صفات عشر للعلة .. منكد البر على الشلة

[حفرلوجيا]

سلام يالربع كل(ن) باسمه

الكشاتة بالعادة تحصلهم شلة منسجمين مع بعضهم .. لكن أحيانا المقادير تبلى بـعلة ( يبعص ) كيف الكشتة أو مثل مايقولون يـ( ....... ) بالكشتة ( الله يكرمكم) ..
ومواصفات هالعلة .. الله يجيركم .. كثيرة .. منها :
1- إذا جزموا الشلة على الطلعة.. وذا سيارته جيب .. سبق بالعذر ( سيارتي أبدخلة الورشة .. الكفرات لك عليهن .. الأهل يبون السيارة ... ) .. ليا .. ( قحطة ) ( أجل وشو له شاري السيارة يامال الفقر ) ..
2- إذا فيها قطة ( قال مياو .. مشوها ) جابها فراطة .. ويمكن ناقصة شوي تقول شاحذهن من مسجد .. ( الله لايغني العدو ) ..
3- إذا كانت الحمول في مكان التجمع يجي حضرته متأخر بعد مايكون الزقرت شدوا له كل شي .. ( الله يشد عليه اللي على بالي ) ..
4- إذا كانت الكشتة بأكثر من سيارة نقز ( عطاه النقاز ) بصدر الصالون وطنش الكبار( الشوالتيه ) اللي راكبين الونيت أو الشاص .. ليا .. ( رخو ) ..
5- إذا كان مافيها تجوال و أول مايختارون مكان للتخييم نزل ( الاخ ) يدعي المغص وتشطر .. وآخ يادسكي .. شب علي .. ( أجعلهم يشبون بك ولا تلقى من يطفيك الا بنعال )..
6- إذا نقز واحد من الشقردية وجاب الخروف وقال تعال يا( أبو فلان ) امسك لي .. قال ( سوري ) أدوخ ماأقدر.. ( أجل ليش ماجبت لك مجمد مفروم من البقالة مخصوص لك ياالعفن ) ..
7- مايهنا له التمشي وحيدا للتأمل بمخلوقات الله الا إذا بدا التجهيز لطبخ الغداء ( مع ان الشقرديه مكفينه الرخمه ) ..
8- إذا فلوها وجابو العشاء نقز ( المره ذي عطاه النحاز ) أول واحد و ( تربع ) وسوى نفسه ماشاف وش لون جالسين الزقرت .. ( يستدلخ ) ..
9- إذا جاء وقت النوم أول من يجهز فراشه هو ويختار أحسن وأدفى مكان .. ويكمله بالشخير ( وشي (ن) ثاني يخلي الزقرت اللي ماناموا يتلطمون ) .. ( الخايس ) ..
10 - آخر من يصحي هو .. وغسل القدور والصحون مايعرفه طول الكشتة .. ( الناعم )
بهالحالة نقول لها( العلة ) .. يمدحون الكشتة مع العمال والسواقين .. وخلك أمير عليهم .. ( كفوك .. يا .... )..
وسلامتكم

[جلوبلستار]

أضف عندك على رقم 8 : اذا حطوا العشا ( الله يحط راسه ) قال ورى هذا كذا؟ ليش ما سويتو كذا ؟ ووووالخ
واذا شبيتوا الحطب ( جعله يشب فيه ) قال ليش ما جبتوا النوع الفلاني او الحطب العلاني ؟ ويسوي نفسه امير عليهم - وليت انه امير كان يشرههم اذا رجعوا - وبصراحه النوعيه هذي عانيت منها .

[laith]

الاخ / "حفرلوجيا" .....

:D :D :D :D :D :D :D :D

تصدق عاد انك رايق ... كفو وصراحه على بلاطه .. مافيه مجامله.

ارجو ان تسمحلي بطباعة هاالموضوع .. وانطله في العفش .. احتمال يقراها حداهم فتكون علاج مماهو فيه

شكرا لك :good:

[القماري]

يسلموا العشر ياحفرلوجيا

[تالي الاولين*]

.


حفرلوجيا

عزالله انك جبت مواصفت العله .. وماقصرت فيه

انا طبعت الموضوع وعلقته في الاستراحة وكتبت فوقة

احذر هذه الصفات بس الحمد لله كل ربعي شقردية طالعين على

مشرفنا :D :D ولا تهون انت وبقية الاعضاء



.

[السمح]

الرسالة الأصلية كتبت بواسطة تالي الاولين*
.


حفرلوجيا

عزالله انك جبت مواصفت العله .. وماقصرت فيه



وياليت تتبعهن بالصفات العشر للنشمي ... اللي على ربعه أحلى من الوسمي

أحلى تحية

[راعي الحزم]

ذكرتني برحلة ( ما دامك واقف ) قصة طريفة كشت أنا وثلاثة عجازين ورحنا للنفود وكل ما وقف واحد من الربع انهلت عليه الاوامر ( فلان ما دامك واقف عب الابريق وفلان ما دامك واقف اغسل الرز وما وما وما .................................... وعد واغلط حتى تسمت تلك الرحلة بهذا الاسم

وعز الله انهم فعلا من علل الكشته

[ابو عمر اللاحم]

ما اضن فيه احد تجتمع فيه هالعشر خصال :confused: مره وحدة الله لا يبلانا .

تحياتي ،،،،

[راعي هجهجه]

السلام عليكم ورحمة الله وبركاته وحياكم الله كل باسمه.
قرأت تعليقاتكم على هالعله اللي لاوجه بالمجلس ولا.........بالمرقد .أصلاً هذا وشوله يروح مع الجماعه والشره ماهي عليه الشره على إللي ياخذه . لأن هذا ينكد عليك الرحله وحنا رايحين نوسع صدورنا من شي فيها مجتمع من هالبلاوي ويجينا هذا يغثنا. لكن أحرص على هذه الصفات والأمورإذا بغيت تطلع للبر.
1-أن تكون القطه أول شرط للرحله علشان يرتاحون كل اللي طالعين .

2-تروح مع ناس رجال وتكانه وأحرص أنهم يكونوا أكبر منك سنا حتى تستفيد منهم .

3-أن لايزيد عددهم عن العشره بالكثير.

4-أنك تاخذ معك ناس ذربين وخفيفين بالشغل والطبخ والحطب وفاهمين للبر.

5- أن تتجنب السفهاء اللي دائم يتمشكلون مع الآخرين سواء من أتباع الكشته أو منهم في البرغيره.

6- أن تكون المشوره بينهم جميعا ولو كان فيهم أحد مايفهم بالبر مثل غيره يشاور تقديرا له .

7-أن يكون بينهم أحتراما وتقديرا متبادلا وهذا أمر ضروري ياجماعه.

8-أن يأمرون عليهم أمير أتباع للرسول صلى الله عليه وسلم.

9-بشاشة الوجه ورحابة الصدرررررررر أمر ضروري .

10-البخل ياجماعه عدو المرجله فاحذر ياأخي من أن تكون بخيلا .
وأخيرا لعل من يقراء هذه الأمور ويجد في نفسه بعض منها أن يحاول أن يتحاشاها . وآسف على الإطاله.

[المربد]

حفرلوجيا : الله يــبـــرّد قلبك مثل ما بردت قلبي !!
الأخ نهار ، الله لا يبلاك.
ترى هذا من زمان موجود حتى الشاعر العربي يقول:

سقط الثقيل من السفينة في الدجى --- فبكى عليه رفاقه وتلاوموا
حتى اذا طلع الصباح اتت به --- نحو السفينة موجة تقدم
قالت خذوه كما اتاني سالما --- لم ابتلعه لأنه لا يهظم

رجاء ومن باب الإنصاف ان نكمل الموضوع بعشر صفات لهب الريح اللي يخلي صاحبه يستريح

[حفرلوجيا]

الأخوان
جلوبلستار ..laith ..القماري .. تالي الاولين*.. السمح .. راعي الحزم .. نهار .. راعي هجهجه .. المربد
شكرا .. وأشوى طمنتوني .. أثاري غيري حصل له وعانى .
وحلوه ياراع الحزم حركة ( دامك واقف ) مسكتة للعجازين ..
أما أخونا راعي هجهجة فأسمح لي أطالبك بتغيير اسمك .. وخله راع الفكر والركادة مادام أفكارك من هالنوع
وياأخونا المربد عنوانك ماعليه غبار
عشر صفات لهب الريح .. اللي يخلي صاحبه يستريح
بصدق أعجبني .. بس ممكن تسمح لي .. نسمح خاطر الريس السمح .. احح أوجع(ن) حلقي من ( الحاء )..وأكتب موضوع بعنوان
صفات عشر للنشمي ... اللي على ربعه أحلى من الوسمي (http://www.mekshat.com/vb/showthread.php?s=&postid=78405#post78405)
تبي تقول مسموح .. شكرا .. والله يسمح دربك والأخوان

[المتهادي]

لازم نحفظ ها لمواصفات ....عشان نتجنبها ......والظاهر كلها فيني ونا مادري .....الله يســــــتر!!!!!!

[عبدالعزيز الدباسي]

الحيقيقة يا حفرلوجيا انك مضبوط :good: وبكلماتك انا مبسوط :p ومنك انا مغبوط :( وصاير مثل المندي والمضغوط:confused:

كلماتك فيها خبرة ودرايه ، و اسلوبك ممتع للغاية ،، وتوصيفك مثل البراية ، عريت كل واحد به غايه

وحبيت اقول لك حكاية ، ان بعضهم ما ينفع ولا ذراية

------------------
مشكور حفرلوجيا .

تسلم والله يا تالي الاولين وما لنا غناة عنكم ، الله يحييك

[حفرلوجيا]

قريت ردك ياخونا المتهادي .. يعلك تسلم وتكون ديم متعافي .. مادام تشوف انك مقصر انا لك منادي .. أنت يانشمي أو اللي نقول عليه اسنافي.
أما شقردي مشرفنا هذا خوش .. رده هيضني وخلاني أدور بوش .. من الطرب اناقز واتسدح بالحوش ..
شافني جاري وقال ياحفرلوجيا علامك مثل أبو خرفيش.. صاير مثل الطيور اللي تو نبت لها ريش.. قلت عندنا شقردي جعل أحبابه له تعيش.. سحرنا بكلامه وخلى عقولنا تطيش.. وكانك ملزم على التنقد والتفاتيش.. خلنا نقول هذا شقردي هو أبوخرفيش.. ( خلك .. لازم نسجع وتورطت.. خلها براسك ) :D :D

[صقر]

مشكور اخوي حفرولوجيا

اعتقد ان اسلوبك هذا ما ينقص مكشات... فهذا الاسلوب في بساطته جاء من القلب الى القلب .... واعتقد ان هذا الاسلوب هو احسن وسيلة لتوصيل المعلومة المكتوبة الى الاعضاء ...

اسلوبك أخي حفرولوجيا مميز والحقيقة انك مكسب للمنتدى.

بارك الله فيك..

[الحر الاشقر]

ومااكثرهم هللبشات تلقاهم معك حتى بالسفر ولا يبين على حقيقتة الا بالسفر معه او بالكشته بس ترى بالكشته

دواه موجود تعرف وشو (( ام خمس)) اللى تبرد الكبد بالصيد وغيره ولها مارب اخرى خذ مثلا كانك تنظفها

بجنبه واخرشه بطلقة حوله وحواليه بس لاتجي فيه كانك مانت قاصد بعدها ما يعتب معكم ;)

وسلامتك وسلامة الجميع:cool:

[فرد حمزة]

هذا ودك من يوم يطلعون الزقرت

يتفقون عليه وواحد مستلم الشبح فوق راسه يقنونه قن اللذينا

ويكرفونه كرف الويل لين يتعدل ويغدي شقردي مع خوياها

بس يبي لها جسارة قلب وجلافه ... ولا تهون العين الحمرا

[ابو ســــاره]

بصراحة حاجة تغبن الكثير من الناس تصرفات الكثير حيث يكون فيه نوع من الجهل او حب الاستدلاخ اقوله قطع يقول ما اعرف اقول غسل يقول ما عرف اقوله احطب يقول ماعرف وقبل الكشته يترزز ومسوي ابوها وسمها امرني بس حيث اني انخدع دائما بمثل هؤلا الاشخاص ولا بد انا يكون هناك اختبار او مقابلة شخصية يشرف عليها حفر لوجيا لاي واحد تبي تطلع فيه معك وبصراحة انا مره اخدت معي واحد فشلني مع الرجال وتمنيت ارجعه لهله بصاروخ بس اكتفيت بتنزيله بارماح والعوده الي فيضتنا طبعاً جت منه طلب العودة .

:no2:

[ميراج]

الاخ حفرولوجيا ماشاء الله عليك عز الله انك مسكت

أما العله عز الله انهم موجودين الله لايكثرهم

أما النشمى اللى على ربعه أحلى من الوسمى بالمواصفات اللى ذكرت أظنه غير موجود كان موجود كم واحد

على وقت حاتم الطائى وماتو الله يرحمهم

تحية اعجاب بمواضعيك المميزه ( سجل معجب )

اخوك ابو طارق

[الفرعاوي]

طيب و اذا صرنا نحبة وش نسوي ؟

[حفرلوجيا]

أخوي صقر :
شكرا على هذا الإطراء الذي قرأه قلبي..
أخوي الحر الأشقر :
شكرا .. وحلوة المآرب الأخرى لـ(أم خمس ) .. بس ترى بعض العلل حتى الفشق تكذب معهم ماحد يقدر لهم ..
أخوي فرد حمزه :
شكرا .. والغريب اننا مانلقى بأهل الشمال القشارة والجلافة .. كل اللي جربتهم من منطقة هالشمال الحبيبة سمحين وطبوعهم عشرة .. أجل ليش مقترح وأنت ماتقدر يا(حيي )على الجلافة والقشارة..
أخوي أبو سارة :
شكرا .. وماعندي مانع مادام حطيت بي الثقة طال عمرك في إجراء المقابلات الشخصية للعلل .. بس أبي أخونا الحر الأشقر يكون عضو باللجنة مالنا غناة عن ( أم خمس ) اللي معه..
أخوي ميراج :
شكرا .. وكلامك كلة تحفيز .. تسلم أقولها من الأعماق يابو طارق..
أخوي الفرعاوي :
ماطرى على بالي هالسؤال .. كني بك كنت تلعب بالحارة مع فريق القدم بمركز ( ظهير قشاش ) ماتفوت الكور الساقطة .. وسؤالك هذا جوابة نكبة .. يعني اذا تحبه أكيد ( من قلب ) .. لاتكشت الاأنت وياه .. خله يتدلع عليك و( بس ) .. والاغيرك مثل الحر الأشقر ماعنده إلا ( أم خمس)..

[فرد حمزة]

أجل وشوله مذيل ردي بآخر سطر :)

قلت لك تبي له جسارة قلب وجلافه على الخوي :( صعبة شوين

[المري]

بيض الله وجهك ياحفر لوجيا على هذا الموضوع الرائع


وتسلم يابعدي ...



اخوك / المري