،، هذا اذا رضوا يعطونك

ما اقول الا الله يفرجه من عنده ،،،،،،،،،،،،،،،،،،،،،،،

[المميز2008]

الله لايهبلنا على هذه الاسعار اخذ بيت ولا اخذ قطعة حديد

[google-999-]

والله مشكله كبيررره وكالات السيارة هاذي والشريطيه ( معارض النسيم ) يعني معقوله الان اشتري رنج روفر بالقيمه الفلانيه واثناا البيع اتفاجى بسعررر غيرر منطقي مع ان سيارتي انظف من السيارة الي بالمعارض والي بالمعرض اغلى من سيارتي والله ضياع الصراحه للآسف لارقيب ولا حسيب ، ياليت احد يفيدنا عن البريمي كم سعرره وشكرا