خوذوا أوصاف وأشكال المشرفين والأعضاء

[حفرلوجيا]

سلام يالربع كل(ن ) باسمه
اعترف أن فكرة هالموضوع انبثقت من موضوع أخونا ( سماوي) اللي كتبه بعنوان :

نريد أن نتوقّع أعمار أعضاء ومشرفي مكشات

كان ودي أشارك بالموضوع لكن .....
المعذرة.. عضو جديد يمكن مايقدر أعماركم ولو اني أتابعكم من زمن ماهو قريب ..
وبعدين شفت الجماعة رايقين ومستانسين قلت ( خلهم ).
والمعذرة .. ايضا لأخوي سماوي .. ابحرف الموضوع شوي بحكم اني ماأقدر اقدر أعماركم على شان ماأبي ( أغلط )....

ودي بدل العمر أوصف بعض الأشكال تبارك الخلاق فيما ابدع وصور
( مااقصد الخلقه) اللهم لاتؤخذنا ..

ونبدأ بالحلقة الأولى .. أخونا..

مكشات..

هذا كل شيء يدلك فيه على الوقار .. أبرزهن حاجتين

الاولى لحيته بيضاء منورة وجهه

والثانية شماغه المتحرص ( منتف ) من قدام من كثر مايجرجره يبي يضبط له مرزام رغم انه من يوم جاه الشماغ ( الوحيد اللي يملكه حاليا )عقب عيد الضحية سنة 1414 ( اهدوه جيرانه اللي حجوا ) ماأنكوى الا مرتين ( وش هالتبذير ).. .. واللي يعجبك بـ(مكشات ) انه ماتغريه مظاهر الحضارة الزائفة والدليل انه يسمع بالمغاسل الاتوماتيكية بالذكر جزاه الله خير .. وما بعد انهبل وقرب عليها ..


يتبع الحلقة القادمة اللي مايلبس إلا الجديد .... اخونا (.....)

[حفرلوجيا]

مازلنا معكم في بث حي ومباشر ..من القناة.. عفوا.. الخيمه العامة....... في حلقات مسلسلة من ......شاهد على ( الشكل )

الحلقة الثانية ....أخونا...
أيمن ... .

ذا صدق فسقان يلبس ثوب الدفة الجديد الكويتي الوسيع ولا صار يمشي تقل خيمة مريوس الونيت عليه وصايرتن تبي تسجد .. بلا والله من هالكرش اللي مربرب(ن ) من خيمة مطبخ مكشات .. الناس تدهر وتبدع بالطبخات وذا يبدع بـ( زرطه) .. مشرف احد يقول شي !!!!!!..

ترقبوا الحلقة القادمة .. مع اللي يصرف راتبه كله على .. ( قوارير .....) أخونا ( ... )

[حفرلوجيا]

الحلقة الثالثة.. أخونا...

السمح..

راتبة يروح كله بشراء..... قوارير










أهب ياللي يقرأ وظنه شين ....




اقلب ظنك ( 180 ) درجه..



أقول..





قواريردهن العود .. وإذا مشى من جنبك تذكرت كتابة العدل .. ماشاء الله من هالروايح اللي تعطعط ( كنمبودي على هندي على طايفي....

انس ذي عاد وخل بالك يا(المشرف العام ) .. احح ... يالله يامشرفين ( فن ) واحد يتعرض مواضيعي .. والله مايردن ... الا أشكيه عند..

كتابة العدل ...

الحلقة القادمه مع (قمري الهيئة.. تبارك الله ) أخونا (....)

[حفرلوجيا]

الحلقة الرابعة.. اخونا..
شقردي ...
هذا..فعلا شقردي و( قمري الهيئة ) ماشاء الله
و....

( مدردح )

ولاصار يمشي ماتدري هو مقبل والا مقفي .. قلنا ( قمري الهيئة ) ماشاء الله .. أذكروا الله... ماتعرفله راس من كرعان .. ويعبي بهالبطن وهو قاصده .. حلمه يتنفخ ويصير على شكل (G كبتل ) ...... كل ذا من حبه بكلمة ( قارمن ) .. انتبه لايصير حلمك أول حرف بـ(ماب سورس).. (M كبتل) همين(ن) تغدي علينا مثل الأخطبوط

بعكس رفيقه .. راعي قرقعة المفاتيح.... أخونا (...)

في الحلقة القادمة...

[حفرلوجيا]

الحلقة الخامسة...أخونا

قتال

نحيف ( يحول ) لدرجة انه ماينشاف وأهله مايدرون انه دخل البيت الا من قرقعة المفاتيح يعني لأول وهلة ( مفاتيح ) تقرقع ... وثاني وهلة إذا مشى .. صوت مثل صوت ( القلابي إذا لف وحمله ثقيل )... يحول عضامه ومفاصلة تصرصر وتحكحك ببعض .. .. حتى جلد مافيه ... حرام عليك ياشقردي.. زميلك بالخيمه ... شر عليه يعسف أهله ويتعلمون يشوفونه قبل المفاتيح ... يعني ( يشيل مفتاح واحد ) على شان مايقرقع .. بس قل له لايسوي فيها شديد ....ويصفق بالباب إذا دخل ( أخاف تصير هي الماريه ) .. وكنك ماغزيت..

ترقبوا المميز الحقيقي أخونا (..... )

[حفرلوجيا]

مازلنا معكم على الهواء مباشرة

الحلقة السادسة

أخونا

المسفهل

عاد هذا مميز بحق ... ماحد يقول به شي.. كلش جديد.. بس إذ صار يمشي.. أو جالس بمجلس فيه ناس كباريه طبعا ( مميزين ) دايم يناظر فوق يبي يلفت الإنتباه لعقاله ( المميز ) المرعز اللي من ( صوف عنز من العهد العباسي ) .. وصاير(ن) هالعقال .. من كثر النتشات اللي به( منتف ) تحتار بـ( المتيريل) حقته هي ( صوف .. او ريش منفوش )
الحلقة القادمة مع اللي ماعليه منقود أبد أخونا (.....)

[حفرلوجيا]

الحلقة السابعة .. أخونا

المري ..

عاد ذا ( اترك عنك) ماعليه أي منقود ( الله لايضره) .. لا وبعد أهله مبسوطين منه على الآخر يقولون إنهم لابغوا يغبون شئ ( مفتاح .. سكروب.. وماشابه ) مايحتارون عندهم شطوب رجليه الله يكافي تقل قاع أو( مطينة ) ناشفة من شهر ولا مشى به أحد..
وهالأيام عنده مشروع ..يبي يدخل بموسوعة قينس للأ رقام القياسية.. عنده شطب برجله اليسرى ( الفتحة 16على 9 سنتيمتر بعمق 5 سنتمتر بإنحراف 45 درجه) يعني شطب ( ثري دايمنشن ) ...ذبحته المقانيص وقص الاثر

ملاحظة لللي لغته الثانية أوردو : ثري دايمنشن تعني الشيئ المعاكس لـ(جلف ) المطازيز ( المسطح ) .. أي شي (مدرمح) مثل لقمة أخونا (.... ) لاصار ذابحة الجوع (من ساعتين ماأكل )

نعلمكم عنه بالحلقة القادمة

[حفرلوجيا]

الحلقة الثامنة

أخونا...

السعلو

صاحب اصغر لقمة في عالم المشافيح ( بحجم كرة التنس) مضروبة بعشرة..
بس اللي يعجبك فيه انه يراعي شلته بالطلعات قايلهم خوذولي بسكوت أكبر حجم على شان ماأضايقكم بكثر أكلي وأخليه هو زادي ..
و أحد خوياه بالطلعة يقول : مرة وأثناء ماهم يبي يرجعون ويحملون عفشهم فقدوا مرابيع الخشب اللي يرفدون له بالحمول وما انتبهوا لكلام السعلو يوم انه يقولهم البسكوت هالمرة شي خيال .. ويقول أيضا انهم خايفين على مشاعره ( الحساس !!!! ) ماعلموه أنه بالع(ن) المرابيع ..

[حفرلوجيا]

نأسف لهذا الإنقطاع المفاجئ للبث بسبب تشويش مصدرة

محطة ( شقران )

يقول مع التشويش اعقلو ولا احد يلعب بـ( الطيف الكهرومغناطيسي ) غيري ..
انشاالله أخونا شقران تأمر أمر .. خاصة وأنت اللي ( رفعت الراس ) .. يومك تغطي على قرداحي ببرنامج من يربح المليون .. أكيد تذكر .. والا نذكرك .. يوم قرداحي يسألك معنى كلمة ( ترددات ) وقلته معناها انها ردود البحص والكنكري اللي يبيعونها بشارع انكاس .. الصراحة اعتقد المشرفين قبل الأعضاء من وقتها وهم معجبين بـ( ألمعيتك .. وسرعة بديهتك ) .. لاتنحتونه ياأخوان .. ترى بتدجون لو ترك الإشراف على خيمة الأجهزة اللاسلكية.. ( الله أعلم )

عموما تسمح لنا أخونا شقران بثنا ماراح يطول ينتهي مع نهاية دوام اليوم .. عاد لاأحد يقول ( الله يخلف موظفين آخر زمن ) ( ترى عندنا اجتماع في لجنة وهذا اللي خلانا فاضين ونبث على الهواء .. تعرفون اللجان .. قرقة بدون إنتاج ..) ..
احح.. نعود اليكم رواد الخيمة العامة.. لمواصلة برنامج شاهد على ( الشكل ) في حلقة ولا كل الحلقات نبثها من استديو شعراء النبط .. الحلقة..

التاسعة مع .. اخونا....ابو عايد ... وأخونا راعي مرات

الحقيقة هالشعار يعجبونك.. ودايما مندمجين ... وبحكم تأثرهم بالمهنة اللي فيها مصطلحات ( شطر .. عجز .. وحدة موضوعية .. تباين.. قافيه..
مطبقين لك هالمصطلحات على أنفسهم .. ( ايه كذا الإحتراف وإلا بلاش)
خذ عندك مثلا
( شطر .. وعجز ) : متفقين أبو عايد يصبغ لحيته بحناء وراعي مرات مخليه بيضاء تلق
( الوحدة الموضوعية ...و.. التباين ) : كلهم يلبسون عقال بس أبو عايد مميله يمين ومدقرله بأذنه اليمنى .. وراعي مرات مميله على اليسار ومدقر له بأذنه اليسرى..
( القافية ) : بحكم تمييلة العقال كلهم عاوجين رقابهم على نسق واحد .. طبعا على شان مايطيح العقال .. وإذا صاروا يمشون.. كلهم بهم حذفة واحد يمين وواحد يسار.. وهاليام كاثرة اجتماعاتهم يبي يوزنون مدري أبياتهم أو أرقابهم..


عموما جتنا أراء في ايميل عاجل يقول لايكون انت مدحدر بحلقات البرنامج وربعك زعلانين ..

قلت ماعاد الا ذي مشرفين مكشات والأعضاء كلهم .. الصدر دهنا .. والنفس حية .. ويعرفون اني أمزح وذي دعابات ..
لكن ياولد .. خل نتوقف.... اخشى ان يكون في ذلك الرأي بصيص من الصحة .... وسلامتكم

[تالي الاولين*]

.


ماقول الى الله يستر

اول ماجاء في بالي الهليل :D


.

[حفرلوجيا]

استدراك.....

الأوصاف المذكورة أعلاه من نسج التخيل ( طبعا )...

وجرى التنويه لكي لايتوهم أحدهم ( ويصدق ) .. وبعدين يزهد بنفسه ... همن رح حلها ..
مانبي نخسر الموقع ....... وأيضا...
ماحنا ناقصين تكون مهمة الاشراف على موقعنا ( مكشاتنا ) من شهار بالطايف..

[مكشات]

مكشات.. هذا كل شيء يدلك فيه على الوقار .. تسلم والله وش زين هالوصف :good:
الاولى : لحيته بيضاء منورة وجهه ... ياسلام .... أتمناها والله من قلب :good:
والثانية : شماغه المتحرص ( منتف ) من قدام من كثر مايجرجره يبي يضبط له مرزام رغم انه من يوم جاه الشماغ ( الوحيد اللي يملكه حاليا )عقب عيد الضحية سنة 1414 ( اهدوه جيرانه اللي حجوا ) ماأنكوى الا مرتين ( وش هالتبذير ).. .. واللي يعجبك بـ(مكشات ) انه ماتغريه مظاهر الحضارة الزائفة والدليل انه يسمع بالمغاسل الاتوماتيكية بالذكر جزاه الله خير .. وما بعد انهبل وقرب عليها ..
:no2: خربتها مرررررررررررررة .. هالحين يبون يفرحون فيها عذالي :(

[قناص القرائن]

ياويلكم مكشات زعل

[المري]

تسلم ياحفرلوجيا


وكلامك 99% صحيح وين انت شايفنى ؟؟؟


اخوك / المري

[عاشق الصفاري]

هههه
اوصاف زينه تصلح لمكشات

[طقهاوالحقها]

الرسالة الأصلية كتبت بواسطة حفرلوجيا


محطة ( شقران )

يوم قرداحي يسألك معنى كلمة ( ترددات ) وقلته معناها انها ردود البحص والكنكري اللي يبيعونها بشارع انكاس

:D

[القماري]

والله إني خايف عليك ياحفرلوجيا (جيت بسرعة البرق وصاير جوكر بالمنتدى، ياخوفي بكرة يخلص إشتراكك ونفقد كل العطاء بسرعة) إنتبه وأنا خوك ، قدامك مطبات صناعية .
الله يستر عليك دنيا وآخره

[الاجودي]

يعطيك العافيه على الموضوع الي عرفتنا فيه على الروس الكبار

وانتبه من الحفر

ترى الحفر من تالي واااااااااااااااااجد

[مريقب العيفار]

الله يقطع شيطانك يا حفرولوجيا

عز الله انك قطعت كبدي من الضحك

واصل ارجوك بس لا تنسى نفسك

[راعي مرات]

الغالي000 حفرولوجيا

شكراً شكراً000وبصراحة رحت أركض للمرآية أشوف رقبتي عوجا00

ياشيخ صدقتك الله يقلع شيطانك0000

شكرا000000

ويا ويلك من أبو عايد000

[حفرلوجيا]

أخوي القمارى وأخوي الأجودي ..
شكرا .. وتوي جاي مطعس بالنفود و( خمعت ) لي بـ( لغف ) .. بس نتقت بالدبل أبشرك سواق .. إن شاء الله ( شكرا ياسيبوية مكشات يا راعي الحزم ) ..
أخوي مريقب العيفار ..
شكرا .. بس انا ما نيب شاعر وإلا كان وصفت نفسي ..
أخوي راعي مرات ..
شكرا بس أظنك شفت نفسك بالمراية يوم شلت العقال .. وهنا ( الخدعة السينمائية ) ياعيوني ..
عاد تصدق وتؤمن بالله
لاإله الا الله
ان الموضوع مايحلى الا يوم توجته بردك .. أما أبو عايد فالحمدلله ان رمضان هل .. والا ماعنده لنا غير ( المشعاب ) .. اللي انت شايله له.. بس هالمشعاب مثل العسل على القلب .. ( غطو .. ماعليكم )..