طريقة ازالة انذار حزام الامان للفورد (طريقة سهله)

[BigC]

السلام عليكم
هذي اول مشاركة لي بالمنتدى الطيب مع اني متابع قديم :) بس تو سجلت بالمنتدى.


اليكم طريقة ازالت انذار حزام الامان في الفورد وقد تمت تجربت الطريقه على كذا موديل من الفكتوريا والماركيز والاكسبلورر.


الطريقة موجودة في الكتالوج اللي يجي مع السيارة اعتقد صفحة 119 او 129


1-تفتح السلف على التشغيل on (بدون ما تشغل)
2- تنتظر لين تختفي اشارة حزام الامان الحمرا اللي في الطبلون (جنب العداد)
3- اول ماتختفي العلامه تركب الحزام وتشيله تسع مرات.(خلك زاهب.ركب على الراحه يمديك). عقب التاسعه يكون الحزام بره ماتخليه مركب
4- تنتظر لين تطلع علامة حزام الامان. تركبه وتشيله مره وحده او تنتظر 50 ثانيه تقريبا (بالنسبة لي ما طلعت لي العلامه) بعدها تركب الحزام وتشيله مره وحده.
(اذا ما وقف.الانذار كرر العميله من 1 الى 4 مره ثانيه )


انا سويت الطريقة مرتين حق حزام السايق ومرتين وحزام الراكب
لازم تكون جالس في الكرسي اللي عند السايق عشان تسوي هالطريقة لحزام الراكب.


ياجماعة الخير الطريقه سهلة . وان شاء الله الشرح يكون واضح مافيه تعقيد



وتقبلوا تحياتي

[ولد الخبر22]

يعطيك العافيه وماقصرت .

بالنسبه لي انا مفصول عندي جرس الانذار .

تقبل احترامي وتقديري .

[ناصح]

طيب يالحبيب

حزام الآمان وضع لسلامتك والمنبه من أجل أن لا تنساه ربطه ..

فلماذا تلغيه ...؟؟؟


وبصفتي أعمل في مستشفى وأقابل مصابي الحوادث المرورية

فأنا أشاهد فرق شاسع في إصابات من ربط ومن لم يربط الحزام ..

نسأل الله أن يكفينا شر الحوادث

[z a n h o r]

يوجد طريقه اسهل

اذا ركبت السياره سكر الباب

واربط الحزام ثم فك الباب وسكره

ثم افتح الحزام راح يروح عنك ازعاج الجرس

وفيه طريقه اسهل واسهل

انك لا ركبت السياره تربط الحزام وتمشي ولا بغيت تنزل تفكه وتنزل

من تجربه الحزام يفيد

والي قد صار له حادث يعرف وش يسوي الحزام باذن الله عز وجل

و للمعلوميه بعض السيارات الايرباق ما يطلع الا اذا كنت رابط الحزام

[سيف نجد FJ]

اتفق معك بس المشكله هي انه يزعج في المواقف يعني اذا فصلته وقعدت تمشي بشويش بسرعه اقل من20 كيلو والله مزعج جدا خلقه انت شايل هم الموقف

اما على الطريق انا اتفق معك بالكامل

[BigC]

يا مرحبا بالجميع.

هذي الحركه تعطل جرس التنبيه فقط :) ما تعطل حزام الامان وعسى الله يحفظ الجميع
اما حركة الباب اذا ماني غلطان لازم تسويها كل مره . اما الطريقة اللي قلت في على طول.


وشكرا

[ابوفهيدان]

يالربع انا عندي فورد 2004 وعندي طريقة حلوة ومريحة
رح للتشليح وفك لك حزام فورد بس الراس بدون الحبل واشبكه بموترك ويروح الصوت يعني كنك مركب الحزام وشابكه بس بدون الحبل الي هو السبته ولا قربت من التفتيش شل الاول وركب الحزام حق الموتر

[سعد777]

طيب يالحبيب




حزام الآمان وضع لسلامتك والمنبه من أجل أن لا تنساه ربطه ..


فلماذا تلغيه ...؟؟؟



وبصفتي أعمل في مستشفى وأقابل مصابي الحوادث المرورية


فأنا أشاهد فرق شاسع في إصابات من ربط ومن لم يربط الحزام ..


نسأل الله أن يكفينا شر الحوادث


طيب انا امشي 30 أو 20 أو 40 المهم سرعات مامنها خوف وفي البر تمقنص ورفع ضغطك صوت الحزام وكل شوي طيط طيط طيط طيط طيط طيط طيط طيط طيط ===<< لا تضحكون >> والله ازعاج بس سرعات أعلى انا اتفق معك لا بد من ربطه برضه داخل حواري مال امه داعي

[جوالة]

حزام الأمان لابد من ربطه
وهو للسلامة أولا وخاصة البزران

[ghassan534]

السلام عليكم
المفروض ان كل واحد منا عقله براسه وهو يقرر متى يستخدم الحزام
اللهم فك اسرانا من سجون الظالمين

[مرعش هدب]

في طريقه حلوه وسهله انك يابو الشباب تشبك الحزام بدون ماتركب
ثم تحط الطرف الاعلى ورى مسند الراس وتركب واذا اسرعت
او قابلت تفتيش طلعه من ورى المسند وحطه على صدرك وحق الراكب مثل
والطرف الثاني جالس عليه... عساها تكون مفهومه
اما طريقتك يالحبيب فيها مشكله وهي انك اذا غيرت البطارية لازم تعيد البرمجة.

تحياتي ,,,

[النداوي HZ2AF]

مشكور الله يجزاك خير يا الغالي

[اسد نجد]

والله اخوي معة ماركيز راح للكهربائي وفصل جرس الحزام

وفصل جرس 120 لانة مزعج مرة خاصة انة اكثر ازعاج للى راكب جنبك

[أبن حرب]

الله يعطيك العافية ...
لكن مثل ما قالوا الأخوان ...
حزام الأمان أمان بعد الله ...
كنت في المدينة وإلا في البر ...
تمشي ميتين .... وإلا عشرين ...
أخطأ الطريق تصير في أقل من ثواني ...
منك أو من غيرك ..
يعني ممكن تبلى وأنت تمشي عشرين ...
وأخيراً ...
الله يحفظنا وياكم من أخطار الطرق ...