الفزعه ياأهل النياسين (الله يحرمكم على النار )

[أسد تميم]

عندي الله يسلمكم سفاري 99 وفيه رجه خفيفه, وركبت من اسبوعين يايات استراليه ومساعد دركسون استرالي ولم اقم بوزن الاذرعه وتفاجئت بعد اسبوع ان الموتر فيه رجه عظيمه وخاصة عندما تصل السرعه 80 الى 90 كيلو في الساعه علما ان الكفرات والجنوط حالتها ممتازه ( دلوني على الحل جعل الي ورثوكم في الفردوس )
علما اني من اهل الرياض ان كان هناك ورشة يرجا تحديدها

[ارتست]

فيه موضوع طرح في هذي الخيمة عن شخص يصلحها ب 350 ريال مع الضمان بس الموضوع يجي له سنة
الله يعينك تدوره وانا بحاول ادورة بعد

[ارتست]

شف هالرابطين
http://www.assayyarat.com/forums/archive/index.php/t-75000.html

http://www.mekshat.com/vb/showthread.php?t=36172&page=2&pp=20
يمكن يخدمونك

[مقلع الرمث]

اخوي الرجه الي تجي موترك تنفض موترك نفض عند المطب يبدا الموتر يرج وتحس ان الكفرات الي قدام حول يتصافقن اذا كانت كذا فهذا من الربلات الي قدام الدفرنس الامامي غيرهن وانشاء الله يظبط وشف المساعدات الي قدام يصير واحد منفقع يصير سبب في الرجه لا تضحك علي انا امجرب صارت معي وانا اخوك مره يرج عندي الموتر رجه ماراحت ولاجت وصار اخر شي من المساعد ارجوا اني افتك
اسف على الاطاله
اخوكم مقلع الرمث

[التسعاوي]

هلا اخوي
إذاكانت الرجه على سرعه محدده مثلا من 80 الى 90 وتي إذاحاولت تهدي او تمسك فرمل فاحتمال كبير انك لازم تخرط الهوبات...اتمنى اني افدتك.

[شروكي ربع]

هلا اخوي




إذاكانت الرجه على سرعه محدده مثلا من 80 الى 90 وتي إذاحاولت تهدي او تمسك فرمل فاحتمال كبير انك لازم تخرط الهوبات...اتمنى اني افدتك.









او جلد المقصات ..

[الفتكي]

السلام عليكم
شوف اخوي اسد تميم اذا كانت الكفرات بالون اكيد من مساعد الدركسون لأني انا عندي نفس الحكايه ومركب مساعد دركسون استرالي اصفر ولا نفع يعني انك لازم تدبل المساعد مايكفي واحد وانا الى الان اعاني نفس المشكله والله يجيب لك الحل .

[.أبوعبدالرحمن]

اخوي شيك على المساعدات الامامية

ايضا شيك على الدودة للدركسون

[alkongrs]

شيك على كراسي المكينه انا صارتلي وصارت من كراسي المكينه واتمنى اني افدتك

[ولد زايد 444]

السلااام عليكم ورحمة الله وبركاته
اذا الرجه الي تقصها توصل لدرجة انهك ماتقدر تمسك الدركسون وماتروح الرجه الين توقف وتمشي مره ثانيه
فيه حلين والله اعلم
ياذراع الدركسون او واحد من الاذرعه
والثاني وهو الوراد بدل الجنوط الي ورى قدام والي قدام ورى
وان شاءلله تضبط معك

[الدحبول]

انا امسى غيرت مساعد الدركسون وجلد المقص 2 وجلد عمود يلي يمسك من الشاصي بالدفرنش
الانا راحت الرجة
سيارة كروزر 97 نفس نظام التعليق حق الباترول

[ولد قلبك]

أنا غيرت الياي وحطيت استرالي
يوم مسكت الدائري الله لايوريك تقول بوسط خلاطة من الرجة العظيمة
وديته لميزان العضيب وشيك عليه وغير جلد المقصات وضبط ولله الحمد والمنة
(موتري باترول)

[بواردي الدلم]

رح للعضيب وشف وش يقولون لك

[ولد عنيزة]

شف يابعدي احتمال كبير تكون من كراسي القير
انا موتري كذا غيرت الكراسي وظبط
لكن فيه واحد من الشباب معه نيسان صالون وتجي موتره رجه عند 100 ومايدري وش العله مهب كفرات ولاجنوط ولا كراسي مايدري وارسل الموتر للصمعاني اللي في بريده وظبط

[أسد تميم]

ما قصرتوا الله لا يحرمكم الاجر

[أبو محمد2010]

رح للعضيب وشف وش يقولون لك

هذا الكلام تراهم ممتازين

[مبارك بن لندن]

أبشر بسعدك يا أسد تميم

هذي الرجة طبيعي تصير في السيارات ذات الدفع الرباعي وخاصة السيارات إللي تجي دفرنس

وقد حصلت معي مرتين علماً أن سيارتي باترول 86:

المرة الأولى عملت كبس لأذرعة الدركسون وبفضل الله راحت

المرة الثانية بعد فترة طويلة عادت بسبب حادث الله يكفانا شر الحوادث وغيرت جلد السست وبفض الله سبحانه زالت وإلى الآن لم تعد.


أيضاً سبق وأن حصلت على أحد أقاربي وسيارته باترول 98 وكبس أذرعة الدركسون وزالت بفضل الله

[المتزن]

السلام عليكم

بعد تجربتي مع الرجه واعراضها اللي ذكرتم :

1. غير مساعد الدركسون إذا كان خربان (اذا شفت زيت طالع منه) وشيك على الجلد حقته اللي بأطراف المساعد.

2. تغيير جلب عمود التوزان

3. كبس الذراع

3. ترصيص ارضي

بالنسبه لجلب العمود غير له جلب مقصات الأمريكي أقوى وافضل وارخص بس يبيله خرط بالمخرطه واحد أو اثنين ملي ثم تكبس وتركب كأنه من المصنع.

وان شاءالله انك تبي تنسى الرجه

وركب الفررات اذا تبي الموتر يخف وويقل صرفه شوي.

وابعد عن كفرات السلك .وعليك بكفرات النايلون الهانكوك اواليوكوهاما اوالبرجستون وتلقى الراحه.

اللي ذكرت لكم سويته عام 93 بموتري نيسان 91 شنبر محوله سفاري واستمر معي الموتر الى عام 97 والرجه اللي تطلع فيه ترصيص فقط.

وشف هالرابط فيه تفاصيل اكثر:
http://www.mekshat.com/vb/showthread.php?t=36856&page=3

وخصوصا كلام الأخ قناص متقاعد

وشكرا للجميع

[turkiq]

اخوي مبارك بن لندن

ارسلت لك رسالة على الخاص بعد اذن صاحب الموضوع

[أسد تميم]

شاكرا لكم جميعا فزعتكم ولاهوب غريب منكم يالنشاما