الرجاء الفزعه والمساعده: هوك خلفي + معاير لهواء الإطارات

[شمالات نجد]

بسم الله الرحمن الرحيم



أخواني لي رجاء فيكم بسؤالين


س1/ ماهو أفضل معيار لقياس هواء الإطارات وأين أجده؟


س2/ أريد هوك خلفي أصلي أو ممتاز للفورتشنر ولا أرغب بالتفصيل والترهيم،، أتصلت على العليان في الغرابي فأفاد أنه موجود ولكنه يركب بالشاص باللحام وأنا أريده بالصواميل؟


مشكورين مقدماً

[شمالات نجد]

للرفع يا أخوان الموضوع ضروري وعاجل لا هنتوا عطونا من خبراتكم

[راعي كيف]

السلام عليكم
إذا كنت تبي الزين فصل عند المميز الشكوى لله لك ولزمن

راعي كيف
ابو ناصر

[شمالات نجد]

الله يعطيك العافية راعي كيف

نفصل مافيه مشكله بس يركب بصواميل مع شاص السيارة وليس بلحام

وين المميز فيه؟

باقي أفضل جهاز لقياس ضغط الإطارات ماهو؟

شكراً

[ابوالجميع]

بسم الله الرحمن الرحيم


السلام عليكم ولرحمة الله وبركاته

عليك بمحل السليماني في الغرابي اتوقع تجد مطلوبك
اناوجدة عندهم هوك ارمادا صناعة استرالية ممتازة

[د.كبسه]

عيار الهوا فيه عند ساكو نوع أسوديجي بعلبه سودا
قيمته أقل من30
حلو مره

[شمالات نجد]

تسلم لي يا ابو الجميع وان شاء الله احصله في الغرابي عند السليماني جاهز اصلي احسن من التفصيل (بس بدون لحام على الشاص) لأني لقيت عند العليان ويقول لازم نلحمه في شاص السيارة.


تسلم يا د. كبسه يا ليتك معلمني اسمه اخاف احصل انواع تتشابه حسب وصفك.


يا جماعة لاهنتو اللي عنده معلومات عن اللي ابيه من هوك ومقاس هواء لا يبخل علي ربيع هالسنه غيرر وبأقدم على إجازة وبضبط الموتر وودي ما أخلي مكان ما أروح له.


يعطيكم العافية

[wewe150]

أبو عزام أنا رايح للسلماني اللي جمب السلام

وسلئته قال لازم تلحيم في الصناعية

[Black VTC]

شف وانا اخوك افضل عيار هواء هو ميشلان سعره في حدود الـ90 ريال يزيد شوي او ينقص :) وتلقاه عند برق الحيا في الروابي ...

بس وش تبي فيه افضل شي و واضح ان سؤالك سؤال استخدام شخصي منت فاتح بنشر :)... يعني اذا استخدمته و ضاع او طاح في البر او نسيته ما تسوى عليك :)...

فيه نوع امريكي تحصله عند الجمعان اللي في صناعية النسيم - على نفس شارع سعد بن عبدالرحمن (الميه) يفتح شمال - تحصله عندهم بــ25 ريال تقريباً وهو نفس اللي في ساكو ابو 30 ريال ...

[شمالات نجد]

(وي وي) الله يعطيك العافية فكيتني من الذهاب والسؤال.

(الفتك الأسود) الله يعطيك العافية أجل متوكلين على الله وبنأخذ الأمريكي أرخص وإن شاء الله أزين.

يا أخوان اللي عنده رداً طارف عن الهوك الخلفي للفورتشنر لا يقصر عشان ما أتعب بكره وأنا أدور في هالبرد.

إذا كان لا بد من التفصيل ولا يوجد جاهز أين تقع بالضبط ورشة المميز؟

مشكورين مقدماً

[شمالات نجد]

شف وانا اخوك افضل عيار هواء هو ميشلان سعره في حدود الـ90 ريال يزيد شوي او ينقص :) وتلقاه عند برق الحيا في الروابي ...


هذا حصلته عند برق الحيا مكتوب على التسعيرة أنه ميشلان لكن مكتوب على الجهاز كلام ثاني!!

على العموم خذيته وجربته طلع في كفراتي 25 مع أني معايرها قبل عند بنشر 30 ورجعته وخذيت واحد ثاني من عندهم نفسه وبعد طلع 25 قلت في نفسي يمكن معيار البنشر هو اللي مزود وتوكلت على الله وخذيته.

الهوك وما أدراك ما الهوك لفيت الغرابي كله ما لقيت

يا جماعة اللي يخبر لي هوك ممتاز جاهز يعلمني وينهو فيه أو علمونا وين ورشة المميز اللي سبق ذكرها؟

لا هنتو.. سلام

[إبن فيصل]

أبو عزام تبي الهوك الاصلي الي عليه اللكلام عندي لك محل في الصناعية القديمة ورشة حدادة تصلح قلوص ودعاميات وخلافة لقيت عنده هوك أمريكي حق سيارات أمريكية (زي الي يجي وكالة في الشيروكي وغيره)أصلي وعلى كيفك ركبته والله كان غالي(بثلاث مية ريال) بس رهيب وقوي ركبته على سيارتي كان معي سوزوكي صغير وولفوه له بس أنا طلب منه يلحمه لكن أنت لو تطلب منه يخرم له صواميل بيركبه أذكر والله العالم عنده باقي هوكين أو ثلاثة وكل واحد أحسن من الثاني طبعاً الامريكية في الشيروكي وغيره مركبه بصواميل ..الوصف وأسم الورشه إذا بغيته أرسلي على الخاص رقم جوالك وأوصفلك المحل وإن شاء الله بيزبط لك الي تبي.

[شمالات نجد]

جعلك تسلم أخوي أبو فيصل (إبن فيصل)

خلني أشوف فيه محل مواعدني بعد أسبوع يقول يجيبون الهوك حق الفورتشنر الخلفي كامل وأصلي ويتحمل

جاهز وليس تفصيل

وإذا طول علي مالي إلا أراسلك عشان التفصيل.. ربك يعين

الله يعطيك العافية أنت وباقي الأخوان ما قصرتوا ورايتكم بيضاء

سلام

[النوخذة الأحسائي]

إن حصلت يا بو عزام غرضك لا تنسة تخبرنا وين حصلته وهل ناسب الفورتشنر ..

تحياتي لك
الحساوي( العلا ) أبو فهد

[النوخذة الأحسائي]

لا تنسى = لاتنسة = لاتنس

[wewe150]

أبو عزام لا تنس


بارك الله فيك تخبرنا بالتفاصيل

[شمالات نجد]

إن شاء الله


شكراً لكم

[ابو تركي 2]

السلام عليكم أخوي الكريم
بنسبه لمعيار الهــواء مــوجود عند ســاكو نوعيه ممتازه انا مجــربه ما اعــرف اسمه لاكــن لونه احمر بلكامل
وفيــه بلف يساعدك على تنسيم الكفرات ومعايرتها وقيمته يوم اشتريته 70 ريال مــا ادري اذا ارتفع مع الأرز
الله وعلم وافيدك كمان عندهم اشتراك ممتــاز مـا يسخن ابد وموصل قوي بين البطاريات ولك مني كل التوفيق
والسلامه في حياتك

[Black VTC]

انا زيك يا بو عزام رحت لبرق الحيا و سألت البائع عندهم عن افضل معيار قال لي عندنا معيار مشلان و جابه من الدرج مهوب معلق مع العدد اللي بآخر المحل و سعره في الحدود اللي قلت لك ...

اما بخصوص فرق الهواء فدائماً يفرق معي 5 درجات بين معيار الهواء حق البنشر و معيار ابوجمل مع الامريكي ..

وتراي شاري الامريكي من الجمعان بـــ25 ريال و ممتاز و ما كد سوى لي اي مشكلة ضاع الاول في الثمامة نسيته على الصدام واخاف انه طاح و اللي يجعل احدن لاقيه عشان يستفيد منه وما اندعس ... وشريتلي ثاني لانه جاز لي بالحيل :)

[شمالات نجد]

أخوي أبو تركي عساك سالم شرينا المعيار خلاص والظاهر أنه جاز لي :)

أخوي الفتك الأسود أيه هم يسمونه مشلان لكنه شركه ثانيه أنا خذيته بـ 75 ريال وجربته في كذا مره وأبشرك من أروع ما يكون ولا عليه حسوفه.

شاكر ومقدر مروركم وتجاوبكم الرائع.. تسلمون

محبكم،، أبو عزام

سلام